ܚܲܕܼܒܫܲܒܵܐ ܕܲܬܼܪܹܝܢ ܕܨܵܘܡܵܐ
ܒܪܝܼܬܵܐ ܗ؛ 18‐32
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܼܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܚܝܹܐܠܹܗ ܝܲܪܕ ܡ̣ܢ ܒܵܬ݇ܪ ܕܗܘܼܨܸܠܹܗ ܠܚܢܘܿܟܼ ܬܡܵܢܹܐܡܵܐܐ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ. ܘܗ݇ܘܹܐܠܗ݇ܘܿܢ ܟܠܲܝܗܝ ܝܵܘܡܵܢܹ̈ܐ ܕܝܲܪܕ ܐܸܬܫܲܥܡܵܐܐ ܘܐܸܫܬܝܼ ܘܬܲܪܬܹܝ ܫܸܢܹ̈ܐ ܘܡܝܼܬܠܹܗ.܀ ܘܚܝܹܐܠܹܗ ܚܢܘܿܟܼ ܐܸܫܬܝܼ ܘܚܲܡܸܫ ܫܸܢܹ̈ܐ ܘܗܘܼܨܸܠܹܗ ܠܡܲܬܘܼܫܠܲܚ.܀ ܘܫܦܸܪܹܗ ܚܢܘܿܟܼ ܠܐܲܠܵܗܵܐ ܡ̣ܢ ܒܵܬ݇ܪ ܕܗܘܼܨܸܠܹܗ ܠܡܲܬܘܼܫܠܲܚ؛ ܬܠܵܬ݇ܡܵܐܐ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܗ݇ܘܹܐܠܗ݇ܘܿܢ ܟܠܲܝܗܝ ܝܵܘܡܵܢܹ̈ܐ ܕܚܢܘܿܟܼ ܬܠܵܬ݇ܡܵܐܐ ܘܐܸܫܬܝܼ ܘܚܲܡܸܫ ܫܸܢܹ̈ܐ.܀ ܘܫܦܸܪܹܗ ܚܢܘܿܟܼ ܠܐܲܠܵܗܵܐ ܘܠܲܝܬ̇؛ ܣܵܒܵܒ ܕܫܩܸܠܹܗ ܐܲܠܵܗܵܐ.܀ ܘܚܝܹܐܠܹܗ ܡܲܬܘܼܫܠܲܚ ܡܵܐܐ ܘܬܡܵܢܝܼ ܘܫܲܒ̣ܲܥ ܫܸܢܹ̈ܐ؛ ܘܗܘܼܨܸܠܹܗ ܠܠܲܡܟ. ܘܚܙܹܐܠܹܗ ܡܲܬܘܼܫܠܲܚ ܡ̣ܢ ܒܵܬ݇ܪ ܕܗܘܼܨܸܠܹܗ ܠܠܲܡܟ؛ ܫܒ̣ܲܥܡܵܐܐ ܘܬܡܵܢܝܼ ܘܬܪܹܝ ܫܸܢܹ̈ܐ؛ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܗ݇ܘܹܐܠܗ݇ܘܿܢ ܟܠܲܝܗܝ ܝܵܘܡܵܢܹ̈ܐ ܕܡܲܬܘܼܫܠܲܚ ܐܸܬܫܲܥܡܵܐܐ ܘܐܸܫܬܝܼ ܘܐܸܬܫܲܥ ܫܸܢܹ̈ܐ؛ ܘܡܝܼܬܠܹܗ.܀ ܘܚܝܹܐܠܹܗ ܠܲܡܟ ܡܵܐܐ ܘܬܡܵܢܝܼ ܘܬܪܹܝ ܫܸܢܹ̈ܐ؛ ܘܗܘܼܨܸܠܹܗ ܒܪܘܿܢܵܐ.܀ ܘܩܪܹܐܠܹܗ ܫܸܡܹܗ ܢܘܿܚ؛ ܘܐ݇ܡܸܪܹܗ ܐܵܗܵܐ ܒܸܬ ܝܵܗ݇ܒ̣ܸܠܲܢ ܠܸܒܵܐ ܡ̣ܢ ܦܵܘܠܚܵܢܲܢ ܘܡ̣ܢ ܥܲܡܠܵܐ ܕܐܝܼܕ̈ܵܬܲܢ؛ ܘܡ̣ܢ ܐܲܪܥܵܐ ܕܠܝܼܛܵܐ ܠܹܗ ܡܵܪܝܵܐ.܀ ܘܚܝܹܐܠܹܗ ܠܲܡܟ ܡ̣ܢ ܒܵܬ݇ܪ ܕܗܘܼܨܸܠܹܗ ܠܢܘܿܚ ܚܲܡܸܫܡܵܐܐ ܘܐܸܬܫܥܝܼ ܘܚܲܡܸܫ ܫܸܢܹ̈ܐ ܘܗܘܼܨܸܠܹܗ ܒܢܘܿܢܹ̈ܐ ܘܒܢܵܬܹ̈ܐ.܀ ܘܗ݇ܘܹܐܠܗ݇ܘܿܢ ܟܠܲܝܗܝ ܝܵܘܡܵܢܹ̈ܐ ܕܠܲܡܟ ܫܲܒ̣ܲܥܡܵܐܐ ܘܫܲܒ̣ܥܝܼ ܘܫܲܒ̣ܲܥ ܫܸܢܹ̈ܐ؛ ܘܡܝܼܬܠܹܗ܀
ܚܲܒ̣ܪܹܗ
ܝܼܫܘܿܥ ܒܲܪܢܘܿܢ ܕ؛ 15‐ܫܘܼܠܵܡܵܐ.
ܫܠܵܘ ܟܬܵܒ̣ܵܐ ܕܝܼܫܘܿܥ ܒܪܢܘܿܢ؛ ܐܲܚܲܝ̈ ܒܲܪܸܟ̣ܡܵܪܝ܀
ܐ݇ܡܸܪܹܗ ܡܵܪܝܵܐ ܠܝܼܫܘܿܥ.܀ ܦܩܘܿܕ ܠܟܵܗܢܹ̈ܐ ܫܵܩܠܵܢܹ̈ܐ ܕܩܹܒ̣ܘܼܬܵܐ؛ ܘܐܵܣܩܝܼ ܡ̣ܢ ܓܵܘ ܝܘܿܪܕܢܵܢ.܀ ܘܦܘܼܩܸܕܠܹܗ ܝܼܫܘܿܥ ܠܟܵܗܢܹ̈ܐ ܘܐ݇ܡܸܪܹܗ ܐܸܠܲܝܗܝ؛ ܐ݇ܣܘܿܩܘܿܢ ܡ̣ܢ ܓܵܘ ܝܘܿܪܕܢܵܢ.܀ ܘܟܲܕ ܐ݇ܣܸܩܠܗ݇ܘܿܢ ܟܵܗܢܹ̈ܐ ܫܵܩܠܵܢܹ̈ܐ ܕܩܹܒ̣ܘܼܬܵܐ ܕܩܘܼܠܵܐ ܕܡܵܪܝܵܐ ܡ̣ܢ ܓܵܘ ܝܘܿܪܕܢܵܢ؛ ܘܣܢܸܕܠܗ݇ܘܿܢ ܦܲܣܵܬܹ̈ܐ [ܫܵܘܦܵܦܹ̈ܐ] ܕܐܲܩܠܵܬܹ̈ܐ ܕܟܵܗܢܹ̈ܐ ܥܲܠ ܒܸܪܙܵܐ؛ ܘܕܸܪܗ݇ܘܿܢ ܡܝܼܵܐ ܕܝܘܿܪܕܢܵܢ ܠܕܘܼܟܬܵܝܗܝ؛ ܘܓ̰ܪܹܐܠܗ݇ܘܿܢ ܐܲܝܟܼ ܩܲܕ݇ܡܵܝܬܵܐ ܥܲܠ ܟܠܲܝܗܝ ܡܲܪ̈ܙܵܢܹܐ ܕܝܘܿܪܕܢܵܢ.܀ ܘܛܵܝܸܦܵܐ ܦܠܸܛܠܹܗ ܡ̣ܢ ܓܵܘ ܝܘܿܪܕܢܵܢ؛ ܥܸܣܪܵܐ ܒܝܲܪܚܵܐ ܩܵܕ݇ܡܵܝܵܐ ܘܫܪܹܐܠܗ݇ܘܿܢ ܒܓܲܠܓܵܠܵܐ ܠܕܸܦܢܵܐ ܡܲܕܢܚܵܝܵܐ ܕܐܝܼܪܝܼܚܘܿ.܀ ܘܬܪܸܥܣܲܪ ܟܹܐܦܹ̈ܐ ܕܫܩܸܠܗ݇ܘܿܢ ܡ̣ܢ ܓܵܘ ܝܘܿܪܕܢܵܢ ܡܘܼܩܸܡܝܼܠܹܗ ܝܼܫܘܿܥ ܒܓܲܠܓܵܠܵܐ. ܘܐ݇ܡܸܪܹܗ ܝܼܫܘܿܥ ܠܒܢܲܝ̈ ܝܼܣܪܵܝܹܠ؛ ܐܝܼܡܲܢ ܕܒܲܩܪܝܼܠܵܘܟ̣ܘܿܢ ܒܢܘܿܢ̈ܵܘܟ̣ܘܿܢ ܘܐܵܡܪܝܼ؛ ܡܘܼܕܝܼ ܝ݇ܢܵܐ ܐܲܢܹܐ ܟܹܐܦܹ̈ܐ؟܀ ܡܲܕܥܸܡܘܿܢ ܩܵܐ ܒܢܘܿܢ̈ܵܘܟ̣ܘܿܢ ܘܐ݇ܡܘܿܪܘܿܢ ܐܸܠܲܝܗܝ؛ ܕܒܝܼܲܕ ܒܸܪܙܵܐ ܥܒ̣ܸܪܗ݇ܘܿܢ ܒܢܲܝ̈ ܝܼܣܪܵܝܹܠ ܐܵܗܵܐ ܝܘܿܪܕܢܵܢ.܀ ܘܡܘܼܒܪܸܙܠܹܗ ܡܵܪܝܵܐ ܐܲܠܵܗܵܘܟ̣ܘܿܢ ܡܝܼܵܐ ܕܝܘܿܪܕܢܵܢ ܡ̣ܢ ܩܵܕ݇ܡܵܝܗܝ ܗܲܠ ܕܥܒ̣ܸܪܗ݇ܘܿܢ؛ ܐܲܝܟܼ ܕܥܒ̣ܸܕܠܹܗ ܡܵܪܝܵܐ ܐܲܠܵܗܵܘܟ̣ܘܿܢ ܠܝܵܡܵܐ ܕܣܘܿܦ؛ ܘܡܘܼܒܪܸܙܠܹܗ ܡ̣ܢ ܩܵܕ݇ܡܲܝܢ ܗܲܠ ܕܥܒ̣ܸܪܲܢ.܀ ܘܝܵܕܥܝܼ ܟܠܲܝܗܝ ܛܵܝܸܦܹ̈ܐ ܕܐܲܪܥܵܐ؛ ܐܝܼܕܹܗ ܕܡܵܪܝܵܐ ܚܲܝܠܵܢܬܵܐ ܝ݇ܠܵܗ̇؛ ܘܦܵܠܚܝܼܬܘܿܢ ܠܡܵܪܝܵܐ ܐܲܠܵܗܵܘܟ̣ܘܿܢ ܟܠܲܝܗܝ ܝܵܘܡܵܢܹ̈ܐ܀
♱♱♱♱♱♱♱♱♱
ܚܲܕܼܒܫܲܒܵܐ ܕܲܬܼܪܹܝܢ ܕܨܵܘܡܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܪ̈ܗܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܗܲܕܟܼܵܐ ܡ̣ܢ ܣܵܒܵܒ ܕܦܸܫܠܲܢ ܡܘܼܟܫܸܛܹܐ ܒܗܲܝܡܵܢܘܼܬܵܐ ܒܸܬ ܗܵܘܹܐ ܠܲܢ ܫܠܵܡܵܐ ܠܟܸܣ ܐܲܠܵܗܵܐ ܒܡܵܪܲܢ ܝܼܫܘܿܥ ܡܫܝܼܚܵܐ* ܕܒܝܼܹܗ ܦܸܫܠܲܢ ܩܘܼܪܒܸܢܹܐ ܒܗܲܝܡܵܢܘܼܬܵܐ ܠܐܵܗܵܐ ܫܵܦܩܲܬ ܕܒܝܼܵܗ̇ ܟܸܠܝܹܐ ܝ݇ܘܲܚ ܘܒܸܥܒܼܵܕܵܐ ܫܘܼܒܼܗܵܪܵܐ ܒܗܹܒܼܝܼ ܕܚܸܩܪܹܗ ܕܐܲܠܵܗܵܐ* ܘܠܵܐ ܗܲܪܟܼܵܐ ܐܲܚܟ̰ܝܼ ܐܸܠܵܐ ܐܘܼܦ ܒܝܲܠܨܘܼܘܵܘ̈ܟܼܘܿܢ ܒܸܥܒܼܵܕܵܐ ܝ݇ܘܲܚ ܫܘܼܒܼܗܵܪܵܐ؛ ܕܟܹܐ ܝܵܕܥܲܚ ܕܝܲܠܨܘܼܝ ܚܡܲܠܬܵܐ ܬܲܡܘܼܡܹܐ ܝ݇ܠܵܗ̇ ܒܝܼܲܢ؛ ܘܚܡܲܠܬܵܐ ܢܸܣܝܵܢܵܐ؛ ܘܢܸܣܝܵܢܵܐ ܗܹܒܼܝܼ* ܐܝܼܢܵܐ ܗܹܒܼܝܼ ܠܵܐ ܡܲܢܚܸܦܵܢܵܐ؛ ܣܵܒܵܒ ܕܚܘܼܒܹܗ ܕܐܲܠܵܗܵܐ ܡܘܼܫܦܸܚܵܐ ܝ݇ܠܹܗ ܥܲܠ ܠܸܒܵܘ̈ܵܬܲܢ ܒܪܘܼܚܵܐ ܕܩܘܼܕܫܵܐ ܕܦܸܫܠܵܗ̇ ܝܘܼܗ݇ܒܸܠܬܵܐ ܩܵܬܲܢ* ܘܐܸܢ ܡܫܝܼܚܵܐ ܒܘܼܬ ܚܵܬܸܪ ܕܙܲܒܘܼܢܘܼܬܲܢ ܒܐܵܗܵܐ ܙܲܒܼܢܵܐ ܡ̣ܢ ܓܸܒܵܐ ܕܟܵܦܘܿܪܹ̈ܐ ܡܸܬܠܹܗ* ܒܙܲܗܡܲܬ ܚܲܕ݇ ܐ݇ܢܵܫܵܐ ܡ̣ܢ ܓܹܒܵܐ ܕܟܵܦܘܿܪܹ̈ܐ ܒܸܬ ܡܵܐܸܬ. ܡ̣ܢ ܓܹܒܵܐ ܕܛܵܒܼܹ̈ܐ ܒܲܠܟܵܐ ܚܲܕ݇ ܐ݇ܢܵܫܵܐ ܩܲܫܕܸܪ ܠܸܡܝܵܬܵܐ* ܗܲܕܟܼܵܐ ܡܲܚܙܘܼܝܹܐ ܝ݇ܠܹܗ ܐܲܠܵܗܵܐ ܚܘܼܒܹܗ ܕܠܟܸܣܠܲܢ. ܘܐܸܢ ܟܲܕ ܚܲܛܵܝܹ̈ܐ ܝ݇ܘܲܚ ܗ݇ܘ̣ܵܘ؛ ܡܫܝܼܚܵܐ ܡ̣ܢ ܓܸܒܲܢ ܡܸܬܠܹܗ* ܟܡܵܐ ܒܘܼܫ ܙܵܘܕܵܐ ܦܵܝܫܲܚ ܡܘܼܟܫܸܛܹܐ ܐܵܕܝܼܵܐ ܒܕܸܡܹܗ؛ ܘܒܝܼܹܗ ܦܵܝܫܲܚ ܦܘܼܨܝܹܐ ܡ̣ܢ ܟܲܪܒܵܐ* ܐܸܢ ܟܲܕ ܕܸܫܡܸܢܹ̈ܐ ܝ݇ܘܲܚ ܗ݇ܘܵܘ؛ ܣܘܼܙܓܸܪܹܗ ܥܲܡܲܢ ܐܲܠܵܗܵܐ ܒܡܵܘܬܵܐ ܕܒܪܘܼܢܹܗ. ܟܡܵܐ ܒܘܼܫ ܙܵܘܕܵܐ ܒܣܲܙܓܲܪܬܹܗ ܒܸܬ ܚܲܝܲܚ ܒܚܲܝܘܼܗ̈ܝ* ܘܠܵܐ ܐܲܚܟ̰ܝܼ ܗܲܕܟܼܵܐ؛ ܐܝܼܢܵܐ ܐܘܼܦ ܒܸܬ ܥܵܒܼܕܲܚ ܫܘܼܒܼܗܵܪܵܐ ܒܐܲܠܵܗܵܐ ܒܝܼܲܕ ܡܵܪܲܢ ܝܼܫܘܿܥ ܡܫܝܼܚܵܐ؛ ܕܒܝܼܹܗ ܐܵܕܝܼܵܐ ܩܘܼܒܸܠܲܢ ܣܵܙܓܵܪܬܵܐ* ܣܵܒܵܒ ܕܵܐܟܼܝܼ ܕܒܝܼܲܕ ܚܲܕ݇ ܒܲܪܢܵܫܵܐ ܥܒܸܪܵܗ̇ ܚܛܝܼܬܵܐ ܠܥܵܠܡܵܐ؛ ܘܒܝܼܲܕ ܚܛܝܼܬܵܐ ܡܵܘܬܵܐ. ܗܲܕܟܼܵܐ ܒܟܠܲܝܗܝ ܒܢܲܝ̈ܢܵܫܵܐ ܥܒܼܸܪܹܗ ܡܵܘܬܵܐ. ܒܗ̇ܝ ܕܟܠܲܝܗܝ ܚܛܸܐܠܗ݇ܘܿܢ* ܣܵܒܵܒ ܗܲܠ ܥܕܵܢܵܐ ܕܢܵܡܘܿܣܵܐ. ܚܛܝܼܬܵܐ ܟܲܕ ܐܝܼܬ ܗ݇ܘ̣ܵܐ ܓܵܘ ܕܘܼܢܝܹܐ؛ ܠܹܐ ܝܗ݇ܘ̣ܵܐ ܦܝܼܫܬܵܐ ܚܘܼܫܒܸܢܬܵܐ ܚܛܝܼܬܵܐ. ܣܵܒܵܒ ܕܠܲܝܬ ܗ݇ܘ̣ܵܐ ܢܵܡܘܿܣܵܐ* ܐܸܠܵܐ ܗܘܼܟܸܡܠܹܗ ܡܵܘܬܵܐ ܡ̣ܢ ܐܵܕܲܡ ܗܲܠ ܡܘܼܫܹܐ ܐܘܼܦ ܥܲܠ ܕܐܵܢܝܼ ܕܠܵܐ ܚܛܸܐ ܠܗ݇ܘܿܢ ܒܕܵܡܵܝܬܵܐ ܕܫܡܲܛܬܵܐ ܕܢܵܡܘܿܣܵܐ ܕܐܵܕܲܡ. ܕܝܼܠܹܗ ܕܵܡܵܝܬܵܐ ܕܗ̇ܘ ܕܐܵܬܹܐ* ܐܸܠܵܐ ܠܹܐ ܝܗ݇ܘ̣ܵܐ ܐܲܝܟܼ ܓ̰ܪܲܛܬܵܐ ܗܲܕܟܼܵܐ ܚܲܠܥܲܬ؛ ܣܵܒܵܒ ܐܸܢ ܒܘܼܬ ܚܸܠܛܵܐ ܕܚܲܕ݇ ܐ݇ܢܵܫܵܐ ܪܵܒܵܐ ܡܸܬܠܗ݇ܘܿܢ ܟܡܵܐ ܒܘܼܫ ܙܵܘܕܵܐ ܫܵܦܵܩܲܬ ܕܐܲܠܵܗܵܐ ܘܚܲܠܥܲܬܹܗ ܒܣܵܒܵܒ ܕܚܲܕ݇ ܒܲܪܢܵܫܵܐ ܝܼܫܘܿܥ ܡܫܝܼܚܵܐ ܒܪܵܒܵܐ ܦܵܝܫܵܐ ܡܘܼܙܝܸܕܬܵܐ* ܘܠܵܐ ܐܲܝܟܼ ܢܲܙܵܢܘܼܬܵܐ ܗܲܕܟܼܵܐ ܚܲܠܥܲܬ. ܣܵܒܵܒ ܕܝܼܘܵܢ ܕܗ݇ܘܹܐ ܠܵܗ̇ ܡ̣ܢ ܚܲܕ݇ ܠܓܘܼܢܵܗܟܵܪܘܼܬܵܐ ܗ݇ܘܹܐܠܵܗ̇؛ ܐܝܼܢܵܐ ܚܲܠܥܲܬ ܡ̣ܢ ܚܛܝܼܵܬܹ̈ܐ ܪܵܒܵܐ ܗ݇ܘܹܐܠܵܗ̇ ܠܟܹܐܢܘܼܬܵܐ. ܣܵܒܵܒ ܐܸܢ ܒܘܼܬ ܚܵܬܸܪ ܕܢܲܙܵܢܘܼܬܵܐ ܕܚܲܕ݇ ܐ݇ܢܵܫܵܐ ܗܘܼܟܸܡܠܹܗ ܡܵܘܬܵܐ؛ ܒܘܼܫ ܙܵܘܕܵܐ ܐܵܢܝܼ ܕܫܩܸܠܗ݇ܘܿܢ ܒܘܼܫܵܝܘܼܬܵܐ ܕܫܵܦܵܩܲܬ ܘܕܚܲܠܥܲܬ ܘܕܟܹܐܢܘܼܬܵܐ ܒܚܲܝܹ̈ܐ ܒܸܬ ܡܗܲܟܡܝܼ ܒܝܼܲܕ ܚܲܕ݇ ܝܼܫܘܿܥ ܡܫܝܼܚܵܐ* ܗܲܪ ܐܲܝܟܼ ܕܒܣܵܒܵܒ ܕܓܢܵܗܵܐ ܕܚܲܕ݇ ܗ݇ܘܹܐܠܵܗ̇ ܓܘܼܢܵܗܟܵܪܘܼܬܵܐ ܠܟܠܲܝܗܝ ܒܢܲܝ̈ܢܵܫܵܐ. ܗܲܕܟܼܵܐ ܒܣܵܒܵܒ ܕܟܹܐܢܘܼܬܵܐ ܕܚܲܕ݇؛ ܒܸܬ ܗܵܘܝܵܐ ܓܼܵܠܝܼܒܘܼܬܵܐ ܠܚܲܝܹ̈ܐ ܩܵܐ ܟܠܲܝܗܝ ܒܢܲܝܢܵܫܵܐ* ܕܐܵܟܼܝܼ ܕܒܘܼܬ ܣܵܒܵܒ ܠܵܐ ܡܲܨܝܲܬܬܹܗ ܕܚܲܕ݇ ܒܲܪܢܵܫܵܐ؛ ܪܵܒܵܐ ܚܲܛܵܝܹ̈ܐ ܗܘܹܐܠܗ݇ܘܿܢ؛ ܗܲܕܟܼܵܐ ܐܘܼܦ ܒܣܵܒܵܒ ܕܡܲܨܝܲܬܬܹܗ ܕܚܲܕ݇؛ ܪܵܒܵܐ ܟܹܐܢܹ̈ܐ ܒܸܬ ܗܵܘܝܼ* ܐܝܼܢܵܐ ܬܲܪܥܵܐ ܕܗܘܹܐ ܠܹܗ ܠܢܵܡܘܿܣܵܐ ܩܵܐ ܕܙܵܝܕܵܐ ܚܛܝܼܬܵܐ؛ ܘܒܗ̇ܝ ܕܘܼܟܬܵܐ ܕܙܝܼܕܠܵܗ̇ ܚܛܝܼܬܵܐ؛ ܬܵܡܵܐ ܦܸܫܠܵܗ̇ ܡܘܼܙܝܸܕܬܵܐ ܫܵܦܵܩܲܬ* ܘܐܲܝܟܼ ܕܗܘܼܟܸܡܠܵܗ̇ ܚܛܝܼܬܵܐ ܒܡܵܘܬܵܐ ܗܲܕܟܼܵܐ ܒܸܬ ܗܲܟܡܵܐ ܫܵܦܵܩܲܬ ܒܟܹܐܢܘܼܬܵܐ ܠܚܲܝܹ̈ܐ ܕܠܐܵܒܲܕ ܒܝܼܲܕ ܡܵܪܲܢ ܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܲܕܼܒܫܲܒܵܐ ܕܲܬܼܪܹܝܢ ܕܨܵܘܡܵܐ
ܡܬܝ ܙ: 15 ‐ 28
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐ݇ܡܝܼܪܹܗ ܝܑܼܫܘܿܥ ܗ݇ܘܹܐܡܘܿܢ ܗܸܫܝܵܪ ܡ̣ܢ ܢܒܼܝܼܹ̈ܐ ܕܲܓܵܠܹ̈ܐ ܕܐܵܬܝܼ ܠܟܸܣܠܵܘܟܼܘܿܢ ܒܠܒܼܝܼܫܝܵܬܹ̈ܐ ܕܦܵܐܪܹ̈ܐ: ܐܝܼܢܵܐ ܡ̣ܢ ܠܓܵܘܵܝܹ̈ܐ ܕܹܐܒܼܹ̈ܐ ܟ̰ܵܠܘܿܓ̰ܹ̈ܐ ܝܢܵܐ: ܐܝܼܢܵܐ ܡ̣ܢ ܛܥܘܿܢܝܵܬܲܝ̈ܗܝ ܒܸܬ ܝܲܕܥܝܼܬܘܿܢ ܠܗ݇ܘܿܢ: ܩܵܡܘܿ ܟܹܐ ܠܲܩܛܝܼ ܡ̣ܢ ܟܝܼܬܒܼܹ̈ܐ ܥܲܢܒܼܹ̈ܐ؟ ܝܲܢ ܡ̣ܢ ܩܝܼܘܵܪܹ̈ܐ ܬܹܐܢܹ̈ܐ؟ ܗܲܕܟܼܵܐ ܟܠ ܐܝܼܠܵܢܵܐ ܛܵܒܼܵܐ ܛܥܘܿܢܝܵܬܹ̈ܐ ܫܲܦܝܼܪܹ̈ܐ ܟܹܐ ܥܵܒܼܸܕ. ܐܝܼܢܵܐ ܐܝܼܠܵܢܵܐ ܒܝܼܫܵܐ ܛܥܘܿܢܝܵܬܹ̈ܐ ܒܝܼܫܹ̈ܐ ܟܹܐ ܥܵܒܼܸܕ. ܠܹܐ ܡܵܨܹܐ ܐܝܼܠܵܢܵܐ ܛܵܒܼܵܐ ܛܥܘܿܢܝܵܬܹ̈ܐ ܒܝܼܫܹ̈ܐ ܠܸܥܒܼܵܕܵܐ: ܘܠܵܐ ܐܝܼܠܵܢܵܐ ܒܝܼܫܵܐ ܛܥܘܿܢܝܵܬܹ̈ܐ ܛܵܒܼܹ̈ܐ ܠܸܥܒܼܵܕܵܐ. ܟܠ ܐܝܼܠܵܢܵܐ ܕܠܵܐ ܥܵܒܼܸܕ ܛܥܘܿܢܝܵܬܹ̈ܐ ܛܵܒܼܹ̈ܐ: ܒܸܬ ܦܵܐܸܫ ܩܸܛܥܝܵܐ ܘܒܢܘܼܪܵܐ ܒܸܬ ܢܵܦܸܠ. ܡ̣ܢ ܐܵܕܝܼܵܐ ܡ̣ܢ ܛܥܘܿܢܝܵܬܲܝ̈ܗܝ ܒܸܬ ܝܲܕܥܝܼܬܘܿܢ ܠܗ݇ܘܿܢ. ܠܹܐ ܗ݇ܘܵܐ ܟܠ ܕܐܵܡܸܪ ܐܸܠܝܼ: ܡܵܪܝܼ ܡܵܪܝܼ، ܒܸܬ ܥܵܒܼܸܪ ܠܡܲܠܟܘܼܬܵܐ ܕܫܡܲܝܵܐ: ܐܸܠܵܐ ܡ̇ܢ ܕܥܵܒܼܸܕ ܨܸܒܼܝܵܢܹܗ ܕܒܵܒܝܼ ܕܒܫܡܲܝܵܐ. ܪܵܒܵܐ ܒܸܬ ܐܲܡܪܝܼ ܐܸܠܝܼ ܒܗ̇ܘ ܝܵܘܡܵܐ: ܡܵܪܝܼ: ܡܵܪܝܼ: ܠܵܐ ܒܫܸܡܘܼܟܼ ܢܘܼܒܹܐܠܲܢ: ܘܒܫܸܡܘܼܟܼ ܫܹܐܕܹ̈ܐ ܦܘܼܠܸܛܠܲܢ: ܘܒܫܸܡܘܼܟܼ ܚܲܝܠܹ̈ܐ ܪܵܒܵܐ ܥܒܼܸܕܠܲܢ؟ ܘܗܿܝܓܵܗ̇ ܒܸܬ ܡܵܘܕܸܢ ܐܸܠܲܝܗܝ: ܕܗܝܼܟ̰ ܠܵܐ ܝܕܝܼܥܠܝܼ ܐܸܠܵܘܟܼܘܿܢ: ܪܚܘܿܩܘܿܢ ܡܸܢܝܼ ܦܵܠܵܚܹ̈ܐ ܕܥܵܘܠܵܐ. ܗܲܕܟܼܵܐ ܟܠ ܕܫܵܡܸܥ ܐܲܢܹܐ ܗܹܡܸܙ̈ܡܵܢܝܼ ܘܥܵܒܼܸܕܠܗ݇ܘܿܢ: ܒܸܬ ܦܵܐܸܫ ܕܘܼܡܝܵܐ ܠܓܲܒܼܪܵܐ ܚܲܟܝܼܡܵܐ: ܗ̇ܘ ܕܒܢܹܐܠܹܗ ܒܲܝܬܹܗ ܥܲܠ ܫܘܿܥܵܐ: ܘܨܠܹܐܠܵܗ̇ ܡܸܛܪܵܐ: ܘܐ݇ܬܹܐܠܗ݇ܘܿܢ ܢܲܗܪ̈ܵܘܵܬܹܐ: ܘܡܚܹܐܠܗ݇ܘܿܢ ܦܵܘܚܹ̈ܐ: ܘܩܝܼܬܠܗ݇ܘܿܢ ܒܗ̇ܘ ܒܲܝܬܵܐ ܘܠܵܐ ܢܦܸܠܹܗ: ܣܵܒܵܒ ܫܘܼܬܵܐܤܘܼ̈ܗܝ ܥܲܠ ܫܘܿܥܵܐ ܡܘܼܬܒ̣ܹܐ ܗ݇ܘܵܘ. ܘܟܠܡ̇ܢ ܕܫܵܡܸܥ ܐܲܢܹܐ ܗܹܡܸܙ̈ܡܵܢܝܼ ܘܠܵܐ ܥܵܒܼܸܕܠܗ݇ܘܿܢ: ܒܸܬ ܦܵܐܸܫ ܕܘܼܡܝܵܐ ܠܓܲܒܼܪܵܐ ܣܲܟܼܠܵܐ: ܕܒܢܹܐܠܹܗ ܒܲܝܬܹܗ ܥܲܠ ܚܝܼܙܵܐ: ܘܨܠܹܐܠܵܗ̇ ܡܸܛܪܵܐ ܘܐ݇ܬܹܐܠܗ݇ܘܿܢ ܢܲܗܪ̈ܵܘܵܬܹܐ: ܘܡܚܹܐܠܗ݇ܘܿܢ ܦܵܘܚܹ̈ܐ: ܘܩܝܼܬܠܗ݇ܘܿܢ ܒܗ̇ܘ ܒܲܝܬܵܐ: ܘܢܦܝܼܠܹܗ: ܘܗ݇ܘܹܐܠܵܗ̇ ܢܦܲܠܬܹܗ ܪܲܒܬܵܐ.
♱♱♱♱♱♱♱♱♱