ܚܲܕܼܒܫܲܒܵܐ ܕܲܬܼܪܹܝܢ ܕܕܸܢܚܵܐ
ܡܸܢܝܵܢܵܐ ܝ؛ 29‐ ܝܐ؛ 11
ܬܸܒ̣ܘ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܩܵܐ ܚܘܼܒܵܒ ܒܲܪ ܪܥܘܼܐܹܝܠ ܡܸܕܝܵܢܵܝܵܐ ܚܸܡܝܵܢܹܗ ܕܡܘܼܫܹܐ؛ ܒܸܬ ܟܵܘܟ̰ܲܚ [ܐܵܙܲܠ݇ܚ] ܠܐܲܬܪܵܐ ܕܐ݇ܡܸܪܹܗ ܡܵܪܝܵܐ ܒܸܬ ܝܵܗܒ̣ܸܢܹܗ ܩܵܬܵܘܟ̣ܘܿܢ؛ ܬܵܐ ܥܲܡܲܢ ܘܒܸܬ ܗܵܘܝܵܐ ܛܵܒ̣ܬܵܐ ܐܸܠܘܼܟܼ؛ ܣܵܒܵܒ ܕܡܵܪܝܵܐ ܗܘܼܡܙܸܡܠܹܗ ܛܵܒ̣ܬܵܐ ܥܲܠ ܝܼܣܪܵܝܹܠ.܀ ܘܐ݇ܡܸܪܹܗ ܐܸܠܹܗ ܠܹܐ ܐܵܙܸܠ݇ܢ؛ ܐܸܠܵܐ ܒܸܬ ܐܵܙܸܠ݇ܢ ܠܐܲܬܪܝܼ ܘܠܗ̇ܝ ܕܘܼܟܬܵܐ ܕܦܝܼܫܵܐ ܝ݇ܘܸܢ ܗܘܼܨܠܵܐ. ܐܵܡܸܪ ܐܸܠܹܗ ܡܘܼܫܹܐ ܠܵܐ ܫܵܒ̣ܩܸܬ̇ ܠܲܢ؛ ܣܵܒܵܒ ܐܲܢ݇ܬ̇ ܝܵܕܥܸܬ̇ ܕܘܼܟܬܵܐ ܕܫܪܵܝܬܲܢ ܓܵܘ ܒܲܪܝܼܵܐ؛ ܘܒܸܬ ܗܵܘܸܬ̇ ܥܲܠܲܢ ܥܲܝܢܹ̈ܐ.܀ ܘܐܸܢ ܐܵܙܸܠ݇ܬ̇ ܥܲܡܲܢ؛ ܡ̣ܢ ܕܗ̇ܝ ܛܵܒ̣ܬܵܐ ܕܥܵܒ̣ܸܕ ܡܵܪܝܵܐ ܥܲܡܲܢ ܒܸܬ ܗܵܘܹܐܠܘܼܟܼ ܣܵܡܵܐ. ܡܘܼܛܥܸܢܗ݇ܘܿܢ ܘܟܘܸܟ̰ܠܗ݇ܘܿܢ ܡ̣ܢ ܛܘܼܪܹܗ ܕܡܵܪܝܵܐ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ؛ ܘܩܹܒ̣ܘܼܬܵܐ ܕܩܵܘܠܹܗ ܕܡܵܪܝܵܐ ܫܩܸܠܵܗ̇ ܡ̣ܢ ܩܵܕ݇ܡܵܝܗܝ ܐܘܼܪܚܵܐ ܕܚܲܕ݇ ܝܵܘܡܵܐ؛ ܕܗܵܕܪܵܐ ܠܗ݇ܘܿܢ ܕܘܼܟܬܵܐ ܕܫܪܵܝܬܵܐ؛ ܘܥܢܵܢܵܐ ܕܡܵܪܝܵܐ ܥܘܼܠܘܼܠ ܡܸܢܲܝܗܝ ܒܐܝܼܡܵܡܵܐ ܐܝܼܡܲܢ ܕܫܵܩܠܝܼ ܡ̣ܢ ܡܲܫܪܝܼܬܵܐ.܀ ܘܐܝܼܡܲܢ ܕܫܩܸܠܵܗ̇ ܩܹܒ̣ܘܼܬܵܐ؛ ܐ݇ܡܸܪܹܗ ܡܘܼܫܹܐ ܩܘܼܡ ܝܵܐ ܡܵܪܝܵܐ ܘܦܵܝܫܝܼ ܛܘܼܚܛܸܚܹܐ ܣܵܢܝܵܢ̈ܘܼܟܼ؛ ܘܥܵܪܩܝܼ ܕܸܫ̮ܡܸܢ̈ܘܼܟܼ ܡ̣ܢ ܩܵܕ݇ܡܘܼܟܼ.܀ ܟܲܕ ܡܘܼܢܝܸܚܠܵܗ̇ ܐ݇ܡܸܪܹܗ؛ ܕܘܼܪ ܝܵܐ ܡܵܪܝܵܐ ܥܲܠ ܪܸ̈ܒܘܵܬܹܐ ܘܥܲܠ ܐܲܠܦܹ̈ܐ ܕܝܼܣܪܵܝܹܠ.܀ ܘܟܲܕ ܛܘܼܪܛܸܡܠܗ݇ܘܿܢ ܛܵܝܸܦܵܐ؛ ܗ݇ܘܹܐܠܵܗ̇ ܣܪܝܼܬܵܐ ܩܵܕ݇ܡ ܡܵܪܝܵܐ؛ ܘܫܡܝܼܥܠܹܗ ܡܵܪܝܵܐ ܘܚܸܡܠܵܗ̇ ܟܲܪܒܹܗ؛ ܘܬܦܹܐܠܵܗ̇ ܒܝܼܲܝܗܝ ܢܘܼܪܹܗ ܕܡܵܪܝܵܐ؛ ܡܘܼܩܸܕܠܵܗ̇ ܠܚܵܕܸܪ̈ܘܵܢܹܐ ܕܡܲܫܪܝܼܬܵܐ.܀ ܡܘܼܩܘܸܚܠܗ݇ܘܿܢ ܛܵܝܸܦܵܐ ܥܲܠ ܡܘܼܫܹܐ؛ ܘܨܘܼܠܹܐܠܹܗ ܡܘܼܫܹܐ ܩܵܕ݇ܡ ܡܵܪܝܵܐ ܘܟܠܹܐܠܵܗ̇ ܢܘܼܪܵܐ.܀ ܘܩܪܹܐܠܹܗ ܫܸܡܵܐ ܕܗ̇ܘ ܐܲܬܪܵܐ ܝܲܩܕܵܢܵܐ. ܣܵܒܵܒ ܕܬܦܹܐܠܵܗ̇ ܒܝܼܲܝܗܝ ܢܘܼܪܵܐ ܕܡܵܪܝܵܐ.܀ ܘܛܵܝܸܦܵܐ ܚܒ̣ܝܼܛܵܐ ܕܐܝܼܬ ܗ݇ܘܵܐ ܓܵܘܲܝܗܝ ܫܘܼܗܘܸܬܠܗ݇ܘܿܢ؛ ܘܕܸܪܗ݇ܘܿܢ ܡܘܼܒܟ̣ܹܐܠܗ݇ܘܿܢ ܐܘܼܦ ܠܒܢܲܝ̈ ܝܼܣܪܵܝܹܠ؛ ܘܐܵܡܪܝܼ؛ ܡܵܢܝܼ ܡܵܨܹܐ ܡܵܐܟ̣ܸܠܲܢ ܒܸܣܪܵܐ؟ ܒܸܕܟ̣ܵܪܵܐ ܝ݇ܘܲܚ ܢܘܼܢܹ̈ܐ ܕܐܵܟ̣ܠܲܚ ܗ݇ܘܵܘ ܓܵܘ ܡܸܨܪܹܝܢ ܕܠܵܐ ܙܘܼܙܹ̈ܐ؛ ܘܚܝܼܵܪܹ̈ܐ ܘܒܲܫܝܼܠܹ̈ܐ ܘܟܸܪ̈ܵܬܹܐ ܘܒܸܨܠܹ̈ܐ ܘܬܘܼܡܵܐ؛ ܘܐܵܕܝܼܵܐ ܗܵܐ ܓܵܢܲܢ ܒܸܦܢܵܝܵܐ ܝ݇ܠܵܗ̇؛ ܘܠܲܝܬ̇ ܗܝܼܟ̰ ܡܸܢܕܝܼ ܫܒ̣ܘܿܩ ܡ̣ܢ ܕܐܵܗܵܐ ܡܲܢܢܵܐ ܕܩܵܕ݇ܡ ܥܲܝܢܲܢ.܀ ܘܡܲܢܢܵܐ ܐܲܝܟܼ ܒܲܪܙܲܪܥܵܐ ܗ݇ܘܵܐ ܕܫܸܒܸܬ؛ ܡܲܒܝܲܢܬܹܗ ܐܲܝܟܼ ܡܲܒܝܲܢܬܵܐ ܕܒܸܠܘܼܪ.܀ ܚܵܕܸܪ ܗ݇ܘܵܐ ܟܠܹܗ ܛܵܝܸܦܵܐ ܕܓ̰ܲܡܥܝܼ ܗ݇ܘܵܘ ܠܹܗ ܘܛܵܚܢܝܼ ܗ݇ܘܵܘ ܠܹܗ ܒܓܵܪܘܿܣܬܵܐ ܘܕܲܩܕܸܩܝܼ ܗ݇ܘܵܘ ܠܹܗ ܒܚܵܫܘܿܠܬܵܐ؛ ܘܒܵܫܠܝܼ ܗ݇ܘܵܘ ܠܹܗ ܓܵܘ ܩܘܼܣܲܪܬܵܐ؛ ܘܬܲܪܨܝܼ ܗ݇ܘܵܘ ܡܸܢܹܗ ܓܸܪ̈ܕܲܝܹܐ. ܘܛܲܥܡܹܗ ܟܹܐ ܗܵܘܹܐ ܐܲܝܟܼ ܕܟܵܕܵܐ ܠܝܼܫܵܐ ܓܵܘ ܡܸܫܚܵܐ. ܘܐܝܼܡܲܢ ܕܨܵܠܹܐ ܗ݇ܘܵܐ ܛܠܘܼܠܵܐ ܥܲܠ ܡܲܫܪܝܼܬܵܐ ܒܠܲܝܠܹܐ؛ ܢܵܦܸܠ ܥܲܠܹܗ ܡܲܢܢܵܐ܀ ܘܫܡܥܝܼܠܹܗ ܡܘܼܫܹܐ ܠܛܵܝܸܦܵܐ ܟܲܕ ܒܸܟ̣ܝܵܐ ܓܵܘ ܒܲܬܘܵܬܲܝ̈ܗܝ؛ ܟܠ ܐ݇ܢܵܫܵܐ ܒܬܲܪܥܵܐ ܕܡܲܫܟܢܹܗ؛ ܘܚܸܡܠܵܗ̇ ܟܲܪܒܹܗ ܕܡܵܪܝܵܐ؛ ܘܐܘܼܦ ܒܥܲܝܢܹ̈ܐ ܕܡܘܼܫܹܐ ܗ݇ܘܹܐܠܵܗ̇ ܣܪܝܼܬܵܐ܀
ܚܲܒ̣ܪܹܗ
ܐܹܫܲܥܝܵܐ ܡܗ؛ 11‐18
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܩܲܕܝܼܫܵܐ ܕܝܼܣܪܵܝܹܠ ܘܓܵܒ̣ܠܵܢܹܗ. ܡܵܪܝܵܐ ܚܲܝܠܬܵܢܵܐ ܫܸܡܹܗ؛ ܛܠܸܒܠܗ݇ܘܿܢ ܡܸܢܝܼ ܢܝܼܫܲܢܩܹ̈ܐ ܥܲܠ ܒܢܘܿܢ̈ܝܼ ܘܥܲܠ ܦܘܼܠܚܵܢܵܐ ܕܐܝܼܕ̈ܝܼ ܩܲܡ ܦܲܩܕܝܼ ܠܝܼ. ܐܵܢܵܐ ܥܒ̣ܸܕܠܝܼ ܐܲܪܥܵܐ؛ ܘܒܲܪܢܵܫܵܐ ܥܲܠܵܗ̇؛ ܐܵܢܵܐ ܒܐܝܼܕ̈ܝܼ ܡܬܸܚܠܝܼ ܫܡܲܝܵܐ؛ ܘܠܟܠܹܗ ܚܲܝܠܲܝܗܝ ܦܘܼܩܸܕܠܝܼ؛ ܐܵܢܵܐ ܡܘܼܪܥܸܫܠܝܼ ܐܸܠܹܗ ܒܙܲܕܝܼܩܘܼܬܵܐ؛ ܘܟܠܲܝܗܝ ܐܘܼܪ̈ܚܵܬܹܗ ܒܸܬ ܥܵܒ̣ܕܸܢ ܕܘܼܙ. ܗ̇ܘ ܒܸܬ ܒܵܢܹܐ ܡܕܝܼܢܵܬ̈ܝܼ ܘܣܠܵܒܝܼ ܒܸܬ ܫܲܕܸܪ؛ ܠܵܐ ܒܙܘܼܙܹ̈ܐ ܘܠܵܐ ܒܪܸܫܘܲܬ؛ ܒܹܐܡܵܪܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ. ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܦܘܼܠܚܵܢܵܐ ܕܡܸܨܪܹܝܢ ܬܲܓܵܪܹ̈ܐ ܕܟܘܼܫ ܘܫܒ̣ܵܐ؛ ܐ݇ܢܵܫܵܐ ܕܩܵܘܡܬܵܐ ܥܲܠܵܟ̣ܝ ܒܸܬ ܥܵܒ̣ܪܝܼ؛ ܘܕܝܼܵܟ̣ܝ ܒܸܬ ܗܵܘܝܼ؛ ܘܒܵܬ݇ܪܵܟ̣ܝ ܒܸܬ ܐܵܙܠ݇ܝܼ؛ ܘܒܫܸܫܸܠܝܵܬܹ̈ܐ ܒܸܬ ܥܵܒ̣ܪܝܼ ܘܐܸܠܵܟ̣ܝ ܒܸܬ ܣܵܓ̣ܕܝܼ؛ ܘܓܵܘܵܟ̣ܝ ܒܸܬ ܡܨܵܠܝܼ؛ ܣܵܒܵܒ ܓܵܘܵܟ̣ܝ ܝܼܠܹܗ ܐܲܠܵܗܵܐ؛ ܘܠܲܝܬ̇ ܚܲܕ݇ ܐܲܠܵܗܵܐ ܐ݇ܚܹܪ݇ܢܵܐ. ܒܫܲܪܝܼܪܘܼܬܵܐ. ܐܲܢ݇ܬ̇ ܝܼܘܸܬ̇ ܚܵܡܝܵܢܵܐ ܘܢܵܛܪܵܢܵܐ؛ ܐܲܠܵܗܹܗ ܕܝܼܣܪܵܝܹܠ ܘܦܵܪܘܿܩܹܗ؛ ܢܟ̣ܸܦܠܗ݇ܘܿܢ ܘܟܘܼܣܹܐܠܗ݇ܘܿܢ ܦܵܬܲܝܗܝ ܟܠܲܝܗܝ ܡܐܸܚܕܵܕܹܐ ܕܚܵܕܪܝܼ ܒܢܟ̣ܸܦܬܵܐ؛ ܘܬܲܪܨܝܼ ܨܵܢܲܡܹ̈ܐ.܀ ܦܘܼܪܩܵܢܹܗ ܕܝܼܣܪܵܝܹܠ ܒܡܵܪܝܵܐ ܝ݇ܠܹܗ ܦܵܪܘܿܩܵܐ ܕܥܵܠܡܹ̈ܐ؛ ܠܹܐ ܢܵܟ̣ܦܝܼܬܘܿܢ ܘܠܹܐ ܡܲܟܣܝܼܬܘܿܢ ܦܵܬܵܘܟ̣ܘܿܢ ܗܲܠ ܥܵܠܲܡ ܥܵܠܡܝܼܢ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܥܸܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ܀
ܡܐܵܕܝܼܵܐ ܐܵܚܘܿܢܘܵܬܝܼ̈ ܩܲܕܝܼܫܹ̈ܐ ܕܦܸܫܠܵܘܟܼܘܿܢ ܟ̰ܝܼܕܹܐ ܒܩܪܵܝܬܵܐ ܕܡ̣ܢ ܫܡܲܝܵܐ ܚܙܹܐܡܘܿܢ ܠܹܗ ܐܵܗܵܐ ܫܠܝܼܚܵܐ ܘܓܘܼܪܵܐ ܕܟܵܗܢܹ̈ܐ ܕܬܵܘܕܝܼܬܲܢ ܝܼܫܘܿܥ ܡܫܝܼܚܵܐ* ܕܘܲܟܝܼܠ ܝܼܠܹܗ ܩܵܐ ܕܗ̇ܘ ܕܩܲܡ ܥܵܒܹܕ ܠܹܗ ܐܲܝܟܼ ܡܘܼܫܹܐ ܒܟܠܹܗ ܒܲܝܬܹܗ* ܚܸܩܪܵܐ ܕܐܵܗܵܐ؛ ܒܘܼܫ ܓܘܼܪܵܐ ܝ݇ܠܹܗ ܡ̣ܢ ܕܗ̇ܘ ܕܡܘܼܫܹܐ ܕܐܵܟܼܝܼ ܕܒܘܼܫ ܪܵܒܵܐ ܝ݇ܠܹܗ ܐܝܼܩܵܪܵܐ ܕܒܲܢܵܝܹܗ ܕܒܲܝܬܵܐ ܡ̣ܢ ܒܸܢܝܵܢܹܗ* ܣܵܒܵܒ ܟܠ ܒܲܝܬܵܐ ܡ̣ܢ ܐ݇ܢܵܫܹ̈ܐ ܟܹܐ ܦܵܐܸܫ ܒܸܢܝܵܐ؛ ܘܗ̇ܘ ܕܒܵܢܹܐ ܟܠ؛ ܐܲܠܵܗܵܐ ܝ݇ܠܹܗ* ܘܡܘܼܫܹܐ ܐܲܝܟܼ ܪܸܓܵܐ ܦܸܫܠܹܗ ܥܒܼܝܼܕܵܐ ܘܲܟܝܼܠ ܓܵܘ ܟܠܹܗ ܒܲܝܬܵܐ ܩܵܐ ܣܵܗܕܘܼܬܵܐ ܕܐܵܢܝܼ ܡܸܢܕܝܼܵܢܹ̈ܐ ܕܝܼܗ݇ܘ̣ܵܘ ܗܘܼܕܪܹܐ ܠܸܦܝܵܫܵܐ ܗܘܼܡܙܸܡܸܐ ܒܝܼـܹܗ* ܐܝܼܢܵܐ ܡܫܝܼܚܵܐ ܐܲܝܟܼ ܒܪܘܼܢܵܐ ܥܲܠ ܒܲܝܬܹܗ؛ ܘܐܲܚܢܲܢ ܝܼܘܲܚ ܒܲܝܬܹܗ. ܐܸܢ ܗܲܠ ܚܲܪܬܵܐ ܗܵܘܹܐ ܠܲܢ ܣܘܼܡܦܵܬܝܼܵܐ ܘܫܘܼܒܼܗܵܪܵܐ ܕܗܹܒܼܝܼܹܗ* ܣܵܒܵܒ ܕܐ݇ܡܸܪܹܗ ܪܘܼܚܵܐ ܕܩܘܼܕܫܵܐ ܕܐܸܢ ܐܸܕܝܘܿܡ ܝܵܘܡܵܐ ܫܵܡܥܝܼܬܘܿܢ ܒܩܵܠܹܗ* ܠܵܐ ܡܲܩܫܝܼܬܘܿܢ ܠܸܒܵܘܵܬܵܘ̈ܟܼܘܿܢ ܩܵܐ ܡܲܟܪܲܒܬܹܗ؛ ܐܲܝܟܼ ܡܲܟܪܸ̈ܒܵܢܸܐ ܘܐܲܝܟܼ ܝܵܘܡܵܐ ܕܓ̰ܘܼܪܵܒܵܐ ܓܵܘ ܒܲܪܝܼܵܐ* ܕܓ̰ܘܼܪܸܒܠܗ݇ܘܿܢ ܐܸܠܝܼ ܒܵܒܵܘܵܬܵܘ̈ܟܼܘܿܢ؛ ܘܨܘܼܚܨܹܐܠܗ݇ܘܿܢ ܘܚܙܹܐܠܗ݇ܘܿܢ ܦܘܼܠܚܵܢ̈ܝܼ ܩܵܐ ܐܲܪܒܥܝܼ ܫܸܢܹ̈ܐ ܣܩܸܕ ܗ݇ܘ̣ܵܐ ܠܝܼ ܒܗ̇ܘ ܕܵܘܪܵܐ* ܘܐ݇ܡܸܪܝܼ ܕܚܲܕ݇ ܛܵܝܸܦܵܐ ܝ݇ܠܹܗ ܠܸܒܹܗ ܚܠܝܼܛܵܐ* ܘܐܵܢܝܼ ܠܵܐ ܝ݇ܕܸܥܠܗ݇ܘܿܢ ܐܘܼܪ̈ܚܵܬܝܼ؛ ܐܲܝܟܼ ܕܝ݇ܡܹܐܠܝܼ ܒܟܲܪܒܝܼ ܕܠܵܐ ܥܵܒܼܪܝܼ ܠܡܲܢܝܲܚܬܝܼ* ܒܲܣ ܐܵܚܘܿܢܘܵܬܝܼ̈ ܗܘܹܐܡܘܿܢ ܗܸܫܝܼܪ ܕܠܵܐ ܗܵܘܹܐ ܒܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ ܠܸܒܵܐ ܒܝܼܫܵܐ ܘܠܵܐ ܡܗܘܼܡܢܵܐ ܘܪܵܚܩܝܼܬܘܿܢ ܡ̣ܢ ܐܲܠܵܗܵܐ ܚܲܝܵܐ* ܐܲܠܵܐ ܛܠܘܿܒܘܿܢ ܡ̣ܢ ܓܵܢܵܘܟܼܘܿܢ ܟܠܲܝܗܝ ܝܵܘܡܵܢܹ̈ܐ ܗܲܠ ܕܗ̇ܘ ܝܵܘܡܵܐ ܕܦܵܐܸܫ ܩܸܪܝܵܐ ܐܸܕܝܘܿܡ ܝܵܘܡܵܐ. ܘܗܸܟܼ̃ ܚܲܕ݇ ܡܸܢܵܘܟܼܘܿܢ ܠܵܐ ܦܵܐܸܫ ܡܘܼܩܫܝܼܵܐ ܒܚܸܠܛܵܐ ܕܚܛܝܼܬܵܐ*
♱♱♱♱♱♱♱♱
ܝܘܚܢܢ ܐ: 1 ‐ 29
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܝܘܚܢܢ
♰ ܒܪܵܫܝܼܬ ܝܑܼܗَܘܵܐ ܡܸܠܬܵܐ: ܘܗ̇ܘ ܡܸܠܬܵܐ ܝܼܗَܘܵܐ ܠܘܵܬ ܐܲܠܵܗܵܐ: ܘܐܲܠܵܗܵܐ ܝܼܗَܘܵܐ ܗ̇ܘ ܡܸܠܬܵܐ. ܐܵܗܵܐ ܝܼܗَܘܵܐ ܒܪܵܫܝܼܬ ܠܘܵܬ ܐܲܠܵܗܵܐ: ܟܠܡܸܢܕܝܼ ܒܐܝܼܕܹܗ ܗ݇ܘܹܐܠܹܗ: ܘܕܠܵܐ ܕܝܼܘܼܗܝ ܐܘܼܦ ܠܵܐ ܚܲܕ݇ ܡܸܢܕܝܼ ܗ݇ܘܹܐܠܹܗ ܡ̣ܢ ܡܸܢܕܝܼ ܕܗ݇ܘܹܐܠܹܗ. ܒܝܼܹܗ ܚܲܝܹ̈ܐ ܝܗ݇ܘܵܘ، ܘܚܲܝܹ̈ܐ ܢܘܼܗܪܵܐ ܕܒܢܲܝ̈ܢܵܫܵܐ ܝܢܵܐ. ܘܗ̇ܘ ܢܘܼܗܪܵܐ ܒܚܸܫܟܵܐ ܟܹܐ ܡܲܢܗܸܪ ܘܚܸܫܟܵܐ ܠܹܐ ܡܛܹܐܠܹܗ ܐܸܠܹܗ . ܗ݇ܘܹܐܠܵܗ̇ ܕܚܲܕ݇ ܒܲܪܢܵܫܵܐ ܕܦܝܼܫܠܹܗ ܫܘܼܕܪܵܐ ܡ̣ܢ ܐܲܠܵܗܵܐ ܫܸܡܹܗ ܝܘܿܚܲܢܵܢ: ܐܵܗܵܐ ܐ݇ܬܹܐܠܹܗ ܠܣܵܗܕܘܼܬܵܐ، ܕܣܵܗܸܕ ܥܲܠ ܢܘܼܗܪܵܐ. ܕܟܠ ܐ݇ܢܵܫܵܐ ܡܗܲܝܡܸܢ ܒܐܝܼܕܹܗ. ܗ̇ܘ ܠܹܐ ܝܗ݇ܘܵܐ ܢܘܼܗܪܵܐ، ܐܸܠܵܐ ܕܣܵܗܸܕ ܥܲܠ ܢܘܼܗܪܵܐ. ܣܵܒܵܒ ܝܼܗ݇ܘܵܐ ܢܘܼܗܪܵܐ ܕܫܪܵܪܵܐ ܕܐ݇ܬܹܐܠܹܗ ܠܥܵܠܡܵܐ ܕܡܲܢܗܸܪ ܠܟܠܢܵܫܵܐ. ܓܵܘ ܥܵܠܡܵܐ ܝܗ݇ܘܵܐ: ܘܥܵܠܡܵܐ ܒܐܝܼܕܹܗ ܗ݇ܘܵܐ ܘܥܵܠܡܵܐ ܠܵܐ ܝܕܸܥܠܹܗ ܐܸܠܹܗ. ܠܘܵܬ ܕܝܼܹܠ݇ܗ ܐ݇ܬܹܐܠܹܗ. ܘܕܕܝܼܹܠ݇ܗ ܠܵܐ ܩܘܼܒܸܠܗ݇ܘܿܢ ܐܸܠܹܗ. ܐܝܼܢܵܐ ܐܲܝܢܝܼ ܕܩܘܼܒܸܠܗ݇ܘܿܢ ܐܸܠܹܗ، ܝܘܼܗ݇ܒܼܸܠܹܗ ܐܸܠܲܝܗܝ ܫܘܼܠܛܵܢܵܐ ܕܗܵܘܝܼ ܒܢܘܿܢܹ̈ܐ ܕܐܲܠܵܗܵܐ. ܠܐܲܝܢܝܼ ܕܡܗܲܝܡܢܝܼ ܒܫܸܡܹܗ: ܐܲܝܢܝܼ ܕܠܵܐ ܡ̣ܢ ܕܸܡܵܐ ܘܠܵܐ ܡ̣ܢ ܨܸܒܼܝܵܢܵܐ ܕܒܸܣܪܵܐ، ܘܠܵܐ ܡ̣ܢ ܨܸܒܼܝܵܢܵܐ ܕܓܲܒܼܪܵܐ: ܐܸܠܵܐ ܡ̣ܢ ܐܲܠܵܗܵܐ ܦܝܼܫܠܗ݇ܘܿܢ ܝܠܝܼܕܹܐ: ܘܡܸܠܬܵܐ ܒܸܣܪܵܐ ܗ݇ܘܹܐܠܹܗ ܘܫܪܹܐܠܹܗ ܒܝܼܵܢ. ܘܚܙܹܐܠܲܢ ܫܘܼܒܼܚܹܗ: ܫܘܼܒܼܚܵܐ ܐܲܝܟܼ ܕܝܼܚܝܼܕܵܝܵܐ ܕܡ̣ܢ ܐܲܒܼܵܐ: ܕܡܸܠܝܵܐ ܛܲܝܒܘܼܬܵܐ ܘܩܘܼܫܬܵܐ. ܝܘܿܚܲܢܵܢ ܣܗܝܼܕܠܹܗ ܒܘܼܬ ܕܝܼܘܼܗܝ، ܘܡܘܼܩܘܸܚܠܹܗ ܘܐ݇ܡܝܼܪܹܗ: ܐܵܗܵܐ ܝܼܠܹܗ ܗ̇ܘ ܕܐ݇ܡܝܼܪܝܼ: ܕܡܒܵܬ݇ܪ ܕܝܼܝܼ ܒܹܐܬܵܝܵܐ ܝܠܹܗ، ܘܗ݇ܘܹܐܠܹܗ ܩܲܕ݇ܡܵܝܝܼ، ܣܵܒܵܒ ܕܡ̣ܢ ܩܵܕ݇ܡ ܡܸܢܝܼ ܝܼܗ݇ܘܵܐ. ܡ̣ܢ ܡܸܠܝܘܼܬܹܗ ܐܲܚܢܲܢ ܟܠܲܢ ܫܩܝܼܠܲܢ. ܘܛܲܝܒܘܼܬܵܐ ܚܠܵܦ ܛܲܝܒܘܼܬܵܐ: ܣܵܒܵܒ ܕܢܵܡܘܿܣܵܐ ܒܝܲܕ ܡܘܼܫܹܐ ܦܝܼܫܠܹܗ ܝܘܼܗ݇ܒܼܵܐ. ܐܝܼܢܵܐ ܫܪܵܪܵܐ ܘܛܲܝܒܘܼܬܵܐ ܒܝܲܕ ܝܑܼܫܘܿܥ ܡܫܝܼܚܵܐ ܗ݇ܘܹܐܠܗ݇ܘܿܢ. ܟ̰ܘܼ ܐ݇ܢܵܫܵܐ ܠܵܐ ܚܙܹܐ ܠܹܗ ܠܐܲܠܵܗܵܐ: ܝܼܚܝܼܕܵܝܵܐ ܐܲܠܵܗܵܐ: ܗ̇ܘ ܕܝܼܠܹܗ ܒܥܘܼܒܵܐ ܕܒܵܒܘܼܗܝ، ܗ̇ܘ ܗܘܼܩܹܐܠܹܗ. ܘܐܵܗܵܐ ܝܼܠܵܗ̇ ܣܵܗܕܘܼܬܹܗ ܕܝܘܿܚܢܵܢ. ܟܲܕ ܫܘܼܕܸܪܗ݇ܘܿܢ ܠܘܵܬܹܗ ܝܗ݇ܘܼܕܵܝܹ̈ܐ ܡ̣ܢ ܐܘܿܪܸܫܠܸܡ ܟܵܗܢܹ̈ܐ ܘܠܹܘܵܝܹ̈ܐ ܕܒܲܩܪܝܼܠܹܗ: ܐܲܢ݇ܬ ܡܵܢܝܼ ܝܘܸܬ؟ ܘܡܘܼܕܹܐܠܹܗ ܘܠܵܐ ܣܪܝܼܒܼܠܹܗ. ܘܡܘܼܕܹܐܠܹܗ ܕܠܹܐ ܝܘܸܢ ܐܵܢܵܐ ܡܫܝܼܚܵܐ. ܘܩܲܡ ܒܲܩܪܝܼܠܹܗ ܡܸܢ݇ܕܪܹܫ݇: ܒܵܣ ܡܘܼܕܝܼ؟ ܐܹܠܝܼܵܐ ܝܘܸܬ؟ ܘܐ݇ܡܝܼܪܹܗ: ܠܹܐ ܝܘܸܢ: ܢܒ̣ܝܼܵܐ ܝܘܹܬ؟ ܘܐ݇ܡܝܼܪܹܗ: ܠܵܐ. ܘܐ݇ܡܝܼܪܗ݇ܘܿܢ ܐܸܠܹܗ: ܘܡܵܢܝܼ ܝܘܸܬ؟ ܕܝܲܗܒܼܲܚ ܓ̰ܘܼܘܵܒ ܠܐܵܢܝܼ ܕܩܲܡ ܫܲܕܪܝܼܠܲܢ. ܡܘܼܕܝܼ ܒܹܐܡܵܪܵܐ ܝܘܸܬ ܥܲܠ ܓܵܢܘܼܟܼ؟ ܐܵܡܸܪ: ܐܵܢܵܐ ܝܑܼܘܸܢ ܩܵܠܵܐ ܕܩܵܪܹܐ ܒܒܲܪܝܼܵܐ: ܕܡܲܫܘܲܝܡܘܿܢ ܐܘܼܪܚܹܗ ܕܡܵܪܝܵܐ. ܕܲܐܟܼܝܼ ܕܐ݇ܡܝܼܪܹܗ ܐܹܫܲܥܝܵܐ ܢܒܼܝܼܵܐ. ܐܝܼܢܵܐ ܐܵܢܝܼ ܕܦܝܼܫܠܗ݇ܘܿܢ ܫܘܼܕܪܹܐ ܡ̣ܢ ܦܪ̈ܝܼܫܹܐ ܝܗ݇ܘܵܘ: ܘܩܲܡ ܒܲܩܪܝܼܠܹܗ ܘܐ݇ܡܝܼܪܗ݇ܘܿܢ ܐܸܠܹܗ: ܒܲܣ ܩܵܡܘܼܕܝܼ ܡܲܥܡܘܼܕܹܐ ܝܘܸܬ؟ ܐܸܢ ܐܲܢ݇ܬ ܠܹܐ ܝܘܸܬ ܡܫܝܼܚܵܐ، ܘܠܵܐ ܐܹܠܝܼܵܐ، ܘܠܵܐ ܢܒܼܝܼܵܐ؟ ܓ̰ܘܼܘܸܒܠܹܗ ܝܘܿܚܲܢܵܢ ܘܐ݇ܡܝܼܪܹܗ ܐܸܠܲܝܗܝ: ܐܵܢܵܐ ܡܲܥܡܘܼܕܹܐ ܝܘܸܢ ܒܡ̈ܝܼܵܐ: ܐܝܼܢܵܐ ܒܲܝܢܵܬܵܘܟܼܘܿܢ ܟܸܠܝܵܐ ܝܠܹܗ ܗ̇ܘ ܕܐܲܚܬܘܿܢ ܠܹܐ ܝܬܘܿܢ ܒܝܼܕܵܥܵܐ ܐܸܠܹܗ: ܐܵܗܵܐ ܝܼܠܹܗ ܗ̇ܘ ܕܡܒܵܬ݇ܪ ܕܝܼܠ݇ܝܼ ܒܹܐܬܵܝܵܐ ܝܠܹܗ: ܘܝܼܠܹܗ ܡ̣ܢ ܩܵܕ݇ܡ ܕܝܼܠ݇ܝܼ: ܗ̇ܘ ܕܐܵܢܵܐ ܠܹܐ ܚܲܫܚܸܢ ܕܫܵܪܸܢ ܓܸܕܹ̈ܐ ܕܨܵܘܠܘܼ̈ܗܝ. ܐܲܢܹܐ ܗ݇ܘܹܐ ܠܗ݇ܘܿܢ ܒܒܹܝܬ ܥܲܢܝܵܐ ܒܡܲܪܙܵܐ ܕܝܘܿܪܕܢܲܢ. ܐܲܝܟܵܐ ܕܝܘܿܚܲܢܵܢ ܡܲܥܡܘܼܕܹܐ ܝܗ݇ܘܵܐ.
+
*2-
=