ܚܲܕܼܒܫܲܒܵܐ ܕܲܬܼܪܹܝܢ ܕܣܘܼܒܵܪܵܐ
ܡܸܢܝܵܢܵܐ ܟܒ؛ 9 – ܟܓ؛ 2
ܬܸܒ̣ܘ ܘܲܫܠܵܘ ܡܸܢܝܵܢܵܐ؛ ܣܸܦܪܵܐ ܕܐܲܪܒܥܵܐ ܕܐܘܼܪܵܝܬܵܐ
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܬܹܐܠܹܗ ܐܲܠܵܗܵܐ ܠܟܸܣ ܒܸܠܥܲܡ ܒܠܲܝܠܹܐ ܘܐ݇ܡܸܪܹܗ ܐܸܠܹܗ؛ ܡܵܢܝܼ ܝ݇ܢܵܐ ܐܲܢܹܐ ܐ݇ܢܵܫܹ̈ܐ ܕܥܲܡܘܼܟܼ؟܀ ܘܐ݇ܡܸܪܹܗ ܒܸܠܥܲܡ ܩܵܐ ܐܲܠܵܗܵܐ؛ ܒܵܠܲܩ ܒܪܘܿܢܵܐ ܕܨܸܦܘܿܪ ܕܡܘܼܐܵܒ̣ ܫܘܼܕܸܪܹܗ ܒܵܬ݇ܪܝܼ ܘܐ݇ܡܸܪܹܗ ܐܸܠܝܼ؛܀ ܗܵܐ ܚܲܕ݇ ܛܵܝܸܦܵܐ ܦܠܸܛܠܹܐ ܡ̣ܢ ܡܸܨܪܹܝܢ؛ ܘܡ̣ܢ ܒܘܼܫܵܝܘܼܬܹܗ ܡܘܼܟܣܵܐ ܠܹܗ ܦܵܬܵܐ ܕܐܲܪܥܵܐ. ܐܵܕܝܼܵܐ ܬܵܐ ܠܘܼܛܠܹܗ ܒܲܠܟܵܐ ܡܵܨܸܢ ܦܵܠܫܸܢ ܥܲܡܹܗ ܘܬܲܠܩܸܢܹܗ. ܘܐ݇ܡܸܪܹܗ ܐܲܠܵܗܵܐ ܩܵܐ ܒܸܠܥܲܡ ܠܵܐ ܐܵܙܸܠ݇ܬ̇ ܥܲܡܲܝܗܝ ܘܠܵܐ ܠܵܝܛܸܬ̇ ܠܹܗ؛ ܣܵܒܵܒ ܒܪܝܼܟ̣ܵܐ ܝ݇ܠܹܗ.܀ ܘܩܸܡܠܹܗ ܒܸܠܥܲܡ ܒܩܵܝܕܲܡܬܵܐ ܘܐ݇ܡܸܪܹܗ ܩܵܐ ܓܘܼܪ̈ܵܢܹܐ ܕܒܵܠܲܩ ܕܘܼܪܘܼܢ ܠܲܐܬܪܵܘܟ̣ܘܿܢ؛ ܣܵܒܵܒ ܠܵܐ ܒܣܸܡܠܵܐ ܠܹܗ ܡܵܪܝܵܐ ܕܐܵܙܸܠ݇ܢ ܥܲܡܵܘܟ̣ܘܿܢ؛ ܘܩܸܡܠܗ݇ܘܿܢ ܓܘܼܪ̈ܵܢܹܐ ܕܡܘܼܐܵܒ̣ ܘܐ݇ܬܹܐܠܗ݇ܘܿܢ ܠܟܸܣ ܒܵܠܲܩ ܘܐܵܡܪܝܼ ܐܸܠܹܗ ܠܵܐ ܒܣܸܡܠܵܐ ܠܹܗ ܒܸܠܥܲܡ ܕܐܵܬܹܐ ܥܲܡܲܢ. ܡܸܕܪܹܐ ܫܘܼܕܸܪܹܗ ܒܵܠܲܩ ܓܵܗܵܐ ܕܬܪܹܝ؛ ܩܵܨܸܕܹ̈ܐ ܒܘܼܫ ܓܘܼܪܹ̈ܐ ܘܒܘܼܫ ܡܝܘܼܩܪܹ̈ܐ ܡ̣ܢ ܕܐܵܢܝܼ ܩܲܕ݇ܡܵܝܹ̈ܐ.܀ ܘܐ݇ܬܹܐܠܗ݇ܘܿܢ ܠܟܸܣ ܒܸܠܥܲܡ ܘܐ݇ܡܸܪܗ݇ܘܿܢ ܐܸܠܹܗ؛ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܒܵܠܲܩ ܒܲܪ ܨܸܦܘܿܪ؛ ܠܵܐ ܡܲܚܦܸܠܸܬ̇ ܡ̣ܢ ܠܹܐܬܵܝܵܐ ܠܟܸܣܠܝܼ؛ ܣܵܒܵܒ ܪܵܒܵܐ ܒܸܬ ܥܵܒ̣ܕܸܢ ܐܝܼܩܵܪܵܐ ܩܵܬܘܼܟܼ؛ ܘܟܠ ܡܸܢܕܝܼ ܕܐܵܡܪܸܬ̇ ܠܝܼ ܒܸܬ ܬܲܡܸܡܸܢ؛ ܬܵܐ ܠܘܼܛܠܹܗ ܐܵܗܵܐ ܛܵܝܸܦܵܐ ܩܵܬܝܼ.܀ ܓ̰ܘܼܘܸܒܠܹܗ ܒܸܠܥܲܡ ܘܐ݇ܡܸܪܹܗ ܠܩܵܨܸܕܹ̈ܐ ܕܒܵܠܲܩ. ܐܸܢ ܝܵܗ݇ܒ̣ܸܠܝܼ ܒܵܠܲܩ ܡܠܲܝܬܵܐ ܕܒܲܝܬܹܗ ܣܹܐܡܵܐ ܝܲܢ ܕܲܗܒ̣ܵܐ ܠܹܐ ܡܵܨܸܢ ܕܥܵܒ̣ܪܸܢ ܥܲܠ ܗܹܡܸܙܡܵܢ ܕܦܘܼܡܹܗ ܕܡܵܪܝܵܐ ܐܲܠܵܗܝܼ؛ ܠܵܐ ܙܥܘܿܪܬܵܐ ܘܠܵܐ ܓܘܼܪܬܵܐ.܀ ܐܝܼܢܵܐ ܦܘܼܫܘܼܢ ܐܘܼܦ ܐܲܚܬܘܿܢ ܠܲܐܟ̣ܵܐ ܠܟܸܣܠܝܼ ܒܠܲܝܠܹܐ ܘܒܸܬ ܝܵܕܥܸܢ ܡܘܼܕܝܼ ܒܸܬ ܡܲܙܝܸܕ ܡܵܪܝܵܐ ܠܗܲܡܙܘܼܡܹܐ ܥܲܡܝܼ. ܘܐ݇ܬܹܐܠܹܗ ܐܲܠܵܗܵܐ ܥܲܠ ܒܸܠܥܲܡ ܒܠܲܝܠܹܐ ܘܐ݇ܡܸܪܹܗ ܐܸܠܹܗ؛ ܐܸܢ ܠܸܟ̰ܝܵܕܘܼܟܼ ܐ݇ܬܹܐܠܗ݇ܘܿܢ ܐܲܢܹܐ ܐ݇ܢܵܫܹ̈ܐ؛ ܩܘܼܡ ܐ݇ܙܸܠ ܥܲܡܲܝܗܝ. ܐܲܚܟ̰ܝܼ ܗ̇ܘ ܡܸܢܕܝܼ ܕܐܵܡܪܸܢܘܼܟܼ ܗ̇ܘ ܥܵܒ̣ܕܸܬ̇.܀ ܘܩܸܡܠܹܗ ܒܸܠܥܲܡ ܒܩܵܝܕܲܡܬܵܐ ܘܡܘܼܛܥܸܢܹܗ ܥܲܠ ܚܡܲܪܬܹܗ؛ ܘܐ݇ܙܸܠܹܗ ܥܲܡ ܓܘܼܪ̈ܵܢܹܐ ܕܡܘܼܐܵܒ̣.܀ ܘܚܸܡܠܵܗ̇ ܟܲܪܒܹܗ ܕܐܲܠܵܗܵܐ ܥܲܠܹܗ ܡ̣ܢ ܣܵܒܵܒ ܕܐ݇ܙܸܠܹܗ؛ ܘܟܠܹܐܠܹܗ ܡܲܠܲܐܟ̣ܹܗ ܕܡܵܪܝܵܐ ܓܵܘ ܐܘܼܪܚܹܗ ܩܵܐ ܕܡܲܕܸܪܹܗ؛ ܟܲܕ ܗ̇ܘ ܪܟܝܼܒ̣ܵܐ ܥܲܠ ܚܡܲܪܬܹܗ؛ ܘܬܪܹܝ ܓ̰ܘܲܢܩܹ̈ܐ ܥܲܡܹܗ. ܘܚܙܹܐܠܵܗ̇ ܚܡܲܪܬܵܐ ܠܡܲܠܲܐܟ̣ܵܐ ܕܡܵܪܝܵܐ ܟܸܠܝܵܐ ܓܵܘ ܐܘܼܪܚܵܐ ܘܣܲܝܦܹܗ ܓܪܝܼܫܵܐ ܕܒ̣ܝܼܩܵܐ ܒܐܝܼܕܹܗ. ܦܟ̰ܸܠܵܗ̇ ܚܡܲܪܬܵܐ ܡ̣ܢ ܐܘܼܪܚܵܐ ܘܐ݇ܙܸܠܵܗ̇ ܓܵܘ ܕܸܫܬܵܐ. ܘܡܸܚܝܵܐ ܠܹܗ ܒܸܠܥܲܡ ܕܡܲܕܸܪܵܗ̇ ܠܐܘܼܪܚܵܐ.܀ ܡܸܕܪܹܐ؛ ܟܠܹܐܠܹܗ ܡܲܠܲܐܟ̣ܵܐ ܕܡܵܪܝܵܐ ܓܘ ܚܲܕ݇ ܥܵܠܘܿܠܬܵܐ ܕܟܲܪܡܵܐ ܡ̣ܢ ܬܸܪܘܲܝܗܝ ܕܸܦܢܵܬܹ̈ܐ ܣܝܵܓ̣ܵܐ [ܣܝܵܓ̣݇ܝܵܐ]. ܘܚܙܹܐܠܵܗ̇ ܚܡܲܪܬܵܐ ܠܡܲܠܲܐܟ̣ܵܐ ܕܡܵܪܝܵܐ ܘܚܠܸܨܠܵܗ̇ ܥܲܠ ܓܘܼܕܵܐ؛ ܘܚܠܝܼܨܵܐ ܠܵܗ̇ ܐܲܩܠܵܗ̇ ܕܒܸܠܥܲܡ ܥܲܠ ܓܘܼܕܵܐ؛ ܘܡܸܕܪܹܐ ܡܸܚܝܵܐ ܠܹܗ.܀ ܘܓܵܗܵܐ ܐ݇ܚܹܪ݇ܬܵܐ ܡܲܠܲܐܟ̣ܵܐ ܕܡܵܪܝܵܐ ܟܠܹܐܠܹܗ ܒܚܲܕ݇ ܕܘܼܟܬܵܐ ܒܘܼܫ ܥܝܼܩܬܵܐ؛ ܐܲܝܟܵܐ ܕܠܲܝܬ̇ ܗ݇ܘܵܐ ܐܘܼܪܚܵܐ ܠܸܦܟ̰ܵܠܵܐ؛ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ.܀ ܘܚܙܹܐܠܵܗ̇ ܚܡܲܪܬܵܐ ܠܡܲܠܲܐܟ̣ܵܐ ܕܡܵܪܝܵܐ ܘܒܪܸܟܠܵܗ̇ ܬܚܘܿܬ ܒܸܠܥܲܡ؛ ܘܡܸܚܝܵܐ ܠܹܗ ܒܚܘܼܛܪܵܐ.܀ ܗܵܝܓܵܗ̇ ܦܬܸܚܠܹܗ ܡܵܪܝܵܐ ܦܘܼܡܵܗ̇ ܕܚܡܲܪܬܵܐ ܘܐ݇ܡܸܪܵܗ̇ ܩܵܐ ܒܸܠܥܲܡ؛ ܡܘܼܕܝܼ ܥܒ̣ܸܕܠܝܼ ܩܵܬܘܼܟܼ؛ ܕܩܲܡ ܡܵܚܸܬ̇ ܠܝܼ ܐܲܢܹܐ ܬܠܵܬܵܐ ܓܵܗܹ̈ܐ؟܀ ܘܐ݇ܡܸܪܹܗ ܒܸܠܥܲܡ ܡ̣ܢ ܣܵܒܵܒ ܕܡܘܼܣܚܸܪܵܟ̣ܝ ܒܝܼܝܼ. ܘܐܸܢ ܗܵܘܹܐ ܗ݇ܘܵܐ ܒܐܝܼܕܝܼ ܣܲܝܦܵܐ ܒܸܬ ܗܵܘܸܢ ܗ݇ܘܵܐ ܩܛܝܼܠܵܟ̣ܝ. ܘܐ݇ܡܸܪܵܗ̇ ܚܡܲܪܬܵܐ ܩܵܐ ܒܸܠܥܲܡ. ܠܹܐ ܝ݇ܘܵܢܝ ܐܵܢܵܐ ܚܡܲܪܬܘܼܟܼ ܕܪܟܝܼܒ̣ܵܐ ܝ݇ܘܸܬ̇ ܥܲܠܝܼ ܗܵܐ ܡ̣ܢ ܥܸܕܵܢܵܐ ܕܙܥܘܿܪܘܼܬܘܼܟܼ ܘܗܲܠ ܐܸܕܝܘܿܡ݇ ܝܵܘܡܵܐ. ܗܸܟ̰ ܥܒ̣ܝܼܕܬܵܐ ܝ݇ܘܵܢܝ ܩܵܬܘܼܟܼ ܗܵܕܟ̣ܵܐ ܡܸܢܕܝܼ؟ ܐܵܡܸܪ ܐܸܠܵܗ̇؛ ܠܵܐ.܀ ܦܬܸܚܠܹܗ ܡܵܪܝܵܐ ܥܲܝܢܹ̈ܐ ܕܒܸܠܥܲܡ ܘܚܙܹܐܠܹܗ ܠܡܲܠܲܐܟ̣ܵܐ ܟܸܠܝܵܐ ܓܵܘ ܐܘܼܪܚܵܐ ܣܲܝܦܹܗ ܓܪܝܼܫܵܐ ܕܒ̣ܝܼܩܵܐ ܒܐܝܼܕܹܗ. ܘܒܪܸܟܠܹܗ ܣܓ̣ܸܕܠܹܗ ܩܵܕ݇ܡܹܗ.܀ ܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ ܕܡܵܪܝܵܐ؛ ܩܵܡܘܿܕܝܼ ܡܚܹܐܠܘܼܟܼ ܠܚܡܲܪܬܘܼܟܼ ܐܲܢܹܐ ܬܠܵܬܵܐ ܓܵܗܹ̈ܐ؟ ܐܵܕܝܼܵܐ ܐܵܢܵܐ ܦܠܝܼܛܵܐ ܝ݇ܘܸܢ ܕܗܵܘܸܢ ܐܸܠܘܼܟܼ ܡܲܕܸܪܵܢܵܐ. ܣܵܒܵܒ ܕܪ݇ܚܸܫܠܘܼܟܼ ܒܚܲܕ݇ ܐܘܼܪܚܵܐ ܕܲܪܩܘܼܒ̣ܠܝܼ.܀ ܘܩܲܡ ܚܵܙܝܵܐ ܠܝܼ ܚܡܲܪܬܵܐ ܘܦܟ̰ܸܠܵܗ̇ ܡ̣ܢ ܩܵܕ݇ܡܝܼ ܐܲܢܹܐ ܬܠܵܬܵܐ ܓܵܗܹ̈ܐ. ܐܸܢ ܠܵܐ ܗܵܘܝܵܐ ܗ݇ܘ̣ܵܐ ܦܟ̰ܝܼܠܬܵܐ؛ ܐܵܕܝܼܵܐ ܒܸܬ ܗܵܘܸܢ ܗ݇ܘܵܐ ܩܛܝܼܠܘܼܟܼ. ܘܐܸܠܵܗ̇ ܡܲܚܝܼܝܸܢ ܗ݇ܘܵܐ.܀ ܐ݇ܡܸܪܹܗ ܒܸܠܥܲܡ ܩܵܐ ܡܲܠܲܐܟ̣ܵܐ ܚܛܹܐܠܝܼ ܠܹܐ ܝܵܕܥܸܢ ܗ݇ܘܵܐ ܕܐܲܢ݇ܬ̇ ܟܸܠܝܵܐ ܝ݇ܘܸܬ̇ ܕܲܪܩܘܼܒ̣ܠܝܼ ܓܵܘ ܐܘܼܪܚܵܐ. ܐܵܕܝܼܵܐ ܐܸܢ ܠܹܐ ܝ݇ܘܸܬ̇ ܪܵܐܙܝܼ ܒܸܬ ܕܵܝܪܸܢ ܠܒܲܝܬܝܼ ܐ݇ܡܸܪܹܗ ܡܲܠܲܐܟ̣ܵܐ ܕܡܵܪܝܵܐ ܩܵܐ ܒܸܠܥܲܡ. ܐ݇ܙܹܠ ܥܲܡ ܕܐܲܢܹܐ ܐ݇ܢܵܫܹ̈ܐ. ܐܲܚܟ̰ܝܼ ܗ̇ܘ ܡܸܢܕܝܼ ܕܐܵܡܪܸܢܘܼܟܼ ܗ̇ܘ ܥܵܒ̣ܕܸܬ̇. ܘܐ݇ܙܸܠܹܗ ܒܸܠܥܲܡ ܥܲܡ ܓܘܼܪ̈ܵܢܹܐ ܕܒܵܠܲܩ.܀ ܘܫܡܝܼܥܠܹܗ ܒܵܠܲܩ ܕܐ݇ܬܹܐܠܹܗ ܒܸܠܥܲܡ. ܦܠܸܛܠܹܗ ܠܸܬܦܵܩܵܐ ܒܝܼܹܗ ܓܵܘ ܡܵܬܵܐ ܕܡܘܼܐܵܒ̣ ܥܲܠ ܬܸܚܘܼܒ ܕܐܲܪܢܘܿܢ.܀ ܘܐ݇ܡܸܪܹܗ ܒܵܠܲܩ ܩܵܐ ܒܸܠܥܲܡ. ܫܘܼܕܸܪܝܼ ܒܵܬ݇ܪܘܼܟܼ ܠܸܟ̰ܝܵܕܘܼܟܼ؛ ܩܵܡܘܿܕܝܼ ܠܵܐ ܐ݇ܬܹܐܠܘܼܟܼ؛ ܝܲܢ ܒܲܠܟܵܐ ܚܫܸܒ̣ܠܘܼܟܼ ܕܠܹܐ ܡܵܨܸܢ ܕܥܵܒ̣ܕܸܢ ܐܝܼܩܵܪܵܐ ܩܵܬܘܼܟܼ؟܀ ܘܐ݇ܡܸܪܹܗ ܒܸܠܥܲܡ ܩܵܐ ܒܵܠܲܩ. ܐܵܕܝܼܵܐ ܕܐ݇ܬܹܐܠܝܼ ܠܟܸܣܠܘܼܟܼ. ܩܵܡܘܿ ܡܵܨܸܢ ܕܐܵܡܪܸܢ ܚܲܕ݇ ܡܸܢܕܝܼ ܫܒ̣ܘܿܩ ܡ̣ܢ ܕܗ̇ܘ ܚܲܒܪܵܐ ܕܡܲܬܸܒ̣ ܐܲܠܵܗܵܐ ܓܵܘ ܦܘܼܡܝܼ؛ ܗܲܪ ܗ̇ܘ ܒܸܬ ܐܵܡܪܸܢ. ܘܐ݇ܙܸܠܹܗ ܒܸܠܥܲܡ ܥܲܡ ܒܵܠܲܩ؛ ܘܡܘܼܥܒ̣ܸܪܹܗ ܒܐܝܼܩܵܪܵܐ ܠܩܘܼܪܝܲܬ ܚܸܨܪܘܿܬ.܀ ܘܦܪܸܡܠܹܗ ܒܵܠܲܩ ܬܵܘܪܹ̈ܐ ܘܥܸܪ̈ܒܹܐ ܘܫܘܼܕܸܪܹܗ ܩܵܐ ܒܸܠܥܲܡ ܘܠܓܘܼܪ̈ܵܢܹܐ ܕܥܲܡܹܗ.܀ ܘܟܲܕ ܗ݇ܘܹܐ ܠܵܗ̇ ܩܵܝܕܲܡܬܵܐ؛ ܠܘܼܒܸܠܹܗ ܒܵܠܲܩ ܩܵܐ ܒܸܠܥܲܡ ܘܡܘܼܣܸܩܠܹܗ ܠܒܸܡܘܼܬܼ ܒܲܥܠܵܐ؛ ܘܚܙܹܐܠܹܗ ܡ̣ܢ ܬܵܡܵܐ ܚܲܕ݇ ܣܵܡܵܐ ܡ̣ܢ ܛܵܝܸܦܵܐ ܕܝܼܣܪܵܝܹܠ.܀ ܘܐ݇ܡܸܪܹܗ ܒܸܠܥܲܡ ܩܵܐ ܒܵܠܲܩ. ܒܢܝܼ ܠܝܼ ܠܲܐܟ̣ܵܐ ܫܲܒ̣ܥܵܐ ܡܲܕܒܚܹ̈ܐ؛ ܘܗܲܕܸܪ ܩܵܬܝܼ ܫܲܒ̣ܥܵܐ ܬܵܘܪܹ̈ܐ ܘܫܲܒ̣ܥܵܐ ܒܲܪ̈ܥܵܢܹܐ؛ ܘܥܒ̣ܸܕܠܹܗ ܒܵܠܲܩ ܐܲܝܟܼ ܕܐ݇ܡܸܪܹܗ ܒܸܠܥܲܡ. ܘܡܘܼܣܸܩܠܗ݇ܘܿܢ ܒܵܠܲܩ ܘܒܸܠܥܲܡ ܬܵܘܪܹ̈ܐ ܘܒܲܪ̈ܥܵܢܹܐ ܥܲܠ ܡܲܕܒܚܵܐ.܀
ܚܲܒ̣ܪܹܗ
ܐܹܫܲܥܝܵܐ ܡܓ؛ 14 ‐ ܡܕ؛ 6
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܦܲܪܩܵܢܵܘܟ̣ܘܿܢ ܩܲܕܝܼܫܵܐ ܕܝܼܣܪܵܝܹܠ؛ ܒܘܼܬ ܚܵܬܸܪ ܕܝܼܵܘܟ̣ܘܿܢ ܫܘܼܕܸܪܝܼ ܠܒܵܒ̣ܹܠ؛ ܘܡܘܼܬܹܐ ܠܝܼ ܠܟܠܲܝܗܝ ܥܵܪ̈ܘܿܩܹܐ؛ ܘܠܟܲܠܕ̈ܵܝܹܐ ܕܓܵܘ ܓܵܡܝܼܹ̈ܐ ܕܚܸܩܪܵܐ.܀ ܐܵܢܵܐ ܝ݇ܘܸܢ ܡܵܪܝܵܐ ܩܲܕܝܼܫܵܘܟ̣ܘܿܢ؛ ܕܒܪܹܐܠܝܼ ܠܝܼܣܪܵܝܹܠ ܡܲܠܟܵܘܟ̣ܘܿܢ. ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܝܘܼܗ݇ܒ̣ܸܠܹܗ ܐܘܼܪܚܵܐ ܒܝܵܡܵܐ ܘܫܒ̣ܝܼܠܵܐ ܒܡܝܼܵܐ ܚܲܝܠܵܢܹ̈ܐ. ܕܡܦܵܠܸܛ ܟܵܠܸܣܟܹ̈ܐ ܘܚܲܝܠܵܐ ܙܲܪܒܵܢܵܐ؛ ܡܐܸܚܕܵܕܹܐ ܒܸܬ ܕܵܡܟ̣ܝܼ ܘܠܹܐ ܩܵܝܡܝܼ؛ ܘܒܸܬ ܟ̰ܵܡܥܝܼ ܐܲܝܟܼ ܫܪܵܓ̣݇ܝܵܐ ܛܲܦܛܸܦܲܢܬܵܐ.܀ ܠܵܐ ܕܵܟ̣ܪܝܼܬܘܿܢ ܡܸܢܕܝܼܵܢܹ̈ܐ ܩܵܕ݇ܡܵܝܹ̈ܐ؛ ܘܐܵܢܝܼ ܕܡ̣ܢ ܫܘܼܪܵܝܵܐ ܠܵܐ ܦܵܪܡܝܼܬܘܿܢ. ܗܵܐ ܒܸܬ ܒܵܪܸܢ ܚܲܕ݇ ܡܸܢܕܝܼ ܚܲܕܬܵܐ؛ ܘܐܵܕܝܼܵܐ ܒܸܬ ܡܲܓ̰ܝܸܢ ܘܚܵܙܝܼܬܘܿܢ ܠܹܗ. ܒܸܬ ܦܵܬܚܸܢ ܐܘܼܪܚܵܐ ܓܵܘ ܒܲܪܝܼܵܐ ܘܢܲܗܪ̈ܵܘܵܬܹܐ ܓܵܘ ܐܲܫܝܼܡܘܿܢ. ܒܸܬ ܫܵܟܪܝܼ ܠܝܼ ܗܲܝܘܵܢܹ̈ܐ ܕܒܲܪܝܼܵܐ. ܟ̰ܲܩܵܠܹ̈ܐ ܘܢܲܥܵܡܹ̈ܐ. ܣܵܒܵܒ ܕܝܘܼܗ݇ܒ̣ܸܠܝܼ ܡܝܼܵܐ ܓܵܘ ܒܲܪܝܼܵܐ ܘܢܲܗܪ̈ܵܘܵܬܹܐ ܓܵܘ ܐܲܫܝܼܡܘܿܢ. ܕܫܵܬܹܐ ܛܵܝܸܦܝܼ ܓܘܼܒܝܵܐ.܀ ܐܵܗܵܐ ܛܵܝܸܦܵܐ ܕܓܘܼܒܹܐ ܠܝܼ ܩܵܐ ܓܵܢܝܼ؛ ܒܸܬ ܫܵܬܝܼ.܀ ܠܹܐ ܗ݇ܘܵܐ ܐܸܠܝܼ ܩܪܹܐܠܘܼܟܼ ܝܲܥܩܘܿܒ̣ ܕܩܲܡ ܩܵܪܸܢܘܼܟܼ ܝܼܣܪܵܝܹܠ؟ ܠܵܐ ܡܘܼܬܹܐܠܘܼܟܼ ܐܸܠܝܼ ܦܵܐܪܹ̈ܐ ܩܵܐ ܕܸܒ̣ܚܹ̈ܐ ܡܘܼܩܕܹ̈ܐ؛ ܘܒܕܸܒ̣ܚ̈ܘܼܟܼ ܠܵܐ ܡܝܘܼܩܸܪܘܼܟܼ ܐܸܠܝܼ؟ ܠܵܐ ܡܘܼܦܠܸܚܠܝܼ ܐܸܠܘܼܟܼ ܒܩܘܼܪ̈ܒܵܢܹܐ؛ ܘܠܵܐ ܡܘܼܟܟ̰ܸܚܠܝܼ ܐܸܠܘܼܟܼ ܒܠܒ̣ܘܿܢ݇ܬܵܐ؟܀ ܠܵܐ ܙܒ̣ܸܢܘܼܟܼ ܐܸܠܝܼ ܒܙܘܼܙܹ̈ܐ ܩܲܢܝܵܐ ܕܒܸܣܡܵܐ ܘܒܬܲܪܒܵܐ ܕܕܸܒ̣ܚܘܼܟܼ ܠܵܐ ܡܘܼܣܒ̣ܸܥܠܘܼܟܼ ܐܸܠܝܼ؟ ܐܸܠܵܐ ܡܘܼܦܠܸܚܠܘܼܟܼ ܐܸܠܝܼ ܒܚܛܝܼܵܬ̈ܘܼܟܼ؛ ܘܡܘܼܟܟ̰ܸܚܠܘܼܟܼ ܐܸܠܝܼ ܒܥܵܘܠܘܼܟܼ.܀ ܐܵܢܵܐ ܝ݇ܘܸܢ ܕܓܵܪܕܸܢ ܥܵܘܠܘܼܟܼ ܒܘܼܬ ܚܵܬܸܪ ܕܝܼܝܼ؛ ܘܚܛܝܼܵܬ̈ܘܼܟܼ ܠܹܐ ܕܵܟ̣ܪܸܢ.܀ ܡܲܝܬ݇ܝܼ ܠܝܼ ܠܒܵܠܘܼܟܼ ܘܒܸܬ ܥܵܒ̣ܕܲܚ ܕܝܼܘܵܢ ܡܐܘܼܕܵܠܹܐ ܚܘܼܫ ܕܐܲܢ݇ܬ̇ ܗܵܘܸܬ̇ ܗܲܩ.܀ ܒܵܒܘܼܟ ܩܵܕ݇ܡܵܝܵܐ ܚܛܹܐܠܹܗ؛ ܘܫܲܠܝܼܛܵܢ̈ܘܼܟܼ ܥܒ̣ܸܕܠܗ݇ܘܿܢ ܓܢܵܗܵܐ ܒܝܼܝܼ.܀ ܟ̰ܘܼܦܠܸܢܗ݇ܘܿܢ ܓܘܼܪ̈ܵܢܘܼܟܼ ܕܘܼܟܬܝܼ ܩܲܕܝܼܫܬܵܐ. ܒܸܬ ܝܵܗ݇ܒ̣ܸܢ ܠܝܲܥܩܘܿܒ̣ ܠܚܸܪܡܵܐ ܘܠܝܼܣܪܵܝܹܠ ܠܠܵܘܡܵܐ.܀ ܡܐܵܕܝܼܵܐ ܫܡܝܼܥ ܐܸܠܝܼ ܝܲܥܩܘܿܒ̣ ܪܹܓܝܼ؛ ܘܝܼܣܪܵܝܹܠ ܕܓܘܼܒܹܐܠܝܼ.܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܒܵܪܝܵܢܘܼܟܼ ܘܓܵܒ̣ܠܵܢܘܼܟܼ ܒܡܲܪܒܥܵܐ ܘܗܲܝܸܪܵܢܘܼܟܼ. ܠܵܐ ܙܵܕܥܸܬ̇ ܪܹܓܝܼ ܝܲܥܩܘܿܒ̣ ܘܝܼܣܪܵܝܹܠ ܕܩܪܹܐ ܠܝܼ.܀ ܒܸܬ ܝܵܗ݇ܒ̣ܸܢ ܡܝܼܵܐ ܒܕܘܼܟܬܵܐ ܨܗܝܼܬܵܐ ܘܓ̰ܵܪ̈ܝܵܢܹܐ ܓܵܘ ܒܵܪܘܼܙܘܼܬܵܐ. ܘܬܲܦܚܸܢ ܪܘܼܚܝܼ ܥܲܠ ܙܲܪܥܘܼܟܼ ܘܒܘܼܪ̈ܟܵܬܝܼ ܥܲܠ ܒܢܘܿܢ̈ܘܼܟܼ. ܒܸܬ ܓܲܪܘܸܣܝܼ ܡ̣ܢ ܓܵܘ ܓܸܠܵܐ ܐܲܝܟܼ ܚܝܼܠܵܦܹ̈ܐ ܥܲܠ ܫܵܩܝܼܬܵܐ ܕܡܝܼܵܐ. ܐܵܗܵܐ ܒܸܬ ܐܵܡܸܪ ܕܡܵܪܝܵܐ ܝ݇ܘܸܢ؛ ܘܐܵܗܵܐ ܒܸܬ ܩܵܪܹܐ ܒܫܸܡܹܗ ܕܝܲܥܩܘܿܒ̣؛ ܘܐܵܗܵܐ ܒܸܬ ܡܲܟܬܸܒ̣ ܐܝܼܕܹܗ ܠܡܵܪܝܵܐ. ܘܒܫܸܡܵܐ ܕܝܼܣܪܵܝܹܠ ܒܸܬ ܦܵܐܹܫ ܩܸܪܝܵܐ.܀
♱♱♱♱♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܩܘܿܠܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܗܵܘܝܼܬܘܿܢ ܕܵܝܸܡ ܒܨܠܘܿܬܵܐ؛ ܘܗܵܘܝܼܬܘܿܢ ܗܸܫܝܲܪ ܘܡܵܘܕܘܿܝܸܐ ܒܝܼܵܗ̇* ܘܨܵܠܹܐܡܘܿܢ ܨܠܘܿܬܵܐ ܐܘܼܦ ܒܘܼܬ ܕܝܼـܲܢ ܕܐܲܠܵܗܵܐ ܦܵܬܸܚ ܩܵܬܲܢ ܬܲܪܥܵܐ ܕܗܲܡܙܲܡܬܵܐ؛ ܠܗܲܡܙܘܼܡܹܐ ܐ݇ܪܵܙܵܐ ܕܡܫܝܼܚܵܐ ܕܒܘܼܬ ܕܝܼـܹܗ ܦܝܼܫܵܐ ܝ݇ܘܸܢ ܐ݇ܣܝܼܪܵܐ؛ ܕܓܵܠܸܢܹܗ ܘܗܲܡܙܸܡܸܢ ܒܘܼܬ ܕܝܼـܹܗ ܐܲܝܟܼ ܕܚܫܝܼܚܬܵܐ ܝ݇ܠܵܗ̇ ܩܵܬܝܼ* ܒܗܸܫܝܵܪܘܼܬܵܐ ܚܕܘܪܘܿܢ ܥܲܡ ܢܘܼܟܼܪ̈ܵܝܹܐ؛ ܘܙܒܼܘܿܢܘܿܢ ܕܲܥܘܝܼܵܘܟܼܘܿܢ* ܘܒܟܠ ܥܕܵܢܵܐ ܗܲܡܙܲܡܬܵܘܟܼܘܿܢ ܗܵܘܝܵܐ ܡܵܪܹܐ ܛܲܥܡܵܐ؛ ܐܲܝܟܼ ܕܒܡܸܠܚܵܐ ܗܵܘܝܵܐ ܡܘܼܡܠܸܚܬܵܐ. ܘܗܵܘܝܼܬܘܿܢ ܒܝܼܕܲܥܝܵܐ ܩܵܐ ܟܠ ܐ݇ܢܵܫܵܐ ܕܵܐܟܼܝܼ ܠܡܲܕܘܼܪܹܐ ܓ̰ܘܼܘܵܒ* ܡܸܢܕܝܼ ܕܡ̣ܢ ܠܟܸܣܠܝܼ ܒܸܬ ܡܲܕܸܥ ܠܵܘܟܼܘܿܢ ܛܘܼܟܼܝܼܩܘܵܣ ܐܵܚܘܿܢܵܐ ܡܘܼܚܸܒܵܐ ܘܡܫܲܡܫܵܢܵܐ ܡܗܘܼܡܢܵܐ ܘܚܲܒܼܪܲܢ ܒܡܵܪܝܵܐ* ܕܫܵܕܘܵܪܹܐ ܝ݇ܘܸܢ ܠܟܹܣܠܵܘܟܼܘܿܢ ܩܵܐ ܕܐܵܗܵܐ ܚܸܠܡܲܬ؛ ܕܫܵܩܸܠ ܚܲܒܪܵܐ ܡܸܢܵܘܟܼܘܿܢ ܘܝܵܗܒܸܠܵܘܟܼܘܿܢ ܠܸܒܵܐ* ܥܲܡ ܐܵܢܝܼܣܝܼܡܘܿܣ ܐܵܚܘܿܢܵܐ ܡܗܘܼܡܢܵܐ ܘܡܘܼܚܸܒܵܐ؛ ܗ̇ܘ ܕܝܼܠܹܗ ܡܸܢܵܘܟܼܘܿܢ. ܐܵܢܝܼ ܒܸܬ ܡܲܕܥܝܼܠܵܘܟܼܘܿܢ ܡܸܢܕܝܼ ܕܠܟܸܣܠܲܢ* ܒܵܩܘܿܪܹܐ ܝ݇ܠܹܗ ܒܫܠܵܡܵܘܟܼܘܿܢ ܐܵܪܸܣܛܲܪܟܘܿܣ ܝܲܚܣܝܼܪ ܕܝܼܠܹܗ ܥܲܡܝܼ؛ ܘܡܲܪܩܘܿܣ ܒܪܘܼܢܵܐ ܕܡܵܡܹܗ ܕܒܲܪܢܒܼܵܐ ܗ̇ܘ ܕܦܸܫܠܵܘܟܼܘܿܢ ܦܘܼܩܕܸܐ ܒܘܼܬ ܕܝܼـܹܗ؛ ܕܐܸܢ ܐܵܬܹܐ ܠܟܸܣܠܵܘܟܼܘܿܢ ܩܵܒܠܝܼܬܘܿܢ ܠܹܗ* ܘܝܼܫܘܿܥ ܗ̇ܘ ܕܦܵܐܸܫ ܩܸܪܝܵܐ ܝܘܼܣܛܘܿܣ؛ ܐܲܢܹܐ ܕܝܼܢܵܐ ܡ̣ܢ ܓܙܘܼܪܬܵܐ؛ ܘܐܵܢܝܼ ܐܲܚܟ̰ܝܼ ܩܲܡ ܗܲܝܸܪܝܼ ܠܝܼ ܒܡܲܠܟܘܼܬܵܐ ܕܐܲܠܵܗܵܐ؛ ܘܐܵܢܝܼ ܗܘܹܐܠܗ݇ܘܿܢ ܩܵܬܝܼ ܫܩܵܠܬܵܐ ܒܠܸܒܵܐ* ܒܵܩܘܿܪܹܐ ܝ݇ܠܹܗ ܒܫܠܵܡܵܘܟܼܘܿܢ ܐܘܼܦܦܪܵܐ ܪܹܓܵܐ ܕܡܫܝܼܚܵܐ؛ ܒܟܼܠ ܥܕܵܢܵܐ ܒܨܠܘܿܬܵܐ ܒܸܦܠܵܚܵܐ ܝ݇ܠܹܗ ܡ̣ܢ ܓܹܒܵܘܟܼܘܿܢ؛ ܕܗܵܘܝܼܬܘܿܢ ܟܵܡܝܼܠ ܒܟܠܹܗ ܪܸܙܵܝܹܗ ܕܐܲܠܵܗܵܐ* ܒܸܣܗܵܕܵܐ ܝ݇ܘܸܢ ܕܩܲܝܪܲܬ ܓܘܼܪܬܵܐ ܐܝܼܬܠܹܗ ܡ̣ܢ ܓܹܒܵܘܟܼܘܿܢ ܘܡ̣ܢ ܓܸܒ ܕܐܵܢܝܼ ܕܓܵܘ ܠܵܕܝܼܩܝܼܵܐ ܘܐܝܼܪܵܦܘܿܠܝܼܣ* ܒܵܩܘܿܪܹܐ ܝ݇ܠܹܗ ܒܫܠܵܡܵܘܟܼܘܿܢ ܠܘܼܩܵܐ ܐܵܣܝܵܐ ܘܕܹܐܡܵܐ* ܒܲܩܪܘܿܢ ܒܫܠܵܡܵܐ ܕܐܵܚܘܿܢܘܵܬܹ̈ܐ ܕܓܵܘ ܠܵܕܝܼܩܝܼܵܐ؛ ܘܒܫܠܵܡܵܐ ܕܢܘܼܡܦܹܐ ܘܥܹܕܬܵܐ ܕܓܵܘ ܒܲܝܬܹܗ* ܘܐܝܼܡܲܢ ܕܐܵܗܵܐ ܐܸܓܲܪܬܵܐ ܦܸܫܠܵܗ̇ ܩܪܝܼܬܵܐ ܠܟܸܣܠܵܘܟܼܘܿܢ؛ ܡܲܥܵܒܼܸܕܘܿܢ ܕܐܘܼܦ ܓܵܘ ܥܹܕܬܵܐ ܕܠܵܕܝܼܩܝܼܵܐ ܦܵܝܫܵܐ ܩܪܝܼܬܵܐ. ܘܗ̇ܝ ܕܦܸܫܠܵܗ̇ ܟܬܝܼܒܼܬܵܐ ܡ̣ܢ ܠܵܕܝܼܩܝܵܐ؛ ܩܪܹܐܡܘܿܢ ܠܵܗ̇ ܐܲܚܬܘܿܢ* ܘܐ݇ܡܘܿܪܘܿܢ ܠܐܲܪܟܝܼܦܘܿܣ ܕܗܵܘܹܐ ܗܹܫܝܲܪ ܒܚܸܠܡܲܬ ܕܩܘܼܒܸܠܸܗ ܡ̣ܢ ܡܵܪܲܢ ܘܗܵܘܹܐ ܬܲܡܘܼܡܵܗ̇* ܐܵܗܵܐ ܫܠܵܡܵܐ ܡܸܢܝܼ ܦܵܘܠܘܿܣ؛ ܘܗܵܘܝܼܬܘܿܢ ܒܸܬܟܼܵܪܵܐ ܠܝܸܣܘܼܪ̈ܝܼ. ܘܫܵܦܵܩܲܬ ܥܲܡܵܘܟܼܘܿܢ؛ ܐܵܡܹܝܢ*
♱♱♱♱♱♱♱♱♱♱♱♱♱♱
ܠܘܩܐ ܐ: 26 ‐ 57
ܐܘܢܓܠܝܘܢ ܩܕܝܫܐ ܕܡܪܢܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܐܝܼܢܵܐ ܒܝܲܪܚܵܐ ܕܫܬܵܐ ܦܝܼܫܠܹܗ ܫܘܼܕܪܵܐ ܓܲܒܼܪܝܼܹܠ ܡܲܠܲܐܟܼܵܐ ܡ̣ܢ ܠܘܵܬ ܐܲܠܵܗܵܐ ܠܸܓܠܝܼܠܵܐ ܠܡܕܝܼܢ݇ܬܵܐ ܕܫܸܡܘܼܗ̇ ܢܲܨܪܲܬ: ܠܘܵܬ ܒܬܘܼܠܬܵܐ ܕܛܠܝܼܒܬܵܐ ܠܓܲܒܼܪܵܐ ܕܫܸܡܹܗ ܝܵܘܣܸܦ: ܡ̣ܢ ܒܲܝܬܹܗ ܕܕܵܘܝܼܕ: ܘܫܸܡܵܐ ܕܒܬܘܼܠܬܵܐ ܡܲܪܝܲܡ. ܘܥܒܼܝܼܪܹܗ ܠܘܵܬܵܗ̇ ܡܲܠܲܐܟܼܵܐ، ܘܐ݇ܡܝܼܪܹܗ ܐܸܠܵܗ̇: ܫܠܵܡܵܐ ܠܹܟܼܝ ܡܠܹܝܬܵܐ ܛܲܝܒܘܼܬܵܐ: ܡܵܪܲܢ ܥܲܡܹܟܼܝ ܒܪܝܼܟܼܬܵܐ ܒܢܸܫܹ̈ܐ: ܐܝܼܢܵܐ ܗ̇ܝ ܟܲܕ ܚܙܹܐܠܵܗ̇ ܚܓ̰ܝܼܠܵܗ̇ ܒܗܹܡܸܙܡܵܢܹܗ: ܘܚܲܫܒ̣ܵܐ ܗ݇ܘܵܐ ܕܡܘܿܕܝܼ ܝܠܹܗ ܐܵܗܵܐ ܫܠܵܡܵܐ: ܘܐ݇ܡܝܼܪܹܗ ܐܸܠܵܗ̇ ܡܲܠܲܐܟܼܵܐ: ܠܵܐ ܙܵܕܥܵܬܝ ܡܲܪܝܲܡ: ܣܵܒܵܒ ܡܘܼܫَܟ̰ܸܚܠܹܟܼܝ ܛܲܝܒܘܼܬܵܐ ܠܘܵܬ ܐܲܠܵܗܵܐ: ܣܵܒܵܒ ܗܵܐ ܒܸܬ ܩܲܒܠܵܬܝ ܒܲܛܢܵܐ، ܘܒܸܕ ܝܲܠܕܵܬܝ ܒܪܘܿܢܵܐ، ܘܒܸܕ ܩܲܪܝܵܬܝ ܫܸܡܹܗ ܝܑܼܫܘܿܥ: ܐܵܗܵܐ ܒܸܕ ܗܵܘܹܐ ܪܲܒܵܐ، ܘܒܪܘܿܢܹܗ ܕܥܸܠܵܝܵܐ ܒܸܕ ܦܵܐܸܫ ܩܸܪܝܵܐ: ܘܒܸܕ ܝܲܗ݇ܒܼܸܠ ܐܸܠܹܗ ܡܵܪܝܵܐ ܐܲܠܵܗܵܐ ܟܘܼܪܣܝܵܐ ܕܕܵܘܝܼܕ ܒܵܒܘܼܗܝ: ܘܒܸܕ ܗܵܟܸܡ ܥܲܠ ܒܲܝܬܵܐ ܕܝܲܥܩܘܼܒܼ ܠܥܵܠܲܡ: ܘܠܡܲܠܟܘܼܬܹܗ ܬܝܵܡܵܐ ܠܹܐ ܗܵܘܹܐ: ܐܵܡܪܵܐ ܡܲܪܝܲܡ ܠܡܲܠܲܐܟܼܵܐ: ܕܲܐܟܼܝܼ ܒܸܕ ܗܵܘܹܐ ܐܵܗܵܐ: ܕܓܲܒܼܪܵܐ ܠܹܐ ܝܠܹܗ ܝܕܝܼܥܵܐ ܐܸܠܝܼ؟ ܓ̰ܘܼܘܸܒܠܹܗ ܡܲܠܲܐܟܼܵܐ ܘܐ݇ܡܝܼܪܹܗ ܐܸܠܵܗ̇: ܪܘܼܚܵܐ ܕܩܘܼܕܫܵܐ ܒܸܕ ܐܵܬܹܐ: ܘܚܲܝܠܹܗ ܕܥܸܠܵܝܵܐ ܒܸܕ ܫܵܪܹܐ ܥܲܠܹܟܼܝ: ܒܘܼܬ ܕܐܵܗܵܐ: ܗ̇ܘ ܕܦܵܐܸܫ ܝܠܝܼܕܵܐ ܡܸܢܹܟܼܝ ܩܲܕܝܼܫܵܐ ܝܠܹܗ ܘܒܪܘܿܢܵܐ ܕܐܲܠܵܗܵܐ ܒܸܬ ܦܵܐܸܫ ܩܸܪܝܵܐ: ܘܗܵܐ ܐܹܠܝܼܫܒܼܲܥ ܚܸܙܡܝܼܬܹܟܼܝ: ܐܵܦ ܗ̇ܝ ܒܛܝܼܢܬܵܐ ܝܠܵܗ̇ ܒܪܘܿܢܵܐ ܒܣܲܝܒܘܼܬܵܗܿ: ܘܐܵܗܵܐ ܝܲܪܚܵܐ ܕܫܬܵܐ ܝܠܹܗ ܠܗ̇ܝ ܕܦܝܵܫܵܐ ܝܠܵܗ̇ ܩܪܝܼܬܵܐ ܥܩܲܪܬܵܐ: ܣܵܒܵܒ ܕܠܹܐ ܥܵܨܹܐ ܠܐܲܠܵܗܵܐ ܡܸܢܕܝܼ: ܐܵܡܪܵܐ ܡܲܪܝܲܡ ܗܵܐ ܐܵܢܵܐ ܐܲܡܬܹܗ ܕܡܵܪܝܵܐ ܝܘܲܢܝ: ܗܵܘܹܐ ܠܝܼ ܐܲܝܟܼ ܗܹܡܸܙܡܵܢܘܼܟܼ: ܘܐ݇ܙܝܼܠܹܗ ܡܲܠܲܐܟܼܵܐ ܡ̣ܢ ܠܘܵܬܵܗܿ: ܐܝܼܢܵܐ ܩܝܼܡܠܵܗ̇ ܡܲܪܝܲܡ ܒܐܵܢܝܼ ܝܵܘܡܵܢܹ̈ܐ: ܘܐ݇ܙܝܼܠܵܗ̇ ܒܡܲܠܝܵܙܬܵܐ ܠܛܘܼܪܵܐ ܠܸܡܕܝܼܢ݇ܬܵܐ ܕܝܼܗܘܼܕ: ܘܥܒܼܸܝܼܪܵܗ̇ ܠܒܲܝܬܹܗ ܕܙܟܼܲܪܝܵܐ: ܘܒܘܼܩܸܪܵܗ̇ ܒܫܠܵܡܵܐ ܕܐܹܠܝܼܫܒܼܲܥ: ܘܗ݇ܘܹܐ ܠܵܗ̇ ܕܟܲܕ ܫܡܝܼܥܠܵܗ̇ ܐܹܠܝܼܫܒܼܲܥ ܫܠܵܡܵܗ̇ ܕܡܲܪܝܲܡ، ܦܨܝܼܚܠܹܗ ܝܵܠܵܕ݇ܐ ܒܟܲܪ݇ܣܵܗ̇: ܘܦܝܼܫܠܵܗ̇ ܡܠܝܼܬܵܐ ܐܹܠܝܼܫܒܼܲܥ ܪܘܼܚܵܐ ܕܩܘܼܕܫܵܐ. ܘܡܘܼܩܘܸܚܠܵܗ̇ ܒܩܵܠܵܐ ܪܵܡܵܐ ܘܐ݇ܡܝܼܪܵܗ̇ ܠܡܲܪܝܲܡ: ܒܪܝܼܟܼܬܵܐ ܝܘܲܬܝ ܐܲܢ݇ܬ ܒܢܸܫܹ̈ܐ، ܘܒܪܝܼܟܼܬܵܐ ܝܠܵܗ̇ ܛܥܘܼܢܬܵܐ ܕܓܵܘ ܟܲܪ݇ܣܹܟܼܝ: ܡܐܲܝܟܵܐ ܠܝܼ ܐܵܗܵܐ ܕܝܸܡܹܗ ܕܡܵܪܝܼ ܐܲܬܝܵܐ ܠܘܵܬܝܼ؟ ܣܵܒܵܒ ܗܵܐ ܟܲܕ ܢܦܝܼܠܹܗ ܩܵܠܵܐ ܕܫܠܵܡܹܟܼܝ ܒܢܵܬ̈ܝܵܬܝܼ، ܒܚܲܕܘܼܬܵܐ ܪܲܒܬܵܐ ܦܨܝܼܚܠܹܗ ܝܵܠܵܕ݇ܐ ܒܟܲܪ݇ܣܝܼ: ܘܛܘܼܒܼܵܐ ܠܗ̇ܝ ܕܗܘܼܡܸܢܵܗܿ: ܕܗܵܘܹܐ ܫܘܼܠܵܡܵܐ ܠܐܲܝܢܝܼ ܕܦܝܼܫܠܗ݇ܘܿܢ ܗܘܼܡܙܸܡܹܐ ܥܲܡܵܗ̇ ܡ̣ܢ ܠܘܵܬ ܡܵܪܝܵܐ. ܘܐ݇ܡܝܼܪܵܗ̇ ܡܲܪܝܲܡ: ܓܲܪܘܘܼܣܹܐ ܝܠܵܗ̇ ܓܵܢܝܼ ܠܡܵܪܝܵܐ: ܘܚܕܹܐܠܵܗ̇ ܪܘܼܚܝܼ ܒܐܲܠܵܗܵܐ ܡܲܚܝܼܵܢܝܼ، ܕܚܝܼܪܹܗ ܒܡܘܼܟܵܟܼܵܐ ܕܐܲܡܬܹܗ: ܣܵܒܵܒ ܗܵܐ ܡ̣ܢ ܐܵܕܝܼܵܐ: ܛܘܼܒܼܵܐ ܒܸܬ ܝܲܗ݇ܒܼܝܼܠܝܼ ܟܠܲܝܗܝ ܫܲܪ̈ܒܼܵܬܹܐ: ܕܥܒܼܝܼܕܠܹܗ ܠܘܵܬܝܼ ܫܘܼܓَܼܠܹ̈ܐ ܓܘܼܪܹ̈ܐ: ܗ̇ܘ ܕܚܲܝܠܵܢܵܐ ܝܠܹܗ ܘܩܲܕܝܼܫܵܐ ܫܸܡܹܗ: ܘܚܢܵܢܹܗ ܠܕܵܪܹ̈ܐ ܘܫܲܪ̈ܒ̣ܵܬܵܐ ܥܲܠ ܐܲܝܢܝܼ ܕܙܵܕܥܝܼ ܡܸܢܹܗ: ܥܒܼܝܼܕܠܹܗ ܙܵܟܼܘܼܬܵܐ ܒܕܪܵܥܹܗ: ܘܒܘܼܪܒܸܙܠܹܗ ܠܚܬܝܼܪܹ̈ܐ ܒܪܸܥܝܵܢܵܐ ܕܠܸܒܲܝܗܝ. ܚܘܼܪܙܸܦܠܹܗ ܠܬܲܩܝܼܦܹ̈ܐ ܡ̣ܢ ܟܘܼܪ̈ܣܵܘܵܬܹܐ ܘܡܘܼܪܸܡܠܹܗ ܠܡܲܟܝܼܟ݂ܹ̈ܐ. ܟܦܝܼܢܹ̈ܐ ܡܘܼܣܒܼܸܥܠܹܗ ܛܵܒܼܵܬܹ̈ܐ: ܘܥܲܬܝܼܪܹ̈ܐ ܫܪܹܐܠܹܗ ܣܦܝܼܩܵܐܝܼܬ: ܗܘܼܝܸܪܹܗ ܠܝܼܣܪܵܝܸܠ ܥܲܒܼܕܹܗ: ܘܕܟܼܸܝܼܪܹܗ ܚܢܵܢܹܗ: ܐܲܝܟܼ ܕܗܘܼܡܙܸܡܠܹܗ ܥܲܡ ܐܲܒܼܵܗܲܝ̈ܢ: ܥܲܡ ܐܲܒܼܪܵܗܵܡ ܘܥܲܡ ܙܲܪܥܹܗ ܠܥܵܠܲܡ. ܐܝܼܢܵܐ ܥܘܼܪܩܸܠܵܗ̇ ܡܲܪܝܲܡ ܠܘܵܬ ܐܹܠܝܼܫܒܼܲܥ ܐܲܝܟܼ ܬܠܵܬܵܐ ܝܲܪ̈ܚܹܐ ܘܕܥܸܪܵܐ ܠܒܲܝܬܵܗ̇.
♱♱♱♱♱♱♱♱♱♱♱♱♱♱