ܚܲܕܼܒ̇ܫܲܒܵܐ ܕܲܬ̣ܪܹܝܢ ܕܒ̣ܵܬܲܪ ܕܕܸܢܚܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.
ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܣܵܗܕܹ̈ܐ ܒܪ̈ܝܼܟܹܐ. ܪܲܒ̇ܘܼ ܡܵܪܲܢ ܘܲܡܫܲܒܲܚ ܪܵܘܪܒ̣ܵܐܝܼܬܼ؛ ܪܲܒ̇ ܘܲܕܼܚܝܼܠ ܥܲܠ ܟܠܗܘܿܢ ܕܲܚܕܼܵܪ̈ܵܘܗܝ. ܪܲܒ̇ܘܼ ܐ݇ܪܵܙܵܐ ܕܲܕܼܢܲܚ̣ ܡ̣ܢ ܪܵܘܡܵܐ. ܫܠܝܼܚܵܐ ܩܵܥܹ̇ܐ ܠܲܢ. ܐ݇ܪܵܙܵܐ ܗ݇ܘ̣ ܓܹܝܪ ܐܲܠܵܗܵܝܵܐ. ܕܲܓ̣ܒ̣ܵܝܗܝ ܠܦܲܓ̣ܪܲܢ ܘܲܥ̣ܡܲܪ ܒܹܗ. ܘܥܲܒ̣ܕܹ̇ܗ ܕܢܸܗܘܸܐ ܚܲܕܼ ܥܲܡܹܗ. ܒܫܵܘܬܵܦܘܼܬ̣ܵܐ ܕܐܝܼܩܵܪܹܗ. ܕܠܲܢ ܢܲܫܘܸܐ ܠܚܲܝܹ̈ܐ ܕܲܠܥܵܠܲܡ. ܬܢܝܼ؛ ܫܲܒܲܚ. ܡܫܝܼܚܵܐ ܕܫܲܝܸܢ ܒܲܕܼܡܵܐ ܕܲܩܢܘܿܡܹܗ. ܪܵܘܡܵܐ ܥܲܡ ܥܘܼܡܩܵܐ. ܫܲܝܸܢ ܡܵܪܝ ܟܵܗܢܹ̈ܐ ܘܡܲܠܟܹ̈ܐ. ܘܥܹܕܿܬܵܟܼ ܩܲܝܸܡ ܒܲܚܢܵܢܵܟܼ. ܘܚܲܕܼ ܢܝܼܫܵܐ ܕܗܲܝܡܵܢܘܼܬܼܵܐ. ܢܲܡܠܸܟܼ ܒܟ̣ܠܵܗ̇ ܥܵܡܲܪܬܵܐ. ܒܛܲܝܒ̇ܘܼܬ̣ܵܟܼ ܡܵܪܵܐ ܡܪܲܚܡܵܢܵܐ.
ܩܸܪܝܵܢܵܐ. ܡܸܢܝܵܢܵܐ؛ܝ؛29‐ܝܐ؛11 ܚܲܒ̣ܪܹܗ. ܐܹܫܲܥܝܵܐ؛ ܡܗ؛ 11‐18
ܫܘܼܪܵܝܵܐ ܕ܀ ܠܘܵܬ̣ܵܟܼ ܡܵܪܝܵܐ ܢܲܦ̮ܫܝ ܐܲܪܝܼܡܹ̇ܬ̣* ܐܲܠܵܗܝ ܒܵܟܼ ܣܲܒ̇ܪܹܬ̣ ܠܵܐ ܐܸܒ̣ܗܲܬ̣* ܠܵܐ ܢܸܫܬܲܒ̣ܗܪܘܼܢ ܥܠܲܝ ܒܥܸܠܕܒ̣ܵܒܲܝ̈* ܘܐܵܦ ܟܠ ܕܲܡܣܲܒ̇ܪܝܼܢ ܒܵܟܼ ܠܵܐ ܢܸܒ̣ܗ̱ܬ̣ܘܼܢ*
ܫܠܝܼܚܵܐ. ܥܸܒ̣ܪ̈ܵܝܹܐ؛ܓ؛1‐14.
ܙܘܼܡܵܪܵܐ. ܒܲܨܠܝܼܒ̣ܵܟܼ ܐܲܡ̣ܠܸܟܼ܀ ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟ̣ܪܹ̈ܐ. ܐܲܝܬܵܘ ܠܡܵܪܝܵܐ ܫܘܼܒ̣ܚܵܐ ܘܐܝܼܩܵܪܵܐ. ܐܲܝܬܵܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ. ܣܓ̣ܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܼܫܹܗ. ܕ܀ ܩܵܠܹܗ ܕܡܵܪܝܵܐ ܥܲܠ ܡܲܝ̈ܵܐ. ܐܲܠܵܗܵܐ ܡܫܲܒ̇ܚܵܐ ܪܥܸܡ. ܡܵܪܝܵܐ ܥܲܠ ܡܲܝ̈ܵܐ ܣܲܓܝܼܐܹ̈ܐ. ܩܵܠܹܗ ܕܡܵܪܝܵܐ ܒܚܲܝܠܵܐ ܘܩܵܠܹܗ ܕܡܵܪܝܵܐ ܒܫܘܼܒ̣ܚܵܐ. ܕ܀
ܐܹܘܲܢܓܲܠܝܼܘܿܢ. ܝܘܿܚܲܢܵܢ ؛ܐ؛ 1‐29
ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܩܵܠ؛ ܡܪܵܐ ܕܟܼܠܵܐ. ܘܲܡܫܲܚ̱ܠܦܵܐ.
ܡܸܛܠ ܕܡܲܒ̇ܘܼܥܵܐ ܕܚܲܝܹ̈ܐ ܥܲܡܵܟܼ ܗ݇ܘ̣؛ ܘܡ̣ܢ ܢܲܚܠܵܐ ܒܲܣܝܼܡܵܐ ܬܲܫܩܸܐ ܐܸܢܘܿܢ. ܕܨܘܼܪܬܵܐ. ܕܢܸܗܘܘܿܢ ܒܹܗ ܡܥܝܼܢܵܐ ܕܡܲܝ̈ܵܐ ܕܢܵܒ̣ܥ̇ܝܼܢ ܠܚܲܝܹ̈ܐ ܕܲܠܥܵܠܲܡ. ܡܥܝܼܢܵܐ ܕܛܵܒ̣̈ܵܬܼܵܐ ܘܲܠܡܹܐܢܵܐ ܡܫܲܝܢܵܐ. ܒܲܥܡܵܕܼܵܟܼ ܡܫܝܼܚܵܐ ܛܲܝܸܒ̣ܬܸ ܠܲܢ. ܘܡ̣ܢ ܦܸܗܝܵܐ ܣܪܝܼܩܵܐ ܕܛܵܥܝܘܼܬܼܵܐ ܕܲܦܬܲܟ̣ܪܹ̈ܐ ܓܠܝܼܦܹ̈ܐ ܠܘܵܬ̣ܵܟܼ ܐܲܦܢ̣ܝܼܬܵܢ. ܘܐܲܫ̣ܠܸܡܬ̇ ܠܲܢ ܝܼܕܲܥܬ̣ܵܐ ܓܡܝܼܪܬܵܐ ܕܲܩܢܘܿܡܹ̈ܐ ܡܫܲܒ̇ܚܹ̈ܐ ܕܐܲܒ̣ܵܐ ܘܲܒ̣ܪܵܐ ܘܪܘܼܚܵܐ ܕܩܘܼܕܫܵܐ. ܟܝܵܢܵܐ ܐܲܠܵܗܵܝܵܐ. ܘܡܸܟܹ̇ܝܠ ܟܠܲܢ ܒܡܲܙܡܘܿܪܹ̈ܐ ܘܲܒܼܬܸܫ̈ܒ̇ܚܵܬܼܵܐ ܢܫܲܒܲܚ ܠܵܟܼ ܛܵܒ̣ܵܐ ܒܲܠܚܘܿܕܲܝܟ. ܬܢܝܼ؛ ܫܲܒܲܚ ܒܵܗ̇.
ܕܒܹܝܡ. ܥܘܼܢܵܝܵܐ. ܥܲܡ ܟܪ̈ܘܿܒܹܐ ܘܲܣܪ̈ܵܦܹܐ ܫܘܼܒ̣ܚܵܐ ܐܲܡܝܼܢܵܐ ܡܲܣܩܝܼܢܲܢ ܡܵܪܝ ܠܐܝܼܩܵܪܵܟܼ ܟܲܕܼ ܐܵܡ̇ܪܝܼܢܲܢ. ܩܲܕ̇ܝܼܫܲܬ̇ ܩܲܕ̇ܝܼܫܲܬ̇ ܩܲܕ̇ܝܼܫܲܬ̇ ܡܵܪܝܵܐ ܐܲܠܵܗܵܐ؛ ܦܲܓ̣ܪܹܗ ܕܲܡܫܝܼܚܵܐ ܢܵܣܒ̇ܝܼܢܲܢ ܟܠܲܢ. ܘܲܕܼܡܹܗ ܝܲܩܝܼܪܵܐ ܠܚܘܼܣܵܝ ܚܵܘܒܹ̈ܐ؛ ܘܢܲܣܸܩ ܠܐܲܠܵܗܵܐ ܬܸܫܒ̇ܘܿܚܬܵܐ ܘܢܹܐܡܲܪ ܗܲܠܸܠܘܼܝܲܗ.