ܚܲܕܼܒܫܲܒܵܐ ܚܲܕܬܵܐ

 

ܐܹܫܲܥܝܵܐ ܢܗ؛ 4‐ܫܘܼܠܵܡܵܐ

ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܗܵܐ ܣܵܗܕܵܐ ܠܛܵܝܸܦܹ̈ܐ ܩܵܡ ܝܵܗ݇ܒ̣ܸܢܘܼܟܼ؛ ܗܵܟܝܼܡ ܘܡܕܲܒܪܵܢܵܐ ܠܡܸܠܲܬܹ̈ܐ܀ ܕܒܸܬ ܩܵܪܸܬ̇ ܛܵܝܸܦܹ̈ܐ ܕܠܵܐ ܝ݇ܕܝܼܥܠܘܼܟܼ؛ ܘܛܵܝܸܦܹ̈ܐ ܕܠܹܐ ܝܵܕܥܝܼܠܘܼܟܼ ܠܟܸܣܠܘܼܟܼ ܒܸܬ ܪܵܚܛܝܼ؛ ܒܘܼܬ ܚܵܬܸܪ ܕܡܵܪܝܵܐ ܐܲܠܵܗܘܼܟܼ؛ ܘܩܲܕܝܼܫܵܐ ܕܝܼܣܪܵܝܹܠ ܕܩܲܡ ܚܵܩܸܪܘܼܟܼ܀ ܛܵܥܹܐܡܘܿܢ ܠܡܵܪܝܵܐ؛ ܘܐܝܼܡܲܢ ܕܡܘܼܫ݇ܟ̰ܸܚܠܵܘܟ̣ܘܿܢ ܩܪܹܐܡܘܿܢ ܠܹܗ܀ ܘܐܝܼܡܲܢ ܕܩܘܼܪܒܸܢܹܗ؛ ܒܸܬ ܫܵܒ̣ܸܩ ܚܲܛܵܝܵܐ ܐܘܼܪܚܹܗ؛ ܘܐ݇ܢܵܫܵܐ  ܥܵܘܵܠܵܐ ܚܝܼܵܠܹܗ؛ ܘܒܸܬ ܕܵܐܸܪ ܠܟܸܣܠܝܼ ܘܒܸܬ ܥܵܒ̣ܕܸܢ ܪ̈ܲܚܡܹܐ ܥܲܠܹܗ؛ ܘܠܟܸܣ ܐܲܠܵܗܲܢ ܕܡܲܙܝܸܕ ܠܸܫܒ̣ܵܩܵܐ [ܠܦܘܼܚܵܠܵܐ]܀ ܣܵܒܵܒ ܕܚܝܼܵܠ̈ܝܼ ܠܹܐ ܝ݇ܢܵܐ ܐܲܝܟܼ ܚܝܼܵܠܵܘܟ̣ܘܿܢ؛ ܘܐܘܼܪ̈ܚܵܬܝܼ ܠܹܐ ܝ݇ܢܵܐ ܐܲܝܟܼ ܐܘܼܪ̈ܚܵܬܵܘܟ̣ܘܿܢ ܒܹܐܡܵܪܵܐ ܝ݇ܠܹܗ ܡܵܪܝܵܐ܀ ܣܵܒܵܒ ܐܲܝܟܼ ܕܪܵܡܬܵܐ ܝ݇ܠܵܗ̇ ܫܡܲܝܵܐ ܡ̣ܢ ܐܲܪܥܵܐ؛ ܗܵܕܟ̣ܵܐ ܪ̈ܵܡܹܐ ܝ݇ܢܵܐ ܐܘܼܪ̈ܚܵܬܝܼ ܡ̣ܢ ܐܘܼܪ̈ܚܵܬܵܘܟ̣ܘܿܢ؛ ܘܚܝܼܵܠ̈ܝܼ ܡ̣ܢ ܚܝܼܵܠܵܘܟ̣ܘܿܢ܀ ܣܵܒܵܒ ܕܵܐܟ̣ܝܼ ܕܨܵܠܹܐ ܡܸܛܪܵܐ ܘܬܲܠܓܵܐ ܡ̣ܢ ܫܡܲܝܵܐ؛ ܘܠܬܵܡܵܐ ܠܹܐ ܕܵܐܹܪ؛ ܐܸܠܵܐ ܟܹܐ ܡܲܫܬܹܐ ܠܐܲܪܥܵܐ؛ ܘܝܵܗ݇ܒ̣ܵܐ ܗܵܨܝܼܠܹܐ ܘܡܲܓ̰ܝܸܢ ܓܸܠܵܐ؛ ܘܝܵܗ݇ܒ̣ܸܠ ܒܲܪܙܲܪܥܵܐ ܩܵܐ ܙܵܪܘܿܥܵܐ؛ ܘܠܲܚܡܵܐ ܠܡܹܐܟ̣ܘܼܠܬܵܐ܀ ܗܵܕܟ̣ܵܐ ܒܸܬ ܗܵܘܹܐ ܚܲܒܪܵܐ ܕܦܸܠܛܠܹܗ ܡ̣ܢ ܦܘܼܡܝܼ؛ ܘܠܹܐ ܕܵܐܹܪ ܠܟܸܣܠܝܼ ܣܦܝܼܩܵܐ. ܐܸܠܵܐ ܐܸܢ ܥܵܒ̣ܸܕ ܡܸܢܕܝܼ ܕܒܵܥܸܢ ܘܬܲܡܸܡ ܗ̇ܘ ܡܸܢܕܝܼ ܕܫܘܼܕܸܪܝܼ ܒܘܼܬ ܕܝܼܹܗ܀ ܣܵܒܵܒ ܒܚܲܕܘܼܬܵܐ ܒܸܬ ܦܵܠܛܝܼܬܘܿܢ ܕܒܫܠܵܡܵܐ ܒܸܬ ܐܵܙܠ݇ܝܼܬܘܿܢ؛ ܘܛܘܼܪ̈ܵܢܹܐ ܘܪ̈ܘܼܡܝܵܬܹܐ ܒܸܬ ܦܵܨܚܝܼ ܩܵܕ݇ܡ ܦܵܬܵܘܟ̣ܘܿܢ ܘܚܸܩܪܵܐ ܕܟܠܲܝܗ‌ܝ ܐܝܼܠܵܢܹ̈ܐ ܕܕܸܫܬܵܐ ܒܸܬ ܡܵܚܝܼ ܟ̰ܲܦܹ̈ܐ. ܘܡ̣ܢ ܓܹܒܵܐ ܕܩܝܼܘܵܪܹ̈ܐ ܒܸܬ ܒܵܪܝܵܐ ܒܪܘܼܬܵܐ؛ ܘܡ̣ܢ ܓܹܒܵܐ ܕܨܵܬܪܵܐ ܒܸܬ ܒܵܪܹܐ ܐܵܣܵܐ. ܘܒܸܬ ܗܵܘܹܐ ܠܡܵܪܝܵܐ ܩܵܐ ܫܸܡܵܐ ܘܠܢܝܼܫܲܢܩܵܐ ܕܥܵܠܲܡ ܕܠܵܐ ܬܵܐܹܡ܀

 

ܚܲܒ̣ܪܹܗ

 

ܦܪܲܟܣܝܼܣ. ܕ؛ 32‐ ܗ؛ 6.

ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܘܐܝܼܬ ܗ݇ܘܵܐ ܠܟܠܲܝܗ‌ܝ ܐܵܢܝܼ ܕܗܘܼܡܸܢܹܐ ܗ݇ܘܵܘ ܚܕܵܐ ܓܵܢܵܐ ܘܚܲܕ݇ ܠܸܒܵܐ؛ ܘܗܝܼܟ̰ ܚܲܕ݇ ܡܸܢܲܝܗ‌ܝ ܠܹܐ ܐܵܡܸܪ ܗ݇ܘܵܐ ܕܕܵܘܸܠܬܵܐ ܕܩܸܢܝܵܐ ܗ݇ܘܵܐ ܕܕܝܼܹܗ ܝ݇ܠܵܗ̇؛ ܐܸܠܵܐ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܗ݇ܘܿܢ ܕܓܵܘܵܐ ܗ݇ܘܵܐ܀ ܘܒܚܲܝܠܵܐ ܓܘܼܪܵܐ ܝܵܗ݇ܒ̣ܝܼ ܗ݇ܘܵܘ ܫܠܝܼܚܹ̈ܐ ܣܵܗܕܘܼܬܵܐ ܒܘܼܬ ܩܝܵܡܬܹܗ ܕܝܼܫܘܿܥ ܡܫܝܼܚܵܐ؛ ܘܫܵܦܵܩܲܬ ܓܘܼܪܬܵܐ ܐܝܼܬ ܗ݇ܘܵܐ ܥܲܠ ܟܠܲܝܗ‌ܝ܀ ܘܠܲܝܬ̇ ܗ݇ܘܵܐ ܐܘܼܦ ܚܲܕ݇ ܓܵܘܲܝܗ‌ܝ ܣܢܝܼܩܵܐ. ܣܵܒܵܒ ܐܵܢܝܼ ܕܐܝܼܬ ܗ݇ܘܵܐ ܠܗ݇ܘܿܢ ܚܲܩܠܵܢܹ̈ܐ ܘܒܵܬܹ̈ܐ ܙܵܒܢܝܼ ܗ݇ܘܵܘ ܘܡܲܝܬܝܼ ܗ݇ܘܵܘ ܛܝܼܡܵܐ ܕܡܸܢܕܝܼ ܕܦܵܐܹܫ ܗ݇ܘܵܐ ܙܘܼܒܢܵܐ܀ ܘܡܵܬܒ̣ܝܼ ܗ݇ܘܵܘ ܩܵܕ݇ܡ ܐܲܩܠܵܬܹ̈ܐ ܕܫܠܝܼܚܹ̈ܐ؛ ܘܦܵܐܹܫ ܗ݇ܘܵܐ ܝܘܼܗ݇ܒ̣ܵܐ ܠܟܠ ܐ݇ܢܵܫܵܐ ܐܲܝܟܼ ܡܸܢܕܝܼ ܕܝܼܗ݇ܘܵܐ ܣܢܝܼܩܵܐ܀ ܝܵܘܣܸܦ ܗ̇ܘ ܕܦܸܫܠܹܗ ܩܸܪܝܵܐ ܡ̣ܢ ܫܠܝܼܚܹ̈ܐ ܒܲܪܢܒ̣ܵܐ ܕܦܵܐܹܫ ܬܘܼܪܓ̰ܸܡܵܐ ܒܪܘܿܢܵܐ ܕܝܵܗ݇ܒ̣ܲܠܬܵܐ ܕܠܸܒܵܐ؛ ܠܹܘܵܝܵܐ ܡ̣ܢ ܐܲܬܪܵܐ ܕܩܹܘܦܪܘܿܣ܀ ܐܝܼܬ ܗ݇ܘܵܐ ܠܹܗ ܚܲܩܠܵܐ ܘܙܘܼܒܢܵܐܠܹܗ ܘܡܘܼܬܹܐܠܹܗ ܗܵܩܵܗ̇؛ ܘܡܘܼܬܸܒ̣ܠܹܗ ܩܵܕ݇ܡ ܐܲܩܠܵܬܹ̈ܐ ܕܫܠܝܼܚܹ̈ܐ܀ ܘܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܐ݇ܚܹܪ݇ܢܵܐ ܫܸܡܹܗ ܚܲܢܵܢܝܵܐ ܘܒܲܟ̣ܬܹܗ ܫܸܡܵܗ̇ ܫܲܦܝܼܪܵܐ؛ ܙܘܼܒܢܵܐ ܗ݇ܘܵܐ ܚܲܩܠܹܗ؛ ܘܫܩܸܠܹܗ ܚܲܕ݇ܟܡܵܐ ܡ̣ܢ ܛܝܼܡܵܗ̇ ܘܛܘܼܫܹܐܠܹܗ؛ ܟܲܕ ܪܥܝܼܫܬܵܐ ܗ݇ܘܵܐ ܒܝܼܹܗ ܒܲܟ̣ܬܹܗ؛ ܘܡܘܼܬܹܐܠܹܗ ܡ̣ܢ ܕܐܵܗܵܐ ܙܘܼܙܵܐ ܘܡܘܼܬܸܒ̣ܠܹܗ ܩܵܕ݇ܡ ܐܲܩܠܵܬܹ̈ܐ ܕܫܠܝܼܚܹ̈ܐ܀ ܘܐ݇ܡܸܪܹܗ ܐܸܠܹܗ ܫܸܡܥܘܿܢ؛ ܚܲܢܵܢܝܵܐ. ܡܘܼܕܝܼ ܝ݇ܠܵܗ̇ ܕܗܵܕܟ̣ܵܐ ܣܵܛܵܢܵܐ ܡܠܹܐܠܹܗ ܠܸܒܘܼܟܼ؛ ܩܵܐ ܕܕܲܓܠܸܬ̇ ܒܪܘܼܚܵܐ ܕܩܘܼܕܫܵܐ ܘܛܵܫܸܬ̇ ܡ̣ܢ ܙܘܼܙܹ̈ܐ ܕܗܵܩܵܐ ܕܚܲܩܠܵܐ؟ ܠܹܐ ܗ݇ܘܵܐ ܕܝܼܘܼܟܼ ܡ̣ܢ ܩܵܕ݇ܡ ܕܦܵܝܫܵܐ ܙܘܼܒܸܢܬܵܐ؛ ܘܡ̣ܢ ܒܵܬ݇ܪ ܕܦܸܫܠܵܗ̇ ܙܘܼܒܸܢܬܵܐ ܡܸܕܪܹܐ ܐܝܼܬ ܗ݇ܘܵܐܠܘܼܟܼ ܗܵܩܘܼܬܵܐ ܥܲܠ ܛܝܼܡܵܗ̇. ܩܵܡܘܿܕܝܼ ܡܘܼܬܸܒ̣ܠܘܼܟܼ ܒܠܸܒܘܼܟܼ ܕܥܵܒ̣ܕܸܬ̇ ܐܵܗܵܐ ܡܸܢܕܝܼ؟ ܠܵܐ ܕܘܼܓܸܠܘܼܟܼ ܒܒܢܲܝ̈ܢܵܫܵܐ. ܐܸܠܵܐ ܒܐܲܠܵܗܵܐ܀ ܘܟܲܕ ܫܡܝܼܥܠܹܗ ܚܲܢܵܢܝܵܐ ܐܲܢܹܐ ܚܲܒܪܹ̈ܐ؛ ܢܦܸܠܹܗ ܘܡܝܼܬܠܹܗ܀ ܘܗܘܹܐܠܵܗ̇ ܙܕܘܿܥܬܵܐ ܓܘܼܪܬܵܐ ܒܟܠܲܝܗ‌ܝ ܕܵܐܢܝܼ ܕܫܡܝܼܥܠܗ݇ܘܿܢ؛ ܘܩܝܼܡܠܗ݇ܘܿܢ ܐܵܢܝܼ ܕܝܼܗ݇ܘܵܘ ܓ̰ܘܲܢܩܹ̈ܐ ܓܵܘܲܝܗ‌ܝ ܓ̰ܘܼܡܸܥܠܗ݇ܘܿܢ ܘܦܘܼܠܸܛܠܗ݇ܘܿܢ ܘܩܒ̣ܸܪܗ݇ܘܿܢ ܐܸܠܹܗ܀ ܘܡ̣ܢ ܒܵܬ݇ܪ ܕܗܘܹܐܠܗ݇ܘܿܢ ܬܠܵܬܵܐ ܣܵܥܲܬܹ̈ܐ ܐܘܼܦ ܒܲܟ̣ܬܹܗ ܥܒ̣ܸܪܵܗ̇. ܟܲܕ ܠܹܐ ܝܵܕܥܵܐ ܗ݇ܘܵܐ ܡܘܼܕܝܼ ܝ݇ܠܹܗ ܩܘܼܘܸܡܵܐ܀ ܐܵܡܸܪ ܐܸܠܵܗ̇ ܫܸܡܥܘܿܢ؛ ܐ݇ܡܘܿܪܝ ܐܸܠܝܼ ܐܸܢ ܒܐܲܢܹܐ ܙܘܼܙܹ̈ܐ ܙܘܼܒܢܵܐ ܠܵܘܟ̣ܘܿܢ ܚܲܩܠܵܐ؟ ܘܗ̇‌ܝ ܐ݇ܡܸܪܵܗ̇؛ ܗܹܐ؛ ܒܐܲܢܹܐ ܙܘܼܙܹ̈ܐ܀ ܐܵܡܸܪ ܐܸܠܵܗ̇ ܫܸܡܥܘܿܢ؛ ܡ̣ܢ ܣܵܒܵܒ ܘܗܘܹܐܠܵܘܟ̣ܘܿܢ ܫܲܪ̈ܝܼܟܹܐ ܠܓ̰ܵܪܘܿܒܹܐ ܪܘܼܚܹܗ ܕܡܵܪܝܵܐ. ܗܵܐ ܐܲܩܠܵܬܹ̈ܐ ܕܩܲܒ̣ܪ̈ܵܢܹܐ ܕܓܲܒ̣ܪܵܟ̣ܝ ܒܬܲܪܥܵܐ؛ ܘܗܲܪ ܐܵܢܝܼ ܒܸܬ ܦܵܠܛܝܼ ܠܵܟ̣ܝ܀ ܘܗܲܪ ܒܗ̇‌ܝ ܣܵܥܲܬ ܢܦܸܠܵܗ̇ ܩܵܕ݇ܡ ܐܲܩܠܵܬܲܝ̈ܗ‌ܝ ܘܡܝܼܬܠܵܗ̇. ܘܥܒ̣ܸܪܗ݇ܘܿܢ ܐܵܢܝܼ ܓ̰ܘܲܢܩܹ̈ܐ ܘܡܘܼܫ݇ܟ̰ܚܵܐ ܠܗ݇ܘܿܢ ܡܝܼܬܬܵܐ؛ ܘܓ̰ܘܼܡܸܥܝܵܐ ܠܗ݇ܘܿܢ ܘܠܘܼܒܠܵܐ ܠܗ݇ܘܿܢ ܩܒ̣ܝܼܪܵܐ ܠܗ݇ܘܿܢ ܥܲܡ ܓܲܒ̣ܪܵܗ̇܀ ܘܗܘܹܐܠܵܗ̇ ܙܕܘܿܥܬܵܐ ܓܘܼܪܬܵܐ ܒܟܠܵܗ̇ ܥܹܕܬܵܐ ܘܒܟܠܲܝܗ‌ܝ ܐܵܢܝܼ ܕܫܡܝܼܥܠܗ݇ܘܿܢ܀

 

♱♱♱♱♱♱♱♱♱

 

ܚܲܕܼܒܫܲܒܵܐ ܚܲܕܬܵܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܿܠܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀

 

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ ܘܛܝܼܡܵܬܹܐܘܿܣ ܐܵܚܘܿܢܵܐ* ܠܐܵܢܝܼ ܕܐܝܼܬ ܒܩܘܿܠܸܣܘܿܣ ܐܵܚܘܿܢܘܵܬܹ̈ܐ ܩܲܕܝܼܫܹ̈ܐ ܘܡܗܘܼܡܢܹ̈ܐ. ܒܝܼܫܘܿܥ ܡܫܝܼܚܵܐ ܫܠܵܡܵܐ ܥܲܡܵܘܟܼܘܿܢ ܘܫܵܦܵܩܲܬ ܡ̣ܢ ܐܲܠܵܗܵܐ ܒܵܒܲܢ* ܡܵܘܕܘܿܝܹܐ ܝ݇ܘܲܚ ܠܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܟܠ ܥܕܵܢܵܐ ܘܨܵܠܘܿܝܹܐ ܝ݇ܘܲܚ ܨܠܘܿܬܵܐ ܒܘܼܬ ܕܝܼܵܘܟܼܘܿܢ* ܗܵܐ ܡ̣ܢ ܕܫܡܝܼܥܠܲܢ ܒܘܼܬ ܗܲܝܡܵܢܘܼܬܵܘܟܼܘܿܢ ܒܝܼܫܘܿܥ ܡܫܝܼܚܵܐ ܘܚܘܼܒܵܘܟܼܘܿܢ ܕܠܟܸܣ ܟܠܲܝܗܝ ܩܲܕܝܼܫܹ̈ܐ* ܒܘܼܬ ܗܹܒܼܝܼ ܕܦܝܼܫܬܵܐ ܝ݇ܠܵܗ̇ ܢܛܝܼܪܬܵܐ ܩܵܬܵܘܟܼܘܿܢ ܓܵܘ ܫܡܲܝܵܐ. ܗ̇ܝ ܕܡ̣ܢ ܩܵܕ݇ܡܵܝܬܵܐ ܫܡܝܼܥܠܵܘܟܼܘܿܢ ܒܗܹܡܸܙܡܲܢ ܕܗܵܩܘܼܬܵܐ ܕܡܲܫܚܲܕܬܵܐ* ܕܦܸܫܠܵܗ̇ ܡܘܼܟܪܸܙܬܵܐ ܐܸܠܵܘܟܼܘܿܢ ܐܲܝܟܼ ܕܐܘܼܦ ܩܵܐ ܟܠܵܗ̇ ܕܘܼܢܝܹܐ. ܘܓܲܪܘܘܼܣܹܐ ܝ݇ܠܵܗ̇ ܘܒܝܼܵܗܒܼܵܐ ܛܥܘܼܢܝܵܬܹ̈ܐ ܕܵܐܟܼܝܼ ܕܐܘܼܦ ܒܝܼܵܘܟܼܘܿܢ ܡ̣ܢ ܝܵܘܡܵܐ ܕܫܡܝܼܥ ܠܵܘܟܼܘܿܢ ܘܝ݇ܕܝܼܥ ܠܵܘܟܼܘܿܢ ܫܵܦܵܩܲܬ ܕܐܲܠܵܗܵܐ ܒܗܵܩܘܼܬܵܐ* ܐܲܝܟܼ ܡܸܢܕܝܼ ܕܝ݇ܠܸܦܠܵܘܟܼܘܿܢ ܡ̣ܢ ܐܵܦܲܦܪܵܐ ܚܲܒܼܪܲܢ ܡܘܼܚܸܒܵܐ ܗ̇ܘ ܕܝܼܠܹܗ ܡ̣ܢ ܓܸܒܵܘܟܼܘܿܢ ܡܫܲܡܫܵܢܵܐ ܡܗܘܼܡܢܵܐ ܕܡܫܝܼܚܵܐ* ܘܗ̇ܘ ܩܲܡ ܡܲܕܸܥ ܠܲܢ ܚܘܼܒܵܘܟܼܘܿܢ ܕܒܪܘܼܚܵܐ* ܒܘܼܬ ܕܐܵܗܵܐ؛ ܐܘܼܦ ܐܲܚܢܲܢ ܡ̣ܢ ܝܵܘܡܵܐ ܕܫܡܝܼܥܠܲܢ ܠܹܐ ܝ݇ܘܲܚ ܒܸܫܠܵܝܵܐ ܡ̣ܢ ܨܵܠܘܿܝܹܐ ܨܠܘܿܬܵܐ ܡ̣ܢ ܓܹܒܵܘܟܼܘܿܢ؛ ܘܠܸܛܠܵܒܵܐ ܕܦܵܝܫܝܼܬܘܿܢ ܡܸܠܝܹܐ ܝ݇ܕܵܥܝܬܵܐ ܕܪܸܙܵܝܹܗ ܕܐܲܠܵܗܵܐ ܒܟܠ ܚܸܟܼܡ̱ܬܵܐ ܘܒܟܠ ܦܲܪܡܵܝܬܵܐ ܕܪܘܼܚܵܐ* ܘܚܵܕܪܝܼܬܘܿܢ ܐܲܝܟܼ ܕܘܵܓ̰ܸܒ ܝܼܠܵܗ̇ ܘܫܵܦܪܝܼܬܘܿܢ ܠܐܲܠܵܗܵܐ ܒܟܠܲܝܗܝ ܦܘܼܠܚܵܢܹ̈ܐ ܛܵܒܹ̈ܐ. ܘܝܵܗ݇ܒܼܝܼܬܘܿܢ ܛܥܘܼܢܝܵܬܹ̈ܐ ܘܓܲܪܘܸܣܝܼܬܘܿܢ ܒܝ݇ܕܵܥܝܬܵܐ ܕܐܲܠܵܗܵܐ* ܘܒܟܠ ܚܲܝܠܵܐ ܦܵܝܫܝܼܬܘܿܢ ܚܘܼܠܸܢܹܐ ܐܲܝܟܼ ܓܘܼܪܘܼܬܵܐ ܕܚܸܩܪܹܗ. ܒܟܠ ܚܡܲܠܬܵܐ ܘܡܲܪܝܲܟܼܬܵܐ ܕܒܹܐܢܵܐ* ܘܒܚܲܕܘܼܬܵܐ ܫܵܟܪܝܼܬܘܿܢ ܠܐܲܠܵܗܵܐ ܒܵܒܵܐ ܕܩܲܡ ܡܲܚܫܸܚܠܲܢ ܠܣܵܡܵܐ ܕܝܵܪܬܘܼܬܵܐ ܕܩܲܕܝܼܫܹ̈ܐ ܒܒܲܗܪܵܐ* ܘܩܲܡ ܦܵܨܹܐ ܠܲܢ ܡ̣ܢ ܗܘܼܟܡܵܐ ܕܚܸܫܟܵܐ. ܘܡܘܼܬܝܲܚܠܹܗ ܠܡܲܠܟܘܼܬܵܐ ܕܒܪܘܼܢܹܗ ܡܘܼܚܸܒܵܐ* ܗ̇ܘ ܕܒܝܼܹܗ ܐܝܼܬܠܲܢ ܦܘܼܪܩܵܢܵܐ ܘܫܒܼܵܩܵܐ ܕܚܛܝܼܵܬܹ̈ܐ* ܕܗ̇ܘ ܒܓܵܢܹܗ ܝܼܠܹܗ ܕܵܡܵܝܬܵܐ ܕܐܲܠܵܗܵܐ ܕܠܹܐ ܦܵܐܸܫ ܚܸܙܝܵܐ؛ ܘܒܘܼܟܼܪܵܐ ܕܟܠܲܝܗܝ ܒܸܪ̈ܝܵܬܹܐ* ܘܒܝܼܹܗ ܦܸܫܠܹܗ ܒܸܪܝܵܐ ܟܠ ܡܸܢܕܝܼ ܕܓܵܘ ܫܡܲܝܵܐ ܘܐܲܪܥܵܐ. ܘܟܠ ܕܦܵܐܸܫ ܚܸܙܝܵܐ ܘܕܠܵܐ ܦܵܐܸܫ ܚܸܙܝܵܐ ܐܸܢ ܡܵܘܬܒܼܹ̈ܐ ܘܐܸܢ ܡܵܪ̈ܵܘܵܬܹܐ؛ ܘܐܸܢ ܐܲܪ̈ܟܘܿܣ ܘܐܸܢ ܫܘܼܠܛܵܢܹ̈ܐ. ܟܠܡܸܢܕܝܼ ܒܐܝܼܕܹܗ ܘܒܝܼܹܗ ܟܸܠܝܵܐ ܝ݇ܠܹܗ* ܘܗܲܪ ܗ̇ܘ ܝܼܠܹܗ ܪܹܫܵܐ ܕܦܲܓܼܪܵܐ ܕܥܸܕܬܵܐ؛ ܕܝܼܠܹܗ ܪܹܫܵܐ ܘܒܘܼܟܼܪܵܐ ܕܡ̣ܢ ܓܵܘܵܐ ܕܡܝܼܬܹ̈ܐ* ܕܗܵܘܹܐ ܩܵܕ݇ܡܵܝܵܐ ܒܟܠ ܡܸܢܕܝܼ. ܕܓܵܘܹܗ ܒܣܸܡܠܵܐ ܠܵܗ̇ ܟܠܵܗ̇ ܟܵܡܝܼܠܘܼܬܵܐ ܠܸܫܪܵܝܵܐ* ܘܒܐܝܹܕܹܗ ܠܣܲܙܓܘܼܪܹܐ ܥܲܡܹܗ ܟܠ ܡܸܢܕܝܼ. ܘܒܐܝܼܕܵܬܘܼܗ̈ܝ ܕܪܹܐܠܹܗ ܫܲܥܢܵܐ ܒܕܸܡܵܐ ܕܙܩܝܼܦܹܗ؛ ܐܸܢ ܕܓܵܘ ܐܲܪܥܵܐ ܘܐܸܢ ܕܓܵܘ ܫܡܲܝܵܐ*

 

♱♱♱♱♱♱♱♱♱

 

ܚܲܕܼܒܫܲܒܵܐ ܚܲܕܬܵܐ

ܝܘܚܢܢ ܟܟ: 19 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ

 

ܐܝܼܢܵܐ ܟܲܕ ܗ݇ܘܹܐܠܹܗ ܪܲܡܫܵܐ ܝܵܘܡܵܐ ܗ̇ܘ ܕܚܲܕܒܫܲܒܵܐ، ܘܬܲܪ̈ܥܹܐ ܕܘܝܼܪܹܐ ܗ݇ܘܵܘ. ܕܐܲܝܟܵܐ ܕܝܼܗ݇ܘܵܘ ܬܲܠܡܝܼ̈ܕܹܐ، ܣܵܒܵܒ ܙܕܘܿܥܬܵܐ ܕܝܗ݇ܘܼܕܵܝܹ̈ܐ. ܐ݇ܬܹܐܠܹܗ ܝܑܼܫܘܿܥ ܟܠܹܐܠܹܗ ܒܲܝܢܵܬܲܝܗܝ. ܘܐ݇ܡܸܪܹܗ ܐܸܠܲܝܗܝ: ܫܠܵܡܵܐ ܥܲܡܵܘܟܼܘܿܢ. ܐܵܗܵܐ ܐ݇ܡܸܪܹܗ: ܘܡܘܼܚܙܹܐܠܹܗ ܐܸܠܲܝܗܝ ܐܝܼܕܵܬܘܼ̈ܗܝ ܘܕܸܦܢܹܗ. ܘܚܕܹܐ ܠܗ݇ܘܿܢ ܬܲܠܡܝܼ̈ܕܹܐ ܕܚܙܹܐܠܗ݇ܘܿܢ ܠܡܵܪܲܢ. ܐܝܼܢܵܐ ܡܸܢ݇ܕܪܹܫ݇ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܫܠܵܡܵܐ ܥܲܡܵܘܟܼܘܿܢ. ܕܲܐܟܼܝܼ ܕܩܲܡ ܫܵܕܸܪܝܼ ܒܵܒܝܼ ܐܘܿܦ ܐܵܢܵܐ ܡܫܵܕܘܼܪܹܐ ܝܘܸܢ ܐܸܠܵܘܟܼܘܿܢ. ܘܟܲܕ ܐܲܢܹܐ ܐ݇ܡܸܪܹܗ: ܢܦܸܚܠܹܗ ܒܝܼܵܝܗܝ ܘܐ݇ܡܸܪܹܗ ܐܸܠܲܝܗܝ: ܩܲܒܠܘܿܢ ܪܘܼܚܵܐ ܕܩܘܼܕܫܵܐ. ܐܸܢ ܫܲܒܼܩܝܼܬܘܿܢ ܚܛܝܼܵܬܹ̈ܐ ܠܐ݇ܢܵܫܵܐ، ܒܸܬ ܦܲܝܫܝܼ ܫܒܼܝܼܩܹܐ ܐܸܠܹܗ. ܘܐܸܢ ܕܲܒܼܩܝܼܬܘܿܢ ܕܐ݇ܢܵܫܵܐ ܒܸܬ ܦܲܝܫܝܼ ܕܒܼܝܼܩܹܐ.  ܐܝܼܢܵܐ ܬܐܘܿܡܵܐ ܚܲܕ݇ ܡ̣ܢ ܬܪܸܥܣܲܪܬܵܐ: ܗ̇ܘ ܕܟܹܐ ܦܵܐܸܫ ܩܸܪܝܵܐ ܬܐܵܡܵܐ، ܠܹܐ ܗ݇ܘܵܐ ܬܵܡܵܐ ܥܲܡܲܝܗܝ ܟܲܕ ܐ݇ܬܹܐܠܹܗ ܝܑܼܫܘܿܥ. ܘܐܲܡܪܝܼ ܐܸܠܹܗ ܬܲܠܡܝܼ̈ܕܹܐ: ܚܙܹܐܠܲܢ ܠܡܵܪܲܢ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܐܸܢ ܠܵܐ ܚܵܙܸܢ ܒܐܝܼ̈ܕܵܬܘܼܗܝ  ܫܵܘܦܵܐ ܕܨܸܨܹ̈ܐ ܘܡܲܬܒܼܸܢ ܒܝܼܵܝܗܝ ܨܸܒ̈ܥܵܬܝܼ. ܘܦܲܫܛܸܢ ܐܝܼܕܝܼ ܒܕܸܦܢܹܗ. ܠܹܐ ܡܗܲܝܡܢܸܢ. ܘܒܵܬ݇ܪ ܬܡܲܢܝܵܐ ܝܵܘܡܵܢܹ̈ܐ ܡܸܢ݇ܕܪܹܫ݇ ܠܓܵܘܵܝܹܐ ܗ݇ܘܵܘ ܬܲܠܡܝܼ̈ܕܹܐ. ܘܬܐܘܿܡܵܐ ܥܲܡܵܝܗܝ. ܘܐ݇ܬܹܐܠܹܗ ܝܑܼܫܘܿܥ ܟܲܕ ܬܲܪ̈ܥܹܐ ܕܘܝܼܪܹܐ. ܟܠܹܐܠܹܗ ܒܲܝܬܦܲܠܓܵܐ. ܘܐ݇ܡܸܪܹܗ ܐܸܠܲܝܗܝ: ܫܠܵܡܵܐ ܥܲܡܵܘܟܼܘܿܢ. ܘܐ݇ܡܸܪܹܗ ܠܬܐܘܿܡܵܐ: ܡܲܝܬܝܼ ܨܸܒܥܘܼܟܼ ܠܲܐܟܼܵܐ. ܘܚܙܝܼ ܐܝܼ̈ܕܵܬܝܼ. ܘܡܲܝܬܝܼ ܐܝܼܕܘܼܟܼ ܘܦܵܫܸܛ ܒܕܸܦܢܝܼ. ܘܠܵܐ ܗܵܘܸܬ ܠܵܐ ܡܗܲܝܡܢܵܐ ܐܸܠܵܐ ܡܗܲܝܡܢܵܐ. ܘܓ̰ܘܼܘܸܒܠܹܗ ܬܐܘܿܡܵܐ ܘܐ݇ܡܸܪܹܗ ܐܸܠܹܗ: ܡܵܪܝܼ ܘܐܲܠܵܗ‌ܝܼ. ܐܵܡܸܪ ܐܸܠܹܗ ܝܑܼܫܘܿܥ: ܐܵܕܝܼܵܐ ܕܩܲܡ ܚܵܙܸܬܠܝܼ ܗܘܼܡܸܢܘܼܟܼ. ܛܘܼܒܼܵܐ ܠܐܲܝܢܝܼ ܕܠܵܐ ܩܲܡ ܚܵܙܝܼܠܝܼ ܘܗܘܼܡܸܢܗ݇ܘܿܢ. ܐܝܼܢܵܐ ܪܵܒܵܐ ܢܝܼܫܲܢܩܹ̈ܐ ܐ݇ܚܹܪ̈݇ܢܹܐ ܥܒܼܸܕܠܹܗ ܝܑܼܫܘܿܥ ܩܵܕ݇ܡ ܬܲܠܡܝܼܕܘܼ̈ܗܝ. ܐܲܝܢܝܼ ܕܠܹܐ ܝܢܵܐ ܟܬܝܼܒܼܹܐ ܒܐܵܗܵܐ ܟܬܵܒܼܵܐ. ܐܝܼܢܵܐ ܐܘܿܦ ܐܲܢܹܐ ܕܟܬܝܼܒܼܹܐ ܝܢܵܐ، ܕܗܲܡܸܢܝܼܬܘܿܢ ܕܝܼܫܘܿܥ ܝܼܠܹܗ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ. ܘܐܝܼܡܵܢ ܕܗܘܼܡܸܢܵܘܟܼܘܿܢ. ܒܸܬ  ܗܵܘܹܝܠܵܘܟܼܘܿܢ ܒܫܸܡܹܗ ܚܲܝܹ̈ܐ ܕܠܥܵܠܲܡ.

 

♱♱♱♱♱♱♱♱♱