ܚܲܕܼܒܫܲܒܵܐ ܕܲܬܼܪܹܝܢ ܕܝܲܠܕܵܐ
ܡܲܦܩܵܢܵܐ؛ ܒ. 1‐11
ܬܸܒ̣ܘ ܘܲܫܠܵܘ ܡܲܦܩܵܢܵܐ؛ ܣܸܦܪܵܐ ܕܲܬܼܪܹܝܢ ܕܐܘܿܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܙܸܠܹܗ ܚܲܕ݇ ܐ݇ܢܵܫܵܐ ܡ̣ܢ ܒܹܝܬ̣ ܠܹܘܝܼ؛ ܘܫܩܸܠܹܗ ܠܒܪܵܬܹܗ ܕܠܹܘܝܼ.܀ ܘܒܛܸܢܵܗ̇ ܒܲܟ̣ܬܵܐ ܘܗܘܼܨܸܠܵܗ̇ ܒܪܘܿܢܵܐ. ܘܚܙܹܐܠܵܗ̇ ܕܫܲܦܝܼܪܵܐ ܝ݇ܠܹܗ؛ ܛܘܼܫܹܐܠܵܗ̇ ܬܠܵܬܵܐ ܝܲܪ̈ܚܹܐ.܀ ܘܠܵܐ ܡܨܹܐܠܵܗ̇ ܡܸܕܪܹܐ ܠܛܵܫܵܝܬܹܗ. ܫܩܸܠܵܗ̇ ܚܲܕ݇ ܣܲܢܕܘܼܩܵܐ ܕܩܲܝܣܵܐ ܘܫܝܼܥܠܵܗ̇ ܒܟܘܼܦܪܵܐ ܘܒܩܝܼܪ؛ ܘܡܘܼܬܸܒ̣ܠܵܗ̇ ܠܝܵܠܵܕ݇ܐ ܓܵܘܹܗ ܘܪܘܼܦܹܐܠܵܗ̇ ܓܵܘ ܡܝܼܵܐ ܪ̈ܲܩܝܼܩܹܐ ܥܲܠ ܣܸܦܬܹܗ ܕܢܲܗܪܵܐ.܀ ܘܟܠܹܐܠܵܗ̇ ܚܵܬܹܗ ܡ̣ܢ ܪܸܚܩܵܐ ܩܵܐ ܕܝܵܕܥܵܐ ܡܘܼܕܝܼ ܒܸܬ ܦܵܐܹܫ ܥܒ̣ܝܼܕܵܐ ܐܸܠܹܗ؟܀ ܨܠܹܐܠܵܗ̇ ܒܪܵܬܹܗ ܕܦܸܪܥܘܿܢ ܕܣܵܚܝܵܐ ܓܵܘ ܢܲܗܪܵܐ؛ ܘܚܸܕܵܡ̈ܝܵܬܵܗ̇ ܒܸܚܕܵܪܵܐ ܗ݇ܘܵܘ ܠܡܲܪܙܵܐ ܕܢܲܗܪܵܐ؛ ܘܚܙܹܐܠܵܗ̇ ܠܣܲܢܕܘܼܩܵܐ ܓܵܘ ܡܝܼܵܐ؛ ܘܫܘܼܕܸܪܵܗ̇ ܠܚܸܕܲܡ̈ܝܵܬܵܗ̇ ܘܫܩܸܠܵܗ̇؛ ܘܦܬܸܚܠܵܗ̇ ܘܚܙܹܐܠܵܗ̇ ܠܝܵܠܵܕ݇ܐ؛ ܘܗܵܐ ܝܵܠܵܕ݇ܐ ܒܸܒܟ̣ܵܝܵܐ؛ ܘܪܘܼܚܸܡܠܵܗ̇ ܥܲܠܹܗ ܘܐ݇ܡܸܪܵܗ̇؛ ܐܵܗܵܐ ܡ̣ܢ ܒܢܲܝ̈ ܥܸܒ̣ܪ̈ܵܝܹܐ ܝ݇ܠܹܗ.܀ ܘܐ݇ܡܸܪܵܗ̇ ܚܵܬܹܗ ܠܒܪܵܬܵܐ ܕܦܸܪܥܘܿܢ؛ ܒܸܬ ܐܵܙܵܠ݇ܢܝ ܩܵܪܝܵܢܲܟ̣ܝ ܒܲܟ̣ܬܵܐ ܡܲܡܸܨܲܢܬܵܐ ܡ̣ܢ ܥܸܒ̣ܪ̈ܵܝܹܐ ܕܡܲܡܸܨܵܐ ܠܵܟ̣ܝ ܐܵܗܵܐ ܝܵܠܵܕ݇ܐ. ܘܐ݇ܡܸܪܵܗ̇ ܐܸܠܵܗ̇ ܒܪܵܬܵܐ ܕܦܸܪܥܘܿܢ ܙܹܠ݇ܝ. ܘܐ݇ܙܸܠܵܗ̇ ܚܲܡܬܵܐ ܘܩܪܹܐܠܵܗ̇ ܠܝܸܡܹܗ ܕܝܵܠܵܕ݇ܐ. ܘܐ݇ܡܸܪܵܗ̇ ܐܸܠܵܗ̇ ܒܪܵܬܵܐ ܕܦܸܪܥܘܿܢ؛ ܗܵܐ ܐܵܗܵܐ ܝܵܠܵܕ݇ܐ ܩܵܬܵܟ̣ܝ ܡܲܡܸܨܠܹܗ ܐܸܠܝܼ؛ ܐܵܢܵܐ ܒܸܬ ܝܵܗܒ̣ܲܢܵܟ̣ܝ ܗܵܩܵܟ̣ܝ. ܘܫܩܸܠܵܗ̇ ܒܲܟ̣ܬܵܐ ܠܝܵܠܵܕ݇ܐ ܘܡܘܼܡܸܨܠܵܗ̇.܀ ܘܓܘܼܪܘܸܣܠܹܗ ܝܵܠܵܕ݇ܐ؛ ܘܡܘܼܬ݇ܝܹܐ ܠܵܗ̇ ܠܒܪܵܬܵܐ ܕܦܸܪܥܘܿܢ ܘܗ݇ܘܹܐܠܹܗ ܩܵܬܵܗ̇ ܒܪܘܿܢܵܐ؛ ܘܩܪܹܐܠܵܗ̇ ܫܸܡܹܗ ܡܘܼܫܹܐ؛ ܣܵܒܵܒ ܕܐ݇ܡܸܪܵܗ̇ ܕܡ̣ܢ ܡܝܼܵܐ ܓܪܸܫܠܝܼ܀
ܚܲܒ̣ܪܹܗ
ܐܹܫܲܥܝܵܐ؛ ܡܛ؛ 1‐7
ܫܠܵܘ ܢܒ̣ܝܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܫܡܸܥܡܘܿܢ ܓܵܙܲܪ̈ܝܵܬܹܐ؛ ܘܡܲܨܝܸܬܘܿܢ ܡܸܠܲܬܹ̈ܐ؛ ܡ̣ܢ ܪܸܚܩܵܐ ܡܵܪܝܵܐ ܩܲܡ ܩܵܪܹܐܠܝܼ؛ ܘܡ̣ܢ ܡܲܪܒܥܵܐ ܘܡ̣ܢ ܟܹܪ݇ܣܵܐ ܕܝܸܡܝܼ ܕܟ̣ܸܪܹܗ ܫܸܡܝܼ.܀ ܥܒ̣ܸܕܠܹܗ ܦܘܼܡܝܼ ܐܲܝܟܼ ܣܲܝܦܵܐ ܚܲܪܘܼܦܵܐ. ܘܒܛܸܠܵܢܝܼܬܵܐ ܕܐܝܼܕܹܗ ܛܘܼܫܝܸܢܹܗ؛ ܩܲܡ ܥܵܒ̣ܸܕܠܝܼ ܐܲܝܟܼ ܓܹܐܪܵܐ ܓܘܼܒܝܵܐ؛ ܘܓܵܘ ܪܸܚܬܹܗ ܚܘܼܡܝܸܢܹܗ.܀ ܘܐ݇ܡܸܪܹܗ ܐܸܠܝܼ ܪܹܓܝܼ ܝ݇ܘܸܬ̇؛ ܝܼܣܪܵܝܹܠ ܕܒܝܼܘܼܟܼ ܦܝܵܫܵܐ ܝ݇ܘܸܢ ܚܩܝܼܪܵܐ؛ ܘܠܵܐ ܐ݇ܡܸܪܝܼ ܠܙܲܪܥܹܗ ܕܝܲܥܩܘܿܒ̣ ܣܪܝܼܩܵܐܝܼܬ [ܒܗܵܒܵܣܘܼܬܵܐ] ܓ̰ܗܹܐܠܝܼ ܒܝܼܘܼܟܼ ܘܝܘܼܗܒ̣ܸܠܝܼ ܚܲܝܠܝܼ ܠܒܲܛܝܼܠܘܼܬܵܐ. ܒܫܲܪܝܼܪܘܼܬܵܐ ܕܝܼܘܵܢܝܼ ܩܵܕ݇ܡ ܡܵܪܝܵܐ ܝ݇ܠܵܗ̇؛ ܘܦܘܼܠܚܵܢܝܼ ܩܵܕ݇ܡ ܐܲܠܵܗܝܼ.܀ ܐܵܕܝܼܵܐ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܩܲܡ ܓܵܒ̣ܸܠܝܼ ܒܡܲܪܒܥܵܐ ܕܗܵܘܸܢ ܐܸܠܹܗ ܪܹܓܵܐ؛ ܘܡܲܕܸܪܸܢ ܠܝܲܥܩܘܿܒ̣ ܠܟܸܣܠܹܗ ܘܠܝܼܣܪܵܝܹܠ ܒܸܬ ܓ̰ܵܡܥܸܢ. ܦܸܫܠܝܼ ܚܩܝܼܪܵܐ ܩܵܕ݇ܡ ܡܵܪܝܵܐ؛ ܘܐܲܠܵܗܝܼ ܗ݇ܘܹܐܠܹܗ ܚܲܝܠܝܼ.܀ ܘܐ݇ܡܸܪܹܗ ܒܵܨܘܿܪܬܵܐ ܝ݇ܠܵܗ̇ ܕܗܵܘܸܬ̇ ܐܸܠܝܼ ܪܹܓܵܐ ܘܡܲܩܸܡܸܬ̇ ܫܲܒ̣ܛܵܐ ܕܝܲܥܩܘܿܒ̣ ܘܡܲܕܸܪܸܬ̇ ܢܘܼܪܒ̣ܵܐ ܕܝܼܣܪܵܝܹܠ؛ ܩܲܡ ܝܵܗܒ̣ܸܢܘܼܟܼ ܒܲܗܪܵܐ ܠܛܵܝܸܦܹ̈ܐ؛ ܕܗܵܘܸܬ̇ ܦܘܼܪܩܵܢܝܼ ܗܲܠ ܡܲܪ̈ܙܵܢܵܢܹܐ ܕܐܲܪܥܵܐ.
♱♱♱♱♱♱♱♱♱♱
ܚܲܕ݇ܒܼܫܹܒܵܐ ܒ ܕܝܲܠܕܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܛܝܼܡܵܬܹܐܘܿܣ ܐܲܚܲܝ̈ ܒܲܪܸܟܼܡܵܪܝ܀
ܡ̣ܢ ܗܸܡܸܙܡܵܢܹ̈ܐ ܒܲܛܝܼܠܹ̈ܐ ܕܠܲܝܬ ܒܝܼܲܝܗܝ ܦܵܝܕܵܐ ܪܚܘܿܩ؛ ܣܵܒܵܒ ܒܘܼܫ ܙܵܘܕܵܐ ܟܹܐ ܡܲܙܝܸܕܝܼ ܥܲܠ ܟܦܘܼܪܝܵܐ ܕܐܵܢܝܼ ܕܒܠܝܼܓܹܐ ܝ݇ܢܵܐ ܒܝܼـܲܝܗܝ* ܗܲܡܙܲܡܬܲܝܗܝ ܐܲܝܟܼ ܐܲܟܼܠܘܿ ܒܸܬ ܕܵܒܼܩܵܐ ܕܘܼܟܬܵܐ ܒܪܵܒܵܐ ܐ݇ܢܵܫܹ̈ܐ. ܚܲܕ݇ ܡܸܢܲܝܗܝ ܝܼܠܹܗ ܗܸܘܡܹܢܹܐܘܿܣ ܘܗ̇ܘ ܐ݇ܚܹܪܵܢܵܐ ܦܝܼܠܹܛܘܿܣ. ܐܵܢܝܼ ܕܚܠܝܼܛ ܠܗ݇ܘܿܢ ܡ̣ܢ ܣܲܪܲܣܬܘܼܬܵܐ؛ ܘܒܹܐܡܵܪܵܐ ܝ݇ܢܵܐ ܕܩܝܵܡܬܵܐ ܕܡܝܼܬܹ̈ܐ ܗܘܝܼܬܵܐ ܝ݇ܠܵܗ̇؛ ܘܗܲܝܡܵܢܘܼܬܵܐ ܕܚܲܕ݇ܟܡܵܐ ܐ݇ܢܵܫܹ̈ܐ ܡܲܕܘܼܪܹܐ ܝ݇ܢܵܐ* ܐܝܼܢܵܐ ܒܸܢܝܲܬ ܩܘܝܼܬܵܐ ܕܐܲܠܵܗܵܐ ܟܠܝܼܬܵܐ ܝ݇ܠܵܗ̇؛ ܘܐܝܼܬܠܵܗ̇ ܐܵܗܵܐ ܡܘܿܗܪ؛ ܘܟܹܐ ܝܲܕܸܥ ܡܵܪܝܵܐ ܠܐܵܢܝܼ ܕܕܝܼـܹܗ ܝ݇ܢܵܐ ܘܟܹܐ ܡܦܵܪܸܩ ܡ̣ܢ ܥܵܘܠܵܐ ܠܟܠ ܕܩܵܪܹܐ ܠܫܸܡܹܗ ܕܡܵܪܝܵܐ* ܐܝܼܢܵܐ ܓܵܘ ܚܲܕ݇ ܒܲܝܬܵܐ ܓܘܼܪܵܐ ܠܵܐ ܐܲܚܟ̰ܝܼ ܡܵܐܢܹ̈ܐ ܕܕܲܗܒܼܵܐ ܘܣܹܐܡܵܐ ܐܝܼܬ؛ ܐܝܼܢܵܐ ܐܘܼܦ ܕܩܲܝܣܵܐ ܘܐܘܼܦ ܕܦܲܚܵܪܵܐ؛ ܚܲܕ݇ܟܡܵܐ ܩܵܐ ܐܝܼܩܵܪܵܐ ܘܚܲܕ݇ܟܡܵܐ ܩܵܐ ܒܹܨܘܼܪܘܼܬܵܐ* ܐܸܢ ܐ݇ܢܵܫܵܐ ܡܕܵܟܹܐ ܓܵܢܹܗ ܡ̣ܢ ܕܐܲܢܹܐ؛ ܒܸܬ ܗܵܘܹܐ ܡܵܐܢܵܐ ܕܸܟܼܝܵܐ ܩܵܐ ܐܝܼܩܵܪܵܐ ܕܚܵܫܸܚ ܩܵܐ ܡܲܦܠܲܚܬܵܐ ܕܡܵܪܹܗ. ܘܗܘܼܕܪܵܐ ܩܵܐ ܟܠ ܦܘܼܠܚܵܢܵܐ ܛܵܒܼܵܐ* ܡ̣ܢ ܟܠܲܝܗܝ ܫܲܗܘܲܬܝܵܬܹ̈ܐ ܕܓ̰ܘܲܢܩܘܼܬܵܐ ܥܪܘܿܩ؛ ܘܪܚܘܿܛ ܒܵܬ̄ܪ ܟܹܐܢܘܼܬܵܐ ܘܗܲܝܡܵܢܘܼܬܵܐ ܘܚܘܼܒܵܐ ܘܫܠܵܡܵܐ ܥܲܡ ܕܐܵܢܝܼ ܕܩܵܪܝܼ ܠܡܵܪܲܢ ܒܠܸܒܵܐ ܕܸܟܼܝܵܐ* ܡ̣ܢ ܕܘܼܪ̈ܵܫܹܐ ܕܐܲܗܡܵܩܘܼܬܵܐ ܕܠܲܝܬ ܒܝܼـܲܝܗܝ ܝܘܼܠܦܵܢܵܐ ܪܚܘܿܩ؛ ܣܵܒܵܒ ܟܹܐ ܝܵܕܥܸܬ ܦܠܵܫܹ̈ܐ ܟܹܐ ܡܗܲܨܠܝܼ* ܐܝܼܢܵܐ ܪܸܓܵܐ ܕܡܵܪܲܢ ܠܹܐ ܝ݇ܠܹܗ ܕܵܝܢܵܢܵܐ ܕܦܵܠܹܫ؛ ܐܸܠܵܐ ܕܗܵܘܹܐ ܡܲܟܝܼܟܼܵܐ ܠܟܣ ܟܠ ܐ݇ܢܵܫܵܐ؛ ܘܡܲܠܦܵܢܵܐ ܘܒܹܐܢܹܗ ܝܲܪܝܼܟܼܵܬܵܐ* ܕܗܵܘܹܐ ܡܵܠܘܿܦܹܐ ܒܡܲܟܝܼܟܼܘܼܬܵܐ ܠܐܵܢܝܼ ܕܕܵܪܫܝܼ ܕܲܪܩܘܼܒܼܠܹܗ. ܕܒܲܠܟܵܐ ܝܵܗܒܸܠܗ݇ܘܿܢ ܐܲܠܵܗܵܐ ܬܝܵܒܼܘܼܬܵܐ ܘܝܵܕܥܝܼ ܠܣܲܪܲܣܬܘܼܬܵܐ* ܘܡܲܕܟܸܪܝܼ ܓܵܢܲܝܗܝ ܘܦܵܝܫܝܼ ܦܘܼܨܝܸܐ ܡ̣ܢ ܢܸܫܒܹ̈ܐ ܕܣܵܛܵܢܵܐ ܕܒܝܼـܹܗ ܦܸܫܠܗ݇ܘܿܢ ܨܝܼܕܹܐ ܠܪܸܙܵܝܸܗ*
♱♱♱♱♱♱♱♱♱♱
ܠܘܩܐ ܒ: 21 ‐ ܫܘܠܡܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܟܲܕ ܬܘܼܡܸܡܠܗ݇ܘܿܢ ܬܡܵܢܝܵܐ ܝܵܘܡܵܢܹ̈ܐ ܕܦܵܐܸܫ ܓܙܝܼܪܵܐ ܝܲܠܵܕ݇ܐ: ܦܝܼܫܠܹܗ ܩܸܪܝܵܐ ܫܸܡܹܗ ܝܑܼܫܘܿܥ: ܕܦܝܼܫܠܹܗ ܩܸܪܝܵܐ ܡ̣ܢ ܡܲܠܲܐܟܼܵܐ ܡ̣ܢ ܩܵܕ݇ܡ ܕܦܵܐܸܫ ܗ݇ܘܵܐ ܒܛܝܼܢܵܐ ܒܟܲܪ݇ܣܵܐ. ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܬܲܕܟܼܝܼܬܲܝܗܝ: ܐܲܝܟܼ ܢܵܡܘܿܣܵܐ ܕܡܘܼܫܹܐ: ܩܲܡ ܡܲܤܩܝܼܠܹܗ ܠܐܘܿܪܸܫܠܸܡ ܕܡܲܩܪܹܒ̣ܝܼܠܹܗ ܩܵܕ݇ܡ ܡܵܪܝܵܐ: ܐܲܝܟܼ ܕܟܬܝܼܒܼܵܐ ܝܠܹܗ ܒܢܵܡܘܿܣܵܐ ܕܡܵܪܝܵܐ: ܕܟܠ ܕܸܟܼܪܵܐ ܦܲܬܚܵܢܵܐ ܕܡܲܪܒܥܵܐ: ܩܲܕܝܼܫܵܐ ܕܡܵܪܝܵܐ ܦܵܐܸܫ ܩܸܪܝܵܐ. ܘܕܝܲܗ݇ܒܼܝܼ ܕܸܒܼܚܬܵܐ ܕܲܐܟܼܝܼ ܕܝܼܠܹܗ ܐ݇ܡܝܼܪܵܐ ܒܢܵܡܘܿܣܵܐ ܕܡܵܪܝܵܐ: ܙܵܘܓܵܐ ܕܫܘܿܦܢܝܼܢܹ̈ܐ ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ. ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܓܵܘ ܐܘܿܪܸܫܠܸܡ ܫܸܡܹܗ ܝܼܗ݇ܘܵܐ ܫܸܡܥܘܿܢ: ܘܐܵܗܵܐ ܐ݇ܢܵܫܵܐ ܟܹܐܢܵܐ ܝܗ݇ܘܵܐ ܘܙܲܕܝܼܩܵܐ، ܘܒܸܣܦܵܪܵܐ ܝܗ݇ܘܵܐ ܠܝܲܗ݇ܒܼܵܠܬܵܐ ܕܠܸܒܵܐ ܕܝܑܼܣܪܵܝܸܠ: ܘܪܘܼܚܵܐ ܕܩܘܼܕܫܵܐ ܐܝܼܬ ܗ݇ܘܵܐ ܥܲܠܘܼܗܝ: ܘܦܝܼܫܬܵܐ ܝܗ݇ܘܵܐ ܐ݇ܡܝܼܪܬܵܐ ܐܸܠܹܗ ܡ̣ܢ ܪܘܼܚܵܐ ܕܩܘܼܕܫܵܐ: ܕܠܹܐ ܚܵܙܹܐ ܡܵܘܬܵܐ: ܗܲܠ ܕܚܵܙܹܐ ܠܡܫܝܼܚܹܗ ܕܡܵܪܝܵܐ: ܐܵܗܵܐ ܐܸܬܝܵܐ ܗ݇ܘܵܐ ܒܪܘܼܚܵܐ ܠܗܲܝܟܠܵܐ: ܘܟܲܕ ܡܲܥܒܼܘܼܪܹܐ ܝܗ݇ܘܵܘ ܐܲܒܼܵܗܘܼ̈ܗܝ ܠܝܼܫܘܿܥ ܛܲܠܝܵܐ: ܕܥܲܒܼܕܝܼ ܚܠܵܦ ܕܝܼܹܗ ܕܲܐܟܼܝܼ ܕܦܩܝܼܕܵܐ ܝܠܹܗ ܒܢܵܡܘܿܣܵܐ: ܫܩܸܠܝܼܹܗ ܥܲܠ ܕܪ̈ܵܥܘܼܗܝ: ܘܒܘܼܪܸܟܼܠܹܗ ܠܐܲܠܵܗܵܐ ܘܐ݇ܡܝܼܪܹܗ: ܡ̣ܢ ܐܵܕܝܼܵܐ ܡܵܪܝܼ ܫܪܝܼܠܹܗ ܠܥܲܒܼܕܘܼܟܼ: ܐܲܝܟܼ ܗܹܡܸܙܡܵܢܘܼܟܼ ܒܫܠܵܡܵܐ: ܕܗܵܐ ܚܙܹܐܠܗ݇ܘܿܢ ܥܲܝ̈ܢܝܼ ܚܢܵܢܘܼܟܼ: ܗ̇ܘ ܕܗܘܼܕܸܪܘܼܟܼ ܒܦܲܪܨܘܿܦܵܐ ܕܟܠܲܝܗܝ ܐܸܡܘܵܬܹ̈ܐ: ܢܘܼܗܪܵܐ ܠܓܸܠܝܵܢܵܐ ܕܥܲܡܡܹ̈ܐ: ܘܚܸܩܪܵܐ ܠܥܲܡܘܼܟܼ ܝܑܼܣܪܵܝܹܠ. ܐܝܼܢܵܐ ܝܵܘܣܸܦ ܘܝܸܡܹܗ ܥܲܓ̰ܒܝܼ ܗ݇ܘܵܘ ܥܲܠ ܐܲܝܢܝܼ ܕܦܲܝܫܝܼ ܗ݇ܘܵܘ ܗܘܼܡܙܸܡܹܐ ܒܘܼܬ ܕܝܼܘܼܗܝ: ܘܒܘܼܪܟܼܵܝܠܹܗ ܫܸܡܥܘܿܢ: ܘܐ݇ܡܝܼܪܹܗ ܠܡܲܪܝܲܡ ܝܸܡܹܗ: ܗܵܐ ܐܵܗܵܐ ܡܘܼܬܒܼܵܐ ܝܠܹܗ ܠܢܦܲܠܬܵܐ ܘܠܩܝܵܡܬܵܐ ܕܪܵܒܵܐ ܒܝܼܣܪܵܝܹܠ: ܘܠܐܵܬܵܐ ܕܡܲܩܪܵܨܘܼܬܵܐ: ܘܒܓܵܢܵܐ ܕܝܼܹܟܼܝ ܒܸܕ ܥܲܒܼܪܵܐ ܪܘܼܡܚܵܐ: ܐܲܝܟܼ ܕܦܲܝܫܝܼ ܓܸܠܝܹܐ ܚܘܼܫܵܒܼܹ̈ܐ ܕܠܸܒܵܘܵܬܹ̈ܐ ܕܪܵܒܵܐ. ܘܐܝܼܢܵܐ ܚܲܢܵܐ ܢܒܼܝܼܬܵܐ ܒܪܵܬܹܗ ܕܦܢܘܼܐܹܝܠ ܡ̣ܢ ܫܲܒܼܛܵܐ ܕܐܵܫܹܝܪ: ܐܵܦ ܗ̇ܝ ܥܒܼܝܼܪܬܵܐ ܝܗ݇ܘܵܐ ܒܫܸܢܹ̈ܐ: ܘܫܲܒܼܥܵܐ ܫܸܢܹ̈ܐ ܚܝܹܐܠܵܗ̇ ܥܲܡ ܓܲܒܼܪܘܼܗ̇ ܡ̣ܢ ܒܬܘܼܠܘܼܬܵܗܿ: ܘܗ݇ܘܹܐܠܵܗ̇ ܐܲܪܡܲܠܬܵܐ ܐܲܝܟܼ ܬܡܵܢܝܼ ܘܐܲܪܒܲܥ ܫܸܢܹ̈ܐ: ܘܠܹܐ ܦܵܪܩܵܐ ܗ݇ܘܵܐ ܡ̣ܢ ܗܲܝܟܠܵܐ: ܘܒܨܵܘܡܵܐ ܘܒܨܠܘܿܬܵܐ ܦܵܠܚܵܐ ܗ݇ܘܵܐ ܒܐܝܼܡܵܡܵܐ ܘܒܠܸܠܝܵܐ: ܘܐܘܼܦ ܗ̇ܝ ܩܝܼܡܠܵܗ̇ ܒܗ̇ܝ ܣܵܥܵܬ ܘܫܘܼܟܸܪܵܗ̇ ܠܡܵܪܝܵܐ: ܘܗܲܡܙܸܡܵܐ ܗ݇ܘܵܐ ܒܘܼܬ ܕܝܼܘܼܗܝ ܥܲܡ ܟܠ ܐ݇ܢܵܫܵܐ ܕܒܸܣܦܵܪܵܐ ܝܗ݇ܘܵܐ ܠܦܘܼܪܩܵܢܵܐ ܕܐܘܿܪܸܫܠܸܡ. ܘܟܲܕ ܬܘܼܡܸܡܠܗ݇ܘܿܢ ܟܠ ܡܸܢܕܝܼ ܐܲܝܟܼ ܕܒܢܵܡܘܿܣܵܐ ܕܡܵܪܝܵܐ: ܕܥܝܼܪܗ݇ܘܿܢ ܠܓܠܝܼܠܵܐ ܠܢܵܨܪܲܬ ܡܕܝܼܢ݇ܬܲܝܗܝ. ܐܝܼܢܵܐ ܝܲܠܵܕ݇ܐ ܓܲܪܘܸܣ ܗ݇ܘܵܐ ܘܦܵܐܸܫ ܗ݇ܘܵܐ ܚܘܼܝܠܸܢܵܐ ܒܪܘܼܚܵܐ: ܘܦܵܐܸܫ ܗ݇ܘܵܐ ܡܸܠܝܵܐ ܚܸܟܼܡܬܵܐ: ܘܛܲܝܒܘܼܬܵܐ ܕܐܲܠܵܗܵܐ ܐܝܼܬ ܗ݇ܘܵܐ ܥܲܠܘܼܗܝ. ܘܐ݇ܢܵܫܘܼ̈ܗܝ ܒܟܠ ܫܹܢ݇ܬܵܐ ܟܹܐ ܐܵܙܝܼܠ݇ ܗ݇ܘܵܘ ܠܐܘܿܪܸܫܠܸܡ ܒܥܲܕܥܹܐܕܵܐ ܕܦܸܨܚܵܐ. ܘܟܲܕ ܗ݇ܘܹܐܠܹܗ ܒܲܪ ܬܪܸܥܣܲܪ ܫܸܢܹ̈ܐ: ܣܝܼܩܠܗ݇ܘܿܢ ܠܥܲܕܥܹܐܕܵܐ ܕܲܐܟܼܝܼ ܕܐܝܼܬ ܗ݇ܘܵܘ ܠܗ݇ܘܿܢ ܥܵܕܵܬ. ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܥܝܼܪܗ݇ܘܿܢ: ܐܝܼܢܵܐ ܝܑܼܫܘܿܥ ܛܲܠܝܵܐ ܦܝܼܫܠܹܗ ܒܐܘܿܪܸܫܠܸܡ: ܘܝܵܘܣܸܦ ܘܝܸܡܹܗ ܠܵܐ ܝܕܝܼܥܠܗ݇ܘܿܢ: ܣܵܒܵܒ ܒܸܚܫܵܒܼܵܐ ܝܗ݇ܘܵܘ ܕܥܲܡ ܚܲܒܼܪ̈ܵܘܵܬܲܝܗܝ ܝܼܠܹܗ: ܘܟܲܕ ܐ݇ܬܹܐ ܠܗ݇ܘܿܢ ܐܘܼܪܚܵܐ ܕܚܲܕ݇ ܝܵܘܡܵܐ: ܛܹܥܠܗ݇ܘܿܢ ܒܵܬ݇ܪܹܗ ܠܘܵܬ ܐ݇ܢܵܫܲܝ̈ܗܝ ܘܠܘܵܬ ܡܿܢ ܕܟܹܐ ܝܲܕܸܥ ܗ݇ܘܵܐ ܠܗ݇ܘܿܢ: ܘܠܵܐ ܡܘܼܫ݇ܟ̰ܸܚܠܗ݇ܘܿܢ ܐܸܠܹܗ: ܘܕܥܝܼܪܗ݇ܘܿܢ ܡܸܢ݇ܕܪܹܫ݇ ܠܐܘܿܪܸܫܠܸܡ ܘܛܵܥܝܼ ܗ݇ܘܵܘ ܒܵܬ݇ܪܹܗ: ܘܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ ܡܘܼܫ݇ܟ̰ܸܚܠܗ݇ܘܿܢ ܐܸܠܹܗ ܓܵܘ ܗܲܝܟܠܵܐ ܟܲܕ ܝܬܝܼܒܼܵܐ ܒܐܵܪܵܠܸܓܼ ܕܡܲܠܦܵܢܹ̈ܐ: ܒܸܫܡܵܥܵܐ ܡܸܢܲܝܗܝ ܘܒܵܩܘܼܪܲܝܗܝ: ܘܟܠܲܝܗܝ ܐܵܢܝܼ ܕܫܲܡܥܝܼ ܗ݇ܘܵܘ ܠܹܗ ܥܲܓ̰ܒܝܼ ܗ݇ܘܵܘ ܒܚܸܟܼܡܬܹܗ ܘܒܓ̰ܘܼܘܵܒܘܼ̈ܗܝ: ܘܟܲܕ ܚܙܹܐܠܗ݇ܘܿܢ ܐܸܠܹܗ ܥܘܼܓ̰ܸܒܠܗ݇ܘܿܢ: ܘܐ݇ܡܝܼܪܵܗ̇ ܐܸܠܹܗ ܝܸܡܹܗ: ܒܪܘܿܢܝܼ ܩܵܡܘܼܕܝܼ ܥܒܼܝܼܕܠܘܼܟܼ ܗܲܕܟܼܵܐ ܐܸܠܲܢ: ܕܗܵܐ ܐܵܢܵܐ ܘܒܵܒܘܼܟܼ ܪܵܒܵܐ ܒܥܹܩܘܼܝ ܗ݇ܘܹܐܠܲܢ ܒܸܛܲܥܝܵܐ ܒܵܬ݇ܪܘܼܟܼ: ܐܵܡܸܪ ܐܸܠܲܝܗܝ: ܩܵܡܘܼܕܝܼ ܒܸܛܵܥܵܐ ܝܬܘܿܢ ܗ݇ܘܵܘ ܒܵܬ݇ܪܝܼ؟ ܠܹܐ ܝܵܕܥܝܼܬܘܿܢ ܕܓܵܘ ܒܲܝܬܵܐ ܕܒܵܒܝܼ ܘܵܠܹܐ ܠܝܼ ܕܗܵܘܸܢ؟ ܐܝܼܢܵܐ ܐܵܢܝܼ ܠܵܐ ܦܘܼܪܡܹܐ ܠܗ݇ܘܿܢ ܠܗܹܡܸܙܡܵܢ ܕܐ݇ܡܝܼܪܹܗ ܐܸܠܲܝܗܝ: ܘܨܠܹܐܠܹܗ ܥܲܡܲܝܗܝ ܘܐ݇ܬܹܐܠܹܗ ܠܢܵܨܪܲܬ: ܘܫܵܠܸܡ ܗ݇ܘܵܐ ܐܸܠܲܝܗܝ: ܐܝܼܢܵܐ ܝܸܡܹܗ ܢܲܛܪܵܐ ܗ݇ܘܵܐ ܟܠܲܝܗܝ ܗܹܡܸܙܡܵܢܹ̈ܐ ܒܠܸܒܵܗ̇. ܐܝܼܢܵܐ ܝܑܼܫܘܿܥ ܓܲܪܘܸܣ ܗ݇ܘܵܐ ܒܩܵܘܡܬܹܗ ܘܒܚܸܟܼܡܬܹܗ ܠܘܵܬ ܐܲܠܵܗܵܐ ܘܒܢܲܝ̈ܢܵܫܵܐ.
♱♱♱♱♱♱♱♱♱♱