ܚܲܕܼܒܫܲܒܵܐ ܕܲܬ̣ܪܹܝܢ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܙ؛ 7‐12
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܠܹܐ ܗ݇ܘܵܐ ܡ̣ܢ ܣܵܒܵܒ ܕܒܘܼܫ ܪܵܒܵܐ ܝ݇ܬܘܿܢ ܡ̣ܢ ܟܠܲܝܗܝ ܛܵܝܸܦܹ̈ܐ؛ ܒܣܸܡܠܵܐ ܠܹܗ ܡܵܪܝܵܐ ܒܝܼܵܘܟ̣ܘܿܢ ܘܩܲܡ ܓܵܒܹܐܠܵܘܟ̣ܘܿܢ؛ ܣܵܒܵܒ ܕܐܲܚܬܘܿܢ ܒܘܼܫ ܚܲܕ݇ܟ̰ܵܐ ܝ݇ܬܘܿܢ ܡ̣ܢ ܟܠܲܝܗܝ ܛܵܝܸܦܹ̈ܐ܀ ܐܸܠܵܐ ܡ̣ܢ ܣܵܒܵܒ ܕܡܘܼܚܸܒܠܹܗ ܐܸܠܵܘܟ̣ܘܿܢ ܡܵܪܝܵܐ؛ ܕܡܲܩܸܡ ܡܵܘܡܵܬܹ̈ܐ ܕܝ݇ܡܹܐܠܹܗ ܠܒܵܒܵܘܵܬܵܘ̈ܟ̣ܘܿܢ؛ ܘܩܲܡ ܦܵܠܸܛܠܵܘܟ̣ܘܿܢ ܡܵܪܝܵܐ ܒܐܝܼܕܹܗ ܚܲܝܠܵܢܬܵܐ؛ ܘܩܲܡ ܦܵܪܸܩܠܵܘܟ̣ܘܿܢ ܡ̣ܢ ܒܹܝܬ̣ ܪܹܓܘܼܬܵܐ؛ ܡ̣ܢ ܐܝܼܕܹܗ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ܀ ܘܕܝܵܕܥܸܬ̇ ܡܵܪܝܵܐ ܐܲܠܵܗܘܼܟܼ ܗܲܪ ܗ̇ܘ ܝܼܠܹܗ ܐܲܠܵܗܵܐ. ܐܲܠܵܗܵܐ ܡܗܲܝܡܢܵܐ؛ ܢܵܛܪܵܢܵܐ ܕܩܵܘܠܵܐ ܘܫܵܦܵܩܲܬ ܠܡܲܚܸܒܵܢ̈ܘܼܗܝ؛ ܘܢܵܛܪ̈ܵܢܹܐ ܕܦܘܼܩܕܵܢ̈ܘܼܗܝ ܠܐܲܠܦܵܐ ܕܵܘܪܹ̈ܐ܀ ܘܦܲܪܸܥ ܠܣܵܢܝܵܢ̈ܘܼܗܝ ܒܚܲܝܲܝ̈ܗܝ؛ ܘܦܲܪܸܥܠܗ݇ܘܿܢ ܕܬܵܠܸܩܠܗ݇ܘܿܢ؛ ܠܹܐ ܢܵܛܸܪ ܠܣܵܢܝܵܢ̈ܘܼܗܝ؛ ܐܸܠܵܐ ܒܚܲܝܲܝ̈ܗܝ ܟܹܐ ܘܦܲܪܸܥܠܗ݇ܘܿܢ܀ ܢܛܘܿܪܘܿܢ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܘܕܝܼܘܵܢܹ̈ܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؛ ܘܥܒ̣ܘܿܕܘܿܢ ܠܗ݇ܘܿܢ܀
ܚܲܒ̣ܪܹܗ
ܐܹܫܲܥܝܵܐ ܠ؛ 15‐27
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܒܘܼܬ ܕܐܵܗܵܐ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܩܲܕܝܼܫܵܐ ܕܝܼܣܪܵܝܹܠ؛ ܐܝܼܡܲܢ ܕܐܸܪܵܘܟ̣ܘܿܢ ܘܡܘܼܢܝܸܚܠܵܘܟ̣ܘܿܢ ܒܸܬ ܦܵܝܫܝܼܬܘܿܢ ܦܘܼܪܩܹܐ؛ ܘܒܫܸܠܝܵܐ ܘܒܗܹܒ̣ܝܼ ܒܸܬ ܗܵܘܝܵܐ ܓܲܢ݇ܒܵܪܘܼܬܵܘܟ̣ܘܿܢ؛ ܘܠܵܐ ܡܘܼܨܝܸܬܠܵܘܟ̣ܘܿܢ܀ ܘܐ݇ܡܸܪܵܘܟ̣ܘܿܢ ܠܵܐ ܗܵܕܟ̣ܵܐ؛ ܥܲܠ ܣܘܼܣܵܘܵܬܹ̈ܐ ܒܸܬ ܪܵܟܒ̣ܲܚ ܘܥܲܠ ܩܵܠܘܿܠܹ̈ܐ [ܗ̄؛ܕ̄؛ ܥܲܠ ܟܵܠܸܣܟܹ̈ܐ ܩܵܠܘܿܠܹ̈ܐ] ܒܸܬ ܥܵܪܩܲܚ. ܒܘܼܬ ܕܐܵܗܵܐ ܒܸܬ ܥܵܪܩܝܼܬܘܿܢ؛ ܘܒܸܬ ܗܵܘܝܼ ܒܘܼܫ ܩܵܠܘܿܠܹ̈ܐ ܛܵܪ̈ܕܵܢܵܘܟ̣ܘܿܢ؛ ܐܲܠܦܵܐ ܡ̣ܢ ܢܓ̰ܵܘܬܵܐ ܕܚܲܕ݇ ܘܡ̣ܢ ܢܓ̰ܵܘܬܵܐ ܕܚܲܡܫܵܐ ܒܸܬ ܥܵܪܩܝܼܬܘܿܢ؛ ܗܲܠ ܕܦܵܝܫܝܼܬܘܿܢ ܐܲܝܟܼ ܚܲܕ݇ ܐ݇ܣܛܘܿܢܵܐ ܥܲܠ ܪܹܫܵܐ ܕܛܘܼܪܵܐ؛ ܘܐܲܝܟܼ ܐܵܬ̈ܵܐ [ܢܝܼܫܲܢܩܵܐ] ܥܲܠ ܪܹܫܵܐ ܕܪܘܼܡܬܵܐ܀ ܣܵܒܵܒ ܒܸܬ ܡܫܵܪܹܐ ܡܵܪܝܵܐ ܠܸܥܒ̣ܵܕܵܐ ܪ̈ܲܚܡܹܐ ܥܲܠܵܘܟ̣ܘܿܢ؛ ܘܒܸܬ ܝܵܪܸܡ ܠܸܥܒ̣ܵܕܵܐ ܛܵܒ̣ܬܵܐ ܥܲܡܵܘܟ̣ܘܿܢ؛ ܣܵܒܵܒ ܕܐܲܠܵܗܵܐ ܝ݇ܠܹܗ ܕܲܝܵܢܵܐ ܡܵܪܝܵܐ؛ ܘܛܘܼܒ̣ܵܐ ܠܟܠ ܕܣܵܦܪܝܼ ܐܸܠܹܗ܀ ܣܵܒܵܒ ܕܛܵܝܸܦܵܐ ܒܸܬܝܵܒ̣ܵܐ ܒܨܸܗܝܘܿܢ؛ ܘܒܐܘܿܪܸܫܠܸܡ. ܒܟ̣ܵܝܵܐ ܠܵܐ ܒܵܟ̣ܝܼܬܘܿܢ؛ ܡܪܵܚܘܼܡܹܐ ܒܸܬ ܡܪܵܚܸܡ ܥܲܠ ܩܵܠܵܐ ܕܡܲܩܘܲܚܬܵܘܟ̣ܘܿܢ؛ ܘܐܝܼܡܲܢ ܕܫܡܝܼܥܠܹܗ ܒܸܬ ܓ̰ܲܘܸܒܠܵܘܟ̣ܘܿܢ܀ ܘܒܸܬ ܝܵܗ݇ܒ̣ܸܠܵܘܟ̣ܘܿܢ ܡܵܪܝܵܐ ܠܲܚܡܵܐ ܒܝܲܠܨܘܼܝ؛ ܘܡܝܼܵܐ ܒܐܘܼܠܨܵܢܵܐ؛ ܘܠܹܐ ܓ̰ܲܡܸܥ ܡܸܕܪܹܐ ܠܡܲܚܠܸܛܵܢܵܘ̈ܟ̣ܘܿܢ؛ ܘܒܸܬ ܚܵܙܝܼ ܥܲܝܢ̈ܵܘܟ̣ܘܿܢ ܒܡܲܚܠܸܛܵܢܵܘ̈ܟ̣ܘܿܢ؛ ܘܢܵܬܝܵܬ̈ܵܘܟ̣ܘܿܢ ܒܸܬ ܫܵܡܥܝܼ ܩܵܠܵܐ ܡ̣ܢ ܒܵܬ݇ܪ ܚܵܨܵܘܟ̣ܘܿܢ ܕܒܹܐܡܵܪܵܐ؛ ܐܵܗܵܐ ܝ݇ܠܵܗ̇ ܐܘܼܪܚܵܐ ܐ݇ܙܸܠ݇ܡܘܿܢ ܒܝܼܵܗ̇؛ ܘܠܵܐ ܦܵܬܠܝܼܬܘܿܢ ܠܝܲܡܝܼܢܵܐ ܘܠܣܸܡܵܠܵܐ؛ ܘܒܸܬ ܟ̰ܵܦܠܸܢܝܼܬܘܿܢ ܣܹܐܡܵܐ ܕܝܼܠܹܗ ܩܪܝܼܡܵܐ [ܡܘܼܠܒ̣ܸܫܵܐ] ܠܨܵܢܵܡܲܝ̈ܗܝ ܘܣܸܩܠܵܐ ܕܕܲܗܒ̣ܵܐ ܕܨܲܠܡܲܝ̈ܗܝ؛ ܘܒܸܬ ܬܲܦܚܝܼܬܘܿܢ ܠܗ݇ܘܿܢ ܐܲܝܟܼ ܡܝܼܵܐ ܫܸܚܬܵܢܹ̈ܐ؛ ܘܐܲܝܟܼ ܬܘܿܙ ܒܸܬ ܦܵܠܛܝܼܬܘܿܢ ܠܗ݇ܘܿܢ܀ ܘܒܸܬ ܦܵܐܹܫ ܡܸܛܪܵܐ ܠܙܲܪܥܵܘܟ̣ܘܿܢ؛ ܘܙܵܪܥܝܼܬܘܿܢ ܒܐܲܪܥܵܐ؛ ܘܕܲܚܠܵܐ ܕܙܲܪܥܵܐ ܕܐܲܪܥܵܐ؛ ܒܸܬ ܗܵܘܹܐ ܛܪܝܼܨܵܐ ܘܫܲܡܝܼܢܵܐ. ܘܡܲܪܥܝܵܐ ܕܥܸܪ̈ܒܵܘܟ̣ܘܿܢ ܒܗ̇ܘ ܝܵܘܡܵܐ ܒܸܬ ܗܵܘܹܐ ܒܐܲܬܪܵܐ ܫܲܡܝܼܢܵܐ؛ ܬܵܘܪܹ̈ܐ ܘܠܘܼܠܹ̈ܐ ܕܦܵܠܚܝܼ ܒܐܲܪܥܵܐ ܥܵܠܝܼܩܵܐ ܬܲܡܝܼܙ ܒܸܬ ܐܵܟ̣ܠܝܼ؛ ܡܕܘܼܪܝܵܐ ܒܪܲܦ̮ܫܬܵܐ ܘܡܸܠܚܵܘܵܐ؛ ܘܒܸܬ ܗܵܘܹܐ ܥܲܠ ܟܠ ܛܘܼܪܵܐ ܪܵܡܵܐ؛ ܘܥܲܠ ܟܠ ܪܘܼܡܬܵܐ ܪܵܡܬܵܐ؛ ܒܸܬ ܓ̰ܵܪܝܼ ܫܵܩܝܼܵܬܹ̈ܐ ܕܡܝܼܵܐ ܒܝܵܘܡܵܐ ܕܩܸܛܠܵܐ ܓܘܼܪܵܐ ܘܬܠܵܚܬܵܐ ܕܒܘܼܪ̈ܓ̰ܹ݂ܐ؛ ܘܒܸܬ ܗܵܘܹܐ ܒܲܗܪܵܐ ܕܣܲܗܪܵܐ ܐܲܝܟܼ ܒܲܗܪܵܐ ܕܫܸܡܫܵܐ؛ ܘܒܲܗܪܵܐ ܕܫܸܡܫܵܐ ܒܸܬ ܗܵܘܹܐ ܚܲܕ݇ ܒܫܲܒ̣ܥܵܐ؛ ܐܲܝܟܼ ܒܲܗܪܵܐ ܕܫܲܒ̣ܥܵܐ ܝܵܘܡܵܢܹ̈ܐ؛ ܕܐܵܣܸܪ ܡܵܪܝܵܐ ܫܸܡܛܵܐ ܕܛܵܝܸܦܹܗ؛ ܘܡܲܪ̈ܥܹܐ ܕܡܚܵܝܬܹܗ ܒܸܬ ܡܒܵܣܸܡ܀
♱♱♱♱♱♱♱♱♱
ܚܕܒܫܒܐ ܒ ܕܐܠܝܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܬܸܣܵܠܘܿܢܝܼܩܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܡܐܵܕܝܼܵܐ ܐܵܚܘܿܢܘܵܬ̈ܝܼ ܩܘܼܡܘܿܢ ܘܚܡܘܿܠܘܿܢ ܒܦܘܼܩܕܵܢܹ̈ܐ ܕܝ݇ܠܸܦܠܵܘܟܼܘܿܢ ܐܸܢ ܒܗܹܡܸܙܡܲܢ ܘܐܸܢ ܒܐܸܓܲܪܬܵܐ ܕܝܼܲܢ* ܐܝܼܢܵܐ ܡܵܪܲܢ ܝܼܫܘܿܥ ܡܫܝܼܚܵܐ ܒܓܵܢܹܗ ܘܐܲܠܵܗܵܐ ܒܵܒܲܢ ܗ̇ܘ ܕܩܲܡ ܡܲܚܸܒܠܲܢ ܘܝܘܼܗ݇ܒܼܸܠܹܗ ܐܸܠܲܢ ܠܸܒܵܐ ܩܵܐ ܗܲܠ ܥܵܠܲܡ ܘܗܹܒܼܝܼ ܛܵܒܼܵܐ ܒܫܵܦܵܩܲܬܹܗ* ܣܵܢܸܕ ܘܡܲܩܘܹܐ ܠܸܒܵܘܵܬܵܘ̈ܟܼܘܿܢ ܒܟܠ ܗܹܡܸܙܡܲܢ ܘܒܟܠ ܦܘܼܠܚܵܢܵܐ ܛܵܒܼܵܐ* ܡ̣ܢ ܐܵܕܝܼܵܐ ܐܵܚܘܿܢܘܵܬ̈ܝܼ ܨܵܠܹܐܡܘܿܢ ܨܠܘܿܬܵܐ ܒܘܼܬ ܕܝܼܲܢ ܕܗܹܡܸܙܡܲܢ ܕܡܵܪܝܵܐ ܗܵܘܝܵܐ ܒܸܪܚܵܛܵܐ ܘܦܵܝܫܵܐ ܚܩܝܼܪܬܵܐ ܒܟܠ ܕܘܼܟܬܵܐ ܐܲܝܟܼ ܕܠܟܸܣܠܵܘܟܼܘܿܢ* ܘܦܵܝܫܲܚ ܦܘܼܨܝܸܐ ܡ̣ܢ ܒܢܲܝ̈ܢܵܫܵܐ ܒܝܼܫܹ̈ܐ ܘܦܟ̰ܝܼܠܹ̈ܐ. ܣܵܒܵܒ ܗܲܝܡܵܢܘܼܬܵܐ ܠܹܐ ܝ݇ܠܵܗ̇ ܕܟܠ ܐ݇ܢܵܫܵܐ* ܐܝܼܢܵܐ ܣܲܪܲܣܬ ܝܼܠܹܗ ܡܵܪܝܵܐ ܕܢܵܛܸܪܵܘܟܼܘܿܢ ܘܦܵܨܹܐ ܠܵܘܟܼܘܿܢ ܡ̣ܢ ܒܝܼܫܵܐ* ܐܝܼܬܠܲܢ ܗܹܒܼܝܼ ܒܝܼܵܘܟܼܘܿܢ ܒܡܵܪܲܢ ܕܡܸܢܕܝܼ ܕܒܸܦܩܵܕܵܐ ܝ݇ܘܲܚ ܐܸܠܵܘܟܼܘܿܢ ܥܒܼܸܕܠܵܘܟܼܘܿܢ ܘܐܘܼܦ ܒܸܥܒܼܵܕܵܐ ܝ݇ܬܘܿܢ* ܘܡܵܪܲܢ ܥܵܒܼܸܕ ܕܘܼܙ ܠܸܒܵܘܵܬܵܘ̈ܟܼܘܿܢ ܠܚܘܼܒܹܗ ܕܐܲܠܵܗܵܐ ܘܠܚܡܲܠܬܹܗ ܕܡܫܝܼܚܵܐ* ܐܝܼܢܵܐ ܒܸܦܩܵܕܵܐ ܝ݇ܘܲܚ ܐܸܠܵܘܟܼܘܿܢ ܐܵܚܘܿܢܘܵܬ̈ܝܼ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܗܵܘܝܼܬܘܿܢ ܪܸܚܩܵܐ ܡ̣ܢ ܟܠ ܐܵܚܘܿܢܵܐ ܐܲܝܢܝܼ ܕܚܸܪܒܵܐ ܚܵܕܸܪ؛ ܘܠܵܐ ܐܲܝܟܼ ܦܘܼܩܕܵܢܵܐ ܕܩܘܼܒܸܠܹܗ ܡܸܢܲܢ* ܣܵܒܵܒ ܐܲܚܬܘܿܢ ܝܵܕܥܝܼܬܘܿܢ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܠܸܦܝܵܫܵܐ ܕܘܼܡܝܸܐ ܒܝܼܲܢ ܕܠܵܐ ܚܕܸܪܲܢ ܚܸܪܒܵܐ ܓܵܘܵܘܟܼܘܿܢ. ܐܘܼܦ ܠܲܚܡܵܐ ܕܠܵܐ ܗܵܩܵܐ ܠܵܐ ܐ݇ܟܼܸܠܲܢ ܡ̣ܢ ܚܲܕ݇ ܐ݇ܢܵܫܵܐ ܡܸܢܵܘܟܼܘܿܢ. ܐܸܠܵܐ ܒܦܘܼܠܚܵܢܵܐ ܘܒܟܸܟ̰ܚܵܐ ܒܠܲܝܠܹܐ ܘܒܝܵܘܡܵܐ ܒܸܦܠܵܚܵܐ ܝ݇ܘܲܚ ܕܥܲܠ ܚܲܕ݇ ܡܸܢܵܘܟܼܘܿܢ ܠܵܐ ܗܵܘܲܚ ܝܘܼܩܪܵܐ* ܠܹܐ ܝ݇ܠܵܗ̇ ܡ̣ܢ ܣܵܒܵܒ ܕܠܲܝܬܠܲܢ ܕܲܣܬܘܼܪ ܐܸܠܵܐ ܕܒܓܵܢܲܢ ܝܵܗܒܼܲܚܠܵܘܟܼܘܿܢ ܛܘܼܦ̮ܣܵܐ ܕܒܝܼܲܢ ܦܵܝܫܝܼܬܘܿܢ ܕܘܼܡܝܸܐ ܣܵܒܵܒ ܐܘܼܦ ܐܝܼܡܲܢ ܕܠܟܸܣܠܵܘܟܼܘܿܢ ܝܼܘܲܚ ܗ݇ܘ̣ܵܘ ܐܵܗܵܐ ܦܘܼܩܸܕܠܲܢ ܐܸܠܵܘܟܼܘܿܢ. ܕܟܠ ܕܠܵܐ ܒܵܥܝܸܐ ܕܦܵܠܸܚ ܐܘܼܦ ܠܵܐ ܐܵܟܼܸܠ* ܒܸܫܡܲܥܝܵܐ ܝ݇ܘܲܚ ܕܐܝܼܬ ܓܵܘܵܘܟܼܘܿܢ ܐ݇ܢܵܫܹ̈ܐ ܚܸܪܒܵܐ ܒܸܚܕܵܪܵܐ؛ ܘܗܸܟ̃ ܡܸܢܕܝܼ ܠܵܐ ܒܸܦܠܵܚܵܐ؛ ܐܸܠܵܐ ܐܸܢ ܫܘܼܠܵܢܹ̈ܐ ܒܲܛܝܼܠܹ̈ܐ* ܗܲܪ ܩܵܐ ܕܐܲܢܹܐ ܒܸܦܩܵܕܵܐ ܝ݇ܘܸܢ ܘܒܸܛܠܵܒܵܐ ܡܸܢܲܝܗܝ ܒܡܵܪܲܢ ܝܼܫܘܿܥ ܡܫܝܼܚܵܐ. ܕܒܫܸܠܝܵܐ ܗܵܘܝܼ ܒܸܦܠܵܚܵܐ ܘܒܹܐܟܼܵܠܵܐ ܠܲܚܡܲܝܗܝ* ܐܝܼܢܵܐ ܐܲܚܬܘܿܢ ܐܵܚܘܿܢܘܵܬ̈ܝܼ ܠܵܐ ܣܵܩܕܵܐ ܠܵܘܟܼܘܿܢ ܠܸܥܒܼܵܕܵܐ ܕܨܦܵܝ ܘܐܸܢ ܚܲܕ݇ ܐ݇ܢܵܫܵܐ ܠܵܐ ܡܲܨܝܸܬ ܠܐܲܢܹܐ ܗܹܡܸܙܡܵܢܲܝ̈ܢ ܕܓܵܘ ܐܸܓܵܪܬܵܐ ܪܚܘܿܩܘܿܢ ܡܸܢܹܗ؛ ܘܠܵܐ ܗܵܘܝܼܬܘܿܢ ܒܹܚܒܼܵܛܵܐ ܥܲܡܹܗ ܩܵܐ ܕܢܵܚܸܦ* ܘܠܵܐ ܐܲܝܟܼ ܕܫ̰ܡܸܢ ܕܵܒܼܩܝܼܬܘܿܢ ܠܹܗ؛ ܐܸܠܵܐ ܗܵܘܝܼܬܘܿܢ ܒܝܼܵܗ݇ܒܼܹܗ ܢܵܣܝܼܗܲܬ ܐܲܝܟܼ ܕܠܐܵܚܘܿܢܵܐ. ܘܡܵܪܹܗ ܕܫܠܵܡܵܐ ܒܓܵܢܹܗ ܒܸܬ ܝܵܗ݇ܒܼܸܠܵܘܟܼܘܿܢ ܫܠܵܡܵܐ ܒܟܠ ܙܲܒܼܢܵܐ ܒܟܠ ܡܸܢܕܝܼ. ܡܵܪܲܢ ܥܲܡ ܟܠܵܘܟܼܘܿܢ܋ ܫܠܵܡܹ̈ܐ ܒܟܬܵܒܼܬܵܐ ܕܐܝܼܕܝܼ ܐܵܢܵܐ ܦܵܘܠܘܿܣ ܟܬܸܒܼܠܝܼ. ܕܝܼܠܹܗ ܢܝܼܫܲܢܩܵܐ ܕܟܠܲܝܗܝ ܐܸܓܲܪ̈ܝܵܬܝܼ ܗܲܕܟܼܵܐ ܒܸܟܬܵܒܼܵܐ ܝ݇ܘܸܢ ܫܵܦܵܩܲܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܥܲܡ ܟܠܵܘܟܼܘܿܢ ܐܲܚܘܿܢܘܵܬ̈ܝܼ؛ ܐܵܡܹܝܢ*
♱♱♱♱♱♱♱♱♱
ܚܕܒܫܒܐ ܕܬܪܼܝܢ ܕܐܠܝܐ
ܡܬܝ ܝܓ: 1 ‐ 24
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐܝܼܢܵܐ ܒܗ̇ܘ ܙܲܒܼܢܵܐ ܦܠܸܛܠܹܗ ܝܑܼܫܘܿܥ ܡ̣ܢ ܒܲܝܬܵܐ ܘܝܬܸܒܼܠܹܗ ܥܲܠ ܡܲܪܙܵܐ ܕܝܵܡܵܐ: ܘܓ̰ܡܸܥܠܗ݇ܘܿܢ ܠܘܵܬܹܗ ܟܸܢܫܹ̈ܐ ܪܵܒܵܐ، ܐܲܝܟܼ ܕܐܵܣܸܠ݇ܩ ܝܵܬܸܒܼ ܓܵܘ ܓܵܡܝܼ. ܘܟܠܹܗ ܟܸܢܫܵܐ ܟܸܠܝܵܐ ܗ݇ܘܵܐ ܥܲܠ ܣܸܦܬܵܐ ܕܝܵܡܵܐ. ܘܪܵܒܵܐ ܗܲܡܙܸܡ ܗ݇ܘܵܐ ܥܲܡܲܝܗܝ ܒܡܲܬܠܹ̈ܐ ܘܐܵܡܸܪ: ܗܵܐ ܦܠܸܛܠܹܗ ܙܵܪܘܿܥܵܐ ܠܸܙܪܵܥܵܐ: ܘܟܲܕ ܙܪܸܥܠܹܗ ܐܝܼܬ ܕܢܦܸܠܹܗ ܥܲܠ ܡܲܪܙܵܐ ܕܐܘܼܪܚܵܐ، ܘܐ݇ܬܹܐܠܵܗ̇ ܦܵܪܲܚܬܵܐ ܘܩܲܡ ܐܲܟܼܠܵܐ ܠܹܗ. ܘܐ݇ܚܹܪ݇ܢܵܐ ܢܦܸܠܹܗ ܥܲܠ ܫܘܿܥܵܐ ܐܲܝܟܵܐ ܕܠܲܝܬ ܗ݇ܘܵܐ ܡܸܕܪܵܐ ܪܵܒܵܐ. ܘܒܗ̇ܝ ܥܸܕܵܢܵܐ ܡܘܼܓ̰ܝܸܢܹܗ. ܐܝܼܢܵܐ ܡ̣ܢ ܣܵܒܵܒ ܕܠܲܝܬ ܗ݇ܘܵܐ ܥܘܼܡܩܵܐ ܕܐܲܪܥܵܐ، ܟܲܕ ܙܪܸܩܠܵܗ̇ ܫܸܡܫܵܐ ܟ̰ܡܸܟ̰ܠܹܗ، ܘܣܵܒܵܒ ܕܠܲܝܬ ܗ݇ܘܵܐ ܠܹܗ ܥܸܩܪܵܐ ܒܪܸܙܠܹܗ. ܘܐ݇ܚܹܪ݇ܢܵܐ ܢܦܸܠܹܗ ܒܲܝܢܵܬ ܟܝܼܬܒܼܹ̈ܐ، ܘܣܸܩܠܗ݇ܘܿܢ ܟܝܼܬܒܼܹ̈ܐ ܘܩܲܡ ܚܲܢܩܝܼܠܹܗ. ܘܐ݇ܚܹܪ݇ܢܵܐ ܢܦܸܠܹܗ ܒܐܲܪܥܵܐ ܛܲܒܼܬܵܐ، ܘܝܘܼܗ݇ܒܼܸܠܹܗ ܛܥܘܿܢܝܵܬܹ̈ܐ: ܐܝܼܬ ܕܲܡܵܐܐ ܘܐܝܼܬ ܕܸܫܬܝܼܢ ܘܐܝܼܬ ܕܲܬܠܵܬܝܼܢ. ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ. ܘܩܘܼܪܒܸܢܗ݇ܘܿܢ ܬܲܠܡܝܼܕܘܼ̈ܗܝ ܘܐܲܡܪܝܼ ܐܸܠܹܗ: ܩܵܡܘܼܕܝܼ ܒܡܲܬܠܹ̈ܐ ܗܲܡܙܘܼܡܹܐ ܝܘܸܬ ܥܲܡܲܝܗܝ؟ ܐܝܼܢܵܐ ܗ̇ܘ ܓ̰ܘܼܘܸܒܹܠܗ ܘܐ݇ܡܸܪܹܗ ܐܸܠܲܝܗܝ: ܕܐܸܠܵܘܟܼܘܿܢ ܦܝܵܫܵܐ ܝܠܹܗ ܝܘܼܗ݇ܒܼܵܐ ܠܝܼܕܵܥܵܐ ܐ݇ܪܵܙܵܐ ܕܡܲܠܟܘܼܬܵܐ ܕܫܡܲܝܵܐ، ܐܝܼܢܵܐ ܠܐܵܢܝܼ ܠܹܐ ܝܠܹܗ ܦܝܼܫܵܐ ܝܘܼܗ݇ܒܼܵܐ. ܣܵܒܵܒ ܠܡ̇ܢ ܕܐܝܼܬܠܹܗ ܒܸܬ ܦܵܐܸܫ ܝܘܼܗ݇ܒܼܵܐ ܘܡܘܼܙܝܸܕܵܐ ܐܸܠܹܗ. ܘܠܡ̇ܢ ܕܠܲܝܬ ܠܹܗ. ܘܐܘܼܦ ܗ̇ܘ ܕܐܝܼܬܠܹܗ ܒܸܬ ܦܵܐܸܫ ܫܩܝܼܠܵܐ ܡܸܢܹܗ. ܒܘܼܬ ܕܐܵܗܵܐ ܒܡܲܬܠܹ̈ܐ ܗܲܡܙܘܼܡܹܐ ܝܘܸܢ ܥܲܡܲܝܗܝ. ܣܵܒܵܒ ܕܟܹܐ ܚܵܙܝܼ ܘܠܹܐ ܚܵܙܝܼ، ܘܟܹܐ ܫܲܡܥܝܼ ܘܠܹܐ ܫܲܡܥܝܼ ܘܠܹܐ ܦܲܪܡܝܼ. ܘܬܲܡܘܼܡܹܐ ܝܠܵܗ̇ ܒܝܼܵܝܗܝ ܢܒܼܝܼܘܼܬܹܗ ܕܐܹܫܲܥܝܵܐ ܕܐ݇ܡܸܪܹܗ: ܕܫܡܵܥܵܐ ܒܸܬ ܫܲܡܥܝܼܬܘܿܢ ܘܠܹܐ ܦܲܪܡܝܼܬܘܿܢ، ܘܚܙܵܝܵܐ ܒܸܬ ܚܵܙܝܼܬܘܿܢ ܘܠܹܐ ܝܲܕܥܝܼܬܘܿܢ. ܣܵܒܵܒ ܚܠܸܡܠܹܗ ܠܸܒܹܗ ܕܐܵܗܵܐ ܥܲܡܵܐ. ܘܒܢܲܬܝܵܬܲܝ̈ܗܝ ܒܝܵܩܘܼܪܘܼܬܵܐ ܫܡܸܥܠܗ݇ܘܿܢ. ܘܥܲܝܢܲܝ̈ܗܝ ܥܟ̰ܸܡܠܗ݇ܘܿܢ ܕܠܵܐ ܚܵܙܝܼ ܒܥܲܝܢܲܝ̈ܗܝ ܘܫܲܡܥܝܼ ܒܢܲܬܝܵܬܲܝ̈ܗܝ ܘܦܲܪܡܝܼ ܒܠܸܒܲܝܗܝ ܘܕܲܥܪܝܼ ܘܒܲܣܡܸܢܗ݇ܘܿܢ. ܐܝܼܢܵܐ ܕܕܝܼܵܘܟܼܘܿܢ ܛܘܼܒܼܵܐ ܠܥܲܝܢܵܘ̈ܟܼܘܿܢ ܕܒܸܚܙܵܝܵܐ ܝܢܵܐ ܘܠܢܲܬܝܵܬܵܘ̈ܟܼܘܿܢ ܕܒܸܫܡܵܥܵܐ ܝܢܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܪܵܒܵܐ ܢܒܼܝܼܹ̈ܐ ܘܙܲܕܝܼܩܹ̈ܐ ܫܘܼܗ݇ܒܼܸܬ ܠܗ݇ܘܿܢ ܕܚܵܙܝܼ ܡܸܢܕܝܼ ܕܒܸܚܙܵܝܵܐ ܝܬܘܿܢ ܘܠܵܐ ܚܙܹܐܠܗ݇ܘܿܢ. ܘܠܸܫܡܵܥܵܐ ܡܸܢܕܝܼ ܕܒܸܫܡܵܥܵܐ ܝܬܘܿܢ ܘܠܵܐ ܫܡܸܥܠܗ݇ܘܿܢ. ܐܝܼܢܵܐ ܐܲܚܬܘܿܢ ܫܡܸܥܡܘܿܢ ܡܲܬܠܵܐ ܕܙܲܪܥܵܐ. ܟܠ ܕܫܵܡܸܥ ܗܹܡܸܙܡܵܢ ܕܡܲܠܟܘܼܬܵܐ ܘܠܵܐ ܦܲܪܡܹܐ ܠܵܗ̇، ܒܸܬ ܐܵܬܹܐ ܒܝܼܫܵܐ ܘܚܵܛܸܦܠܵܗ̇ ܗܹܡܸܙܡܵܢ ܕܙܪܝܼܥܬܵܐ ܝܠܵܗ̇ ܒܠܸܒܹܗ. ܐܵܗܵܐ ܝܠܹܗ ܗ̇ܘ ܕܥܲܠ ܡܲܪܙܵܐ ܕܐܘܼܪܚܵܐ ܦܸܫܠܹܗ ܙܸܪܥܝܵܐ. ܐܝܼܢܵܐ ܗ̇ܘ ܕܥܲܠ ܫܘܿܥܵܐ ܦܸܫܠܹܗ ܙܸܪܥܝܵܐ، ܗ̇ܘ ܝܠܹܗ ܕܫܵܡܸܥ ܗܹܡܸܙܡܵܢ، ܘܒܗ̇ܝ ܣܵܥܵܬ ܒܚܲܕܘܼܬܵܐ ܡܩܵܒܸܠܵܗ̇، ܐܝܼܢܵܐ ܠܲܝܬܠܹܗ ܥܸܩܵܪܵܐ ܒܝܼܵܗ̇، ܐܸܠܵܐ ܕܙܲܒܼܢܵܐ ܝܠܵܗ̇. ܘܐܝܼܡܵܢ ܕܗ݇ܘܹܐ ܠܹܗ ܐܘܼܠܨܵܢܵܐ ܝܲܢ ܪܕܘܼܦܝܵܐ ܒܘܼܬ ܗܹܡܸܙܡܵܢ، ܓ̰ܲܠܕܹܐ ܟܹܐ ܤܵܪܸܒ̣. ܐܝܼܢܵܐ ܗ̇ܘ ܕܓܵܘ ܟܝܼܬܒܼܹ̈ܐ ܦܸܫܠܹܗ ܙܸܪܥܝܵܐ، ܗ̇ܘ ܝܼܠܹܗ ܕܫܵܡܸܥ ܗܹܡܸܙܡܵܢ، ܘܬܲܚܡܵܢܬܵܐ ܕܐܵܗܵܐ ܥܵܠܡܵܐ ܘܡܲܚܠܲܛܬܵܐ ܕܥܘܼܬܪܵܐ ܟܹܐ ܚܲܢܩܝܼܠܵܗ̇ ܠܡܸܠܬܵܐ، ܘܕܠܵܐ ܛܥܘܿܢܝܵܬܹ̈ܐ ܟܹܐ ܗܵܘܝܵܐ، ܐܝܼܢܵܐ ܗ̇ܘ ܕܥܲܠ ܐܲܪܥܵܐ ܛܲܒܼܬܵܐ ܦܸܫܠܹܗ ܙܸܪܥܝܵܐ، ܗ̇ܘ ܝܼܠܹܗ ܕܫܵܡܸܥ ܗܹܡܸܙܡܵܢܝܼ ܘܦܲܪܡܹܐ، ܘܝܵܗ݇ܒܼܸܠ ܛܥܘܿܢܝܵܬܹ̈ܐ، ܘܥܵܒܼܸܕ ܐܝܼܬ ܕܲܡܵܐܐ ܘܐܝܼܬ ܕܲܫܬܝܼܢ ܘܐܝܼܬ ܕܲܬܠܵܬܝܼܢ.
♱♱♱♱♱♱♱♱♱