ܚܲܕܼܒܫܲܒܵܐ ܕܲܬܠܵܬܼܵܐ ܕܣܘܼܒܵܪܵܐ
ܒܪܝܼܬܵܐ؛ ܝܚ؛ 1‐20
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܦܸܫܠܹܗ ܚܸܙܝܵܐ ܡܵܪܝܵܐ ܠܐܲܒ̣ܪܵܗܵܡ ܒܒܹܝܬ̣ ܒܲܠܘܼܛܵܐ ܕܡܲܡܪܹܐ؛ ܟܲܕ ܗܘ̇ ܝ݇ܬܝܼܒ̣ܵܐ ܒܬܲܪܥܵܐ ܕܡܲܫܟܢܵܐ ܒܥܸܕܵܢܵܐ ܕܚܸܡܵܐ.܀ ܡܘܼܪܸܡܠܹܗ ܥܲܝܢ̈ܘܼܗܝ ܘܚܙܹܐܠܹܗ ܬܠܵܬܵܐ ܐ݇ܢܵܫܹ̈ܐ ܟܸܠܝܹܐ ܥܘܼܠܘܼܠ ܡܸܢܹܗ. ܘܚܸܙܝܲܝܗܝ ܠܹܗ ܘܪܚܸܛܠܹܗ ܠܐܘܼܪܚܲܝܗܝ ܡ̣ܢ ܬܲܪܥܵܐ ܕܡܲܫܟܢܵܐ؛ ܘܣܓ̣ܸܕܠܹܗ ܥܲܠ ܐܲܪܥܵܐ.܀ ܘܐ݇ܡܸܪܹܗ ܝܵܐ ܡܵܪܝܼ ܐܸܢ ܡܲܫ݇ܟ̰ܚܸܢ ܪ̈ܲܚܡܹܐ ܒܥܲܝܢ̈ܘܼܟܼ ܠܵܐ ܥܵܒ̣ܪܸܬ̇ ܡ̣ܢ ܪܹܓܘܼܟܼ.܀ ܒܸܬ ܫܵܩܠܸܢ ܚܲܕ݇ܟ̰ܵܐ ܡܝܼܵܐ؛ ܘܚܲܠܸܠܗ݇ܘܿܢ ܐܲܩܠܵܬܵܘ̈ܟ̣ܘܿܢ؛ ܘܝ݇ܬܘܿܒ̣ܘܿܢ ܬܚܘܿܬ ܐܝܼܠܵܢܵܐ.܀ ܘܫܩܘܿܠܘܿܢ ܚܲܕ݇ ܩܸܛܥܵܐ ܕܠܲܚܡܵܐ ܘܣܢܘܿܕܘܿܢ ܠܸܒܵܘܟ̣ܘܿܢ؛ ܘܒܵܬ݇ܪ ܗܵܕܵܐ ܐܵܙܠ݇ܝܼܬܘܿܢ. ܣܵܒܵܒ ܗܲܕܟ̣ܵܐ ܬܦܸܩܠܵܘܟ̣ܘܿܢ ܒܪܹܓܵܘܟ̣ܘܿܢ؛ ܘܐ݇ܡܸܪܗ݇ܘܿܢ ܐܸܠܹܗ ܥܒ̣ܘܿܕ ܐܲܝܟܼ ܕܒܹܐܡܵܪܵܐ ܝ݇ܘܸܬ̇.܀ ܡܘܼܠܝܸܙܠܹܗ ܐܲܒ̣ܪܵܗܵܡ ܘܪܚܸܛܠܹܗ ܠܡܲܫܟܢܵܐ ܠܟܸܣ ܣܲܪܵܐ. ܘܐ݇ܡܸܪܹܗ ܐܸܠܵܗ̇ ܓ̰ܲܠܕܹܐ ܬܠܵܬ ܟܝܼܘܿܠܹ̈ܐ ܩܲܡܚܵܐ ܨܸܦܝܵܐ ܠܘܼܫܝ ܘܥܒ̣ܘܿܕܝ ܦܲܛܝܼܪܹ̈ܐ. ܘܪܚܸܛܠܹܗ ܐܲܒ̣ܪܵܗܵܡ ܠܒܸܩܪܵܐ ܕܬܵܘܪܹ̈ܐ ܘܫܩܸܠܹܗ ܡ̣ܢ ܬܵܡܵܐ ܚܲܕ݇ ܫܲܪܚܵܐ ܪܵܒܵܐ ܛܪܝܼܨܵܐ ܘܝܘܼܗܒ̣ܸܠܹܗ ܩܵܐ ܪܹܓܵܐ ܘܡܘܼܠܝܸܙܠܹܗ ܕܦܵܪܸܡܠܹܗ ܘܒܵܫܸܠܹܗ.܀ ܫܩܸܠܹܗ ܟܲܪܥܵܐ ܘܚܲܠܒ̣ܵܐ ܘܫܲܪܚܵܐ ܕܗܘܼܕܸܪܹܗ؛ ܘܡܘܼܬܸܒ̣ܠܹܗ ܩܵܕ݇ܡܵܝܗܝ ܘܗ̇ܘ ܟܸܠܝܵܐ ܥܘܼܠܘܼܠ ܡܸܢܲܝܗܝ ܬܚܘܿܬ ܐܝܼܠܵܢܵܐ؛ ܘܐ݇ܟ̣ܸܠܗ݇ܘܿܢ.܀ ܘܒܘܼܩܸܪܗ݇ܘܿܢ ܡܸܢܹܗ؛ ܐܲܝܟܵܐ ܝ݇ܠܵܗ̇ ܣܲܪܵܐ ܒܲܟ̣ܬܘܼܟܼ؟܀ ܘܐ݇ܡܸܪܹܗ ܕܘܼ ܝ݇ܠܵܗ̇ ܓܵܘ ܡܲܫܟܢܵܐ. ܘܐ݇ܡܸܪܹܗ ܐܸܠܹܗ؛ ܡܒܵܬ݇ܪ ܚܲܕ݇ ܫܹܢ݇ܬܵܐ ܒܸܬ ܕܵܝܪܸܢ ܠܟܸܣܠܘܼܟܼ ܐܲܝܟܼ ܕܐܵܗܵܐ ܥܸܕܵܢܵܐ. ܣܲܪܵܐ ܒܲܟ̣ܬܘܼܟܼ ܒܸܬ ܗܵܘܹܐ ܠܵܗ̇ ܒܪܘܿܢܵܐ. ܘܣܲܪܵܐ ܫܡܝܼܥܠܵܗ̇ ܒܬܲܪܥܵܐ ܕܡܲܫܟܢܵܐ. ܡ̣ܢ ܒܵܬ݇ܪ ܚܵܨܵܗ̇.܀ ܘܐܲܒ̣ܪܵܗܵܡ ܘܣܲܪܵܐ ܪܵܒܵܐ ܣܝܼܒ̣ܹ̈ܐ ܗ݇ܘ̣ܵܘ ܘܥܒ̣ܝܼܪܹ̈ܐ ܒܫܸܢܹ̈ܐ. ܥܒ̣ܸܪܬܵܐ ܗ݇ܘܵܐ ܥܕܵܢܵܐ ܕܣܲܪܵܐ ܗܵܘܝܵܐ ܗ݇ܘܵܐ ܒܐܘܼܪܚܵܐ ܕܒܲܟ̣ܬܵܬܹ̈ܐ. ܘܓܚܸܟܠܵܗ̇ ܣܲܪܵܐ ܒܠܸܒܵܗ̇ ܘܐ݇ܡܸܪܵܗ̇ ܡ̣ܢ ܒܵܬ݇ܪ ܕܣܝܼܒ̣ܬܵܐ ܝ݇ܘܵܢܝ ܡܸܕܪܹܐ ܒܸܬ ܗܵܘܝܵܢܝ ܚܲܡܬܵܐ. ܘܡܵܪܝܼ ܣܵܒ̣ܵܐ ܝ݇ܠܹܗ. ܘܐ݇ܡܸܪܹܗ ܡܵܪܝܵܐ ܩܵܐ ܐܲܒ̣ܪܵܗܵܡ؛ ܩܵܡܘܿܕܝܼ ܓܚܸܟܠܵܗ̇ ܣܲܪܵܐ ܘܐ݇ܡܸܪܵܗ̇؛ ܒܣܲܪܲܣܬܘܼܬܵܐ ܒܸܬ ܗܵܨܠܵܢܝ ܐܵܢܵܐ ܣܵܒ̣ܬܵܐ؟܀ ܐܵܗܵܐ ܫܘܼܠܵܐ ܠܹܐ ܝ݇ܠܹܗ ܪܵܒܵܐ ܥܲܣܩܵܐ ܠܟܸܣ ܡܵܪܝܵܐ. ܒܐܵܗܵܐ ܥܸܕܵܢܵܐ ܫܹܢ݇ܬܵܐ ܐ݇ܚܹܪ݇ܬܵܐ ܒܸܬ ܕܵܝܪܸܢ ܠܟܸܣܠܘܼܟܼ ܣܲܪܵܐ ܒܲܟ̣ܬܘܼܟܼ ܒܸܬ ܗܵܘܝܵܐ ܚܦܝܼܩܬܵܐ ܒܪܘܿܢܵܐ.܀ ܣܪܝܼܒ̣ܵܐ ܠܵܗ̇ ܣܲܪܵܐ ܘܐ݇ܡܸܪܵܗ̇؛ ܠܵܐ ܓܚܸܟܠܝܼ؛ ܡ̣ܢ ܣܵܒܵܒ ܕܙܕܝܼܥ ܠܵܗ̇؛ ܐܝܼܢܵܐ ܗ̇ܘ ܐ݇ܡܸܪܹܗ؛ ܠܵܐ؛ ܓܚܸܟܠܵܟ̣ܝ. ܩܸܡܠܗ݇ܘܿܢ ܡ̣ܢ ܬܵܡܵܐ ܐܵܢܝܼ ܐ݇ܢܵܫܹ̈ܐ.܀ ܘܝܘܼܗ݇ܒ̣ܸܠܗ݇ܘܿܢ ܦܵܬܲܝܗܝ ܠܵܓܹܒܵܐ ܕܣܕܘܿܡ. ܘܐܲܒ̣ܪܵܗܵܡ ܐ݇ܙܸܠܹܗ ܥܲܡܲܝܗܝ ܕܡܲܦܫܸܛܠܗ݇ܘܿܢ܀ ܘܡܵܪܝܵܐ ܐ݇ܡܸܪܹܗ؛ ܡܛܵܫܘܿܝܹܐ ܝ݇ܘܸܢ ܡ̣ܢ ܪܹܓܝܼ ܐܲܒ̣ܪܵܗܵܡ ܡܸܢܕܝܼ ܕܒܸܥܒ̣ܵܕܵܐ ܝ݇ܘܸܢ.܀ ܘܐܲܒ̣ܪܵܗܵܡ ܒܸܬ ܗܵܘܹܐ ܚܲܕ݇ ܛܵܝܸܦܵܐ ܪܵܒܵܐ ܓܘܼܪܵܐ. ܘܒܝܼܹܗ ܒܸܬ ܦܵܝܫܝܼ ܒܘܼܪ̈ܟ̣ܹܐ ܟܠܲܝܗܝ ܛܵܝܸܦܹ̈ܐ ܕܐܲܪܥܵܐ. ܣܵܒܵܒ ܕܟܹܐ ܝܵܕܥܸܢܹܗ؛ ܕܒܸܬ ܦܵܩܸܕ ܠܒܢܘܿܢ̈ܘܼܗܝ ܘܠܒܢܲܝ̈ ܒܲܝܬܹܗ ܡ̣ܢ ܒܵܬ݇ܪܹܗ ܕܢܵܛܪܝܼ ܐܘܼܪ̈ܚܵܬܹܗ ܕܡܵܪܝܵܐ؛ ܠܸܥܒ̣ܵܕܵܐ ܙܲܕܝܼܩܘܼܬܵܐ ܘܕܝܼܘܵܢ. ܣܵܒܵܒ ܡܵܪܝܵܐ ܒܸܬ ܡܲܝܬܹܐ ܥܲܠ ܐܲܒ̣ܪܵܗܵܡ ܡܸܢܕܝܼ ܕܐ݇ܡܸܪܹܗ ܒܘܼܬ ܕܝܼܹܗ܀
ܚܲܒ̣ܪܹܗ
ܕܲܝܼܢܹ̈ܐ؛ ܝܓ؛ 2‐25
ܫܠܵܘ ܟܬܼܵܒ̣ܵܐ ܕܕܲܝܵܢܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܐܝܼܬ ܗ݇ܘ̣ܵܐ ܚܲܕ݇ ܐ݇ܢܵܫܵܐ ܡ̣ܢ ܨܸܕܥܵܐ؛ ܡ̣ܢ ܐܘܼܓ̰ܵܚ ܕܕܵܢ ܘܫܸܡܹܗ ܡܢܘܿܚ؛ ܘܒܲܟ̣ܬܹܗ ܥܩܲܪܬܵܐ ܗ݇ܘܵܐ ܘܠܹܐ ܗܲܨܠܵܐ ܗ݇ܘܵܐ.܀ ܦܸܫܠܹܗ ܚܸܙܝܵܐ ܡܲܠܲܐܟ̣ܵܐ ܕܡܵܪܝܵܐ ܠܐܵܗܵܐ ܒܲܟ̣ܬܵܐ ܘܐ݇ܡܸܪܹܗ ܐܸܠܵܗ̇. ܐܲܢ݇ܬ̇ܝ ܥܩܲܪܬܵܐ ܝ݇ܘܵܬ̇ܝ ܘܠܹܐ ܝ݇ܘܵܬ̇ܝ ܗܵܨܘܿܠܹܐ؛ ܐܵܕܝܼܵܐ ܒܸܬ ܒܵܛܢܵܬ̇ܝ ܘܗܲܨܠܵܬ̇ܝ ܒܪܘܿܢܵܐ.܀ ܗܵܘܝܵܬ̇ܝ ܗܸܫܝܲܪ ܕܠܵܐ ܫܵܬܝܵܬ̇ܝ ܚܲܡܪܵܐ ܝܲܢ ܥܵܪܲܩ؛ ܘܠܵܐ ܐܵܟ̣ܠܵܬ̇ܝ ܗܝܼܟ̰ ܡܸܢܕܝܼ ܛܲܡܐܵܐ.܀ ܣܵܒܵܒ ܒܸܬ ܒܵܛܢܵܬ̇ܝ ܘܗܲܨܠܵܬ̇ܝ ܒܪܘܿܢܵܐ؛ ܘܡܲܓܪܵܥܝܬܵܐ ܠܵܐ ܐܵܣܩܵܐ ܥܲܠ ܪܹܫܹܗ. ܣܵܒܵܒ ܢܙܝܼܪܵܐ ܕܐܲܠܵܗܵܐ ܒܸܬ ܗܵܘܹܐ ܝܵܠܵܕ݇ܐ ܡ̣ܢ ܡܲܪܒܥܵܐ؛ ܘܗ̇ܘ ܒܸܬ ܫܵܪܹܐ ܠܦܵܪܘܿܩܹܐ ܠܝܼܣܪܵܝܹܠ ܡ̣ܢ ܐܝܼܕܵܐ ܕܦܠܸܫܬܵܝܹ̈ܐ.܀ ܘܐ݇ܬܹܐܠܵܗ̇ ܐܵܗܵܐ ܒܲܟ̣ܬܵܐ ܘܐ݇ܡܸܪܵܗ̇ ܩܵܐ ܓܲܒ̣ܪܵܗ̇ ܚܲܕ݇ ܐ݇ܢܵܫܵܐ ܕܐܲܠܵܗܵܐ ܐ݇ܬܹܐܠܹܗ ܠܟܸܣܠܝܼ؛ ܘܦܸܫܠܹܗ ܚܸܙܝܵܐ ܐܸܠܝܼ ܐܲܝܟܼ ܡܲܠܲܐܟ̣ܸܵܐ ܕܐܲܠܵܗܵܐ ܘܪܵܒܵܐ ܙܕܝܼܥܠܝܼ؛ ܘܠܵܐ ܒܘܼܩܸܪܝܼ ܡ̣ܢ ܐܲܝܟܵܐ ܝ݇ܠܹܗ؛ ܘܫܸܡܹܗ ܠܵܐ ܡܘܼܕܸܥܠܹܗ ܩܵܬܝܼ.܀ ܘܐ݇ܡܸܪܹܗ ܐܸܠܝܼ؛ ܗܵܐ ܒܸܬ ܒܵܛܢܵܬ̇ܝ ܘܗܲܨܠܵܬ̇ܝ ܒܪܘܿܢܵܐ. ܡ̣ܢ ܐܵܕܝܼܵܐ ܠܵܐ ܫܵܬܝܵܬ̇ܝ ܚܲܡܪܵܐ ܘܥܵܪܲܩ؛ ܘܠܵܐ ܐܵܟ̣ܠܵܬ̇ܝ ܟܠ ܡܸܢܕܝܼ ܛܲܡܵܐܐ. ܣܵܒܵܒ ܢܙܝܼܪܵܐ ܕܐܲܠܵܗܵܐ ܒܸܬ ܗܵܘܹܐ ܝܵܠܵܕ݇ܐ ܡ̣ܢ ܡܲܪܒܥܵܐ ܗܲܠ ܝܵܘܡܵܐ ܕܡܵܘܬܹܗ.܀ ܘܛܠܸܒܠܹܗ ܡܢܘܿܚ ܡ̣ܢ ܡܵܪܝܵܐ ܘܐ݇ܡܸܪܹܗ؛ ܦܲܪܦܘܼܠܹܐ ܝ݇ܘܸܢ ܒܝܼܘܼܟܼ ܡܵܪܝܵܐ؛ ܗ̇ܘ ܐ݇ܢܵܫܵܐ ܕܫܘܼܕܸܪܘܼܟܼ؛ ܚܘܼܫ ܐܵܬܹܐ ܡܸܕܪܹܐ ܠܟܸܣܠܲܢ؛ ܘܡܲܠܸܦ ܠܲܢ ܡܘܼܕܝܼ ܥܵܒ̣ܕܲܚ ܩܵܐ ܝܵܠܵܕ݇ܐ ܕܦܵܐܹܫ ܗܘܼܨܠܵܐ.؟ ܘܫܡܝܼܥܠܹܗ ܡܵܪܝܵܐ ܒܩܵܠܹܗ ܕܡܢܘܿܚ؛ ܘܐ݇ܬܹܐܠܹܗ ܡܸܕܪܹܐ ܡܲܠܲܐܟ̣ܵܐ ܕܡܵܪܝܵܐ ܠܟܸܣ ܒܲܟ̣ܬܵܐ؛ ܟܲܕ ܗ̇ܝ ܝ݇ܬܝܼܒ̣ܬܵܐ ܗ݇ܘܵܐ ܠܒ̣ܲܕܲܪ ܡ̣ܢ ܚܲܩܠܹ̈ܐ. ܘܡܢܘܿܚ ܓܲܒ̣ܪܵܗ̇ ܠܹܐ ܗ݇ܘܵܐ ܠܟܸܣܠܵܗ̇؛ ܡܘܼܠܝܸܙܠܵܗ̇ ܒܲܟ̣ܬܵܐ ܘܪܚܸܛܠܵܗ̇ ܘܡܘܼܚܒܸܪܵܗ̇ ܩܵܐ ܓܲܒ̣ܪܵܗ̇؛ ܘܐ݇ܡܸܪܵܗ̇ ܐܸܠܹܗ؛ ܗܵܐ ܦܸܫܠܹܗ ܚܸܙܝܵܐ ܐܸܠܝܼ ܗ̇ܘ ܐ݇ܢܵܫܵܐ ܕܐ݇ܬܹܐܠܹܗ ܒܗ̇ܘ ܝܵܘܡܵܐ ܠܟܸܣܠܝܼ.܀ ܩܸܡܠܹܗ ܡܢܘܿܚ ܘܐ݇ܙܸܠܹܗ ܥܲܡ ܒܲܟ̣ܬܹܗ؛ ܘܐ݇ܬܹܐܠܹܗ ܠܟܸܣ ܕܗ̇ܘ ܐ݇ܢܵܫܵܐ؛ ܘܐ݇ܡܸܪܹܗ ܐܸܠܹܗ؛ ܐܲܢٔܬ ܝܼܘܸܬ̇ ܗ̇ܘ ܐ݇ܢܵܫܵܐ ܕܗܘܼܡܙܸܡܠܘܼܟܼ ܥܲܡ ܕܐܵܗܵܐ ܒܲܟ̣ܬܵܐ؟ ܘܐ݇ܡܸܪܹܗ ܐܵܢܵܐ ܝ݇ܘܸܢ.܀ ܘܐ݇ܡܸܪܹܗ ܡܢܘܿܚ؛ ܐܸܢ ܗܵܘܝܵܐ ܐܲܝܟܼ ܕܐ݇ܡܸܪܘܼܟܼ؛ ܬܵܢܝܼ ܠܝܼ ܕܵܐܟ̣ܝܼ ܬܲܓܒܸܪܸܚܠܹܗ ܝܵܠܵܕ݇ܐ.܀ ܘܐ݇ܡܸܪܹܗ ܡܲܠܲܐܟ̣ܵܐ ܕܡܵܪܝܵܐ ܩܵܐ ܡܢܘܿܚ؛ ܡ̣ܢ ܟܠ ܡܸܢܕܝܼ ܕܐ݇ܡܸܪܝܼ ܩܵܐ ܒܲܟ̣ܬܵܐ ܗܵܘܝܵܐ ܗܸܫܝܲܪ.܀ ܘܡ̣ܢ ܟܠ ܡܸܢܕܝܼ ܕܦܵܠܸܛ ܡ̣ܢ ܓܸܦܬܵܐ ܠܵܐ ܐܵܟ̣ܠܵܐ. ܚܲܡܪܵܐ ܘܥܵܪܲܩ ܠܵܐ ܫܵܬܝܵܐ؛ ܘܟܠ ܡܸܢܕܝܼ ܛܲܡܵܐܐ ܠܵܐ ܐܵܟ̣ܠܵܐ؛ ܘܟܠ ܕܦܘܼܩܕܵܐ ܠܝܼ ܢܵܛܪܵܐ.܀ ܐ݇ܡܸܪܹܗ ܡܢܘܿܚ ܩܵܐ ܡܲܠܲܐܟ̣ܵܐ ܕܡܵܪܝܵܐ؛ ܡܲܟܠܝܼܲܚܠܘܼܟܼ ܘܒܵܫܠܲܚ ܚܲܕ݇ ܓܸܕܝܵܐ ܕܥܸܙܹ̈ܐ ܘܡܵܬܒ̣ܲܚ ܩܵܕ݇ܡܘܼܟܼ. ܐ݇ܡܸܪܹܗ ܡܲܠܲܐܟ̣ܵܐ ܕܡܵܪܝܵܐ ܩܵܐ ܡܢܘܿܚ؛ ܐܸܢ ܡܲܟܠܸܬ̇ ܠܝܼ ܠܹܐ ܐܵܟ̣ܠܸܢ ܡ̣ܢ ܠܲܚܡܘܼܟܼ؛ ܘܐܸܢ ܡܲܐ݇ܣܩܸܬܿ ܕܸܒ̣ܚܵܐ؛ ܠܡܵܪܝܵܐ ܡܲܣܸܩܠܹܗ. ܣܵܒܵܒ ܠܹܐ ܗ݇ܘܵܐ ܒܝܼܕܵܥܝܵܐ ܡܢܘܿܚ ܕܡܲܠܲܐܟ̣ܵܐ ܕܡܵܪܝܵܐ ܝ݇ܠܹܗ.܀ ܘܐ݇ܡܸܪܹܗ ܡܢܘܿܚ ܠܡܲܠܲܐܟ̣ܵܐ ܕܡܵܪܝܵܐ؛ ܡܘܼܕܝܼ ܝ݇ܠܹܗ ܫܸܡܘܼܟܼ؛ ܕܐܝܼܡܲܢ ܕܗܵܘܹܐ ܚܲܒܪܘܼܟܼ؛ ܩܵܪܲܚܠܘܼܟܼ؟ ܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ ܕܡܵܪܝܵܐ؛ ܩܵܡܘܿܕܝܼ ܒܵܩܘܿܪܹܐ ܝ݇ܘܸܬ̇ ܠܫܸܡܝܼ ܕܝܼܠܹܗ ܚܩܝܼܪܵܐ؟܀ ܫܩܸܠܹܗ ܡܢܘܿܚ ܓܸܕܝܵܐ ܕܥܸܙܹ̈ܐ ܘܩܲܡܚܵܐ ܨܸܦܝܵܐ؛ ܘܡܘܼܬܸܒ̣ܠܹܗ ܥܲܠ ܟܹܐܦܵܐ ܩܘܼܪܒܵܢܵܐ ܠܡܵܪܝܵܐ. ܘܫܵܒܘܼܚܹܐ ܗ݇ܘܵܐ ܠܡܵܪܝܵܐ.܀ ܘܡܢܘܿܚ ܘܒܲܟ̣ܬܹܗ ܒܲܚܙܵܝܵܐ ܗ݇ܘ̣ܵܘ ܐܝܼܡܲܢ ܕܐ݇ܣܸܩܠܵܗ̇ ܠܵܗܵܐ ܕܢܘܼܪܵܐ ܡ̣ܢ ܟܹܐܦܵܐ ܠܫܡܲܝܵܐ؛ ܘܐ݇ܣܸܩܠܹܗ ܡܲܠܲܐܟ̣ܵܐ ܕܡܵܪܝܵܐ ܓܵܘ ܠܵܗܵܐ ܕܢܘܼܪܵܐ. ܘܡܢܘܿܚ ܘܒܲܟ̣ܬܹܗ ܚܙܹܐܠܗ݇ܘܿܢ ܘܢܦܸܠܗ݇ܘܿܢ ܥܲܠ ܦܵܬܲܝܗܝ ܥܲܠ ܐܲܪܥܵܐ ܘܣܓ̣ܸܕܠܗ݇ܘܿܢ.܀ ܘܡܸܕܪܹܐ ܠܵܐ ܡܘܼܙܝܸܕܠܹܗ ܡܲܠܲܐܟ̣ܵܐ ܕܡܵܪܝܵܐ ܠܸܦܝܵܫܵܐ ܚܸܙܝܵܐ ܠܡܢܘܿܚ ܘܒܲܟ̣ܬܹܗ. ܗܵܝܓܵܗ̇ ܝ݇ܕܝܼܥܠܗ݇ܘܿܢ ܕܡܲܠܲܐܟ̣ܵܐ ܗ݇ܘܵܐ ܕܡܵܪܝܵܐ.܀ ܘܐ݇ܡܸܪܹܗ ܡܢܘܿܚ ܩܵܐ ܒܲܟ̣ܬܹܗ. ܒܸܬ ܡܵܝܬܲܚ؛ ܣܵܒܵܒ ܕܚܙܹܐܠܲܢ ܠܐܲܠܵܗܵܐ.܀ ܐ݇ܡܸܪܵܗ̇ ܐܸܠܹܗ ܒܲܟ̣ܬܹܗ؛ ܐܸܢ ܒܵܥܹܐ ܗ݇ܘܵܐ ܐܲܠܵܗܵܐ ܕܡܲܡܝܸܬܠܲܢ ܠܹܐ ܩܵܒܸܠ ܗ݇ܘ̣ܵܐ ܡܸܢܲܢ ܕܸܒ̣ܚܵܐ؛ ܘܠܹܐ ܡܲܚܙܹܐ ܗ݇ܘܵܐ ܠܲܢ ܐܲܢܹܐ ܟܠܲܝܗܝ ܒܐܵܗܵܐ ܙܲܒ̣ܢܵܐ؛ ܘܠܹܐ ܡܲܫܡܸܥ ܗ݇ܘܵܐ ܩܵܬܲܢ ܐܲܢܹܐ ܡܸܢܕܝܼܵܢܹ̈ܐ.܀ ܗܘܼܨܸܠܵܗ̇ ܒܲܟ̣ܬܵܐ ܒܪܘܿܢܵܐ؛ ܘܩܪܹܐܠܵܗ̇ ܫܸܡܹܗ ܫܸܡܫܘܿܢ. ܓܘܼܪܘܸܣܠܹܗ ܝܵܠܵܕ݇ܐ ܘܒܘܼܪܸܟ̣ܠܹܗ ܡܵܪܝܵܐ܀
♱♱♱♱♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ
ܩܵܐ ܕܐܵܗܵܐ ܣܵܒܵܒ ܐܵܢܵܐ ܦܵܘܠܘܿܣ ܦܝܼܫܵܐ ܝ݇ܘܸܢ ܐ݇ܣܝܼܪܵܐ ܡ̣ܢ ܓܸܒܵܘܟܼܘܿܢ ܛܵܝܸܦܹ̈ܐ* ܐܸܢ ܫܸܡܥܝܸܐ ܝ݇ܬܘܿܢ ܡܕܲܒܪܵܢܘܼܬܵܐ ܕܫܵܦܵܩܲܬ ܕܐܲܠܵܗܵܐ ܕܦܸܫܠܵܗ̇ ܝܘܼܗܒܸܠܬܵܐ ܩܵܐ ܕܝܼܝܼ ܒܝܼܵܘܟܼܘܿܢ* ܐܲܫܟܵܪܵܐ ܦܸܫܠܹܗ ܡܘܼܕܹܥܝܵܐ ܩܵܬܝܼ ܐَܪܵܙܵܐ. ܕܵܐܟܼܝܼ ܕܟܬܸܒܼܠܝܼ ܒܟܸܪܝܘܼܬܵܐ* ܐܲܝܟܼ ܕܒܸܬ ܚܵܙܝܼܬܘܿܢ ܐܝܼܡܲܢ ܕܩܵܪܝܼܬܘܿܢ ܠܦܲܪܡܘܼܝܹܐ ܝ݇ܕܵܥܝܬܝܼ ܕܓܵܘ ܐ݇ܪ̈ܵܙܹܐ ܕܡܫܝܼܚܵܐ* ܗ̇ܘ ܕܓܵܘ ܕܵܘܪܹ̈ܐ ܐ݇ܚܹܪَ̈ܢܹܐ ܠܵܐ ܦܸܫܠܹܗ ܝ݇ܕܝܼܥܝܵܐ ܩܵܐ ܒܢܲܝ̈ܢܵܫܵܐ؛ ܐܲܝܟܼ ܕܐܵܕܝܼܵܐ ܦܸܫܠܹܗ ܡܘܼܚܙܝܼܵܐ ܒܪܘܼܚܵܐ ܠܫܠܝܼܚܘܼܗ̈ܝ ܘܠܢܒܼܝܼܘܼܗ̈ܝ ܩܲܕܝܼܫܹ̈ܐ* ܩܵܐ ܕܗܵܘܝܼ ܛܵܝܸܦܹ̈ܐ ܒܢܘܼܢܹ̈ܐ ܕܝܵܪܬܘܼܬܹܗ ܘܫܲܪ̈ܝܼܟܹܐ ܕܦܲܓܼܪܹܗ ܘܕܩܵܘܠܵܐ ܕܦܸܫܠܹܗ ܝܘܼܗܒܼܵܐ ܒܐܸܘܲܢܓܵܠܝܼܘܿܢ* ܗ̇ܘ ܕܐܵܢܵܐ ܒܓܵܢܝܼ ܗ݇ܘܹܐܠܝܼ ܚܸܠܡܲܬܟܲܪ ܕܝܼـܹܗ؛ ܐܲܝܟܼ ܚܲܠܥܲܬ ܕܫܵܦܵܩܲܬ ܕܐܲܠܵܗܵܐ ܕܦܸܫܠܵܗ̇ ܝܘܼܗܒܸܠܬܵܐ ܩܵܬܝܼ ܡ̣ܢ ܡܲܥܒܕܵܢܘܼܬܵܐ ܕܚܲܝܠܹܗ* ܐܵܢܵܐ ܕܝܼܘܹܢ ܙܥܘܼܪܵܐ ܕܟܠܲܝܗܝ ܩܲܕܝܼܫܹ̈ܐ ܦܸܫܠܵܗ̇ ܝܘܼܗܒܸܠܬܵܐ ܩܵܬܝܼ ܐܵܗܵܐ ܫܵܦܵܩܲܬ؛ ܠܡܲܫܚܘܼܕܹܐ ܕܵܘܸܠܬܵܐ ܕܡܫܝܼܚܵܐ ܓܵܘ ܛܵܝܸܦܹ̈ܐ* ܘܡܲܦܪܸܡܸܢ ܠܟܠ ܚܲܕ݇ ܐ݇ܢܵܫܵܐ؛ ܡܘܼܕܝܼ ܝ݇ܠܵܗ̇ ܡܕܲܒܪܵܢܘܼܬܵܐ ܕܐܵܗܵܐ ܐ݇ܪܵܙܵܐ ܕܦܝܼܫܵܐ ܝܗ݇ܘܵܐ ܛܘܼܫܝܵܐ ܡ̣ܢ ܟܠܵܗ̇ ܕܘܼܢܝܹܐ ܒܐܲܠܵܗܵܐ ܒܵܪܘܿܝܵܐ ܕܟܠ* ܕܒܐܘܼܪܚܵܐ ܕܥܹܕܬܵܐ ܦܵܝܫܵܐ ܝ݇ܕܝܼܥܬܵܐ ܚܸܟܼܡܬܵܐ ܓܘܼܪܬܵܐ ܕܐܲܠܵܗܵܐ ܩܵܐ ܐܲܪ̈ܟܘܿܣ ܘܫܘܼܠܛܵܢܹ̈ܐ ܕܓܵܘ ܫܡܲܝܵܐ* ܗ̇ܝ ܕܗܘܼܕܸܪܬܵܐ ܝܗ݇ܘܵܐ ܡ̣ܢ ܫܘܼܪܵܝܵܐ ܕܒܪܝܼܬܵܐ. ܘܩܲܡ ܡܲܚܙܹܐ ܠܵܗ̇ ܒܝܼـܲܕ ܝܼܫܘܿܥ ܡܫܝܼܚܵܐ ܡܵܪܲܢ* ܕܒܝܼـܹܗ ܐܝܼܬ ܠܲܢ ܒܸܣܬܵܝܘܼܬܵܐ ܘܩܘܼܪܒܵܝܘܼܬܵܐ ܒܗܹܒܼܝܼ ܕܗܲܝܡܵܢܘܼܬܹܗ* ܩܵܐ ܕܐܵܗܵܐ ܣܵܒܵܒ؛ ܒܹܛܠܵܒܵܐ ܝ݇ܘܸܢ ܡ̣ܢ ܡܵܪܲܢ ܕܠܵܐ ܣܵܩܕܸܢ ܒܝܲܠܨܘܼܘܝܼ̈ ܡ̣ܢ ܓܹܒܵܘܟܼܘܿܢ؛ ܣܵܒܵܒ ܐܵܗܵܐ ܝ݇ܠܹܗ ܚܸܩܪܵܘܟܼܘܿܢ* ܡܲܟܘܼܦܹܐ ܝ݇ܘܸܢ ܒܘܼܪ̈ܟܵܟܝܼ ܩܵܕ݇ܡ ܒܵܒܵܐ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܗ̇ܘ ܕܡܸܢܹܗ ܦܵܐܸܫ ܩܸܪܝܵܐ ܟܠ ܒܵܒܵܐ ܕܓܵܘ ܫܡܲܝܵܐ ܘܐܲܪܥܵܐ* ܕܝܵܗܒܸܠܵܘܟܼܘܿܢ ܐܲܝܟܼ ܕܵܘܸܠܬܵܐ ܕܚܸܩܪܹܗ؛ ܕܗܵܘܝܼܬܘܿܢ ܚܲܝܠܵܢܹ̈ܐ ܒܪܘܼܚܹܗ* ܕܓܵܘ ܒܲܪܢܵܫܵܘܟܼܘܿܢ ܓܵܘܵܝܵܐ ܫܵܪܹܐ ܡܫܝܼܚܵܐ ܒܗܲܝܡܵܢܘܼܬܵܐ ܘܒܚܘܼܒܵܐ. ܘܗܵܘܹܐ ܩܘܼܝܵܐ ܥܸܩܪܵܘܟܼܘܿܢ ܘܒܸܢܝܲܬܵܘܟܼܘܿܢ* ܕܡܵܨܝܼܬܘܿܢ ܦܲܪܡܝܼܬܘܿܢ ܥܲܡ ܟܠܲܝܗܝ ܩܲܕܝܼܫܹ̈ܐ؛ ܡܘܼܕܝܼ ܝ݇ܠܹܗ ܪܵܘܡܵܐ ܘܥܘܼܡܩܵܐ ܘܝܘܼܪܟܼܵܐ ܘܦܸܬܝܘܼܬܵܐ* ܘܝܵܕܥܝܼܬܘܿܢ ܓܘܼܪܘܼܬܵܐ ܕܝَܕܵܥܝܬܵܐ ܕܚܘܼܒܹܗ ܕܡܫܝܼܚܵܐ؛ ܘܗܵܘܝܼܬܘܿܢ ܟܵܡܝܼܠ ܒܟܠܵܗ̇ ܟܵܡܝܼܠܘܼܬܵܐ ܕܐܲܠܵܗܵܐ* ܩܵܐ ܕܗ̇ܘ ܕܟܹܐ ܡܵܨܹܐ ܒܚܲܝܠܵܐ ܥܵܒܼܸܕ ܩܵܬܲܢ ܒܘܼܫ ܙܵܘܕܼܵܐ ܡ̣ܢ ܕܗ̇ܘ ܡܸܢܕܝܼ ܕܛܵܠܒܲܚ ܘܬܲܚܡܸܢܲܚ ܐܲܝܟܼ ܚܲܝܠܹܗ ܕܦܝܵܫܵܐ ܝ݇ܠܹܗ ܦܠܝܼܚܵܐ ܒܝܼܲܢ ܚܸܩܪܵܐ ܐܸܠܹܗ ܒܥܹܕܬܹܗ ܒܝܼܫܘܿܥ ܡܫܝܼܚܵܐ ܒܟܠܲܝܗܝ ܕܵܘܪܹ̈ܐ ܕܕܘܼܢܝܹܐ ܗܲܠ ܐܵܒܲܕ ܐܵܒܲܕܝܼܢ ܐܵܡܹܝܢ܀
♱♱♱♱♱♱♱♱♱♱♱♱♱♱
ܠܘܩܐ ܐ: 57 ‐ ܫܘܼܠܵܡܵܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܐܝܼܢܵܐ ܐܹܠܝܼܫܒܼܲܥ ܗ݇ܘܹܐܠܹܗ ܐܸܠܵܗ̇ ܙܲܒܼܢܵܐ ܕܝܲܠܕܵܐ: ܘܝܠܝܼܕܠܵܗ݁ ܒܪܘܿܢܵܐ. ܘܫܡܝܼܥܠܗ݇ܘܿܢ ܫܒܼܵܒܼܘܼ̈ܗ̇ ܘܚܸܙ̈ܡܵܢܘܼܗ̇ ܕܡܘܼܙܝܸܕܠܹܗ ܐܲܠܵܗܵܐ ܚܢܵܢܹܗ ܠܘܵܬܵܗ̇: ܘܚܵܕܝܼ ܗ݇ܘܵܘ ܥܲܡܘܼܗ̇. ܘܗ݇ܘܹܐܠܵܗ̇ ܠܝܵܘܡܵܐ ܕܬܡܵܢܝܵܐ: ܘܐ݇ܬܹܐܠܗ݇ܘܿܢ ܠܸܓܙܵܪܹܗ ܠܛܲܠܝܵܐ: ܘܩܵܪܝܼ ܗ݇ܘܵܘ ܠܹܗ ܒܫܸܡܵܐ ܕܒܵܒܘܼܗܝ ܙܟܼܲܪܝܵܐ. ܘܓ̰ܘܼܘܸܒܠܵܗ̇ ܝܸܡܹܗ ܘܐܵܡܪܵܐ ܐܸܠܲܝܗܝ: ܠܵܐ ܗܲܕܟܼܵܐ: ܐܸܠܵܐ ܦܵܐܸܫ ܩܸܪܝܵܐ ܝܘܿܚܲܢܲܢ. ܘܐ݇ܡܝܼܪܗ݇ܘܿܢ ܐܸܠܵܗ̇ ܕܠܲܝܬ ܐ݇ܢܵܫܵܐ ܒܫܲܪܒܬܹܟܼܝ ܕܦܝܵܫܵܐ ܝܠܹܗ ܩܸܪܝܵܐ ܒܐܵܗܵܐ ܫܸܡܵܐ. ܘܪܡܝܼܙܠܗ݇ܘܿܢ ܠܒܵܒܘܼܗܝ ܕܕܲܐܟܼܝܼ ܒܲܣܡܵܐ ܠܹܗܕܡܲܬܝܼܒ̣ܠܹܗ ܫܸܡܹܗ. ܘܛܠܝܼܒܠܹܗ ܦܸܢܩܝܼܬܵܐ ܘܟܬܝܼܒܼܠܹܗ ܘܐ݇ܡܝܼܪܹܗ ܝܘܿܚܲܢܲܢ ܝܑܼܠܹܗ ܫܸܡܹܗ: ܘܟܠܢܵܫܵܐ ܥܘܼܓ̰ܸܒܠܹܗ: ܘܒܗ̇ܝ ܥܸܕܵܢܵܐ ܦܝܼܫܠܹܗ ܦܬܝܼܚܵܐ ܦܘܼܡܹܗ ܘܠܸܫܵܢܹܗ: ܘܗܘܼܡܙܸܡܠܹܗ ܘܒܘܼܪܸܟܼܠܹܗ ܠܐܲܠܵܗܵܐ. ܘܗ݇ܘܹܐ ܠܵܗ̇ ܙܕܘܿܥܬܵܐ ܥܲܠ ܟܠܲܝܗܝ ܫܒܼܵܒܼܲܝ̈ܗܝ: ܘܒܟܠܹܗ ܛܘܼܪܵܐ ܕܝܼܗܘܼܕ. ܐܲܢܹܐ ܦܝܵܫܵܐ ܝܗ݇ܘܵܘ ܗܘܼܡܙܸܡܹܐ. ܘܟܠܲܝܗܝ ܕܫܡܝܼܥܠܗ݇ܘܿܢ ܚܲܫܒܼܝܼ ܗ݇ܘܵܘ ܒܠܸܒܲܝܗܝ ܘܐܲܡܪܝܼ: ܝܵܐ ܪܲܒ ܡܘܿܕܝܼ ܒܸܬ ܗܵܘܹܐ ܐܵܗܵܐ ܛܲܠܝܵܐ؟ ܘܐܝܼܕܹܗ ܕܡܵܪܝܵܐ ܝܼܗ݇ܘܵܐ ܥܲܡܹܗ. ܘܦܝܼܫܠܹܗ ܡܸܠܝܵܐ ܙܟܼܲܪܝܵܐ ܒܵܒܘܼܗܝ ܪܘܼܚܵܐ ܕܩܘܼܕܫܵܐ. ܘܢܘܼܒܹܐܠܹܗ ܘܐ݇ܡܝܼܪܹܗ: ܒܪܝܼܟܼܵܐ ܝܠܹܗ ܡܵܪܝܵܐ ܐܲܠܵܗܹܗ ܕܝܼܣܪܵܝܸܠ: ܕܣܘܼܚܒܸܪܹܗ ܠܛܵܝܸܦܹܗ ܘܥܒܼܝܼܕܠܹܗ ܦܘܼܪܩܵܢܵܐ ܐܸܠܹܗ. ܘܡܘܼܩܝܼܡܠܹܗ ܐܸܠܲܢ ܩܲܪ݇ܢܵܐ ܕܦܘܼܪܩܵܢܵܐ ܒܒܲܝܬܹܗ ܕܕܵܘܝܼܕ ܥܲܒܼܕܹܗ: ܐܲܝܟܼ ܕܗܘܼܡܙܸܡܠܹܗ ܒܦܘܼܡܵܐ ܕܢܒܼܝܼܘܼ̈ܗܝ ܩܲܕܝܼܫܹ̈ܐ ܕܡ̣ܢ ܥܵܠܲܡ. ܕܦܵܪܸܩܠܲܢ ܡ̣ܢ ܕܸܫ̃ܡܸܢܲܝ̈ܢ: ܘܡ̣ܢ ܐܝܼܕܵܐ ܕܟܠܲܝܗܝ ܣܲܢܝܵܢܲܝ̈ܢ. ܘܥܒܼܝܼܕܠܹܗ ܚܢܵܢܹܗ ܥܲܡ ܐܲܒܼܵܗܲܝ̈ܢ: ܘܕܟܼܝܼܪܹܗ ܠܕܝܵܬܹܩܘܼ̈ܗܝ ܩܲܕܝܼܫܹ̈ܐ. ܘܡܵܘܡܵܬܹ̈ܐ ܕܝ݇ܡܹܐ ܠܹܗ ܠܐܲܒܼܪܵܗܲܡ ܒܵܒܲܢ. ܕܝܲܗ݇ܒܼܸܠܲܢ ܕܦܲܝܫܵܚ ܦܪܝܼܩܹܐ ܡ̣ܢ ܐܝܼܕܵܐ ܕܕܸܫ̃ܡܸܢܲܝ̈ܢ: ܘܕܠܵܐ ܙܕܘܿܥܬܵܐ ܦܲܠܚܲܚ ܩܵܕ݇ܡܘܼܗܝ ܟܠܲܝܗܝ ܝܵܘ̈ܡܵܬܲܢ ܒܟܹܐܢܘܼܬܵܐ ܘܒܙܲܕܝܼܩܘܼܬܵܐ: ܘܐܲܢ݇ܬ ܛܲܠܝܵܐ ܢܒ̣ܝܼܹܗ ܕܥܸܠܵܝܵܐ ܒܸܬ ܦܲܝܫܸܬ ܩܸܪܝܵܐ: ܣܵܒܵܒ ܒܸܬ ܐܵܙܸܠ݇ܬ ܩܲܕ݇ܡ ܦܲܪܨܘܿܦܹܗ ܕܡܵܪܝܵܐ ܕܗܲܕܪܸܬ ܐܘܼܪܚܹܗ. ܕܝܲܗܒܼܸܠ ܡܲܕܥܵܐ ܕܚܲܝܹ̈ܐ ܠܥܲܡܹܗ ܒܫܘܼܒܼܩܵܢܵܐ ܕܚܛܝܼܵܬܲܝ̈ܗܝ. ܒܪ̈ܲܚܡܹܗ ܕܚܢܵܢܵܐ ܕܐܲܠܵܗܲܢ: ܕܒܝܼܵܝܗܝ ܒܸܬ ܬܵܦܸܩ ܒܝܼܵܢ ܕܸܢܚܵܐ ܡ̣ܢ ܪܵܘܡܵܐ. ܠܡܲܢܗܘܼܪܹܐ ܠܐܲܝܢܝܼ ܕܒܚܸܫܟܵܐ ܘܒܛܸܠܵܠܹ̈ܐ ܕܡܵܘܬܵܐ ܝܬܝܼܒ̣ܹܐ ܝܢܵܐ. ܕܡܲܬܪܸܨ ܐܲܩ̈ܠܵܬܲܢ ܒܐܘܼܪܚܵܐ ܕܫܠܵܡܵܐ. ܐܝܼܢܵܐ ܝܵܠܵܕ݇ܐ ܓܲܪܘܸܣ ܗ݇ܘܵܐ ܘܦܵܐܸܫ ܗ݇ܘܵܐ ܚܘܼܝܠܸܢܵܐ ܒܪܘܼܚܵܐ. ܘܒܚܵܪܵܒܝܼ ܗ݇ܘܵܐ ܗܲܠ ܠܝܵܘܡܵܐ ܕܚܙܵܝܬܹܗ ܠܘܵܬ ܝܼܣܪܵܝܸܠ.
♱♱♱♱♱♱♱♱♱♱♱♱♱♱