ܚܲܕܼܒ̇ܫܲܒܵܐ ܩܲܕܼܡܵܝܵܐ ܕܒܼܵܬܲܪ ܕܝܲܠܕܵܐ

 

   ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.

 

ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܡܫܝܼܚܵܐ ܐܸܬܼܝܼܠܸܕܼ.

ܕܲܡܡܲܟܸ̇ܟܼ ܪܘܼܚܵܐ ܕܫܲܠܝܼܛܵܢܹ̈ܐ. ܐܸܫܬ̇ܓܸܫܘ ܥܲܡܡܹ̈ܐ ܘܙܵܥ ܡܲܠܟ̇ܘ̈ܵܬܼܵܐ. ܝܲܠܕܵܐ ܕܡ̣ܢ ܡܲܪܝܲܡ. ܐܲܙܝܼܥ̣ ܠܗܹܪܘܿܕܸܣ. ܘܒܸܟܼܝܵܗ̇ ܕܪܵܚܹܝܠ ܫ̣ܩܲܠ ܗ݇ܘ̣ܵܐ ܫܘܼܠܵܡܵܐ. ܥܲܠ ܪܵܡܬܼܵܐ ܩܸܛܠܵܐ ܘܫܘܼܦܵܥ ܕܡܵܐ ܕܫܲܒܼܪܹ̈ܐ. ܘܝܵܘܡܵܢ ܠܘܵܬܲܢ ܦܘܼܪܩܵܢ ܟܠܗܹܝܢ ܒܸܪ̈ܝܵܬܼܵܐ. ܬܢܝܼ؛ ܫܲܒܲܚ. ܨܠܝܼܒܼܵܐ ܕܲܗܘ̣ܵܐ ܠܲܢ ܥܸܠܼܲܬܼ ܛܵܒܼ̈ܵܬܼܵܐ. ܘܒܹܗܸܘ ܐܸܬܼܚܲܪܲܪ ܓܸܢܣܲܢ ܡܵܝܘܿܬܼܵܐ. ܗܸܘ ܡܵܪܝ ܢܸܗܘܸܐ ܠܲܢ ܫܘܼܪܵܐ ܚܲܣܝܼܢܵܐ. ܘܒܹܗ ܢܸܙܟܹ̇ܝܘܗ‌ܝ ܠܒܼܝܼܫܵܐ ܘܟܼܠܗܹܝܢ ܨܸܢ̈ܥܵܬܹܗ.

 

   ܩܸܪܝܵܢܵܐ.  ܒܪܝܼܬܼܵܐ ܟܐ؛1‐22. ܚܲܒܼܪܹܗ. ܐ؛ܫܡܘܼܐܹܝܠ ܐ؛ 19‐ܫܘܼܠܵܡܵܐ.

 

ܫܘܼܪܵܝܵܐ. ܕ܀ ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟܼܪܹ̈ܐ* ܐܲܝܬܵܘ ܠܡܵܪܝܵܐ ܫܘܼܒܼܚܵܐ ܘܐܝܼܩܵܪܵܐ* ܐܲܝܬܵܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ* ܣܓܼܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܫܹܗ*

 

ܫܠܝܼܚܵܐ.  ܓܵܠܵܛܵܝܹ̈ܐ ܕ؛ 18‐ܗ؛ 2

 

ܙܘܼܡܵܪܵܐ. ܒܲܨܠܝܼܒܼܵܟܼ ܐܲܡ̣ܠܸܟܼ܀ ܪܹ̈ܫܲܝ ܦܵܪܹܣ ܟܲܕܼ ܪܵܘܙ̇ܝܼܢ. ܛܥܲܢ̣ܘ ܩܘܼܪ̈ܒܵܢܹܐ ܡ̣ܢ ܐܲܬܼܪ̱ܗܘܿܢ. ܘܩܲܪܸܒܼܘ ܠܲܒܼܪܵܗ̇ ܕܲܒܼܬܼܘܼܠܬܵܐ. ܕܲܗܒܼܵܐ ܘܡܘܼܪܵܐ ܘܲܠܒܼܘܿܢ݇ܬܵܐ‌܀ ܐܲܝܟܼ ܝܲܠܘܼܕܼܵܐ ܥܲܠ̣ܘ ܘܐܸܫܟ̇ܚܘܼܗ‌ܝ. ܕܲܫܪܸܐ ܒܥܘܼܒܵܗ̇ ܕܡܸܣܟܹ̇ܢܬܵܐ. ܘܲܒܼܪܲܟܼܘ ܘܲܣ̣ܓܸܕܼܘ ܟܲܕܼ ܪܵܘܙܝܼܢ. ܘܩܲܪܸܒܼܘ ܩܕܼܵܡܵܘܗ‌ܝ ܣܝܼ̈ܡܵܬܼܗܘܿܢ.

 

ܐܹܘܲܢܓܲܠܝܘܿܢ. ܡܲܬܲܝ ܒ؛ 1‐ܫܘܼܠܵܡܵܐ

 

  ܥܘܿܢܝܼܬܼܵܐ ܕܐ݇ܪ̈ܵܙܹܐ. ܒܩܵܠ؛ ܐܲܝܠܹܝܢ ܕܐܸܬ̇ܬ̇ܚܸܕܼܘ.

ܫܲܒܲܚܘ ܠܡܵܪܝܵܐ ܒܩܘܼܕܼܫܹܗ. ܡܸܛܠ ܐܝܼܩܵܪܵܐ ܕܲܫܡܵܟܼ؛ ܠܲܫܡܵܐ ܕܩܘܼܕܼܫܹܗ ܠܥܵܠܲܡ ܥܵܠܡܝܼܢ. ܝܵܐܹ̇ܐ ܘܙܵܕܹܩ̇ ܡܵܪܝܵܐ ܕܲܢܫܲܒܲܚ ܠܲܡܪܲܚܡܵܢܘܼܬܼܵܐ ܕܛܲܝܒ̇ܘܼܬܼܵܟܼ. ܡܸܛܠ ܕܝܲܗ̣݇ܒܼܬ̇ ܠܲܢ ܒܲܚܢܵܢܵܟܼ ܐ݇ܪ̈ܵܙܹܐ ܫܒܼܝܼܚܹ̈ܐ. ܗܵܢ̇ܘܿܢ ܕܒܲܕܼܚܝܼܠܘܼܬܼܗܘܿܢ ܡܲܠܲܐܟܹ̈ܐ ܪܓܼܝܼܓܼܝܼܢ ܕܲܢܚܘܼܪܘܼܢ. ܘܐܲܫ̣ܘܝܼܬܵܢ ܒܛܲܝܒ̇ܘܼܬܼܵܟܼ ܕܡܵܐ ܕܡܸܬܼܩܲܪܲܒܼ ܠܵܟܼ ܕܸܒܼܚܵܐ ܕܲܟܼܝܵܐ ܘܩܲܕܝܼܫܵܐ. ܢܸܚܙܹܝܘܗ‌ܝ ܟܠܲܢ ܒܓܲܠܝܘܼܬܼ ܐܲܦܹ̈ܐ ܠܫܘܼܒܼܚܵܐ ܦܲܐܝܵܐ ܕܪܲܒ̇ܘܼܬܼܵܟܼ. ܘܢܸܩܥܸܐ ܬܘܼܒܼ ܥܲܡ ܚܲܝ̈ܠܵܘܵܬܼܵܐ ܫܡܲܝܵܢܹ̈ܐ ܘܢܹܐܡܲܪ. ܩܲܕ̇ܝܼܫ ܩܲܕ̇ܝܼܫ ܩܲܕ̇ܝܼܫܲܬ̇ ܐܲܠܵܗܵܐ. ܬܢܝܼ. ܫܒܲܚ. ܒܵܗ̇.

 

  ܕܒܹܝܡ. ܥܘܼܢܵܝܵܐ؛ ܦܲܓܼܪܵܐ ܘܲܕܼܡܵܐ ܡܚܲܣܝܵܢܵܐ ܗܵܐ ܡܸܬܼܩܲܪܲܒܼ. ܥܲܠ ܡܲܕܒ̇ܚܵܐ ܚܲܝܵܐ ܘܡܲܚܝܵܢܵܐ. ܒܓܼܵܘ ܥܹܕܲܬܼ ܩܘܼܕܼܫܵܐ ܩܲܕܿܝܼܫܬܵܐ. ܘܥܬܼܝܼܕܼ ܬܘܼܒܼ ܕܢܸܬܼܩܲܒܲܠ ܥܲܠ ܡܲܕܼܒ̇ܚܵܐ ܩܲܕܿܝܼܫܵܐ ܘܲܫܒܼܝܼܚܵܐ ܘܪܘܼܚܵܢܵܐ. ܗ̇ܘ ܐܲܝܢܵܐ ܕܐܝܼܬܼܵܘܗ‌ܝ ܫܲܪܝܼܪܵܐ ܒܲܫܡܲܝܵܐ܀ ܬܵܘ ܐܲܟܲܚ݇ܕܼ ܥܲܡܡܹ̈ܐ ܢܸܬܼܩܲܪܲܒܼ ܠܹܗ ܒܩܲܕܿܝܼܫܘܼܬܼܵܐ ܕܦܲܓܼܪ̈ܲܝܢ ܘܲܕܼܢܲܦ̮ܫ̈ܵܬܲܢ. ܗܵܢܵܐ ܓܹܝܪ ܐܝܼܬܼܵܘܗ‌ܝ ܐ݇ܪܵܙܵܐ ܕܲܟܼܣܸܐ ܗ݇ܘ̣ܵܐ. ܕܐܸܬܼܝܼܗܸܒܼ ܚܠܵܦܲܝܢ ܠܫܘܼܒܼܩܵܢܵܐ ܕܲܚܛܵܗܹ̈ܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ܀

ܒܵܬܹ̈ܐ؛ ܗܵܐ ܒܬܼܘܼܠܬܵܐ ܒܵܛ̇ܢܵܐ ܘܝܵܠ̇ܕܵܐ ܒܪܵܐ. ܘܡܸܬܼܩܪܸܐ ܫܡܹܗ ܥܲܡܵܢܘܼܐܹܝܠ‌܀ ܬܵܘ ܐܲܟܲܚ݇ܕܼ...‌܀ ܐܸܬܼܝܼܠܸܕܼ ܠܟܼܘܿܢ ܓܹܝܪ ܝܵܘܡܵܢܵܐ ܦܵܪܘܿܩܵܐ. ܕܐܝܼܬܼܵܘܗ‌ܝ ܡܵܪܝܵܐ ܡܫܝܼܚܵܐ ܒܲܡܕܼܝܼܢ݇ܬܹ̇ܗ ܕܕܼܵܘܝܼܕܼ‌܀

 

ܬܸܫܒ̇ܘܿܚܬܵܐ ܕܡܲܣܒܼܵܐ ܕܐ݇ܪ̈ܵܙܹܐ؛ ܡܵܪܲܢ ܝܼܫܘܿܥ..