ܚܲܕܼܒܫܲܒܵܐ ܩܲܕܼܡܵܝܵܐ ܕܩܘܼܕܵܫ ܥܹܕܬܵܐ

 

ܡܲܦܩܵܢܵܐ؛ ܡ؛ 17‐ܫܘܼܠܵܡܵܐ

ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܕܲܬܼܪܹܝܢ ܕܐܘܿܪܵܝܬܵܐ؛

ܐܲܚܲܝ̈ ܒܲܪܸܟ̣ܡܵܪܝ܀

 

ܘܗܘܹܐܠܵܗ̇ ܒܚܲܕ݇ ܒܝܲܪܚܵܐ ܩܲܕ݇ܡܵܝܵܐ؛ ܒܫܹܢ݇ܬܵܐ ܕܬܲܪܬܹܝ؛ ܒܚܲܕܼܒܫܲܒܵܐ ܩܸܡܠܹܗ ܡܲܫܟܢܵܐ܀ ܘܡܘܼܩܸܡܠܹܗ ܡܘܼܫܹܐ ܡܲܫܟܢܵܐ؛ ܘܢܩܸܫܠܹܗ ܣܸܟܵܟܹ̈ܐ ܘܡܘܼܬܸܒ̣ܠܹܗ ܕܲܦܹ̈ܐ؛ ܘܡܘܼܩܘܹܐܠܹܗ ܕܵܒ̣ܪܹ̈ܐ؛ ܘܡܘܼܩܸܡܠܹܗ ܐ݇ܣܛܘܼܢܹ̈ܐ؛ ܘܦܪܸܣܠܹܗ ܟ̰ܲܕܪܵܐ ܥܲܠ ܡܲܫܟܢܵܐ؛ ܘܕܪܹܐܠܹܗ ܦܲܪܕܵܐ ܕܓܸܠܕܹ̈ܐ ܥܘܼܠܘܼܠ ܡܸܢܹܗ؛ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܫܩܸܠܹܗ ܘܡܘܼܬܸܒ̣ܠܹܗ ܠܣܵܗܕܘܼܬܵܐ ܒܩܹܒ̣ܘܼܬܵܐ؛ ܘܡܘܼܬܸܒ̣ܠܹܗ ܫܲܩܠܹ̈ܐ ܘܚܘܼܣܵܝܵܐ ܥܲܠ ܩܹܒ̣ܘܼܬܵܐ ܡ̣ܢ ܥܘܼܠܘܼܠ܀ ܘܡܘܼܥܒ̣ܸܪܹܗ ܩܹܒ̣ܘܼܬܵܐ ܠܡܲܫܟܢܵܐ. ܘܫܩܸܠܹܗ ܣܸܬܪܵܐ ܕܦܲܪܕܵܐ ܘܦܪܸܣܠܹܗ ܥܲܠ ܩܹܒ̣ܘܼܬܵܐ ܕܣܵܗܕܘܼܬܵܐ؛ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܡܘܼܬܸܒ̣ܠܹܗ ܦܵܬܘܿܪܵܐ ܒܡܲܫܟܲܢ ܙܲܒ̣ܢܵܐ ܥܲܠ ܫܸܦܘܼܠܵܠܹ̈ܐ ܕܡܲܫܟܢܵܐ ܡ̣ܢ ܓܲܪܒܝܵܐ ܠܒ̣ܲܕܲܪ ܡ̣ܢ ܦܲܪܕܵܐ܀ ܘܡܘܼܪܝܸܙܠܹܗ ܥܲܠܹܗ ܣܸܕܪܹ̈ܐ ܕܠܲܚܡܵܐ ܩܵܕ݇ܡ ܡܵܪܝܵܐ. ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܡܘܼܬܸܒ̣ܠܹܗ ܡܢܵܪܬܵܐ ܒܡܲܫܟܲܢ ܙܲܒ̣ܢܵܐ ܒܲܪܩܘܼܒ̣ܠ ܦܵܬܘܿܪܵܐ؛ ܥܲܠ ܫܸܦܘܼܠܵܠܹ̈ܐ ܕܡܲܫܟܢܵܐ ܡ̣ܢ ܬܲܝܡܢܵܐ܀ ܡܘܼܠܗܹܐܠܹܗ ܫܪ̈ܵܓ̣݇ܝܵܬܹܐ ܩܵܕ݇ܡ ܡܵܪܝܵܐ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܡܘܼܬܸܒ̣ܠܹܗ ܡܲܕܒܚܵܐ ܕܕܲܗܒ̣ܵܐ ܒܡܲܫܟܲܢ ܙܲܒ̣ܢܵܐ ܩܵܕ݇ܡ ܦܲܪܕܵܐ܀ ܘܡܘܼܣܸܩܠܹܗ ܥܲܠܹܗ ܪܹܝܚܵܐ ܕܒܸܣܡܹ̈ܐ؛ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܡܘܼܬܸܒ̣ܠܹܗ ܦܲܪܕܵܐ ܕܬܲܪܥܵܐ ܕܡܲܫܟܢܵܐ܀ ܘܡܲܕܒܚܵܐ ܕܕܸܒ̣ܚܵܐ ܡܘܼܬܸܒ̣ܠܹܗ ܒܬܲܪܥܵܐ ܘܡܲܫܟܲܢ ܙܲܒ̣ܢܵܐ؛ ܘܡܘܼܣܸܩܠܹܗ ܥܲܠܹܗ ܕܸܒ̣ܚܵܐ؛ ܘܩܲܡܚܵܐ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܡܘܼܬܸܒ̣ܠܹܗ ܠܲܩܢܵܐ ܒܹܝܠ ܡܲܫܟܲܢ ܙܲܒ̣ܢܵܐ ܠܡܲܕܒܚܵܐ ܘܕܪܹܐܠܹܗ ܓܵܘܵܗ̇ ܡܝܼܵܐ ܩܵܐ ܚܲܠܵܠܬܵܐ܀ ܕܚܲܠܸܠܝܼ ܡܸܢܵܗ̇ ܡܘܼܫܹܐ ܘܐܲܗܪܘܿܢ ܘܒܢܘܿܢ̈ܘܼܗ‌ܝ ܐܝܼܕܵܬܲܝ̈ܗ‌ܝ ܘܐܲܩܠܵܬܲܝ̈ܗ‌ܝ܀ ܐܝܼܡܲܢ ܕܥܵܒ̣ܪܝܼ ܠܡܲܫܟܲܢܙܲܒ̣ܢܵܐ؛ ܘܐܝܼܡܲܢ ܕܩܲܪܒܸܢܝܼ ܠܡܲܕܒܚܵܐ ܚܲܠܸܠܝܼ؛ ܐܲܝܟܼ ܕܦܘܼܩܸܕܠܹܗ ܡܵܪܝܵܐ ܠܡܘܼܫܹܐ܀ ܘܡܘܼܩܸܡܠܹܗ ܕܵܪܬܵܐ ܠܚܵܕܵܪ̈ܘܵܢܹܐ ܕܡܲܫܟܢܵܐ ܘܡܲܕܒܚܵܐ؛ ܘܡܘܼܬܸܒ̣ܠܹܗ ܦܲܪܕܵܐ ܒܬܲܪܥܵܐ ܕܕܵܪܬܵܐ؛ ܘܬܘܼܡܸܡܠܹܗ ܡܘܼܫܹܐ ܦܘܼܠܚܵܢܵܐ܀ ܥܢܵܢܵܐ ܡܘܼܟܸܣܠܵܗ̇ ܠܡܲܫܟܲܢܙܲܒ̣ܢܵܐ؛ ܘܐܝܼܩܵܪܹܗ ܕܡܵܪܝܵܐ ܦܸܫܠܹܗ ܡܸܠܝܵܐ ܡܲܫܟܢܵܐ܀ ܘܠܵܐ ܡܨܹܐܠܹܗ ܡܘܼܫܹܐ ܠܸܥܒ̣ܵܪܵܐ ܠܡܲܫܟܲܢܙܲܒ̣ܢܵܐ ܣܵܒܵܒ ܕܫܪܹܐܠܵܗ̇ ܥܲܠܹܗ ܥܢܵܢܵܐ؛ ܘܐܝܼܩܵܪܹܗ ܕܡܵܪܝܵܐ ܡܠܹܐܠܹܗ ܡܲܫܟܢܵܐ܀ ܘܐܝܼܡܲܢ ܕܝܵܪܡܵܐ ܗ݇ܘܵܐ ܥܢܵܢܵܐ ܡ̣ܢ ܥܲܠ ܡܲܫܟܢܵܐ ܡܲܛܥܸܢܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ ܒܟܠܲܝܗ‌ܝ ܟܘܲܟ̰ܝܵܬܲܝ̈ܗ‌ܝ؛ ܘܐܸܢ ܠܵܐ ܝܵܪܡܵܐ ܗ݇ܘܵܐ ܥܢܵܢܵܐ؛ ܠܹܐ ܡܲܛܥܸܢܝܼ ܗܲܠ ܝܵܘܡܵܐ ܕܝܵܪܡܵܐ܀ ܣܵܒܵܒ ܥܢܵܢܵܐ ܗܵܘܝܵܐ ܗ݇ܘܵܐ ܥܲܠ ܡܼܲܫܟܢܵܐ ܒܝܵܘܡܵܐ؛ ܘܢܘܼܪܵܐ ܒܠܲܝܠܹܐ؛ ܒܲܪܩܘܼܒ̣ܠ ܟܠܲܝܗ‌ܝ ܒܢܲܝ̈ ܝܼܣܪܵܝܹܠ ܒܟܠܲܝܗ‌ܝ ܟܘܲܟ̰ܝܵܬܲܝ̈ܗ‌ܝ܀

 

 

ܚܲܒ̣ܪܹܗ

 

ܐܹܫܲܥܝܵܐ ܘ؛ 1‐ܫܘܼܠܵܡܵܐ

ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀

 

ܒܫܹܢ݇ܬܵܐ ܕܡܝܼܬܠܹܗ ܥܘܼܙܝܼܵܐ ܡܲܠܟܵܐ؛ ܚܙܹܐܠܝܼ ܠܡܵܪܝܵܐ ܝ݇ܬܝܼܒ̣ܵܐ ܥܲܠ ܚܲܕ݇ ܟܘܼܪܣܝܼ ܪܵܡܵܐ؛ ܘܫܸܩܠܵܐ ܕܫܸܦܘܼܠܵܠܘܼܗ̈‌ܝ ܡܸܠܝܵܐ ܗܲܝܟܠܹܗ܀ ܘܣܪ̈ܵܦܹܐ ܟܸܠܝܹܐ ܥܘܼܠܘܼܠ ܡܸܢܹܗ؛ ܟܠ ܚܲܕ݇ ܡܸܢܲܝܗ‌ܝ ܡܵܪܹܐ ܐܸܫܬܵܐ ܓܘܼܠܦܵܢܹ̈ܐ؛ ܒܬܪܹܝ ܡܟܵܣܘܿܝܹܐ ܦܲܪܨܘܿܦܹܗ ܘܒܬܪܹܝ ܡܟܵܣܘܿܝܹܐ ܐܲܩܠܹ̈ܗ؛ ܘܒܬܪܹܝ ܒܸܦܪܵܚܵܐ؛ ܘܒܸܩܪܵܝܵܐ ܐܵܗܵܐ ܠܐܵܗܵܐ؛ ܘܒܹܐܡܵܪܵܐ؛ ܩܲܕܝܼܫ؛ ܩܲܕܝܼܫ؛ ܩܲܕܝܼܫ؛ ܡܵܪܝܵܐ ܚܲܝܠܬܵܢܵܐ؛ ܕܡܠܝܼܬܵܐ ܝ݇ܠܵܗ̇ ܐܲܪܥܵܐ ܬܸܫܒܘܿܚܝܵܬܹ̈ܗ؛ ܪܓܝܼܕܠܗ݇ܘܿܢ ܐܸܣܩܘܿܦܝܵܬܹ̈ܐ ܕܬܲܪ̈ܥܵܢܹܐ ܡ̣ܢ ܩܵܠܵܐ ܕܒܸܩܪܵܝܵܐ؛ ܘܒܲܝܬܵܐ ܦܸܫܠܹܗ ܡܸܠܝܵܐ ܬܸܢܢܵܐ܀ ܘܐ݇ܡܪܝܼ؛ ܘܵܝ ܐܸܠܝܼ ܕܬܠܝܼܩܵܐ ܝ݇ܘܸܢ. ܣܵܒܵܒ ܚܲܕ݇ ܛܲܡܵܐܐ ܕܣܸܦܘܵܬܹ̈ܐ ܝ݇ܘܸܢ؛ ܘܓܵܘ ܛܵܝܸܦܵܐ ܕܣܸܦܘܵܬܹ̈ܗ ܛܲܡ̈ܐܹܐ ܒܸܥܡܵܪܵܐ ܝ݇ܘܸܢ؛ ܘܠܡܲܠܟܵܐ ܡܵܪܝܵܐ ܚܲܝܠܬܵܢܵܐ ܚܙܹܐܠܗ݇ܘܿܢ ܥܲܝܢ̈ܝܼ܀ ܘܦܪܸܚܠܹܗ ܠܟܸܣܠܝܼ ܚܲܕ݇ ܡ̣ܢ ܣܪ̈ܵܦܹܐ؛ ܘܒܐܝܼܷܹܕܹܗ ܚܕܵܐ ܓܸܡܘܼܪܬܵܐ ܕܢܘܼܪܵܐ ܫܩܸܠܹܗ ܒܡܵܫܵܐ ܡ̣ܢ ܡܲܕܒܚܵܐ܀ ܘܡܘܼܩܪܸܒ̣ܠܹܗ ܠܦܘܼܡܝܼ؛ ܘܐ݇ܡܸܪܹܗ ܐܸܠܝܼ؛ ܗܵܐ ܩܘܼܪܒܸܢܵܗ̇ ܐܵܗܵܐ ܠܣܸܦܘܵܬ̈ܘܼܟܼ؛ ܕܥܵܒ̣ܸܪ ܥܵܘܠܘܼܟܼ ܘܦܵܝܫܝܼ ܦܘܼܚܠܹܐ ܚܛܝܼܵܬ̈ܘܼܟܼ܀ ܘܫܡܝܼܥܠܝܼ ܩܵܠܹܗ ܕܡܵܪܝܵܐ ܕܒܹܐܡܵܪܵܐ؛ ܠܡܵܢܝܼ ܫܲܕܪܸܢ؛ ܘܡܵܢܝܼ ܒܸܬ ܐܵܙܸܠ؟ ܘܐ݇ܡܸܪܝܼ ܗܵܐ ܐܵܢܵܐ ܫܲܕܸܪܝܼ܀ ܘܐ݇ܡܸܪܹܗ ܐܸܠܝܼ ܙܹܠ݇ ܐ݇ܡܘܿܪ ܠܐܵܗܵܐ ܛܵܝܸܦܵܐ؛ ܫܡܲܥܝܵܐ ܫܡܸܥܡܘܿܢ ܘܠܵܐ ܦܵܪܡܝܼܬܘܿܢ؛ ܘܚܙܵܝܵܐ ܚܙܹܐܡܘܿܢ ܘܠܹܐ ܝܵܕܥܝܼܬܘܿܢ܀ ܥܘܼܒܹܐܠܹܗ ܠܸܒܹܗ ܕܐܵܗܵܐ ܛܵܝܸܦܵܐ؛ ܘܢܵܬܝܵܬ̈ܘܼܗ‌ܝ ܝܘܼܩܪܸܢܗ݇ܘܿܢ؛ ܘܥܲܝܢ̈ܘܼܗ‌ܝ ܫܥܝܼܠܗ݇ܘܿܢ؛ ܕܠܵܐ ܚܵܙܹܐ ܒܥܲܝܢ̈ܘܼܗ‌ܝ ܘܫܵܡܸܥ ܒܢܵܬܝܵܬ̈ܘܼܗ‌ܝ܀ ܘܦܲܪܡܹܐ ܒܠܸܒܹܗ ܘܬܲܘܸܒ ܘܦܵܐܹܫ ܦܘܼܚܠܵܐ. ܘܐ݇ܡܸܪܝܼ؛ ܗܲܠ ܐܝܼܡܲܢ ܝܵܐ ܡܵܪܝܵܐ؟ ܘܐ݇ܡܸܪܹܗ ܗܲܠ ܕܚܵܪܒ̣ܝܼ ܡܵܬܘܵܬܹ̈ܐ ܡ̣ܢ ܕܠܲܝܬ̇ ܝܵܬܒ̣ܵܢܵܐ؛ ܘܒܵܬܹ̈ܐ ܡ̣ܢ ܕܠܲܝܬ̇ ܐ݇ܢܵܫܹ̈ܐ؛ ܘܐܲܪܥܵܐ ܒܸܬ ܚܵܪܒ̣ܵܐ ܘܗܵܘܝܵܐ ܒܲܝܵܪܵܐ؛ ܘܒܸܬ ܡܲܪܚܸܩ ܡܵܪܝܵܐ ܠܒܢܲܝ̈ܢܵܫܵܐ؛ ܘܒܸܬ ܙܵܝܕܵܐ ܫܒ̣ܝܼܩܘܼܬܵܐ ܒܓܵܘܵܗ̇ ܕܐܲܪܥܵܐ܀ ܘܒܸܬ ܦܵܝܫܝܼ ܓܵܘܵܗ̇ ܚܲܕ݇ ܡ̣ܢ ܥܸܣܪܵܐ؛ ܘܒܸܬ ܕܵܝܪܵܐ ܘܗܵܘܝܵܐ ܠܝܲܩܕܵܢܵܐ؛ ܐܲܝܟܼ ܐܝܼܠܵܢܵܐ ܕܒܸܛܡܵܐ ܘܐܲܝܟܼ ܒܲܠܘܼܛܵܐ ܕܢܦܸܠܹܗ ܡ̣ܢ ܥܸܩܪܹܗ؛ ܙܲܪܥܵܐ ܩܲܕܝܼܫܵܐ ܝ݇ܠܹܗ ܫܸܬܠܹܗ܀

 

♱♱♱♱♱♱♱♱♱

 

ܚܲܕ݇ܒܼܫܹܒܵܐ ܩܵܕ݇ܡܵܝܵܐ ܕܩܘܼܕܵܫ ܥܹܕܬܵܐ

ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ

ܕܲܠܘܵܬܼ ܩܘܼܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ܀

ܐ ܩܘܿܪ̈ܲܢܬܼܵܝܹܐ؛ ܝܒ؛ 28‐ܝܓ‐ܫܘܼܠܵܡܵܐ

 

ܣܵܒܵܒ ܡܘܼܬܸܒܼܠܹܗ ܐܲܠܵܗܵܐ ܓܵܘ ܥܹܕܬܹܗ ܩܵܕ݇ܡܵܝܬܵܐ ܫܠܝܼܚܹ̈ܐ؛ ܒܵܬ̄ܪܲܝܗܝ ܢܒܼܝܼܹ̈ܐ؛ ܘܒܵܬ̄ܪ ܡܸܢܲܝܗܝ ܡܲܠܦܵܢܹ̈ܐ؛ ܘܡ̣ܢ ܒܵܬ̄ܪ ܕܝܼܲܝܗܝ ܥܵܒܼܕܵܢܹ̈ܐ ܕܥܵܓ̰ܝܼܒܘܼܝܵܬܹ̈ܐ ܘܚܲܠܥܲܬܹ̈ܐ ܕܒܵܣܲܡܬܵܐ؛ ܗܲܝܪ̈ܵܢܹܐ ܘܡܕܲܒܪ̈ܵܢܹܐ ܘܬܵܗܵܪܹ̈ܐ ܕܠܸܫܵܢܹ̈ܐ* ܩܵܡܘܿ ܟܠܲܝܗܝ ܫܠܝܼܚܹ̈ܐ؛ ܩܵܡܘܿ ܟܠܲܝܗܝ ܢܒܼܝܼܹ̈ܐ؛ ܝܲܢ ܟܠܲܝܗܝ ܡܲܠܦܵܢܹ̈ܐ. ܝܲܢ ܦܲܠܚܵܢܹ̈ܐ ܕܥܵܓ̰ܝܼܒܘܼܝܵܬܹ̈ܐ. ܩܵܡܘܿ ܟܠܲܝܗܝ ܐܝܼܬ ܠܗ݇ܘܿܢ ܚܲܠܥܲܬܹ̈ܐ ܕܒܵܣܲܡܬܵܐ؛ ܝܲܢ ܟܠܲܝܗܝ ܒܠܸܫܵܢܹ̈ܐ ܗܲܡܙܘܼܡܹܐ ܝ݇ܢܵܐ؛ ܝܲܢ ܟܠܲܝܗܝ ܟܹܐ ܦܵܫܩܝܼ* ܐܝܼܢܵܐ ܐܸܢ ܐܲܚܬܘܿܢ ܒܲܚܸܠܝܼܬܘܿܢ ܒܚܲܠܥܲܬܹ̈ܐ ܓܘܼܪܹ̈ܐ؛ ܐܵܢܵܐ ܒܸܬ ܡܲܚܙܸܢܵܘܟܼܘܿܢ ܐܘܼܪܚܵܐ ܒܘܼܫ ܠܵܚܘܼܡܬܵܐ* ܐܸܢ ܒܟܠ ܠܸܫܵܢܵܐ ܕܒܢܲܝ̈ܢܵܫܵܐ ܗܲܡܙܸܡܸܢ ܘܒܠܹܫܵܢܵܐ ܕܡܲܠܲܐܟܼܹ̈ܐ ܙܹܐ ܘܚܘܼܒܵܐ ܠܵܐ ܗܵܘܹܐ ܒܝܼܝܼ؛ ܗܘܹܐܠܝܼ ܐܲܝܟܼ ܚܲܕ݇ ܩܸܛܥܵܐ ܕܡܝܼܣ ܕܙܲܡܙܸܡ؛ ܝܲܢ ܚܲܕ݇ ܙܹܓܵܐ ܕܝܵܗ݇ܒܼܸܠ ܩܵܠܵܐ* ܘܐܸܢ ܗܵܘܝܵܐ ܒܝܼܝܼ ܢܒܼܝܼܘܼܬܵܐ ܘܝܵܕܥܸܢ ܟܠܲܝܗܝ ܐ݇ܪ̈ܵܙܹܐ ܘܟܠܵܗ̇ ܝ݇ܕܵܥܝܬܵܐ؛ ܘܐܸܢ ܗܵܘܝܵܐ ܒܝܼܝܼ ܟܠܵܗ̇ ܗܲܝܡܵܢܘܼܬܵܐ ܗܲܠ ܕܡܵܨܸܢ ܫܵܢܸܢ ܐܘܼܦ ܛܘܼܪ̈ܵܢܹܐ؛ ܘܚܘܼܒܵܐ ܠܵܐ ܗܵܘܹܐ ܒܝܼܝܼ؛ ܗܸܟ̃ ܡܸܢܕܝܼ ܝ݇ܘܸܢ* ܘܐܸܢ ܡܲܐܟܼܠܸܢ ܟܠܡܸܢܕܝܼ ܕܐܝܼܬܼ ܠܝܼ ܩܵܐ ܡܸܣܟܹܢܹ̈ܐ؛ ܘܐܸܢ ܣܵܦܸܢ ܠܦܲܓܼܪܝܼ ܕܝܵܩܸܕ ܒܢܘܼܪܵܐ ܘܚܘܼܒܵܐ ܠܵܐ ܗܵܘܹܐ ܒܝܼܝܼ؛ ܗܸܟ̃ ܡܸܢܕܝܼ ܠܹܐ ܝ݇ܘܸܢ ܒܸܩܢܵܝܵܐ* ܚܘܼܒܵܐ ܝܵܪܝܼܟܼܬܵܐ ܝ݇ܠܵܗ̇ ܒܹܐܢܹܗ؛ ܘܒܵܣܝܼܡܵܐ ܝ݇ܠܹܗ. ܚܘܼܒܵܐ ܠܹܐ ܒܲܚܸܠ. ܚܘܼܒܵܐ ܠܹܐ ܫܵܓܼܸܫ ܘܠܹܐ ܚܵܬܸܪ؛ ܘܠܹܐ ܦܵܠܸܚ ܫܘܼܠܵܢܹ̈ܐ ܡܲܢܚܸܦܵܢܹ̈ܐ؛ ܘܠܹܐ ܒܵܥܝܹܐ ܕܓܵܢܹܗ ܐܲܚܟ̰ܝܼ؛ ܘܠܹܐ ܟܵܪܸܒ ܘܠܹܐ ܚܵܫܸܒܼ ܒܝܼܫܬܵܐ* ܠܹܐ ܚܵܕܹܐ ܒܥܵܘܠܵܐ؛ ܐܝܼܢܵܐ ܟܹܐ ܚܵܕܹܐ ܒܗܵܩܘܼܬܵܐ* ܟܠ ܡܸܢܕܝܼ ܟܹܐ ܩܵܒܸܠ؛ ܘܟܠܡܸܢܕܝܼ ܟܹܐ ܡܗܲܝܡܸܢ. ܘܟܹܐ ܦܵܐܸܫ ܒܗܹܒܼܝܼ ܥܲܠ ܟܠ ܡܸܢܕܝܼ؛ ܘܩܵܒܸܠ ܟܠ ܡܸܢܕܝܼ* ܚܘܼܒܵܐ ܗܸܟ̃ ܠܹܐ ܢܵܦܸܠ؛ ܢܒܼܝܼܵܘܵܬܹ̈ܐ ܟܹܐ ܒܵܛܠܝܼ ܘܠܸܫܵܢܹ̈ܐ ܟܹܐ ܫܵܬܩܝܼ ܘܝ݇ܕܵܥܝܬܵܐ ܟܹܐ ܒܵܛܠܵܐ* ܣܵܒܵܒ ܚܲܕ݇ܟ̰ܵܐ ܡ̣ܢ ܪܵܒܵܐ ܟܹܐ ܝܵܕܥܲܚ؛ ܘܚܲܕ݇ܟ̰ܵܐ ܡ̣ܢ ܪܵܒܵܐ ܟܹܐ ܢܵܒܲܚ. ܐܝܼܢܵܐ ܐܝܼܡܲܢ ܕܐܵܬܝܵܐ ܟܵܡܝܼܠܘܼܬܵܐ؛ ܗܵܝܓܵܗ ܒܸܬ ܒܵܛܸܠ ܗ̇ܘ ܡܸܢܕܝܼ ܕܝܼܗܘܵܐ ܚܲܕ݇ܟ̰ܵܐ. ܐܝܼܡܲܢ ܕܝ݇ܘܸܢ ܗ݇ܘ̣ܵܐ ܝܵܠܵܕ݇ܐ؛ ܐܲܝܟܼ ܝܵܠܕ݇ܐ ܟܹܐ ܗܲܡܙܸܡܸܢ ܗ݇ܘ̣ܵܐ ܘܐܲܝܟܼ ܝܵܠܵܕ݇ܐ ܙܥܘܿܪܵܐ ܟܹܐ ܬܲܚܡܸܢܹܢ ܗ݇ܘ̣ܵܐ ܘܐܲܝܟܼ ܝܵܠܵܕ݇ܐ ܟܹܐ ܦܵܝܫܸܢ ܗ݇ܘ̣ܵܐ ܚܫܝܼܒܼܵܐ. ܐܝܼܢܵܐ ܐܝܼܡܲܢ ܕܗ݇ܘܹܐ ܠܝܼ ܓܲܒܼܪܵܐ؛ ܒܘܼܛܸܠܝܼ ܡܸܢܕܝܼܵܢܹ̈ܐ ܕܝܵܠܕ݇ܘܼܬܵܐ* ܣܵܒܵܒ ܐܵܕܝܼܵܐ ܐܲܝܟܼ ܕܓܵܘ ܢܵܘܪܵܐ ܒܸܚܙܵܝܵܐ ܝ݇ܘܲܚ ܒܛܘܼܦ̮ܣܵܐ ܐܝܼܢܵܐ ܗܵܝܓܵܗ ܦܵܐܬܵܐ ܒܲܪܩܘܼܒܼܠ ܦܵܐܬܵܐ. ܐܵܕܝܼܵܐ ܒܝܼܕܲܥܝܵܐ ܝ݇ܘܸܢ ܚܲܕ݇ܟ̰ܵܐ ܡ̣ܢ ܪܵܒܵܐ؛ ܗܵܝܓܵܗ ܒܸܬ ܝܵܕܥܸܢ ܐܲܝܟܼ ܡܸܢܕܝܼ ܕܦܸܫܠܝܼ ܝ݇ܕܝܼܥܝܵܐ* ܣܵܒܵܒ ܐܲܢܹܐ ܝ݇ܢܵܐ ܬܠܵܬܵܐ ܡܸܢܕܝܼܵܢܹ̈ܐ ܦܵܝܫܵܢܹ̈ܐ. ܗܲܝܡܵܢܘܼܬܵܐ ܘܗܹܒܼܝܼ ܘܚܘܼܒܵܐ ܐܝܼܢܵܐ ܕܒܘܼܫ ܓܘܼܪܵܐ ܡܸܢܲܝܗܝ ܝܼܠܹܗ ܚܘܼܒܵܐ*

 

♱♱♱♱♱♱♱♱♱

 

 

ܚܕܒܫܒܐ ܩܕܡܝܐ ܕܩܘܕܫ ܥܕܬܐ

ܡܬܝ ܝܘ: 13 ‐ 20، ܟܐ: 12 ‐ 14.

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ

 

  ܐܝܼܢܵܐ ܟܲܕ ܐ݇ܬܹܐ ܠܹܗ ܝܑܼܫܘܿܥ ܠܐܲܬܪܵܐ ܕܩܹܣܲܪܝܵܐ ܕܦܝܼܠܝܼܦܘܿܣ. ܒܵܩܸܪ ܗ݇ܘܵܐ ܡ̣ܢ ܬܲܠܡܝܼܕܘܼ̈ܗܝ ܘܐܵܡܸܪ: ܡܵܢܝܼ ܒܹܐܡܵܪܵܐ ܝܢܵܐ ܥܲܠܝܼ ܐ݇ܢܵܫܹ̈ܐ ܕܝܼܘܸܢ ܒܪܘܿܢܹܗ ܕܐ݇ܢܵܫܵܐ؟ ܐܝܼܢܵܐ ܐܵܢܝܼ ܐ݇ܡܸܪܗ݇ܘܿܢ: ܐܝܼܬ ܕܒܹܐܡܵܪܵܐ ܝܢܵܐ: ܝܘܿܚܲܢܵܢ ܡܲܥܡܕܵܢܵܐ. ܐܝܼܢܵܐ ܐ݇ܚܹܪ̈݇ܢܹܐ ܐܹܠܝܼܵܐ. ܘܐ݇ܚܹܪ̈݇ܢܹܐ ܐܹܪܲܡܝܵܐ ܝܲܢ ܚܲܕ݇ ܡ̣ܢ ܢܒܼܝܼܹ̈ܐ. ܐܵܡܸܪ ܐܸܠܲܝܗܝ: ܐܝܼܢܵܐ ܐܲܚܬܘܿܢ ܡܵܢܝܼ ܒܹܐܡܵܪܵܐ ܝܬܘܿܢ ܕܝܼܘܸܢ؟ ܓ̰ܘܼܘܸܒܠܹܗ ܫܸܡܥܘܿܢ ܟܹܐܦܵܐ ܘܐ݇ܡܸܪܹܗ: ܐܲܢ݇ܬ ܝܼܘܸܬ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܵܝܵܐ: ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܹܗ: ܛܘܼܒܼܵܐ ܐܸܠܘܼܟܼ ܫܸܡܥܘܿܢ ܒܪܘܿܢܹܗ ܕܝܘܿܢܵܐ. ܕܒܸܣܪܵܐ ܘܕܸܡܵܐ ܠܵܐ ܓܠܹܐ ܠܹܗ ܐܸܠܘܼܟܼ. ܐܸܠܵܐ ܒܵܒܝܼ ܕܒܲܫܡܲܝܵܐ. ܐܘܿܦ ܐܵܢܵܐ ܒܹܐܡܵܪܵܐ ܝܘܸܢ ܐܸܠܘܼܟܼ: ܐܲܢ݇ܬ ܝܼܘܸܬ ܟܹܐܦܵܐ. ܘܥܲܠ ܕܐܵܗܵܐ ܟܹܐܦܵܐ ܒܸܬ ܒܵܢܸܢ ܠܵܗ̇ ܠܥܹܕܬܝܼ. ܘܬܲܪ̈ܥܹܐ ܕܫܝܘܿܠ ܠܹܐ ܙܲܪܒܸܢܝܼܠܵܗ̇. ܐܸܠܘܼܟܼ ܒܸܬ ܝܲܗܒܼܸܢ ܩܕܝܼܠܹ̈ܐ ܕܡܲܠܟܘܼܬܵܐ ܕܫܡܲܝܵܐ. ܘܟܠ ܡܸܢܕܝܼ ܕܐܲܣܪܸܬ ܒܐܲܪܥܵܐ، ܒܸܬ ܗܵܘܹܐ ܐ݇ܣܝܼܪܵܐ ܒܫܡܲܝܵܐ. ܘܟܠ ܡܸܢܕܝܼ ܕܫܵܪܸܬ ܒܐܲܪܥܵܐ ܒܸܬ ܗܵܘܹܐ ܫܸܪܝܵܐ ܒܫܡܲܝܵܐ. ܘܥܒܼܸܪܹܗ ܝܑܼܫܘܿܥ ܠܗܲܝܟܠܵܐ ܕܐܲܠܵܗܵܐ، ܘܦܘܼܠܸܛܠܹܗ ܠܟܠܲܝܗܝ ܐܲܝܢܝܼ ܕܒܸܙܒܼܵܢܵܐ ܗ݇ܘܵܘ ܘܙܵܒܘܼܢܹܐ ܒܗܲܝܟܠܵܐ: ܘܡܘܼܚܕܸܪܹܗ ܦܵܬܘܿܪܹ̈ܐ ܕܨܲܪ̈ܵܦܹܐ ܘܟܘܼܪ̈ܣܵܘܵܬܵܐ ܕܐܵܢܝܼ ܕܡܙܵܒܘܼܢܹܐ ܗ݇ܘܵܘ ܝܵܘܢܹ̈ܐ. ܘܐ݇ܡܸܪܹܗ ܐܸܠܲܝܗܝ: ܟܬܝܼܒܼܵܐ ܝܠܹܗ. ܕܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܐܸܫ ܩܸܪܝܵܐ.

 

♱♱♱♱♱♱♱♱♱