ܚܲܕܼܒܫܲܒܵܐ ܩܲܕܼܡܵܝܵܐ ܕܝܵܠܕܵܐ
ܒܪܝܼܬܵܐ؛ ܟܐ؛ 1‐22
ܬܸܒ̣ܘ ܘܲܫܠܵܘ ܒܪܝܼܬܵܐ ܣܸܦܪܵܐ ܩܲܕܼܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܡܵܪܝܵܐ ܕܟ̣ܸܪܹܗ ܠܣܲܪܵܐ ܐܲܝܟܼ ܕܐ݇ܡܸܪܹܗ؛ ܘܥܒ̣ܸܕܠܹܗ ܡܵܪܝܵܐ ܠܣܲܪܵܐ ܐܲܝܟܼ ܕܗܘܼܡܙܸܡܠܹܗ.܀ ܘܒܛܸܢܵܗ̇ ܣܲܪܵܐ ܘܗܘܼܨܸܠܵܗ̇ ܒܪܘܿܢܵܐ ܩܵܐ ܐܲܒ̣ܪܵܗܵܡ ܒܣܲܝܒܘܼܬܹܗ ܠܙܲܒ̣ܢܵܐ ܕܗܘܼܡܙܸܡܠܹܗ ܥܲܡܹܗ ܐܲܠܵܗܵܐ.܀ ܘܩܪܹܐܠܹܗ ܫܸܡܵܐ ܕܒܪܘܿܢܹܗ ܕܦܸܫܠܹܗ ܗܘܼܨܠܵܐ ܩܵܬܹܗ؛ ܕܗܘܼܨܸܠܵܗ̇ ܐܸܠܹܗ ܣܲܪܵܐ؛ ܐܝܼܣܚܲܩ.܀ ܘܓܙܸܪܹܗ ܐܲܒ̣ܪܵܗܵܡ ܠܐܝܼܣܚܲܩ ܒܪܘܿܢܹܗ ܒܲܪ ܬܡܲܢܝܵܐ ܝܵܘܡܵܢܹ̈ܐ ܐܲܝܟܼ ܕܦܘܼܩܸܕܠܹܗ ܐܲܠܵܗܵܐ.܀ ܘܐܲܒ̣ܪܵܗܵܡ ܒܲܪ ܐܸܡܵܐܐ ܫܸܢܹ̈ܐ ܗ݇ܘܵܐ ܐܝܼܡܲܢ ܕܐܝܼܣܚܲܩ ܒܪܘܿܢܹܗ ܦܸܫܠܹܗ ܗܘܼܨܠܵܐ.܀ ܘܐ݇ܡܸܪܵܗ̇ ܣܲܪܵܐ ܚܲܕܘܼܬܵܐ ܓܘܼܪܬܵܐ ܥܒ̣ܸܕܠܹܗ ܐܸܠܝܼ ܐܲܠܵܗܵܐ ܒܐܵܗܵܐ ܝܵܘܡܵܐ؛ ܘܟܠ ܕܫܵܡܸܥ ܒܸܬ ܚܵܕܹܐ ܥܲܡܝܼ.܀ ܘܐ݇ܡܸܪܵܗ̇؛ ܡ̇ܢ ܐ݇ܡܸܪܹܗ ܩܵܐ ܐܲܒ̣ܪܵܗܵܡ ܕܣܲܪܵܐ ܒܸܬ ܡܲܡܸܨܵܐ ܒܢܘܿܢܹ̈ܐ؛ ܕܗܘܼܨܸܠܵܗ̇ ܐܸܠܹܗ ܒܪܘܿܢܵܐ ܒܣܲܝܒܘܼܬܹܗ؟ ܓܘܼܪܘܸܣܠܹܗ ܝܵܠܵܕ݇ܐ ܘܦܸܫܠܹܗ ܚܣܝܼܠܵܐ ܡ̣ܢ ܚܲܠܒ̣ܵܐ. ܥܒ̣ܸܕܠܹܗ ܐܲܒ̣ܪܵܗܵܡ ܡܸܫܬܘܼܬܵܐ ܓܘܼܪܬܵܐ ܒܝܵܘܡܵܐ ܕܦܸܫܠܹܗ ܚܣܝܼܠܵܐ ܐܝܼܣܚܲܩ.܀ ܘܚܙܹܐܠܵܗ̇ ܣܲܪܵܐ ܠܒܪܘܿܢܵܐ ܕܗܵܓܲܪ ܡܸܨܪܵܝܬܵܐ ܕܗܘܼܨܸܠܵܗ̇ ܠܐܲܒ̣ܪܵܗܵܡ ܒܸܓܚܵܟܵܐ.܀ ܐ݇ܡܸܪܵܗ̇ ܩܵܐ ܐܲܒ̣ܪܵܗܵܡ ܦܲܠܸܛܠܵܗ̇ ܐܵܗܵܐ ܚܸܕܲܡܬܵܐ ܘܒܪܘܿܢܵܗ̇؛ ܕܠܵܐ ܝܵܪܸܬ ܐܵܗܵܐ ܒܪܘܿܢܵܐ ܕܚܸܕܲܡܬܵܐ ܥܲܡ ܒܪܘܿܢܝܼ ܐܝܼܣܚܲܩ.܀ ܦܫܸܡܠܹܗ ܐܲܒ̣ܪܵܗܵܡ ܪܵܒܵܐ ܒܐܵܗܵܐ ܚܲܒܪܵܐ ܒܘܼܬ ܩܸܨܲܬ ܕܒܪܘܿܢܹܗ.܀ ܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܠܵܐ ܦܵܫܡܸܬ̇ ܒܘܼܬ ܝܵܠܵܕ݇ܐ ܘܚܸܕܲܡܬܘܼܟܼ. ܡܲܨܝܸܬ̇ ܠܟܠ ܡܸܢܕܝܼ ܕܐܵܡܪܵܐ ܠܘܼܟܼ ܣܲܪܵܐ. ܣܵܒܵܒ ܐܝܼܣܚܲܩ ܒܸܬ ܦܵܐܹܫ ܩܸܪܝܵܐ ܐܸܠܘܼܟܼ ܙܲܪܥܵܐ.܀ ܐܘܼܦ ܒܪܘܿܢܵܐ ܕܚܸܕܲܡܬܵܐ ܒܸܬ ܥܵܒ̣ܕܸܢܹܗ ܚܲܕ݇ ܛܵܝܸܦܵܐ ܓܘܼܪܵܐ. ܣܵܒܵܒ ܕܙܲܪܥܘܼܟܼ ܝܼܠܹܗ.܀ ܘܩܸܡܠܹܗ ܐܲܒ̣ܪܵܗܵܡ ܒܩܵܝܕܲܡܬܵܐ؛ ܫܩܸܠܹܗ ܠܲܚܡܵܐ ܘܚܲܕ݇ ܓܘܼܕܵܐ ܕܡܝܼܵܐ ܘܝܘܼܗ݇ܒ̣ܸܠܹܗ ܩܵܐ ܗܵܓܲܪ؛ ܘܡܘܼܬܸܒ̣ܠܹܗ ܠܝܵܠܵܕ݇ܐ ܥܲܠ ܪܘܼܦ̮ܫܵܗ̇ ܘܫܘܼܕܪܵܐ ܠܹܗ ܘܐ݇ܙܸܠܵܗ̇؛ ܘܬܘܼܠܩܵܐ ܠܵܗ̇ ܐܘܼܪܚܵܗ̇ ܓܵܘ ܒܲܪܝܼܵܐ ܒܹܪܫܒܲܥ. ܘܬܸܡܠܗ݇ܘܿܢ ܡܝܼܵܐ ܡ̣ܢ ܓܘܼܕܵܐ؛ ܗ̇ܝܓܵܗ ܪܘܼܦܹܐܠܵܗ̇ ܠܝܵܠܵܕ݇ܐ ܬܚܘܿܬ ܚܲܕ݇ ܡ̣ܢ ܬܲܪ̈ܵܫܝܵܬܹܐ؛ ܘܐ݇ܙܸܠܵܗ̇ ܘܝ݇ܬܸܒ̣ܠܵܗ̇ ܪܸܚܩܵܐ ܐܲܝܟܼ ܪܲܦܵܝܬܵܐ ܕܩܸܫܬܵܐ ܒܲܪܩܘܼܒ̣ܠ؛ ܣܵܒܵܒ ܕܐ݇ܡܸܪܵܗ̇ ܕܠܵܐ ܚܵܙܝܵܢܝ ܒܡܵܘܬܵܐ ܕܝܵܠܵܕ݇ܐ؛ ܘܝ݇ܬܸܒ̣ܠܵܗ̇ ܡ̣ܢ ܒܲܪܩܘܼܒ̣ܠ؛ ܘܡܘܼܪܸܡܠܵܗ̇ ܩܵܠܵܗ̇ ܘܒܟ̣ܹܐܠܵܗ̇.܀ ܘܫܡܝܼܥܠܹܗ ܐܲܠܵܗܵܐ ܒܩܠܹܗ ܕܝܵܠܵܕ݇ܐ؛ ܘܩܪܹܐܠܹܗ ܡܲܠܲܐܟ̣ܹܗ ܕܐܲܠܵܗܵܐ ܠܗܵܓܲܪ ܡ̣ܢ ܫܡܲܝܵܐ؛ ܘܐ݇ܡܸܪܹܗ ܐܸܠܵܗ̇؛ ܡܵܐ ܠܵܟ̣ܝ ܗܵܓܲܪ؟ ܠܵܐ ܙܵܕܥܝܵܬ̇ܝ. ܣܵܒܵܒ ܕܫܡܝܼܥܠܹܗ ܐܲܠܵܗܵܐ ܒܩܵܠܹܗ ܕܝܵܠܵܕ݇ܐ ܒܗ̇ܝ ܕܘܼܟܬܵܐ ܕܝܼܠܹܗ.܀ ܐܵܕܝܼܵܐ ܩܘܼܡܝ ܫܩܘܿܠܝ ܠܝܵܠܵܕ݇ܐ ܘܕܒ̣ܘܿܩܝ ܐܝܼܕ̈ܵܟ̣ܝ ܒܝܼܹܗ؛ ܣܵܒܵܒ ܒܸܬ ܥܵܒ̣ܕܸܢܹܗ ܚܲܕ݇ ܛܵܝܸܦܵܐ ܓܘܼܪܵܐ.܀ ܘܦܬܸܚܠܹܗ ܐܲܠܵܗܵܐ ܥܲܝܢ̈ܘܿܗ̇؛ ܘܚܙܹܐܠܵܗ̇ ܚܲܕ݇ ܒܹܐܪܵܐ ܕܡܝܼܵܐ ܘܐ݇ܙܸܠܵܗ̇ ܘܡܠܹܐܠܵܗ̇ ܓܘܼܕܵܐ ܡܝܼܵܐ ܘܡܘܼܫܬܹܐܠܵܗ̇ ܠܝܵܠܵܕ݇ܐ.܀ ܘܗ݇ܘܹܐܠܹܗ ܐܲܠܵܗܵܐ ܥܲܡ ܝܵܠܵܕ݇ܐ؛ ܘܓܘܼܪܘܸܣܠܹܗ ܘܝ݇ܬܸܒ̣ܠܹܗ ܒܒܲܪܝܼܵܐ ܕܦܵܪܵܢ. ܘܝܵܠܸܦ ܗ݇ܘܵܐ ܩܸܫܬܵܐ ܒܡܲܕܒܪܵܐ [ܒܒܲܪܝܼܵܐ] ܕܦܵܪܲܢ؛ ܘܫܩܸܠܵܗ̇ ܩܵܬܹܗ ܝܸܡܹܗ ܒܲܟ̣ܬܵܐ ܡ̣ܢ ܐܲܪܥܵܐ ܕܡܸܨܪܹܝܢ܀
ܚܲܒ̣ܪܹܗ
ܐ؛ ܫܡܘܼܐܹܝܠ ܐ؛ 19‐ܫܘܼܠܵܡܵܐ
ܫܠܵܘ ܣܸܦܪܵܐ ܕܫܡܘܼܐܹܝܠ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܝ݇ܕܝܼܥ ܠܹܗ ܗܲܠܩܵܢܵܐ ܠܚܲܢܵܐ ܒܲܟ̣ܬܹܗ؛ ܘܕܟ̣ܝܼܪܵܐ ܠܹܗ ܡܵܪܝܵܐ. ܘܗܘܹܐܠܹܗ ܠܙܲܒ̣ܢܵܐ ܕܝܵܘܡܵܢܹ̈ܐ؛ ܒܛܸܢܵܗ̇ ܚܲܢܵܐ ܘܗܘܼܨܸܠܵܗ̇ ܒܪܘܿܢܵܐ؛ ܘܩܪܹܐܠܵܗ̇ ܫܸܡܹܗ ܫܡܘܼܐܹܝܠ؛ ܣܵܒܵܒ ܡ̣ܢ ܡܵܪܝܵܐ ܛܠܸܒܠܝܼ.܀ ܘܐ݇ܣܸܩܠܹܗ ܗܲܠܩܵܢܵܐ ܘܟܠܲܝܗܝ ܒܢܲܝ̈ ܒܲܝܬܹܗ؛ ܠܡܲܩܪܘܼܒ̣ܹܐ ܕܸܒ̣ܚܹ̈ܐ ܩܵܐ ܡܵܪܝܵܐ ܒܝܵܘܡܵܬܹ̈ܐ ܕܢܸܕܪܹܗ.܀ ܘܚܲܢܵܐ ܠܵܐ ܐ݇ܣܸܩܠܵܗ̇؛ ܣܵܒܵܒܵ ܕܐ݇ܡܸܪܵܗ̇ ܩܵܐ ܓܲܒ̣ܪܵܗ̇؛ ܗܲܠ ܕܦܵܐܹܫ ܚܣܝܼܠܵܐ ܝܵܠܵܕ݇ܐ؛ ܘܒܸܬ ܡܲܝܬ݇ܝܲܢܹܗ ܕܦܵܐܹܫ ܚܸܙܝܵܐ ܩܵܕ݇ܡ ܡܵܪܝܵܐ؛ ܘܒܸܬ ܝܵܬܸܒ̣ ܬܵܡܵܐ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܘܼܗܝ. ܘܐ݇ܡܸܪܹܗ ܐܸܠܵܗ̇ ܗܲܠܩܵܢܵܐ ܓܲܒ̣ܪܵܗ̇؛ ܥܒ̣ܘܿܕܝ ܟܠ ܡܸܢܕܝܼ ܕܒܲܣܡܵܐ ܠܵܟ̣ܝ. ܬܸܒ̣ܝ ܗܲܠ ܕܚܵܣܠܵܬ̇ܝ ܠܹܗ. ܐܲܚܟ̰ܝܼ ܡܲܩܘܹܐ ܡܵܪܝܵܐ ܗܹܡܸܙܡܵܢ̈ܵܟ̣ܝ. ܘܝ݇ܬܸܒ̣ܠܵܗ̇ ܒܲܟ̣ܬܵܐ ܘܡܘܼܡܸܨܠܵܗ̇ ܒܪܘܿܢܵܗ̇ ܗܲܠ ܕܚܣܸܠܵܗ̇.܀ ܘܡܘܼܣܸܩܠܵܗ̇ ܥܲܡܵܗ̇ ܐܝܼܡܲܢ ܕܚܣܸܠܵܗ̇ ܥܲܡ ܚܲܕ݇ ܬܵܘܪܵܐ ܒܲܪ ܬܠܵܬܵܐ ܫܸܢܹ̈ܐ؛ ܘܚܲܕ݇ ܟܝܼܘܿܠܵܐ ܕܩܲܡܚܵܐ ܘܚܲܕ݇ ܓܘܼܕܵܐ ܕܚܲܡܪܵܐ؛ ܘܡܘܼܬܹܐܠܵܗ̇ ܠܒܲܝܬܹܗ ܕܡܵܪܝܵܐ ܒܫܝܼܠܘܼ؛ ܘܝܵܠܵܕ݇ܐ ܗܵܠܵܐ ܙܥܘܿܪܵܐ ܗ݇ܘܵܐ.܀ ܘܦܪܸܡܠܗ݇ܘܿܢ ܬܵܘܪܵܐ ܘܡܘܼܬܹܐܠܗ݇ܘܿܢ ܠܝܵܠܵܕ݇ܐ ܠܟܸܣ ܥܸܠܝܼ.܀ ܘܐ݇ܡܸܪܵܗ̇ ܚܲܢܵܐ ܩܵܐ ܥܸܠܝܼ؛ ܦܲܪܦܘܼܠܹܗ ܝ݇ܘܵܢܝ ܒܝܼܘܼܟܼ ܡܵܪܝܼ؛ ܚܲܝܬܵܐ ܠܵܗ̇ ܓܵܢܘܿܟܼ ܝܵܐ ܡܵܪܝܼ ܐܵܢܵܐ ܝ݇ܘܵܢܝ ܗܵܝ ܒܲܟ̣ܬܵܐ ܕܟܠܝܼܬܵܐ ܗ݇ܘܵܐ ܥܲܡܘܼܟܼ ܠܲܐܟ̣ܵܐ ܘܡܨܵܠܘܿܝܹܐ ܨܠܘܿܬܵܐ ܩܵܕ݇ܡ ܡܵܪܝܵܐ ܒܘܼܬ ܕܐܵܗܵܐ ܝܵܠܵܕ݇ܐ.܀ ܘܨܘܼܠܹܐܠܝܼ؛ ܘܝܘܼܗܒ̣ܸܠܹܗ ܐܸܠܝܼ ܡܵܪܝܵܐ ܡܲܛܠܲܒ ܕܛܠܸܒܠܝܼ ܡܸܢܹܗ.܀ ܘܐܘܼܦ ܐܵܢܵܐ ܡܘܼܛܠܸܒܠܝܼ ܐܸܠܹܗ ܩܵܐ ܡܵܪܝܵܐ ܟܠܲܝܗܝ ܝܵܘܡܵܢܹ̈ܐ ܕܗ̇ܘ ܚܵܝܵܐ ܝ݇ܠܹܗ. ܣܵܒܵܒ ܦܝܼܫܵܐ ܝ݇ܠܹܗ ܛܠܝܼܒܵܐ ܩܵܬܝܼ ܡ̣ܢ ܡܵܪܝܵܐ. ܘܣܓ̣ܸܕܠܗ݇ܘܿܢ ܬܵܡܵܐ ܠܡܵܪܝܵܐ܀
♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܓܵܠܵܛܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܨܦܵܝ ܝܼܠܵܗ̇ ܕܒܲܚܸܠܝܼܬܘܿܢ ܒܦܘܼܠܚܵܢܹ̈ܐ ܛܵܒܹ̈ܐ ܒܟܠ ܥܕܵܢܵܐ؛ ܘܠܵܐ ܐܲܚܟ̰ܝܼ ܐܝܼܡܲܢ ܕܗܵܘܸܢ ܠܟܸܣܠܵܘܟܼܘܿܢ* ܒܢܘܼܢܝܼ̈ ܐܵܢܝܼ ܕܒܘܼܬ ܕܝܼـܲܝܗܝ ܡܸܢ݇ܕܪܹܫ̄ ܒܸܓܪܵܫܵܐ ܝ݇ܘܸܢ ܚܸܒܼܠܹ̈ܐ؛ ܗܲܠ ܕܦܵܐܸܫ ܥܒܼܝܼܕܵܐ ܨܘܼܪܬܵܐ ܓܵܘܵܘܟܼܘܿܢ ܡܫܝܼܚܵܐ* ܒܵܥܝܸܢ ܗ݇ܘ̣ܵܐ ܕܗܵܘܸܢ ܐܵܕܝܼܵܐ ܠܟܸܣܠܵܘܟܼܘܿܢ* ܘܫܲܚܠܸܦܸܢ ܠܗܹܡܸܙܡܵܢ̈ܝܼ؛ ܣܵܒܵܒ ܕܦܝܵܫܵܐ ܝ݇ܘܸܢ ܒܵܗܲܬܝܼ ܒܝܼܵܘܟܼܘܿܢ* ܐ݇ܡܘܿܪܘܿܢ ܠܝܼ ܐܲܚܬܘܿܢ ܐܵܢܝܼ ܕܒܸܒܥܵܝܵܐ ܝ݇ܢܵܐ ܕܗܵܘܝܼ ܬܚܘܿܬ ܫܲܪܥܲܬ؛ ܩܵܡܘܿܕܝܼ ܠܫܲܪܥܲܬ ܠܹܐ ܝ݇ܬܘܿܢ ܡܲܨܝܘܼܬܹܐ* ܣܵܒܵܒ ܕܟܬܝܼܒܼܵܐ ܝ݇ܠܹܗ؛ ܠܐܲܒܼܪܵܗܵܡ ܗܘܹܐ ܠܗ݇ܘܿܢ ܬܪܹܝ ܒܢܘܼܢܹ̈ܐ ܚܲܕ݇ ܡ̣ܢ ܚܹܕܲܡܬܵܐ ܘܗ̇ܘ ܐ݇ܚܹܪ݇ܢܵܐ ܡ̣ܢ ܡܵܪܬܵܐ* ܐܸܠܵܐ ܗ̇ܘ ܕܡ̣ܢ ܚܸܕܲܡܬܵܐ ܒܒܸܣܪܵܐ ܦܸܫܠܹܗ ܗܘܼܨܠܵܐ؛ ܘܗ̇ܘ ܕܡ̣ܢ ܡܵܪܬܵܐ ܒܩܵܘܠܵܐ ܗ̣݇ܘܹܐܠܹܗ* ܐܝܼܢܵܐ ܐܲܢܹܐ ܝܼܢܵܐ ܛܘܼܦ̮ܣܵܐ ܕܬܪܹܝ ܩܵܘܠܹ̈ܐ؛ ܚܲܕ݇ ܡܸܢܲܝܗܝ ܛܘܼܪܵܐ ܕܣܝܼܢܵܝ ܗܵܨܘܿܠܹܐ ܠܪܸܓܘܼܬܵܐ ܕܝܼܠܵܗ̇ ܗܵܓܲܪ* ܣܵܒܵܒ ܗܵܓܲܪ ܛܘܼܪܵܐ ܕܣܝܼܢܵܝ ܝܼܠܵܗ̇ ܕܓܵܘ ܥܵܪܵܒܝܼܵܐ ܘܬܵܒܥܵܐ ܠܐܵܗܵܐ ܐܘܿܪܸܫܠܸܡ ܘܦܵܠܚܵܐ ܪܸܓܘܼܬܵܐ ܗ̇ܝ ܘܒܢ̈ܘܼܢܵܗ̇* ܐܝܼܢܵܐ ܗ̇ܝ ܐܘܿܪܸܫܠܸܡ ܥܸܠܵܝܬܵܐ ܡܵܪܬܵܐ ܝ݇ܠܵܗ̇ ܕܝܼܠܵܗ̇ ܝܸܡܲܢ* ܣܵܒܵܒ ܕܟܬܝܼܒܼܵܐ ܝ݇ܠܹܗ ܥܒܼܘܿܕܝ ܒܘܼܣܵܡܵܐ ܥܩܲܪܬܵܐ ܗ̇ܝ ܕܠܵܐ ܡܗܵܨܠܵܐ؛ ܘܦܨܘܿܚܝ ܘܡܲܩܘܸܚܝ ܗ̇ܝ ܕܠܵܐ ܓܵܪܫܵܐ ܚܸܒܼܠܹ̈ܐ. ܣܵܒܵܒ ܕܙܝܼܕܠܗ݇ܘܿܢ ܒܢܘܼܢܹ̈ܐ ܕܨܵܕܝܼܬܵܐ ܒܘܼܫ ܙܵܘܕܵܐ ܡ̣ܢ ܒܢܘܼܢܹ̈ܐ ܕܓܒܼܝܼܪܬܵܐ* ܐܝܼܢܵܐ ܐܲܚܢܲܢ ܐܵܚܘܿܢܘܵܬܝܼ̈ ܐܲܝܟܼ ܐܝܼܣܚܲܩ ܒܢܘܼܢܹ̈ܐ ܕܩܵܘܠܵܐ ܝ݇ܘܲܚ* ܐܲܝܟܼ ܕܗܵܝܓܵܗ؛ ܗ̇ܘ ܕܦܝܼܫܵܐ ܝܗ݇ܘ̣ܵܐ ܗܘܼܨܠܵܐ ܒܒܸܣܪܵܐ ܛܵܪܸܕ ܗ݇ܘ̣ܵܐ ܠܗ̇ܘ ܕܒܪܘܼܚܵܐ؛ ܘܗܲܕܟܼܵܐ ܐܘܼܦ ܐܵܕܝܼܵܐ* ܐܸܠܵܐ ܡܘܸܕܝ ܐ݇ܡܸܪܹܗ ܟܬܵܒܼܵܐ. ܦܵܠܸܛ ܠܵܗ̇ ܚܹܕܲܡܬܵܐ ܘܒܪܘܼܢܵܗ̇؛ ܣܵܒܵܒ ܕܠܹܐ ܝܵܪܸܬ ܒܪܘܼܢܵܐ ܕܚܹܕܲܡܬܵܐ ܥܲܡ ܒܪܘܼܢܵܐ ܕܡܵܪܬܵܐ* ܗܲܕܟܼܵܐ ܐܵܚܘܿܢܘܵܬ̈ܝܼ؛ ܐܲܚܢܲܢ ܠܹܐ ܝ݇ܘܲܚ ܒܢܘܼܢܹ̈ܐ ܕܚܹܕܲܡܬܵܐ ܐܸܠܵܐ ܒܢܘܼܢܹ̈ܐ ܕܡܵܪܬܵܐ* ܒܲܣ ܟܠܹܐܡܘܿܢ ܒܗ̇ܝ ܐܵܙܵܕܘܼܬܵܐ ܕܡܫܝܼܚܵܐ ܩܲܡ ܥܵܒܼܸܕ ܠܲܢ ܐܵܙܲܕ. ܘܠܵܐ ܦܵܝܫܝܼܬܘܿܢ ܐ݇ܣܝܼܪܹܐ ܡܸܢ݇ܕܪܹܫ̄ ܒܢܝܼܪܵܐ ܕܪܹܓܘܼܬܵܐ*
♱♱♱♱♱♱♱♱♱♱
ܡܬܝ ܒ: 1 ‐ ܫܘܼܠܵܡܵܐ
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ
ܟܪܘܙܘܬܼܐ ܕܡܬܝ
♰ ܐܝܼܢܵܐ ܟܲܕ ܦܝܼܫܠܹܗ ܝܠܝܼܕܵܐ ܝܑܼܫܘܿܥ ܒܒܹܝܬܠܚܸܡ ܕܝܼܗܘܼܕܵܐ: ܒܝܵܘܡܵܢܹ̈ܐ ܕܗܹܪܘܿܕܸܣ ܡܲܠܟܵܐ: ܐ݇ܬܹܐܠܗ݇ܘܿܢ ܡܓܼܘܼܫܹ̈ܐ ܡ̣ܢ ܡܲܕܢܚܵܐ ܠܐܘܿܪܸܫܠܸܡ، ܘܐܵܡܪܝܼ: ܐܲܝܟܵܐ ܝܠܹܗ ܡܲܠܟܵܐ ܕܝܗ݇ܘܼܕܵܝܹ̈ܐ ܕܦܝܼܫܠܹܗ ܝܠܝܼܕܵܐ؟ ܣܵܒܵܒ ܚܙܹܐܠܲܢ ܟܵܘܟܼܒܼܹܗ ܒܡܲܕܢܚܵܐ: ܘܐ݇ܬܹܐ ܠܲܢ ܠܸܣܓܼܵܕܵܐ ܐܸܠܹܗ. ܐܝܼܢܵܐ ܫܡܝܼܥܠܹܗ ܗܹܪܘܿܕܸܣ ܡܲܠܟܵܐ ܘܦܝܼܫܠܹܗ ܫܥܝܼܫܵܐ: ܘܟܠܵܗ̇ ܐܘܿܪܸܫܠܸܡ ܥܲܡܹܗ: ܘܟܘܼܦܸܫܠܹܗ ܟܠܲܝܗܝ ܪܲܒܲܝ̈ ܟܵܗܢܹ̈ܐ ܘܣܵܦܪܹ̈ܐ ܕܥܲܡܵܐ ܘܒܵܩܸܪ ܗ݇ܘܵܐ ܠܗ݇ܘܿܢ: ܕܐܲܝܟܵܐ ܦܝܵܫܵܐ ܝܠܹܗ ܝܠܝܼܕܵܐ ܡܫܝܼܚܵܐ؟ ܐܝܼܢܵܐ ܐܵܢܝܼ ܐ݇ܡܝܼܪܗ݇ܘܿܢ: ܒܒܹܝܬܠܚܸܡ ܕܝܼܗܘܼܕܵܐ: ܣܵܒܵܒ ܗܲܕܟܼܵܐ ܟܬܝܼܒܼܵܐ ܝܠܹܗ ܒܢܒܼܝܼܵܐ: ܐܵܦ ܐܲܢ݇ܬܝ ܒܹܝܬܠܚܸܡ ܕܝܼܗܘܼܕܵܐ، ܠܹܐ ܝܘܲܬܝ ܒܵܨܘܼܪܬܵܐ ܒܡܲܠܟܹ̈ܐ ܕܝܼܗܘܼܕܵܐ، ܣܵܒܵܒ ܡܸܢܹܟܼܝ ܒܸܬ ܦܵܠܸܛ ܡܲܠܟܵܐ، ܕܗ̇ܘ ܒܸܬ ܡܲܪܥܹܐ ܠܛܵܝܸܦܝܼ ܝܑܼܣܪܵܝܸܠ: ܗܲܝܓܵܗ̇ ܗܹܪܘܿܕܸܣ ܒܛܸܫܘܵܐ ܩܪܹܐܠܹܗ ܠܡܓܼܘܼܫܹ̈ܐ: ܘܝܠܝܼܦܠܹܗ ܡܸܢܲܝܗܝ ܒܐܲܝܢܝܼ ܙܲܒܼܢܵܐ ܦܝܼܫܠܹܗ ܚܸܙܝܵܐ ܐܸܠܲܝܗܝ ܟܵܘܟܼܒܼܵܐ. ܘܘܩܲܡ ܫܵܕܸܪܗ݇ܘܿܢ ܠܒܹܝܬܠܚܸܡ: ܘܐ݇ܡܝܼܪܹܗ ܐܸܠܲܝܗܝ: ܙܹܠ݇ܡܘܿܢ ܨܲܚܨܲܝܡܘܿܢ ܥܲܠ ܛܲܠܝܵܐ ܚܦܝܼܛܵܐܝܼܬ: ܘܐܝܼܡܵܢ ܕܩܲܡ ܡܲܫ݇ܟ̰ܚܝܼܬܘܿܢ ܠܹܗ، ܐ݇ܬܹܐܡܘܿܢ ܡܲܕܝܼܥܡܘܿܢ ܠܝܼ، ܕܐܘܿܦ ܐܵܢܵܐ ܐܵܙܸܠ݇ܢ ܣܵܓܼܕܸܢ ܐܸܠܹܗ: ܐܝܼܢܵܐ ܐܵܢܝܼ ܟܲܕ ܫܡܝܼܥܠܗ݇ܘܿܢ ܡ̣ܢ ܡܲܠܟܵܐ، ܐ݇ܙܝܼܠܗ݇ܘܿܢ. ܘܗܵܐ ܗ̇ܘ ܟܵܘܟܼܒܼܵܐ ܕܚܙܹܐܠܗ݇ܘܿܢ ܒܡܲܕܢܚܵܐ، ܐܵܙܸܠ ܗ݇ܘܵܐ ܩܵܕ݇ܡܲܝܗܝ: ܗܲܠ ܕܐ݇ܬܹܐܠܹܗ ܟܠܹܐܠܹܗ ܠܥܸܠ ܡ̣ܢ ܐܲܝܟܵܐ ܕܝܼܗَܘܵܐ ܛܲܠܝܵܐ: ܐܝܼܢܵܐ ܟܲܕ ܚܙܹܐܠܗ݇ܘܿܢ ܠܟܵܘܟܼܒܼܵܐ ܚܕܹܐܠܗ݇ܘܿܢ ܚܲܕܘܼܬܵܐ ܪܵܒܵܐ ܓܘܼܪܬܵܐ: ܘܥܒܼܸ݇ܝܼܪܗ݇ܘܿܢ ܠܒܲܝܬܵܐ، ܘܚܙܹܐܠܗ݇ܘܿܢ ܠܛܲܠܝܵܐ ܥܲܡ ܡܲܪܝܲܡ ܝܸܡܹܗ. ܘܢܦܝܼܠܗ݇ܘܿܢ ܣܓܼܝܼܕܠܗ݇ܘܿܢ ܐܸܠܹܗ: ܘܦܬܝܼܚܠܗ݇ܘܿܢ ܣܝܼܡܵܬܲܝ̈ܗܝ ܘܡܘܼܩܪܸܒܼܠܗ݇ܘܿܢ ܐܸܠܹܗ ܩܘܼܪ̈ܒܵܢܹܐ: ܕܲܗܒܼܵܐ ܘܡܘܼܪܵܐ ܘܠܒܼܘܼܢ݇ܬܵܐ: ܘܦܝܼܫܠܹܗ ܚܸܙܝܵܐ ܐܸܠܲܝܗܝ ܒܚܸܠܡܵܐ، ܕܠܵܐ ܕܵܥܪܝܼ ܠܘܵܬ ܗܹܪܘܿܕܸܣ: ܘܒܐܘܼܪܚܵܐ ܐ݇ܚܹܪ݇ܬܵܐ ܙܝܼܠܗ݇ܘܿܢ ܠܐܲܬܪܲܝܗܝ: ܐܝܼܢܵܐ ܟܲܕ ܙܝܼܠܗ݇ܘܿܢ: ܦܝܼܫܠܹܗ ܚܸܙܝܵܐ ܡܲܠܲܐܟܼܵܐ ܕܡܵܪܝܵܐ ܒܚܸܠܡܵܐ ܠܝܵܘܣܸܦ ܘܐ݇ܡܝܼܪܹܗ ܐܸܠܹܗ: ܩܘܼܡ ܠܵܒܸܠ ܠܛܲܠܝܵܐ ܘܠܝܸܡܹܗ ܘܥܪܘܿܩ ܠܡܸܨܪܹܝܢ. ܘܬܵܡܵܐ ܗ݇ܘܝܼ ܗܲܠ ܕܐܲܡܪܸܢ ܐܸܠܘܼܟܼ. ܣܵܒܵܒ ܗܕܝܼܪܵܐ ܝܠܹܗ ܗܹܪܘܿܕܸܣ ܠܹܛܲܥܝܵܐ ܠܛܲܠܝܵܐ ܐܲܝܟܼ ܕܛܵܠܸܩܠܹܗ: ܐܝܼܢܵܐ ܝܵܘܣܸܦ ܩܝܼܡܠܹܗ ܫܩܝܼܠܹܗ ܠܛܲܠܝܵܐ ܘܠܝܸܡܹܗ ܒܠܸܠܝܵܐ ܘܥܪܝܼܩܠܹܗ ܠܡܸܨܪܹܝܢ. ܘܗ݇ܘܹܐܠܹܗ ܬܵܡܵܐ ܗܲܠ ܡܵܘܬܵܐ ܕܗܹܪܘܿܕܸܣ: ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܡ̣ܢ ܡܵܪܝܵܐ ܒܢܒܼܝܼܵܐ ܕܐ݇ܡܝܼܪܹܗ: ܕܡ̣ܢ ܡܸܨܪܹܝܢ ܩܪܹܐܠܝܼ ܠܒܪܘܿܢܝܼ: ܗܿܝܓܵܗ̇ ܗܹܪܘܿܕܸܣ ܟܲܕ ܚܙܹܐܠܹܗ ܕܦܝܼܫܠܹܗ ܡܘܼܣܚܸܪܵܐ ܡ̣ܢ ܡܓ݂ܘܼܫܹ̈ܐ: ܟܪܝܼܒܠܹܗ ܪܵܒܵܐ، ܘܫܘܼܕܸܪܹܗ ܡܘܼܩܛܸܠܹܗ ܟܠܲܝܗܝ ܛܠܵܝܹ̈ܐ ܕܒܹܝܬܠܚܸܡ ܘܕܟܠܲܝܗܝ ܬܸܚܘܼ̈ܒܘܼܗ̇: ܡ̣ܢ ܒܲܪ ܬܸܪܬܹܝ ܫܸܢܹ̈ܐ ܘܠܐܸܠܬܸܚ: ܐܲܝܟܼ ܙܲܒܼܢܵܐ ܕܨܘܼܚܨܹܐܠܹܗ ܡ̣ܢ ܡܓܼܘܼܫܹ̈ܐ. ܗܿܝܓܵܗ̇ ܦܝܼܫܠܹܗ ܬܘܼܡܸܡܵܐ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܒܝܲܕ ܐܹܪܲܡܝܵܐ ܢܒܼܝܼܵܐ ܕܐ݇ܡܝܼܪܹܗ: ܩܵܠܵܐ ܦܝܼܫܠܹܗ ܫܸܡܥܝܵܐ ܒܪܵܡܬܵܐ: ܒܸܟܼܝܵܐ ܘܐܸܠܝܵܐ ܪܵܒܵܐ: ܪܵܚܹܝܠ ܒܟܼܵܝܵܐ ܥܲܠ ܒܢܘܿܢܘܼ̈ܗܿ: ܘܠܹܐ ܒܲܣܡܵܐ ܗ݇ܘܵܐ ܠܵܗ̇ ܠܸܫܩܵܠܵܐ ܠܸܒܵܐ، ܣܵܒܵܒ ܕܠܲܝܬ ܗ݇ܘܵܘ. ܐܝܼܢܵܐ ܟܲܕ ܡܝܼܬܠܹܗ ܗܹܪܘܿܕܸܣ ܡܲܠܟܵܐ: ܦܝܼܫܠܹܗ ܚܸܙܝܵܐ ܡܲܠܲܐܟܼܵܐ ܕܡܵܪܝܵܐ ܒܚܸܠܡܵܐ ܠܝܵܘܣܸܦ ܒܡܸܨܪܹܝܢ. ܘܐ݇ܡܝܼܪܹܗ ܐܸܠܹܗ: ܩܘܼܡ ܠܵܒܸܠ ܠܛܲܠܝܵܐ ܘܠܝܸܡܹܗ: ܘܙܸܠ݇ܐ ܠܐܲܪܥܵܐ ܕܝܼܣܪܵܝܸܠ، ܣܵܒܵܒ ܡܝܼܬܠܗ݇ܘܿܢ ܐܵܢܝܼ ܕܒܥܵܝܵܐ ܝܗ݇ܘܵܘ ܓܵܢܹܗ ܕܛܲܠܝܵܐ: ܘܝܵܘܣܸܦ ܩܝܼܡܠܹܗ ܠܘܼܒܸܠܹܗ ܠܛܲܠܝܵܐ ܘܠܝܸܡܹܗ: ܘܐ݇ܬܹܐܠܹܗ ܠܐܲܪܥܵܐ ܕܝܼܣܪܵܝܸܠ. ܐܝܼܢܵܐ ܟܲܕ ܫܡܝܼܥܠܹܗ ܕܐܲܪܟܹܐܠܹܐܘܿܣ ܗ݇ܘܹܐ ܠܹܗ ܡܲܠܟܵܐ ܒܝܼܗܘܼܕ، ܚܠܵܦ ܗܹܪܘܿܕܸܣ ܒܵܒܹܗ: ܙܕܝܼܥܠܹܗ ܕܐܵܙܸܠ ܠܬܵܡܵܐ: ܘܦܝܼܫܠܹܗ ܚܸܙܝܵܐ ܒܚܸܠܡܵܐ ܐܸܠܹܗ ܕܐܵܙܸܠ ܠܐܲܬܪܵܐ ܕܓܠܝܼܠܵܐ. ܘܐ݇ܬܹܐܠܹܗ ܥܡܝܼܪܹܗ ܒܡܕܝܼܢ݇ܬܵܐ ܕܦܝܵܫܵܐ ܝܠܵܗ̇ ܩܪܝܼܬܵܐ ܢܵܨܪܲܬ. ܐܲܝܟܼ ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܒܢܒܼܝܼܵܐ: ܕܢܵܨܪܵܝܵܐ ܒܸܬ ܦܵܐܸܫ ܩܸܪܝܵܐ.
♱♱♱♱♱♱♱♱♱♱