ܬܢܹܝܢ ܢܵܡܘܿܣܵܐ؛ ܕ؛ 32‐41
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܐܵܕܝܼܵܐ ܒܲܩܪܘܿܢ ܒܘܼܬ ܝܵܘܡܵܢܹ̈ܐ ܕܗܘܹܐܠܗ݇ܘܿܢ ܡ̣ܢ ܩܵܕ݇ܡ ܡܸܢܵܘܟ̣ܘܿܢ؟ ܡ̣ܢ ܝܵܘܡܵܐ ܕܒܪܹܐܠܹܗ ܐܲܠܵܗܵܐ ܒܢܲܝ̈ܢܵܫܵܐ ܥܲܠ ܐܲܪܥܵܐ؛ ܡ̣ܢ ܡܲܪ̈ܙܵܢܹܐ ܕܫܡܲܝܵܐ ܗܲܠ ܡܲܪ̈ܙܵܢܹܐ ܕܫܡܲܝܵܐ؛ ܐܸܢ ܩܘܼܘܸܡܠܹܗ ܚܲܕ݇ ܗܵܕܟ̣ܵܐ ܡܸܢܕܝܼ ܓܘܼܪܵܐ ܝܲܢ ܦܸܫܠܹܗ ܫܸܡܥܝܵܐ ܐܲܝܟܼ ܕܝܼܹܗ܀ ܐܸܢ ܚܲܕ݇ ܛܵܝܸܦܵܐ ܐ݇ܚܹܪ݇ܢܵܐ ܫܡܝܼܥܠܹܗ ܩܵܠܹܗ ܕܐܲܠܵܗܵܐ ܗܲܡܙܘܼܡܹܐ ܡ̣ܢ ܓܵܘ ܢܘܼܪܵܐ؛ ܐܲܝܟܼ ܕܐܲܚܬܘܿܢ ܫܡܝܼܥܠܵܘܟ̣ܘܿܢ ܘܚܝܹܐܠܵܘܟ̣ܘܿܢ܀ ܝܲܢ ܓ̰ܘܼܪܸܒܠܗ݇ܘܿܢ ܠܐܲܠܵܗܵܐ ܕܐ݇ܙܸܠܹܗ ܘܫܩܸܠܹܗ ܩܵܐ ܓܵܢܹܗ ܚܲܕ݇ ܛܵܝܸܦܵܐ ܡ̣ܢ ܓܵܘ ܛܵܝܸܦܹ̈ܐ؛ ܒܓ̰ܘܼܪ̈ܵܒܹܐ؛ ܘܒܢܝܼܫܲܢܩܹ̈ܐ؛ ܘܥܵܓ̰ܝܼܒܘܼܝܵܬܹ̈ܐ؛ ܘܦܠܵܫܹ̈ܐ؛ ܘܒܐܝܼܕܵܐ ܚܲܝܠܵܢܬܵܐ ܘܕܪܵܥܵܐ ܪܵܡܵܐ؛ ܘܒܚܸܙܘܵܢܹ̈ܐ ܓܘܼܪܹ̈ܐ؛ ܐܲܝܟܼ ܟܠ ܡܸܢܕܝܼ ܕܥܒ̣ܸܕܠܹܗ ܡܵܪܝܵܐ ܐܲܠܵܗܵܘܟ̣ܘܿܢ ܠܡܸܨܪ̈ܵܝܹܐ ܩܵܕ݇ܡ ܥܲܝܢ̈ܵܘܟ̣ܘܿܢ܀ ܐܲܚܬܘܿܢ ܚܙܹܐܠܵܘܟ̣ܘܿܢ ܘܒܝܼܕܵܥܝܵܐ ܝ݇ܬܘܿܢ ܕܡܵܪܝܵܐ ܝ݇ܠܹܗ ܐܲܠܵܗܵܐ ܘܠܲܝܬ̇ ܡܸܕܪܹܐ ܫܒ̣ܘܿܩ ܡܸܢܹܗ܀ ܡ̣ܢ ܫܡܲܝܵܐ ܩܲܡ ܡܲܫܡܸܥܠܵܘܟ̣ܘܿܢ ܩܵܠܹܗ ܠܡܵܠܲܦܬܵܘܟ̣ܘܿܢ. ܘܥܲܠ ܐܲܪܥܵܐ ܩܲܡ ܡܲܚܙܹܐܠܵܘܟ̣ܘܿܢ ܢܘܼܪܹܗ ܓܘܼܪܵܐ؛ ܘܗܹܡܸܙܡܵܢ̈ܘܼܗܝ ܫܡܝܼܥܠܵܘܟ̣ܘܿܢ ܡ̣ܢ ܓܵܘ ܢܘܼܪܵܐ܀ ܒܗ̇ܝ ܕܡܘܼܚܸܒܠܹܗ ܠܒܵܒܵܘܵܬܵܘ̈ܟ̣ܘܿܢ ܓܘܼܒܹܐܠܹܗ ܠܙܲܪܥܲܝܗܝ ܡ̣ܢ ܒܵܬ݇ܪܲܝܗܝ ܘܩܲܡ ܦܵܠܸܛܠܵܘܟ̣ܘܿܢܑ ܒܓܵܢܹܗ ܒܚܲܝܠܵܐ ܓܘܼܪܵܐ ܡ̣ܢ ܡܸܨܪܹܝܢ܀ ܠܬܵܠܘܿܩܹܐ ܡ̣ܢ ܩܵܕ݇ܡܵܘܟ̣ܘܿܢ ܛܵܝܸܦܹ̈ܐ ܒܘܼܫ ܓܘܼܪܹ̈ܐ ܘܒܘܼܫ ܚܲܝܠܵܢܹ̈ܐ ܡܸܢܵܘܟ̣ܘܿܢ ܕܡܲܥܒ̣ܸܪܵܘܟ̣ܘܿܢ ܘܝܵܗ݇ܒ̣ܸܠ ܠܵܘܟ̣ܘܿܢ ܐܲܪܥܲܝܗܝ ܝܵܪܬܘܼܬܵܐ ܐܲܝܟܼ ܐܸܕܝܘܿܡ݇ ܝܵܘܡܵܐ؛ ܘܒܸܬ ܝܵܕܥܝܼܬܘܿܢ ܒܐܵܗܵܐ ܝܵܘܡܵܐ ܘܡܲܕܸܪܝܼܬܘܿܢ ܠܸܒܵܘܟ̣ܘܿܢ؛ ܣܵܒܵܒ ܕܡܵܪܝܵܐ ܝ݇ܠܹܗ ܐܲܠܵܗܵܐ ܒܫܡܲܝܵܐ ܡ̣ܢ ܥܘܼܠܘܼܠ ܘܥܲܠ ܐܲܪܥܵܐ ܡ̣ܢ ܐܸܠܬܸܚܬ̇؛ ܘܠܲܝܬ̇ ܡܸܕܪܹܐ ܫܒ̣ܘܿܩ ܡܸܢܹܗ܀ ܢܛܘܿܪܘܿܢ ܢܵܡܘܿܣ̈ܘܼܗܝ ܘܦܘܼܩܕܵܢ̈ܘܼܗܝ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؛ ܕܗܵܘܝܵܐ ܠܵܟ̣ܘܿܢ ܛܵܒ̣ܬܵܐ ܘܩܵܐ ܒܢܘܿܢܵܘ̈ܟ̣ܘܿܢ ܡ̣ܢ ܒܵܬ݇ܪܵܘܟ̣ܘܿܢ؛ ܘܙܵܝܕܝܼ ܝܵܘܡܵܢܵܘ̈ܟ̣ܘܿܢ ܒܐܲܪܥܵܐ ܕܝܵܗ݇ܒ̣ܸܠ ܠܵܘܟ̣ܘܿܢ ܡܵܪܝܵܐ ܐܲܠܵܗܵܐ ܕܟܠܲܝܗܝ ܝܵܘܡܵܢܹ̈ܐ܀
ܚܲܒ̣ܪܹܗ
ܐܹܫܲܥܝܵܐ؛ ܓ؛ 16‐ܕ؛ ܫܘܼܠܵܡܵܐ
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ ܐܲܚܲܝ̈ ܒܲܪܸܟ̣ܡܵܪܝ܀
ܡ̣ܢ ܣܵܒܵܒ ܕܪܝܼܡܠܗ݇ܘܿܢ ܒܢܵܬܹ̈ܐ ܕܨܸܗܝܘܿܢ؛ ܘܚܕܸܪܗ݇ܘܿܢ ܒܩܕܵܠܵܐ ܪܵܡܵܐ ܘܒܪܸܡܙܵܐ ܕܥܲܝܢܹ̈ܐ ܒܸܚܕܵܪܵܐ ܝ݇ܗܘܵܘ؛ ܘܒܸܛܪܵܦܵܐ ܒܐܲܩܠܵܬܲܝ̈ܗܝ ܘܡܲܟܪܘܼܒܹܐ ܠܡܵܪܝܵܐ܀ ܒܸܬ ܡܲܟܸܦ ܡܵܪܝܵܐ ܪܹ̈ܫܵܢܹܐ ܕܒܢܵܬܹ̈ܐ ܕܨܸܗܝܘܿܢ؛ ܘܡܵܪܝܵܐ ܐܸܣܟܹܡܲܝܗܝ ܒܸܬ ܥܵܒ̣ܸܕܠܹܗ ܫܘܼܠܚܵܝܵܐ܀ ܒܗ̇ܘ ܝܵܘܡܵܐ ܡܵܪܝܵܐ ܒܸܬ ܒܵܛܸܠ ܠܹܗ ܚܸܩܪܵܐ ܕܓ̰ܘܼܠܲܝ̈ܗܝ ܘܣܸܩܠܲܝ̈ܗܝ ܘܨܘܼܨܝܵܬܲܝ̈ܗܝ؛ ܘܦܸܨܠܵܐ ܕܟܵܘܣܲܝ̈ܗܝ ܘܒܸܣܟܲܝ̈ܗܝ ܘܣܸܩܠܵܐ ܕܦܵܬܲܝܗܝ ܘܩܵܢܸܫܝܵܬܲܝ̈ܗܝ ܘܬܵܘܩܲܝ̈ܗܝ ܘܚܸܠܚܵܠܲܝ̈ܗܝ ܘܩܘܼܠܒܹ̈ܐ ܕܐܝܼܕܵܬܲܝ̈ܗܝ ܘܐܲܩܠܵܬܲܝ̈ܗܝ؛ ܘܫܸܒܸܪ̈ܝܵܬܲܝܗܝ؛ ܘܟܠܲܝܗܝ ܦܸܨܠܹ̈ܐ ܕܠܒ̣ܸܫܬܲܝܗܝ܀ ܘܒܸܬ ܗܵܘܹܐ ܚܸܡܩܵܐ ܡ̣ܢ ܓܹܒܵܐ ܕܪܹܝܚܲܝܗܝ ܒܲܣܝܼܡܵܐ. ܘܡ̣ܢ ܓܹܒܵܐ ܕܚܸܪ̈ܚܵܨܹܐ ܚܲܒ̣ܠܹ̈ܐ ܕܣܲܥܪܵܐ ܒܸܬ ܐܵܣܪܝܼ؛ ܘܡ̣ܢ ܓܹܒܵܐ ܕܟܵܘܣܵܐ ܫܲܦܝܼܪܵܐ ܢܟ̰ܵܠܬܵܐ ܕܟܵܘܣܵܐ؛ ܘܡ̣ܢ ܓܹܒܵܐ ܕܦܲܪܟ̰ܵܐ ܛܝܼܡܵܢܵܐ ܣܲܩܵܐ ܒܸܬ ܠܵܒ̣ܫܝܼ. ܣܵܒܵܒ ܫܘܼܦܪ̈ܲܝܗܝ ܒܸܬ ܚܵܪܸܒ̣܀ ܚܲܝܠܵܢ̈ܵܟ̣ܝ ܒܣܲܝܦܵܐ ܒܸܬ ܢܵܦܠܝܼ ܘܓܲܢ݇ܒܵܪ̈ܵܟ̣ܝ ܒܦܠܵܫܵܐ܀ ܒܸܬ ܘܲܠܘܸܠܝܼ ܘܝܵܬܒ̣ܝܼ ܒܬܵܙܝܼ ܬܲܪ̈ܥܵܢܵܗ̇؛ ܘܓ̣ܵܠܝܼܒܘܼܬܵܗ̇ ܒܸܬ ܢܵܦܠܵܐ ܠܐܲܪܥܵܐ܀ ܘܒܸܬ ܕܵܒ̣ܩܝܼ ܫܒ̣ܲܥ ܒܲܟ̣ܬܵܬܹ̈ܐ ܠܚܲܕ݇ ܓܲܒ̣ܪܵܐ ܒܗ̇ܘ ܝܵܘܡܵܐ؛ ܘܒܸܬ ܐܵܡܪܝܼ ܠܹܗ؛ ܠܲܚܡܲܢ ܐܵܟ̣ܠܲܚ؛ ܘܠܒ̣ܸܫܬܲܢ ܠܵܒ̣ܫܲܚ. ܐܲܚܟ̰ܝܼ ܫܸܡܘܼܟܼ ܦܵܐܹܫ ܩܸܪܝܵܐ ܥܲܠܲܢ؛ ܡܲܥܒ̣ܸܪ ܠܵܘܡܲܢ܀ ܗܲܪ ܒܗ̇ܘ ܝܵܘܡܵܐ ܒܸܬ ܗܵܘܹܐ ܕܸܢܚܹܗ ܕܡܵܪܝܵܐ ܠܚܸܩܪܵܐ ܘܐܝܼܩܵܪܵܐ؛ ܘܲܛܥܘܼܢܝܵܬܹ̈ܐ ܕܐܲܪܥܵܐ ܠܣܸܩܠܵܐ ܘܫܘܼܒ̣ܚܵܐ ܠܡܸܢܕܝܼ ܕܦܸܫܠܹܗ ܡ̣ܢ ܝܼܣܪܵܝܹܠ܀ ܘܒܸܬ ܗܵܘܹܐ ܡ̇ܢ ܕܦܵܐܹܫ ܡܘܼܫ݇ܟ̰ܚܵܐ ܒܨܸܗܝܘܿܢ ܘܡ̇ܢ ܕܦܵܐܹܫ ܡܘܼܫ݇ܟ̰ܚܵܐ ܒܐܘܿܪܸܫܠܸܡ؛ ܩܲܕܝܼܫܵܐ ܒܸܬ ܦܵܐܹܫ ܩܸܪܝܵܐ؛ ܟܠ ܕܟܬܝܼܒ̣ܵܐ ܝ݇ܠܹܗ ܒܐܘܿܪܸܫܠܸܡ ܠܚܲܝܹ̈ܐ܀ ܘܒܸܬ ܚܲܠܸܠ ܡܵܪܝܵܐ ܫܸܚܬܵܐ ܕܒܢܵܬܹ̈ܐ ܕܨܸܗܝܘܿܢ؛ ܘܕܸܡܵܐ ܒܸܬ ܡܲܪܚܸܩܠܹܗ ܡ̣ܢ ܓܵܘܵܐ ܕܐܘܿܪܸܫܠܸܡ. ܒܪܘܼܚܵܐ ܕܕܝܼܘܵܢ؛ ܘܒܪܘܼܚܵܐ ܡܲܩܕܵܢܬܵܐ܀ ܘܒܸܬ ܒܵܪܹܐ ܡܵܪܝܵܐ ܥܲܠ ܟܠ ܒܲܝܬܵܐ؛ ܠܛܘܼܪܵܐ ܕܨܸܗܝܘܿܢ ܘܥܲܠ ܚܵܕܲܪ̈ܘܵܢܵܗ̇؛ ܥܢܵܢܵܐ ܒܝܵܘܡܵܐ. ܘܬܸܢܢܵܐ ܘܒܲܗܪܵܐ ܕܠܵܗܵܐ ܕܢܘܼܪܵܐ ܒܠܲܝܠܹܐ؛ ܣܵܒܵܒ ܥܲܠ ܟܠ ܐܝܼܩܵܪܵܐ ܒܸܬ ܗܵܘܝܵܐ ܛܸܠܵܢܝܼܬܵܐ܀ ܘܣܸܬܵܪܵܐ ܒܸܬ ܗܵܘܹܐ ܠܛܸܠܵܢܝܼܬܵܐ ܕܝܵܘܡܵܐ ܡ̣ܢ ܦܵܘܚܵܐ ܚܲܡܝܼܡܵܐ؛ ܠܟܵܣܘܿܝܹܐ ܘܕܲܠܕܘܼܢܹܐ ܡ̣ܢ ܩܲܫܩܲܫܬܵܐ ܘܡ̣ܢ ܡܸܛܪܵܐ܀
♱♱♱♱♱♱♱♱♱
ܚܕܒܫܒܐ ܕܬܪܝܢ ܕܩܝܛܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܬܠܲܢ ܗܲܕܟܼܵܐ ܗܹܒܼܝܼ ܒܝܼܫܘܿܥ ܡܫܝܼܚܵܐ ܠܟܸܣ ܐܲܠܵܗܵܐ* ܠܵܐ ܕܐܲܚܢܲܢ ܡܵܨܲܚ ܚܵܫܒܼܲܚ ܚܲܕ݇ ܡܸܢܕܝܼ ܐܲܝܟܼ ܕܡ̣ܢ ܓܵܢܲܢ. ܐܸܠܵܐ ܚܲܝܠܲܢ ܡ̣ܢ ܐܲܠܵܗܵܐ ܝ݇ܠܹܗ* ܗ̇ܘ ܕܩܲܡ ܡܲܚܫܸܚܠܲܢ ܕܗܵܘܲܚ ܡܫܲܡܫܵܢܹ̈ܐ ܕܕܝܵܬܹܩܹܐ ܚܲܕܬܵܐ؛ ܠܵܐ ܒܟܬܵܒܼܵܐ ܐܝܼܢܵܐ ܒܪܘܼܚܵܐ. ܣܵܒܵܒ ܟܬܵܒܼܵܐ ܟܹܐ ܩܵܛܸܠ؛ ܐܝܼܢܵܐ ܪܘܼܚܵܐ ܟܹܐ ܡܲܚܝܼܵܐ* ܐܸܢ ܚܸܠܡܲܬ ܕܡܵܘܬܵܐ ܒܟܬܵܒܼܵܐ ܦܸܫܠܵܗ̇ ܪܫܝܼܡܬܵܐ ܒܟܹܐܦܹ̈ܐ ܘܗܘܹܐܠܵܗ̇ ܒܬܸܫܒܘܿܚܬܵܐ؛ ܕܵܐܟܼܝܼ ܕܠܹܐ ܡܵܨܝܼ ܒܢܲܝ̈ ܝܼܣܪܵܝܹܠ ܠܸܚܝܵܪܵܐ ܓܵܘ ܦܵܐܬܵܐ ܕܡܘܼܫܹܐ؛ ܒܣܵܒܵܒ ܕܦܵܐܬܹܗ ܕܦܸܫܠܵܗ̇ ܒܘܼܛܸܠܬܵܐ* ܟܡܵܐ ܒܘܼܫ ܙܵܘܕܵܐ ܚܸܠܡܲܬ ܕܪܘܼܚܵܐ ܒܸܬ ܗܵܘܝܵܐ ܒܚܸܩܪܵܐ* ܣܵܒܵܒ ܐܸܢ ܩܵܐ ܚܸܠܡܲܬ ܕܓܘܼܢܵܗܟܵܪܘܼܬܵܐ ܗܘܹܐܠܵܗ̇ ܚܸܩܪܵܐ؛ ܟܡܵܐ ܒܘܼܫ ܙܵܘܕܵܐ ܚܸܠܡܲܬ ܕܙܲܕܝܼܩܘܼܬܵܐ ܒܸܬ ܙܵܝܕܵܐ ܒܚܸܩܪܵܐ* ܐܲܝܟܼ ܕܐܸܢ ܠܹܐ ܝ݇ܗܘܼܵܐ ܚܩܝܼܪܬܵܐ ܗ̇ܝ ܕܦܸܫܠܵܗ̇ ܚܩܝܼܪܬܵܐ؛ ܒܡܲܕܒܼܲܩܬܵܐ ܥܲܡ ܕܐܵܗܵܐ ܚܸܩܪܵܐ ܒܘܼܫ ܓܘܼܪܵܐ* ܣܵܒܵܒ ܐܸܢ ܡܸܢܕܝܼ ܕܦܸܫܠܹܗ ܒܘܼܛܠܵܐ ܗܘܹܐܠܹܗ ܒܚܸܩܪܵܐ. ܒܘܼܫ ܙܵܘܕܵܐ ܗ̇ܘ ܕܝܼܠܹܗ ܥܲܪܩܸܠܵܢܵܐ ܒܚܸܩܪܵܐ ܒܸܬ ܗܵܘܹܐ* ܣܵܒܵܒ ܕܐܝܼܬ ܠܲܢ ܗܲܕܟܼܵܐ ܐܵܗܵܐ ܗܹܒܼܝܼ؛ ܕܒܘܼܫ ܙܵܘܕܵܐ ܒܓ̰ܘܼܪܐܲܬ ܦܝܼܫܹܐ ܝ݇ܘܲܚ ܬܘܼܓܒܸܪܹܐ* ܘܠܵܐ ܐܲܝܟܼ ܡܘܼܫܹܐ ܕܕܵܪܹܐ ܗ݇ܘܼܵܐ ܡܵܟܲܣܬܵܐ ܥܲܠ ܦܵܐܬܹܗ ܕܠܵܐ ܚܵܝܪܝܼ ܒܢܲܝ̈ ܝܼܣܪܵܝܸܠ ܒܫܘܼܠܵܡܵܐ ܕܗ̇ܘ ܕܦܝܵܫܵܐ ܗ݇ܘܼܵܐ ܒܘܼܛܠܵܐ* ܐܝܼܢܵܐ ܗܘܹܐܠܗ݇ܘܿܢ ܟܘܼܪܹ̈ܐ ܚܝܼܵܠܲܝ̈ܗܝ. ܣܵܒܵܒ ܗܲܠ ܐܸܕܝܘܿܡ݇ ܝܵܘܡܵܐ ܐܝܼܡܲܢ ܕܕܝܵܬܹܩܹܐ ܥܲܬܝܼܩܬܵܐ ܦܝܵܫܵܐ ܝ݇ܠܵܗ̇ ܩܪܝܼܬܵܐ؛ ܗܲܪ ܗ̇ܝ ܡܵܟܲܣܬܵܐ ܟܠܝܼܬܵܐ ܝ݇ܠܵܗ̇ ܥܲܠ ܦܵܐܬܲܝܗܝ. ܘܠܹܐ ܦܵܝܫܵܐ ܓܠܝܼܬܵܐ ܕܒܝܼܲܕ ܡܫܝܼܚܵܐ ܒܸܬ ܦܵܝܫܵܐ ܒܘܼܛܸܠܬܵܐ* ܘܗܲܠ ܐܸܕܝܘܿܡ݇ ܝܵܘܡܵܐ ܐܝܼܡܲܢ ܕܟܬܵܒܼܵܐ ܕܡܘܼܫܹܐ ܦܝܵܫܵܐ ܝ݇ܠܹܗ ܩܸܪܝܵܐ. ܡܵܟܲܣܬܵܐ ܥܲܠ ܠܸܒܲܝܗܝ ܕܪܝܼܬܵܐ ܝ݇ܠܵܗ̇* ܘܐܝܼܡܲܢ ܕܚܲܕ݇ ܐٔܢܵܫܵܐ ܡܸܢܲܝܗܝ ܕܵܐܸܪ ܠܟܸܣ ܡܵܪܝܵܐ ܦܵܝܫܵܐ ܫܩܝܼܠܬܵܐ ܡܸܢܹܗ ܡܵܟܲܣܬܵܐ* ܐܝܼܢܵܐ ܡܵܪܝܵܐ ܝܼܠܹܗ ܪܘܼܚܵܐ. ܘܒܗ̇ܝ ܕܘܼܟܬܵܐ ܕܪܘܼܚܹܗ ܕܡܵܪܝܵܐ ܐܝܼܬ؛ ܐܵܙܵܕܘܼܬܵܐ ܝ݇ܠܵܗ̇* ܐܝܼܢܵܐ ܐܲܚܢܲܢ ܟܠܲܢ ܒܦܵܐܬܵܐ ܓܠܝܼܬܵܐ ܬܸܫܒܘܿܚܬܹܗ ܕܡܵܪܝܵܐ ܐܲܝܟܼ ܕܓܵܘ ܢܵܘܪܵܐ ܒܸܚܙܵܝܵܐ ܝ݇ܘܲܚ. ܘܠܕܗ̇ܝ ܕܡܘܼܬܵܐ ܦܝܵܫܵܐ ܝ݇ܘܲܚ ܫܘܼܚܠܸܦܹܐ. ܡ̣ܢ ܚܸܩܪܵܐ ܠܚܸܩܪܵܐ ܐܲܝܟܼ ܕܡ̣ܢ ܡܵܪܝܵܐ ܪܘܼܚܵܐ*
♱♱♱♱♱♱♱♱♱
ܠܘܩܐ ܝܗ: 4 ‐ ܫܘܠܡܐ.
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ ܐܵܗܵܐ ܡܲܬܠܵܐ: ܡܵܢܝܼ ܡܸܢܵܘܟܼܘܿܢ ܓܲܒܼܪܵܐ ܕܐܝܼܬܠܹܗ ܡܵܐܐ ܥܸܪ̈ܒܹܐ: ܘܐܸܢ ܛܵܠܸܩ ܚܲܕ݇ ܡܸܢܲܝܗܝ: ܠܹܐ ܫܵܒܼܸܩ ܬܸܫܥܝܼ ܘܬܸܫܥܵܐ ܒܒܲܪܝܼܵܐ ܘܐܵܙܸܠ ܛܵܥܹܐ ܠܗ̇ܘ ܕܛܠܸܩܠܹܗ ܗܲܠ ܕܡܵܫ݇ܟ̰ܸܚܠܹܗ؟ ܘܐܝܼܡ̇ܢ ܕܡܵܫ݇ܟ̰ܸܚܠܹܗ ܒܸܬ ܚܵܕܹܐ: ܘܒܸܬ ܫܵܩܸܠܹܗ ܥܲܠ ܪ̈ܘܼܦ̮ܫܵܢܘܼܗܝ: ܘܒܸܬ ܐܵܬܹܐ ܠܒܲܝܬܹܗ: ܘܒܸܬ ܩܵܪܹܐ ܠܪ̈ܵܚܡܘܼܗܝ ܘܠܫܒܼܵܒܼܘܼ̈ܗܝ ܘܐܵܡܸܪ ܐܸܠܲܝܗܝ: ܚܕܹܝܡܘܿܢ ܥܲܡܝܼ ܕܡܘܼܫ݇ܟ̰ܸܚܠܝܼ ܥܸܪܒܝܼ ܕܝܼܗَܘܵܐ ܛܠܝܼܩܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܗܲܕܟܼܵܐ ܒܸܬ ܗܵܘܝܵܐ ܚܲܕܘܼܬܵܐ ܓܵܘ ܫܡܲܝܵܐ ܥܲܠ ܚܲܕ݇ ܚܲܛܵܝܵܐ ܕܬܲܘܸܒ: ܒܘܼܫ ܡ̣ܢ ܕܥܲܠ ܬܸܫܥܝܼ ܘܬܸܫܥܵܐ ܙܲܕܝܼܩܹ̈ܐ ܕܠܹܐ ܝܢܵܐ ܣܢܝܼܩܹܐ ܠܬܝܵܒܼܘܼܬܵܐ. ܝܲܢ ܐܲܝܢܝܼ ܝܠܵܗ̇ ܒܲܟܼܬܵܐ ܕܐܝܼܬܠܵܗ̇ ܥܸܣܪܵܐ ܙܘܼܙܹ̈ܐ ܘܛܵܠܩܵܐ ܚܲܕ݇ ܡܸܢܲܝܗܝ: ܘܠܵܐ ܡܲܢܗܸܪܵܐ ܫܪܵܓَܼܝܵܐ ܘܟܵܢܫܵܐ ܒܲܝܬܵܐ ܘܛܵܥܝܵܐ ܒܵܬ݇ܪܹܗ ܒܚܦܝܼܛܘܼܬܵܐ ܗܲܠ ܕܡܲܫ݇ܟ̰ܚܵܐ ܠܹܗ: ܘܐܝܼܡܵܢ ܕܡܲܫ݇ܟ̰ܚܵܐ ܠܹܗ: ܒܸܬ ܩܲܪܝܵܐ ܠܚܵܒܼܸܪ̈ܝܵܬܘܼܗܝ ܘܠܫܒܼܵܒܼܝܵܬܘܼ̈ܗܝ ܘܐܲܡܪܵܐ ܐܸܠܲܝܗܝ: ܚܕܹܝܡܘܿܢ ܥܲܡܝܼ ܕܡܘܼܫ݇ܟ̰ܸܚܠܝܼ ܙܘܼܙܝܼ ܕܝܼܗَܘܵܐ ܛܠܝܼܩܵܐ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܗܲܕܟܼܵܐ ܒܸܬ ܗܵܘܝܵܐ ܚܲܕܘܼܬܵܐ ܩܵܕ݇ܡ ܡܲܠܲܐܟܼܹ̈ܗ ܕܐܲܠܵܗܵܐ ܥܲܠ ܚܲܕ݇ ܚܲܛܵܝܵܐ ܕܬܲܘܸܒ. ܘܡܸܢ݇ܕܪܹܫ݇ ܐ݇ܡܝܼܪ ܗ݇ܘܵܐ ܠܹܗ ܐܸܠܲܝܗܝ ܝܑܼܫܘܿܥ: ܚܲܕ݇ ܓܲܒܼܪܵܐ ܐܝܼܬ ܗ݇ܘܵܐ ܠܹܗ ܬܪܹܝ ܒܢܘܿܢܹ̈ܐ: ܘܐ݇ܡܸܪܹܗ ܐܸܠܹܗ ܒܪܘܿܢܹܗ ܙܥܘܿܪܵܐ: ܒܵܒܝܼ: ܗܲܒَܼܠܝܼ ܦܲܠܓܘܼܬܵܐ ܕܡܲܛܝܵܐ ܠܝܼ ܡ̣ܢ ܒܹܲܝܬܘܼܟܼ: ܘܦܘܼܠܸܓَܼܠܹܗ ܐܸܠܲܝܗܝ ܡܵܐܠܹܗ: ܘܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ: ܓ̰ܘܼܡܸܥܠܹܗ ܗ̇ܘ ܒܪܘܿܢܹܗ ܙܥܘܿܪܵܐ ܟܠ ܡܸܢܕܝܼ ܕܡܛܹܐܠܹܗ ܐܸܠܹܗ: ܘܐ݇ܙܸܠܹܗ ܠܐܲܬܪܵܐ ܪܸܚܩܵܐ: ܘܬܵܡܵܐ ܒܘܼܪܒܸܙܠܹܗ ܡܵܐܠܹܗ ܟܲܕ ܒܸܚܵܝܵܐ ܒܬܲܪܬܲܚܬܵܐ: ܘܟܲܕ ܦܘܼܪܸܩܠܹܗ ܟܠܡܸܢܕܝܼ ܕܐܝܼܬ ܗ݇ܘܵܐ ܠܹܗ: ܗ݇ܘܹܐ ܠܹܗ ܟܸܦܢܵܐ ܪܲܒܵܐ ܒܗ̇ܘ ܐܲܬܪܵܐ: ܘܫܘܼܪܹܐ ܠܹܗ ܒܸܚܣܵܪܵܐ: ܘܐ݇ܙܸܠܹܗ ܬܒܸܥܠܹܗ ܠܚܲܕ݇ ܡ̣ܢ ܒܢܲܝ̈ ܡܕܝܼܢ݇ܬܵܐ ܕܗ̇ܘ ܐܲܬܪܵܐ: ܘܗ̇ܘ ܩܲܡ ܫܵܕܸܪܹܗ ܠܚܲܩܠܵܐ ܠܡܲܪܥܘܼܝܹܐ ܚܙܘܼܪܹ̈ܐ: ܘܫܲܗ݇ܒܼܸܬ ܗ݇ܘܵܐ ܠܸܡܠܵܝܵܐ ܟܲܪ݇ܣܹܗ ܡ̣ܢ ܚܲܪ̈ܘܼܒܼܹܐ ܕܐܲܟܼܠܝܼ ܗ݇ܘܵܘ ܚܙܘܼܪܹ̈ܐ: ܘܐ݇ܢܵܫܵܐ ܠܵܐ ܝܲܗ݇ܒܼܸܠ ܗ݇ܘܵܐ ܠܹܗ: ܘܟܲܕ ܐ݇ܬܹܐܠܹܗ ܠܓܵܢܹܗ ܐ݇ܡܸܪܹܗ: ܐܵܕܝܼܵܐ ܟܡܵܐ ܕܒܼܝܼܩܹܐ ܒܗܵܩܵܐ ܐܝܼܬ ܓܵܘ ܒܲܝܬܵܐ ܕܒܵܒܝܼ ܕܟܹܐ ܙܵܝܸܕ ܡܸܢܲܝܗܝ ܠܲܚܡܵܐ: ܘܐܵܢܵܐ ܠܲܐܟܼܵܐ ܒܸܛܠܵܩܵܐ ܝܘܸܢ ܡ̣ܢ ܟܸܦܢܝܼ. ܒܸܬ ܩܲܝܡܸܢ ܐܵܙܸܠ݇ܢ ܠܘܵܬ ܒܵܒܝܼ ܘܐܲܡܪܸܢ ܐܸܠܹܗ: ܒܵܒܝܼ ܚܛܹܐ ܠܝܼ ܒܲܫܡܲܝܵܐ ܘܩܵܕ݇ܡܘܼܟܼ، ܘܡ̣ܢ ܐܵܕܝܼܵܐ ܠܹܐ ܚܲܫܚܸܢ ܕܦܲܝܫܸܢ ܩܸܪܝܵܐ ܒܪܘܿܢܘܼܟܼ: ܥܒܼܘܿܕܠܝܼ ܐܲܝܟܼ ܚܲܕ݇ ܡ̣ܢ ܦܵܠܵܚ̈ܘܼܟܼ ܕܒ̣ܝܼܩܹ̈ܐ ܒܗܵܩܵܐ: ܘܩܸܡܠܹܗ ܐ݇ܬܹܐܠܹܗ ܠܘܵܬ ܒܵܒܘܼܗܝ: ܘܗܵܠܵܐ ܗ̇ܘ ܪܸܚܩܵܐ: ܩܲܡ ܚܵܙܹܐܠܹܗ ܒܵܒܘܼܗܝ ܪܘܼܚܸܡܠܹܗ ܥܲܠܘܼܗܝ: ܘܪܚܸܛܠܹܗ ܢܦܸܠܹܗ ܥܲܠ ܩܕܵܠܹܗ، ܘܩܲܡ ܢܵܫܸܩܠܹܗ. ܘܐ݇ܡܸܪܹܗ ܐܸܠܹܗ ܒܪܘܿܢܹܗ: ܒܵܒܝܼ: ܚܛܹܐܠܝܼ ܒܫܡܲܝܵܐ ܘܩܵܕ݇ܡܘܼܟܼ: ܘܠܹܐ ܚܲܫܚܸܢ ܕܒܪܘܢܘܼܟܼ ܦܲܝܫܸܢ ܩܸܪܝܵܐ: ܐܝܼܢܵܐ ܒܵܒܘܼܗܝ ܐ݇ܡܸܪܹܗ ܠܪܹ̈ܓܵܘܵܬܘܼܗܝ: ܦܲܠܛܘܿܢ ܓ̰ܘܼܒܵܐ ܪܹܫܵܝܬܵܐ ܡܲܠܒܼܸܫܘܿܢ ܠܹܗ: ܘܡܲܬܒܼܘܿܢ ܥܸܙܲܩܬܵܐ ܒܐܝܼܕܹܗ: ܘܡܲܠܒܼܸܫܘܿܢ ܠܹܗ ܨܵܘܠܹ̈ܐ: ܘܡܲܝܬܹܝܡܘܿܢ ܩܛܘܼܠܘܿܢ ܬܵܘܪܵܐ ܕܬܪܝܼܨܵܐ: ܘܐܲܟܼܠܸܚ ܘܥܲܒܼܕܵܚ ܒܘܼܣܵܡܵܐ: ܕܐܵܗܵܐ ܒܪܘܿܢܝܼ ܡܝܼܬܵܐ ܗ݇ܘܵܐ ܘܚܝܹܐܠܹܗ: ܘܛܠܝܼܩܵܐ ܗ݇ܘܵܐ ܘܦܸܫܠܹܗ ܡܫ݇ܟ̰ܝܼܚܵܐ: ܘܫܘܼܪܹܐ ܠܗ݇ܘܿܢ ܠܸܥܒܼܵܕܵܐ ܒܘܼܣܵܡܵܐ: ܐܝܼܢܵܐ ܗ̇ܘ ܒܪܘܿܢܹܗ ܓܘܼܪܵܐ ܓܵܘ ܚܲܩܠܵܐ ܗ݇ܘܵܐ: ܘܟܲܕ ܐ݇ܬܹܐܠܹܗ ܘܩܘܼܪܒܸܢܹܗ ܠܘܵܬ ܒܲܝܬܵܐ: ܫܡܸܥܠܹܗ ܩܵܠܵܐ ܕܙܡܵܪܵܐ ܪܵܒܵܐ: ܘܩܪܹܐ ܠܹܗ ܠܚܲܕ݇ ܡ̣ܢ ܛܠܵܝܹ̈ܐ: ܘܩܲܡ ܒܵܩܸܪܹܗ ܕܡܘܿܕܝܼ ܠܹܗ ܐܵܗܵܐ؟ ܐܵܡܸܪ ܐܸܠܹܗ: ܐܲܚܘܿܢܘܼܟܼ ܐ݇ܬܹܐ ܠܹܗ: ܘܩܛܸܠܹܗ ܒܵܒܘܼܟܼ ܬܵܘܪܵܐ ܕܬܪܝܼܨܵܐ: ܕܟܲܕ ܨܵܚ ܩܘܼܒܸܠܹܗ: ܘܟܪܸܒܠܹܗ ܘܠܹܐ ܒܲܤܡܵܐ ܗ݇ܘܵܐ ܠܹܗ ܠܸܥܒܼܵܪܵܐ: ܘܦܠܸܛܠܹܗ ܒܵܒܘܼܗܝ ܘܛܠܸܒܠܹܗ ܡܸܢܹܗ: ܐܝܼܢܵܐ ܗ̇ܘ ܐ݇ܡܸܪܹܗ ܠܒܵܒܘܼܗܝ: ܗܵܐ ܟܡܵܐ ܫܸܢܹ̈ܐ ܦܠܵܚܵܐ ܝܘܸܢ ܪܹܓܘܼܬܵܐ ܐܸܠܘܼܟܼ. ܘܗܝܼܟ̰ ܠܵܐ ܥܒܼܸܪܝܼ ܠܦܘܼܩܕܵܢܘܼܟܼ، ܘܚܲܕ݇ ܓܸܕܝܵܐ ܠܵܐ ܝܘܼܗ݇ܒܼܸܠܘܼܟܼ ܐܸܠܝܼ ܕܥܲܒܼܕܸܢ ܒܘܼܣܵܡܵܐ ܥܲܡ ܚܲܒܼܪ̈ܵܘܵܬܝܼ. ܐܝܼܢܵܐ ܠܐܵܗܵܐ ܒܪܘܿܢܘܼܟܼ، ܟܲܕ ܬܘܼܪܬܸܚܠܹܗ ܡܵܠܘܼܟܼ ܥܲܡ ܙܲܢܝܵܬܹ̈ܐ ܘܐ݇ܬܹܐܠܹܗ: ܦܪܸܡܠܘܼܟܼ ܐܸܠܹܗ ܬܵܘܪܵܐ ܬܪܝܼܨܵܐ. ܐܵܡܸܪ ܐܸܠܹܗ ܒܵܒܘܼܗܝ: ܒܪܘܿܢܝܼ: ܐܲܢ݇ܬ ܒܟܠ ܙܲܒܼܢܵܐ ܥܲܡܝܼ ܝܘܸܬ، ܘܟܠ ܡܸܢܕܝܼ ܕܕܝܼܠ݇ܝܼ ܕܝܼܠ݇ܘܼܟܼ ܝܼܠܹܗ: ܐܝܼܢܵܐ ܠܸܥܒܼܵܕܵܐ ܒܘܼܣܵܡܵܐ ܘܵܓ̰ܸܒ ܝܼܠܵܗ̇ ܘܠܸܚܕܵܝܵܐ: ܕܐܵܗܵܐ ܐܲܚܘܿܢܘܼܟܼ ܡܝܼܬܵܐ ܗ݇ܘܵܐ ܘܚܝܹܐܠܹܗ، ܘܛܠܝܼܩܵܐ ܗ݇ܘܵܐ ܘܦܸܫܠܹܗ ܡܫ݇ܟ̰ܝܼܚܵܐ.
♱♱♱♱♱♱♱♱♱
The Assyrian Church
of the East did not yet sanction this document.
Please email any errors/corrections you may find to Fr. Lawrance Namato via Lnamato@gmail.com
|
1: This Document is typed using EastAssyrian Font. 3: Install the downloaded font. 4: Copy any part of this page and Paste into Microsoft Word, then change the font to EastAssyrian or to your favorite Assyrian font.
Qasha Lawrance Namato |
<