ܚܲܕܼܒ̇ܫܲܒܵܐ ܕܲܬܼܪܹܝܢ ܕܒܼܵܬܲܪ ܝܲܠܕܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.
ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܚܲܢܵܢܵܐ ܕܲܦܬܼܝܼܚ.
ܫܡܲܥܘ ܗܵܕܹܐ ܟܠܟܼܘܿܢ ܥܲܡܡܹ̈ܐ. ܡܸܟܹ̇ܝܠ ܫܲܒܲܚܘ ܥܲܡܡܹ̈ܐ ܥܲܡܹܗ. ܥܲܡܡܹ̈ܐ ܘܐܸܡ̈ܘܵܬܼܵܐ ܬܵܘ ܢܸܙܡܲܪ ܫܘܼܒܼܚܵܐ. ܠܲܡܫܝܼܚܵܐ ܝܼܫܘܿܥ ܕܦܲܪܩܹܗ ܠܲܟܼܝܵܢܲܢ. ܘܐܲܦܢ̣ܝܼ ܥܲܛܠܘܼܬܲܢ ܠܢܘܼܗܪܵܐ ܕܝܼܕܲܥܬܹܗ. ܘܝܲܗ̣݇ܒܼ ܠܲܢ ܒܛܲܝܒ̇ܘܼܬܹܗ ܚܲܝܹ̈ܐ ܕܲܠܥܵܠܲܡ. ܬܢܝܼ؛ ܫܲܒܲܚ. ܨܠܝܼܒܼܵܐ ܕܲܗܘ݀ܵܐ ܠܲܢ ܥܸܠܲܬܼ ܛܵܒܼ̈ܵܬܼܵܐ. ܘܒܹܗܸܘ ܐܸܬܼܚܲܪܲܪ ܓܸܢܣܲܢ ܡܵܝܘܿܬܼܵܐ. ܗܸܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ̇ܝܘܗܝ ܠܒܼܝܼܫܵܐ ܘܟܼܠܗܹܝܢ ܨܸܢܥܵܬܹ̈ܗ.
ܩܸܪܝܵܢܵܐ؛ ܡܲܦܩܵܢܵܐ ܒ؛ 1‐11. ܚܲܒܼܪܹܗ؛ ܐܹܫܲܥܝܵܐ ܡܛ؛ 1‐7
ܫܘܼܪܵܝܵܐ ܀ܕ܀ ܐܸܡܲܪ ܒܹܝܬܼ ܥܲܡܡܹ̈ܐ ܕܡܵܪܝܵܐ ܐܲܡ̣ܠܸܟܼ* ܘܐܲܬܼܩ̣ܢܵܗ̇ ܠܬܹܒܹܝܠ ܕܠܵܐ ܬܙܘܼܥ* ܢܕܼܘܼܢ ܠܥܲܡܡܹ̈ܐ ܒܲܬܼܪܝܼܨܘܼܬܼܵܐ* ܢܸܚܕ̇ܘܿܢ ܫܡܲܝܵܐ ܘܲܬ̇ܕܼܘܼܨ ܐܲܪܥܵܐ*
ܫܠܝܼܚܵܐ. ܒ؛ܛܝܼܡܵܬܹܐܘܿܣ ܒ؛ 16‐ܫܘܼܠܵܡܵܐ
ܙܘܼܡܵܪܵܐ. ܒܛܘܼܒܲܝܗܘܿܢ܀ ܝܲܩܝܼܪ̈ܵܬܼܵܐ ܐܸܬܼܡܲܠܲܠ ܒܹܟܼܝ ܩܪܝܼܬܹܗ ܕܐܲܠܵܗܲܢ. ܐܸܬ̇ܕܲܟܼܪ ܠܪܵܚܵܒܼ ܘܲܠܒܼܵܒܹܠ ܝܵܕܼܥܵܬ̣̈ܝ. ܗܵܐ ܦܠܸܫܬܵܝܹ̈ܐ ܘܨܘܿܪ ܘܥܲܡܵܐ ܕܟܼܘܼܫܵܝܹ̈ܐ. ܓ܀ ܓܲܒܼܪܵܐ ܓܲܢ݇ܒܵܪܵܐ ܐܸܬܼܝܼܠܸܕܼ ܒܵܗ̇ ܘܗܸܘ ܐܲܬܼܩ̣ܢܵܗ̇. ܡܵܪܝܵܐ ܢܸܡܢܸܐ ܒܲܟܼܬܼܵܒܼܵܐ ܠܥܲܡܹܗ. ܗܵܢܵܐ ܐܸܬ̇ܝܼܠܸܕܼ ܬܲܡܵܢ. ܓ܀
ܐܹܘܲܢܓܲܠܝܘܿܢ. ܠܘܼܩܵܐ ܒ؛ 21‐ܫܘܼܠܵܡܵܐ
ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܩܵܠ؛ ܠ̣ܒܸܫܘ ܠܵܐ ܡܸܬܼܚܲܒ̇ܠܵܢܘܼܬܼܵܐ.
ܫܲܒܲܚܘ ܠܡܵܪܝܵܐ ܡ̣ܢ ܫܡܲܝܵܐ. ܢܸܚܕ̇ܘܿܢ ܫܡܲܝܵܐ ܘܲܬ̇ܕܼܘܼܨ ܐܲܪܥܵܐ. ܢܫܲܒ̇ܚܘܼܢܵܝܗܝ ܫܡܲܝܵܐ ܘܐܲܪܥܵܐ. ܫܡܲܝܵܐ ܘܐܲܪܥܵܐ ܐܸܬܼܚܲܕܲܬܼܘ. ܒܝܲܕܼ ܝܲܠܕܵܐ ܫܒܼܝܼܚܵܐ ܕܡ̣ܢ ܒܬܼܘܼܠܬܵܐ ܐܸܬܼܚܙܝܼ. ܘܡ̣ܢ ܗܵܝܕܹܝܢ ܟܲܕܼ ܡܲܠܲܐܟܹ̈ܐ ܫܠܵܡܵܐ ܐܲܟܼܪܸܙܘ ܗ݇ܘ̣ܵܘ. ܒܪܝܼܬܼܵܐ ܐܸܬܼܡܲܠܝܲܬ̤ ܣܲܒܼܪܵܐ ܛܵܒܼܵܐ ܒܩܵܠܲܝ̈ܗܘܿܢ. ܘܠܵܐ ܡܸܟܹ̇ܝܠ ܒܦܘܼܠܚܵܢܵܐ ܬܥܝܼܫܵܐ ܕܲܚܛܝܼܬܼܵܐ ܡܸܬܼܗܲܦܟܵܐ. ܐܸܬܼܚܙܝܼ ܓܹܝܪ ܒܒܹܝܬܼܠܚܸܡ ܐܲܝܢܵܐ ܕܢܵܣܹ̇ܒܼ ܡܸܨܛܲܠܝܵܢܘܼܬܼܵܐ. ܘܠܵܐ ܡܸܟܹ̇ܝܠ ܒܲܚܒܼܵܠܹܗ ܕܡܵܘܬܵܐ ܡܸܫܬܲܒܼܩܵܐ. ܐܸܠܵܐ ܚܵܕܼܝܵܐ ܘܕܼܵܝܨܵܐ ܒܦܘܼܪܩܵܢܵܐ. ܕܲܥ̣ܒܲܕܼ ܒܚܘܼܒܹ̇ܗ ܒܵܪܘܿܝܵܐ. ܒܡܸܨܥܵܝܵܐ ܕܲܢܣܲܒܼ ܠܓܸܠܝܵܢܵܐ ܕܟܲܣܝܘܼܬܹܗ. ܚܵܕܹܝ̇ܢ ܪܵܘܡܵܐ ܘܥܘܼܡܩܵܐ ܒܝܘܿܡ ܝܲܠܕܵܟܼ ܦܵܪܘܿܩܲܢ ܫܘܼܒܼܚܵܐ ܠܵܟܼ. ܬܢܝܼ؛ ܫܲܒܲܚ ܒܵܗ̇.
ܕܒܹܝܡ. ܥܘܼܢܵܝܵܐ. ܢܵܘܕܸ̇ܐ ܠܒܲܪ ܡܲܠܟܵܐ ܕܐܸܬ̇ܬܲܚܬ̇ܝܼ ܠܘܵܬܲܢ. ܘܲܠܓܸܢܣܲܢ ܡܵܝܘܿܬܼܵܐ ܠܡܵܘܗܲܒܼܬܼܵܐ ܡܥܲܠܲܝܬܵܐ ܒܛܲܝܒ̇ܘܼܬܹܗ ܐܲܫ̣ܘܝܼ ܠܐ݇ܪ̈ܵܙܹܐ ܕܚܝܼ̈ܠܹܐ. ܟܸܢܫܹ̈ܐ ܕܡܲܠܲܐܟܹ̈ܐ ܒܕܸܚܠܵܐ ܪܲܒܵܐ ܘܒܲܪܬܹܝܬܼܵܐ ܩܵܝ̇ܡܝܼܢ ܘܲܡܩܲܕܿܫܝܼܢ ܠܲܫܡܹܗ܀ ܘܲܒܼܬܸܕܼܡܘܼܪܬܵܐ ܪܲܒ̇ܬܼܵܐ ܥܲܡܲܢ ܩܵܥܹܝ̇ܢ ܟܠܗܘܿܢ ܒܩܵܠܹ̈ܐ ܕܩܲܕ̇ܝܼܫܘܼܬܼܵܐ ܘܐܵܡ̇ܪܝܼܢ. ܩܲܕ̇ܝܼܫ ܡܵܪܝܵܐ. ܩܲܕ̇ܝܼܫ ܐܲܠܵܗܵܐ. ܘܲܡܫܲܒܲܚ ܩܲܕ̇ܝܼܫܵܐ ܕܡ̣ܢ ܡܬܼܘܿܡ ܐܝܼܬܼܵܘܗܝ.
ܒܵܬܹ̈ܐ. ܕܵܪܵܐ ܠܕܼܵܪܵܐ ܢܸܫܬܲܥܘܿܢ ܥܒܼܵܕܲܝ̈ܟ. ܘܓܲܢ݇ܒܵܪܘܼܬܼܵܟܼ ܢܚܵܘܘܿܢ؛ ܘܲܒܼܬܸܕܼܡܘܼܪܬܵܐ ܪܲܒ̇ܬܼܵܐ؛ ܘܥܘܼܫܢܵܐ ܕܲܕܼܚܝܼܠܘܼܬܼܵܟܼ ܢܹܐܡܪܘܼܢ. ܘܪܲܒ̇ܘܼܬܼܵܟܼ ܐܸܫܬܲܥܸܐ ؛ ܘܲܒܼܬܸܕܼܡܘܼܪܬܵܐ ܪܲܒܿܬܵܐ.