ܚܲܕܼܒ̇ܫܲܒܵܐ ܕܲܬ̣ܪܹܝܢ ܕܨܵܘܡܵܐ

 

   ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ.  

 

ܕܩܲܢܟܹ̇ܐ. ܒܢܸܬ̇ܛܲܝܲܒܼ ܒܕܸܚܠ̱ܬܼܵܐ.

ܐܸܢܵܐ ܕܹܝܢ ܥܠܲܝܟ ܡܵܪܝܵܐ ܐܸܬ̇ܬܲܟܼܠܹܬܼ. ܟܠ ܕܲܡܣܲܒܿܪܝܼܢ ܒܡܵܪܝܵܐ.  ܬܘܼܟܼܠܵܢܵܐ ܕܐܝܼܬܼ ܠܲܢ ܡܵܪܲܢ ܥܲܠ ܪ̈ܲܚܡܲܝܟ. ܡܓܲܪܸܓܼ ܠܲܢ ܕܢܸܫܐܲܠ ܡܸܢܵܟܼ ܫܘܼܒ̣ܩܵܢܵܐ. ܠܵܐ ܗ݇ܘ̣ܵܐ ܕܲܚܢܲܢ ܫܵܘܹܝ̇ܢܲܢ ܡܵܪܝܵܐ. ܐܸܠܵܐ ܕܐܲܢ݇ܬ̇ܘܼ ܡܙܲܕܸܩ ܐܲܢ݇ܬ̇ ܡܲܓܵܢ. ܠܲܕܼܩܵܪܹܝ̇ܢ ܠܵܟܼ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒܿܘܼܬܼܵܐ. ܬܢܝܼ؛ ܫܲܒܲܚ. ܬܵܘ ܟܠܲܢ ܢܸܟ̇ܘܿܦ ܒܘܼܪ̈ܟܲܝܢ ܒܲܨܠܘܿܬܼܵܐ. ܩܕܼܵܡ ܨܠܝܼܒ̣ܵܐ ܕܐܝܼܬܼܵܘܗ‌ܝ ܓܲܙܵܐ ܕܥܘܼܕܼܪ̈ܵܢܹܐ. ܕܢܸܫܟܲܚ ܪ̈ܲܚܡܹܐ ܘܫܘܼܒ̣ܩܵܢܵܐ ܕܚܵܘܒܹ̈ܐ. ܡܵܐ ܕܟܼܠ ܣܵܘܦܝܼ̈ܢ ܢܵܗ̇ܪܝܼܢ ܒܙܲܠܝܼܩܵܘ̈ܗ‌ܝ. ܘܟܲܕܼ ܠܵܐ ܨܵܒܹܝ̇ܢ ܣܵܩܘܿܪ̈ܵܘܗ‌ܝ ܣܵܓ̣ܕ̇ܝܼܢ ܠܡܵܪܘܼܬܹܗ.

 

ܩܸܪܝܵܢܵܐ؛  ܒܪܝܼܬܼܵܐ؛ ܗ؛ 18‐32. ܚܲܒ̣ܪܹܗ؛ ܝܼܫܘܿܥ ܒܲܪܢܘܿܢ؛ ܕ؛ 15‐ܫܘܼܠܵܡܵܐ.

 

ܫܘܼܪܵܝܵܐ؛ ܘ܀ ܐܲܝܢܵܘ ܓܲܒ̣ܪܵܐ ܕܨܵܒܹ̇ܐ ܚܲܝܹ̈ܐ* ܘܪܵܚܹ̇ܡ ܝܵܘ̈ܡܵܬܼܵܐ ܛܵܒܹ̈ܐ ܠܡܸܚܙܵܐ* ܛܲܪ ܠܸܫܵܢܵܟܼ ܡ̣ܢ ܒܝܼܫܬܵܐ* ܘܣܸܦ̈ܘܵܬܼܵܟܼ ܠܵܐ ܢܡܲܠ̈ܠܵܢ ܢܸܟܼܠܵܐ* ܥܒܲܪ ܡ̣ܢ ܒܝܼܫܬܵܐ ܘܲܥܒܸܕܼ ܛܵܒ̣ܬܼܵܐ* ܒܥܝܼ ܫܠܵܡܵܐ ܘܗܲܪܛ̄ ܒܵܬ̣ܪܹܗ*

 

   ܫܠܝܼܚܵܐ؛  ܪ̈ܗ݇ܘܿܡܵܝܹܐ؛ ܗ؛ 1‐ܫܘܼܠܵܡܵܐ.

 

   ܙܘܼܡܵܪܵܐ؛ ܪܹܫ ܣܝܼܥܬܵܐ܀  ܡܵܪܝܵܐ ܡܵܐ ܣ̣ܓ̣ܝܼܘ ܐܵܠܘܿܨܲܝ̈. ܣܲܓܝܼܐܹ̈ܐ ܕܩܵܡ̣ܘ ܥܠܲܝ. ܘܣܲܓܝܼܐܹ̈ܐ ܕܐܵܡ̇ܪܝܼܢ ܠܵܗ̇ ܠܢܲܦ̮ܫܝ. ܠܲܝܬ̇ ܠܹܟܼܝ ܦܘܼܪܩܵܢܵܐ ܒܐܲܠܵܗܹܟܼܝ. ܕ܀ ܘܐܲܢ݇ܬ̇ ܡܵܪܝܵܐ ܡܣܲܝܥܵܢܝ ܘܐܝܼܩܵܪܝ. ܘܲܡܪܲܡ̱ܪܡܵܢܹܗ ܕܪܹܫܝ. ܒܩܵܠܝ ܠܡܵܪܝܵܐ ܩܹܪܝ̇ܬ̣. ܘܲܥ̣ܢܵܢܝ ܡ̣ܢ ܛܘܼܪܹܗ ܩܲܕܝܼܫܵܐ. ܕ܀

 

   ܐܹܘܲܢܓܲܠܝܼܘܿܢ؛  ܡܲܬܲܝ؛ ܙ؛ 15‐28

 

   ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܩܵܠ؛ ܐܲܝܠܹܝܢ ܕܐܸܬ̇ܬ̇ܚܸܕܼܘ.

ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ. ܫܘܼܒܼܚܹܗ ܒܐܲܪܥܵܐ ܘܒܲܫܡܲܝܵܐ.  ܐ݇ܪܵܙܹܗ ܕܲܨܠܝܼܒܼܵܐ ܡܸܬܼܡܲܠܲܠ. ܘܟܼܠ ܒܸܪ̈ܝܵܬܼܵܐ ܡܸܬܼܦܲܨ̈ܚܵܢ. ܕܡܲܠܟܵܐ ܡܫܝܼܚܵܐ ܡܸܬܼܟܿܪܸܙ. ܘܥܵܠܡܵܐ ܟܠܹܗ ܡܸܬܼܩܲܕܲܫ. ܬܢܝܼ؛ ܫܲܒܲܚ ܒܵܗ̇.

 

ܕܒܹܝܡ. ܥܘܼܢܵܝܵܐ.  ܒܪܵܐ ܕܝܲܗ̣݇ܒܼܠܲܢ ܦܲܓ̣ܪܹܗ ܘܲܕܼܡܹܗ. ܗܲܒ̣ܠܲܢ ܚܲܝܹ̈ܐ ܒܡܲܠܟܿܘܼܬܼܵܟܼ. ܬܢܝܼ.

ܒܵܬܹ̈ܐ؛  ܒܗܵܢܵܐ ܝܵܘܡܵܐ ܩܲܕܼܡܵܝܵܐ. ܕܐܝܼܬܼܵܘܗ‌ܝ ܒܘܼܟܼܪܵܐ ܕܝܵܘ̈ܡܵܬܼܵܐ. ܬܵܘ ܢܸܣܲܒ̣ ܦܲܓ̣ܪܹܗ ܘܲܕܼܡܹܗ. ܕܗܵܘ ܒܘܼܟܼܪܵܐ ܕܐܲܠܵܗܘܼܬܼܵܐ܀ ܒܗܵܢܵܐ ܝܵܘܡܵܐ ܩܲܕܼܡܵܝܵܐ. ܫܡܲܝܵܐ ܕܲܠܥܸܠ ܐܸܬܼܒܲܪܝܲܬܸ. ܬܵܘ ܢܸܣܲܒܼ ܦܲܓܼܪܹܗ ܕܲܒ̣ܪܵܐ. ܕܐܸܫܬܲܕܲܪ ܡ̣ܢ ܥܸܠܵܝܵܐ܀ ܒܗܵܢܵܐ ܝܵܘܡܵܐ ܐܸܬܼܒܲܪܝܲܬܸ. ܐܲܪܥܵܐ ܕܡܸܢܵܗ̇ ܟܠܡܸܕܸܡ. ܬܵܘ ܢܸܣܲܒ̣ ܦܲܓ̣ܪܹܗ ܕܲܒ̣ܪܵܐ. ܕܐܝܼܬܼܵܘܗ‌ܝ ܡܵܪܵܐ ܕܟ̣ܠܡܸܕܸ̇ܡ.

 

♱♱♱♱♱♱♱♱♱