|
ܚܲܕܼܒ̇ܫܲܒܵܐ ܕܲܬ̣ܪܹܝܢ ܕܲܫܠܝܼܚܹ̈ܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ.
ܕܩܲܢܟܹ̇ܐ. ܪܹܫ ܩܵܠܵܐ.
ܕܲܒܲܪ ܐܸܢܘܿܢ ܠܲܠܡܹܐܢܵܐ ܕܲܨ̣ܒ̣ܵܘ؛ ܒܚܲܝܠܵܐ ܕܦܘܼܪܩܵܢܵܐ ܕܝܲܡܝܼܢܹܗ. ܒܲܠܡܹܐܢܹܗ ܕܲܡܫܝܼܚܵܐ ܟܠܲܢ ܐܸܬܼܓܵܘܲܣܢܲܢ. ܫܲܝܢܵܐ ܘܲܫܠܵܡܵܐ ܢܲܓ̇ܝܼܪܵܐ. ܒܪܘܼܚܵܐ ܕܩܘܼܕܼܫܵܐ ܐܸܫ̣ܟܲܚܢܲܢ. ܬܢܝܼ؛ ܫܲܒܲܚ. ܫܒ̣ܝܼܚ ܡ̣ܢ ܟܠ ܘܪܵܡ ܡ̣ܢ ܟܠ ܘܲܡܥܲܠܲܝ ܠܥܸܠ ܡ̣ܢ ܟܠܵܐ. ܢܲܛܲܪ ܥܹܕ̇ܬܵܟܼ ܒܲܚܢܵܢܵܟܼ. ܘܲܠܝܲܠܕܹ̇ܝ̈ܗ̇ ܦܪܘܿܩ ܒܲܨܠܝܼܒ̣ܵܟܼ܀
ܩܸܪܝܵܢܵܐ؛ ܝܘܼܐܹܝܠ؛ ܒ؛ 15‐27 ܚܲܒ̣ܪܹܗ؛ ܦܪܲܟܿܣܝܼܣ؛ ܕ؛ 5‐23
ܫܘܼܪܵܝܵܐ؛ ܢܸܚܕܸ̇ܐ ܠܸܒ̇ܗܘܿܢ ܕܐܲܝܠܹܝܢ ܕܒ̣ܵܥܹ̇ܝܢ ܠܡܵܪܝܵܐ* ܒܥܵܘ ܠܡܵܪܝܵܐ ܘܐܸܬܼܚܲܝܲܠܘ* ܘܲܒܼܥܵܘ ܐܲܦܵܘ̈ܗܝ ܒܟܼܠܙܒܲܢ* ܐܸܬ̇ܕܲܟܼܪܘ ܬܸܕܼܡ̱ܪ̈ܵܬܹܗ ܕܲܥ̣ܒܲܕܼ* ܬܸܕܼܡ̱ܪ̈ܵܬܹܗ ܘܕܼܝܼܢܵܐ ܕܦܘܼܡܹܗ܀ ܙܲܪܥܹܗ ܕܐܲܒ̣ܪܵܗܵܡ ܥܲܒ̣ܕܹ̇ܗ* ܘܲܒ̣ܢܲܝ̈ ܝܲܥܩܘܿܒܼ ܓܒ̣ܵܘ̈ܗܝ* ܗܘܸܝܘܼ ܡܵܪܝܵܐ ܐܲܠܵܗܲܢ*
ܫܠܝܼܚܵܐ؛ ܐ؛ ܩܘܿܪ̈ܲܢܬܼܵܝܹܐ؛ ܗ؛ 6‐ܘ؛ 12
ܙܘܼܡܵܪܵܐ؛ ܒܲܠܥܵܠܲܡ ܐܲܢ݇ܬ̇ܘܼ. ܛܵܒ̣ܘܼ ܡܵܪܝܵܐ ܘܪ̈ܲܚܡܵܘܗܝ ܥܲܠ ܟܠܗܘܿܢ ܥܲܒ̣ܕܵܘ̈ܗܝ. ܢܵܘܕ̇ܘܿܢ ܠܵܟܼ ܡܵܪܝܵܐ ܥܲܒ̣ܕܲܝ̈ܟ. ܘܙܲܕ̇ܝܼܩܲܝ̈ܟ ܢܫܲܒ̇ܚܘܼܢܵܟܼ. ܓ܀ ܘܫܘܼܒ̣ܚܵܐ ܕܡܲܠܟ̇ܘܼܬܼܵܟܼ ܢܹܐܡܪܘܼܢ. ܘܲܒ̣ܥܘܼܫܢܵܟܼ ܢܡܲܠܠܘܼܢ. ܕܲܢܚܵܘܘܿܢ ܠܲܒ̣ܢܲܝ̈ܢܵܫܵܐ ܓܲܢ݇ܒܵܪܘܼܬܼܵܟܼ ܘܫܘܼܒ̣ܚܵܐ ܕܡܲܠܟ̇ܘܼܬܼܵܟܼ. ܓ܀
ܐܹܘܲܢܓܲܠܝܼܘܿܢ؛ ܠܘܼܩܵܐ؛ ܙ؛ 31‐ܫܘܼܠܵܡܵܐ
ܕܐܹܘܲܢܓܲܠܝܼܘܿܢ؛ ܒܩܵܠܵܐ ܪܲܒܵܐ. ܐܹܬܹܐ ܠܒܲܝܬܵܟܼ ܒܐܝܼܩܵܪܵܐ ܘܐܸܦ̱ܪܥܵܟܼ ܢܸܕܼܪ̈ܲܝ. ܕܨܘܼܪܬܵܐ. ܘܫܲܪܝܲܬܸ ܒܕܸܡܥܹܝ̈ܗ̇ ܡܨܲܒ̇ܥܵܐ ܪܸ̈ܓ̣ܠܵܘܗܝ. ܘܕܼܝܼܠܵܗ̇ ܡܲܪܝܼܪܵܐ ܢܲܦ̮ܫܵܗ̇. ܠܒܲܝܬܹܗ ܕܫܸܡܥܘܿܢ ܦܪܝܼܫܵܝܵܐ ܥܸܠܲܬܸ ܚܲܛܵܝܬܵܐ. ܘܲܒ̣ܥܲܝܢܹ̈ܐ ܗܵܢܹ̇ܝܢ ܕܲܒܼܗܹܝܢ ܚܛܵܗܹ̈ܐ ܡܸܬ̇ܬܲܓܿܪܵܐ ܗ݇ܘ̣ܵܬܼ. ܒܗܹܝܢ ܐܸܫܟ̇ܚܲܬܸ ܠܵܗ̇ ܫܘܼܒ̣ܩܵܢܵܐ ܕܚܵܘܒܹ̈ܐ ܡܵܪܝܵܐ. ܗܵܝ̇ ܓܹܝܪ ܕܠܲܒ̣ܢܲܝ̈ ܐ݇ܢܵܫܵܐ ܒܚܵܘܪܵܐ ܕܥܲܝܢܹܝ̈ܗ̇ ܫܵܒܲܝܵܐ ܗ݇ܘ̣ܵܬ̣. ܗܸܝ ܠܪܸ̈ܓ̣ܠܲܝܟ ܩܲܕ̇ܝܼ̈ܫܵܬܼܵܐ ܒܕܸܡܥܹܝ̈ܗ̇ ܨܲܒ̇ܥܲܬܸ. ܗܵܝ̇ ܕܣܲܥܪܵܗ̇ ܠܛܵܥܝܘܼܬܼܵܐ ܡܲܬ̣ܩܢܵܐ ܗ݇ܘ̣ܵܬܼ. ܐܲܝܟܼ ܕܲܒ̣ܣܸܕ̇ܘܿܢܵܐ ܠܪܸ̈ܓ̣ܠܲܝܟ ܘܒܹܗ ܟܲܦܪܲܬܸ. ܘܡܸܬܼܒܲܣܡܵܐ ܗ݇ܘ̣ܵܬܼ ܒܦܲܐܝܘܼܬܼܵܐ ܕܒ̣ܝܼ̈ܫܵܬ̣ܵܗ̇. ܡܸܫܚܵܐ ܝܲܩܝܼܪܵܐ ܡܸܫܚܲܬܸ ܠܪܸ̈ܓ̣ܠܲܝܟ ܦܵܪܘܿܩܲܢ. ܘܐܲܝܟܼ ܐܸܠܦܵܐ ܣܲܦܩܲܬܸ ܝܘܼܩܪܵܗ̇ ܫܕܼܵܬܸ ܐܵܦ ܗܸܝ ܣܲܢ̈ܝܵܬܼܵܗ̇. ܫܘܼܒ̣ܚܵܐ ܠܵܟܼ. ܫܲܒܲܚ؛ ܗܵܝ̇ ܙܵܢܝܼܬܼܵܐ ܕܠܘܼܩܕܲܡ ܐܝܼܬܹܝܗ̇ ܗܘܸܵܬܼ ܐܲܝܟܼ ܒܹܝܬܼ ܡܲܥܡ̱ܪܵܐ ܕܟܼܠ ܒܝܼ̈ܫܵܬܼܵܐ. ܘܟܸܢ ܗܘܸܵܬܼ ܡܩܲܒ̇ܠܵܢܝܼܬܼܵܐ ܕܲܬܼܝܵܒ̣ܘܼܬܼܵܐ. ܗܵܝ̇ ܕܹܝܢ ܕܡܸܬ̇ܬܲܓܿܪܵܐ ܗ݇ܘܵܬ̣ ܒܟܼܠܗܘܿܢ ܚܵܘܒܹ̈ܐ. ܗܸܦܟܲܬܸ ܙܸܒ̣ܢܲܬܸ ܠܵܗ̇ ܦܘܼܪܩܵܢܵܐ ܠܢܲܦ̮ܫܵܗ̇. ܘܲܒܼܪܸܡܙܵܐ ܕܥܲܝܢܹ̈ܝܗ̇ ܙܲܠܝܼ̈ܠܵܬܼܵܐ. ܟܲܢܫܲܬܸ ܠܲܩܢܘܿܡܵܗ̇ ܟܠ ܚܘܼܣܪ̈ܵܢܝܼܢ. ܘܡܸܢܗܹܝܢ ܫܲܦܥܲܬܸ ܕܸܡܥܹ̈ܐ ܚܢܝܼ̈ܓܼܵܬܼܵܐ. ܘܐܲܫܝܼܓܲܬܸ ܠܪܸ̈ܓܼܠܲܝܟ ܩܲܕ̇ܝܼ̈ܫܵܬܼܵܐ. ܘܲܒ̣ܡܸܫܚܵܐ ܘܲܒܼܒܼܘܼܣܵܡܹ̈ܐ ܠܲܒܼܢܲܝ̈ܢܵܫܵܐ ܨܵܝ̇ܕܵܐ ܗ݇ܘ̣ܵܬܼ. ܘܲܒܼܣܘܼܛܡܹ̈ܐ ܕܥܵܘ̣ܠܵܐ ܟܠܫܵܥ ܐܵܣ̇ܪܵܐ ܗ݇ܘ̣ܵܬܼ. ܡܸܫܚܵܐ ܝܲܩܝܼܪܵܐ ܡܸܫܚܲܬܸ ܠܵܟܼ ܡܵܪܝ ܕܐܸܬܼܢ̱ܣܸܒ̣ܬ̇ ܡܸܛܠ ܦܘܼܪܩܵܢܲܢ. ܘܥܲܡܵܗ̇ ܠܵܟܼܘܼ ܩܵܪܹܝ̇ܢܲܢ. ܕܐܲܢ݇ܬ̇ܘܼ ܝܵܕܲܥ̇ ܟܠܗܘܿܢ ܚܲܫܲܝ̈ܢ ܡܵܪܹܟܠ. ܫܘܼܒ̣ܚܵܐ ܠܵܟܼ.
ܕܐ݇ܪ̈ܵܙܹܐ؛ ܒܲܒܼܝܲܕܼ ܫܠܵܡܵܐ.
ܐܲܬ̣ܩܸܢ ܐܲܪܥܵܐ ܥܲܠ ܡܲܬ̣ܩܢܹ̈ܝܗ̇. ܗܵܘ̇ ܕܐܝܼܬܼܵܘܗܝ ܡ̣ܢ ܩܕܼܵܡ ܥܵܠܡܹ̈ܐ. ܕܨܘܼܪܬܵܐ. ܡܵܪܝܵܐ ܥ̣ܒܲܕܼ ܐܲܪܥܵܐ ܒܚܲܝܠܹܗ. ܘܐܲܬ̣ܩܸܢ ܬܹܒܹܝܠ ܒܚܸܟܼܡ̱ܬܹܗ. ܒܪܸܡܙܹܗ ܥ̣ܒܲܕܼ ܒܪܝܼܬܼܵܐ ܟܠܵܗ̇ ܐܝܼܬܼܝܵܐ ܕܲܩܕܼܵܡ ܟܠ. ܘܠܲܚ̣ܡܵܗ̇ ܒܣܘܿܓ̣ܐܵܐ ܕܛܲܝܒ̇ܘܼܬܹܗ ܕܗܸܝ ܒܵܗ̇ ܬܹܐܠܲܦ ܥܠܵܘܗܝ. ܡܸܢܵܗ̇ ܥܲܒ̣ܕܵܗ̇ ܡܸܬܼܚܲܙܝܵܢܝܼܬܼܵܐ. ܡܢܵܬܼܵܐ ܐ݇ܚܪܹܬܼܵܐ ܡܸܬܼܝܲܕܼܥܵܢܝܼܬܼܵܐ. ܘܐܲܣ̣ܪܵܗ̇ ܠܟܼܠܵܗ̇ ܒܒܲܪܢܵܫܵܐ ܕܬܼܵܘܕܸܿܐ ܕܚܲܕܼܘܼ ܒܪܵܗ̇. ܕܲܒܼܝܲܕܼ ܚܘܼܒܹ̇ܗ ܢܵܘܕܲܥ ܥܲܠ ܝܵܬܹܗ؛ ܬܢܝܼ؛ ܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܐ݇ܪܵܙܵܐ ܟܲܣܝܵܐ ܕܲܡܫܝܼܚܵܐ ܗܵܐ ܡܸܬܼܦܲܠܲܓ̣. ܟܸܢܫܹ̈ܐ ܕܡܲܠܲܐܟܹ̈ܐ ܠܦܵܬܼܘܿܪ ܩܘܼܕܼܫܵܐ ܪܘܼܚܵܢܵܐ ܡܩܲܕ̇ܫܝܼܢ܀ ܟܠܲܢ ܒܝܲܕܼ ܛܲܝܒ̇ܘܼܬܹܗ ܕܦܵܪܘܿܩܲܢ. ܒܗܲܝܡܵܢܘܼܬܼܵܐ ܠܘܵܬܹܗ ܢܸܬ̣ܩܲܪܲܒ̣. ܘܦܲܓ̣ܪܹܗ ܘܲܕܼܡܹܗ ܕܲܒ̣ܪܵܐ ܡܫܝܼܚܵܐ. ܢܸܣܲܒ̣ ܘܲܢܫܲܒܲܚ ܟܲܕܼ ܐܵܡ̇ܪܝܼܢܲܢ ܗܲܠܸܠܘܼܝܲܗ܀ ܒܵܬܹ̈ܐ؛ ܘܲܗܘܸܵܐ ܡ̣ܢ ܫܸܠܝܵܐ ܡ̣ܢ ܫܡܲܝܵܐ. ܩܵܠܵܐ ܕܐܲܝܟܼ ܕܪܘܼܚܵܐ ܥܲܙܝܼܙܬܵܐ܀ ܟܠܲܢ ܒܝܲܕ ܛܲܝܒ̇ܘܼܬܹܗ ܘܫܲܪܟܵܐ܀
♱♱♱♱♱♱♱♱♱
|