ܚܲܕܼܒܿܫܲܒܵܐ ܩܲܕܼܡܵܝܵܐ ܕܩܘܼܕܵܫ ܥܹܕܿܬܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܝ ܐܘܿܪܸܫܠܸܡ ܠܡܵܪܝܵܐ. (ܡܸܬܼܐܲܡܪܵܐ ܒܟܼܠܹܗ ܫܵܒܼܘܿܥܵܐ ܕܡܲܥܲܠܬܵܐ)
ܐܲܩܲܦܬܵܐ. ܩܲܕܿܝܼܫܘܼ ܒܹܝܬܼ ܡܲܫ̱ܪܝܹܗ ܕܲܡܪܲܝܡܵܐ܀
ܥܘܼܢܵܝܵܐ؛ ܐܲܠܵܗܵܐ ܒܓܼܵܘܵܗ̇ ܠܵܐ ܬܙܘܼܥ܀
ܕܩܲܢܟܹ̇ܐ. ܒܲܟܼܣܸܐ ܗ݇ܘ̣ܵܐ.
ܡܲܬܼܩ̄ܢܵܐ ܠܡܵܘܬ̇ܒܼܵܟܼ ܥ̣ܒܲܕܿܬ̇ ܡܵܪܝܵܐ ܡܲܩܕܿܫܵܟܼ. ܡܵܪܝܵܐ ܬܲܩܸܢܲܝܗܝ ܒܐܝܼܕܲܝ̈ܟ. ܠܡܹܐܢܵܐ ܕܫܲܝܢܵܐ ܡܫܝܼܚܵܐ ܐܲܬܼܩܸܢ̣ܬܿ ܒܐܲܪܥܵܐ ܠܲܡܫܲܒܿܚܵܢܲܝ̈ܟ. ܒܛܘܼܦ̮ܣܹܗ ܕܥܘܼܡܪܵܟܼ ܫܡܲܝܵܢܵܐ. ܘܟܲܕܼ ܡ̣ܢ ܝܲܡܝܼܢ ܐܲܒ̣ܵܐ ܒܲܡܪ̈ܵܘܡܹܐ ܝܵܬܹ̇ܒܼ ܗ̣݇ܘܲܝܬ̇. ܡ̣ܠܲܝܬܵܗ̇ ܠܥܹܕܿܬܵܟܼ ܡܲܠܟܵܐ ܕܬܸܫܒܿܘܿܚܬܵܐ. ܗܸܕܪܹܗ ܘܫܘܼܦܪܹܗ ܕܲܨܠܝܼܒܼܵܟܼ. ܘܡܸܛܠ ܗܵܕܹܐ ܥܝܼܪܹ̈ܐ ܘܐ݇ܢܵܫܵܐ ܚܵܕܹܝ̇ܢ ܒܵܗ̇. ܘܫܘܼܒ̣ܚܵܐ ܙܵܡ̇ܪܝܼܢ ܒܩܘܼܕܵܫܵܗ̇. ܕܐܲܒ̣ܵܐ ܣܵܡ̣ ܫܲܬܼܐܸܣܹܝ̈ܗܝ. ܘܲܒܼܪܵܐ ܫܲܟܼܠܸܠ̣ ܘܲܒܼܢ̣ܵܗ̇. ܘܪܘܼܚܵܐ ܢ̣ܚܸܬܼ ܘܩܲܕܿܫܵܗ̇. ܒܵܥܹܝ̇ܢܲܢ ܡܸܢܵܟܼ ܫܘܼܪܵܐ ܗܘܸܝܼ ܠܵܗ̇ ܚܲܣܝܼܢܵܐ. ܘܛܲܪ ܠܵܗ̇ ܫܠܵܡܵܐ ܢܲܓܿܝܼܪܵܐ. ܬܢܝܼ؛ ܫܲܒܲܚ. ܒܝܲܕܼ ܨܠܝܼܒ̣ܵܟܼ ܩܲܕܿܝܼܫܵܐ ܦܵܪܘܿܩܲܢ. ܚܕܼܵܐ ܡܲܪܥܝܼܬܼܵܐ ܗܘܸܵܬܼ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ. ܘܲܚܕܼܵܐ ܥܹܕܿܬܵܐ ܩܲܕܿܝܼܫܬܵܐ ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ ܗܵܐ ܚܵܕܹܝ̇ܢ. ܘܟܼܠܗܹܝܢ ܒܸܪ̈ܝܵܬܼܵܐ ܗܵܐ ܩܵܥ̈ܝܵܢ ܡܵܪܹܟܠ ܫܘܼܒ̣ܚܵܐ ܠܵܟܼ.
ܩܸܪܝܵܢܵܐ؛ ܡܲܦܩܵܢܵܐ؛ ܡ؛17‐ܫܘܼܠܵܡܵܐ ܚܲܒ̣ܪܹܗ؛ ܐܹܫܲܥܝܵܐ؛ ܘ؛ 1‐ܫܘܼܠܵܡܵܐ
ܫܘܼܪܵܝܵܐ؛ ܟܠܹܗ ܫܘܼܒ̣ܚܵܗ̇ ܕܒܲܪܬܼ ܡܲܠܟܵܐ ܡ̣ܢ ܠܓܼܵܘ؛ ܠܩܘܼܕܵܫܵܗ̇ ܕܥܹܕܿܬܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܼܝܲܗ܀ ܘܲܡܨܲܒܲܬܼ ܠܒܼܘܼܫܵܗ̇ ܒܕܲܗܒܼܵܐ ܛܵܒ̣ܵܐ؛ ܠܩܘܼܕܵܫܵܗ̇ ܕܥܹܕܿܬܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ؛ ܗܲܠܸܠܘܼܝܲܗ ܗܲܠܸܠܘܼܝܲܗ ܐܹܗܲܠܸܠܘܝܲܗ܀ ܫܒܲܚ... ܠܩܘܼܕܵܫܵܗ̇ ܕܥܹܕܿܬܵܐ܀ ܥܲܠܲܡ...܀ ܠܩܘܼܕܵܫܵܗ̇ ܕܥܹܕܿܬܵܐ܀
ܫܠܝܼܚܵܐ؛ ܐ؛ܩܘܿܪ̈ܲܢܬܼܵܝܹܐ؛ ܝܒ؛ 28‐ܝܓ‐ܫܘܼܠܵܡܵܐ
ܙܘܼܡܵܪܵܐ؛ ܒܩܵܠ ܪܵܥܝܹܗ. ܡܵܐ ܚܲܒ̇ܝܼܒܼܝܼܢ ܡܲܫܟ̇ܢܲܝ̈ܟ ܡܵܪܝܵܐ ܚܲܝܠ̱ܬܼܵܢܵܐ. ܣܲܟ̇ܝܲܬ݀ ܢܲܦ̮ܫܝ ܘܐܸܬܼܪܲܓܼܪ̱ܓܲܬܸ ܠܕܼܵܪ̈ܵܘܗܝ ܕܡܵܪܝܵܐ. ܒ܀ ܪܲܒ̇ܝܼܘ ܦܲܪ̈ܘܼܓܹܐ ܥܲܠ ܓܹܢ݇ܒ̣ ܡܲܕܼܒ̇ܚܵܟܼ ܡܵܪܝܵܐ ܚܲܝܠ̱ܬܼܵܢܵܐ. ܡܲܠܟ̇ܝ ܘܐܲܠܵܗܝ ܛܘܼܒܲܝܗܘܿܢ ܠܲܕܼܥܵܡ̇ܪܝܼܢ ܒܒܲܝܬܵܟܼ. ܒ܀
ܐܹܘܲܢܓܲܠܝܼܘܿܢ. ܡܲܬܲܝ؛ ܝܘ؛ 13‐20. ܐܲܩܸܦ؛ ܟܐ؛ 12‐14
ܕܐ݇ܪ̈ܵܙܹܐ. ܒܫܘܼܪܵܝ ܗܵܘ ܕܒܼܐܝܼܬܼܘܼܬܹܗ. ܐܸܬܼܦܲܨܚ̄ܘ ܘܙܲܡܲܪܘ ܘܫܲܒܲܚܘ؛ ܫܡܲܥܝ ܒܪܲܬܼܝ ܘܲܚܙܵܝ ܘܲܨܠܵܝ ܐܸܕܼܢܹܟܼܝ. ܕܨܘܼܪܬܵܐ. ܕܘܼܨܹܝ̈ܢ ܘܫܲܒܲܚܹܝ̈ܢ ܐܲܟܼܚ݇ܕܼܵܐ ܚܲܪ̈ܒ̣ܵܬܼܵܐ ܕܐܘܿܪܸܫܠܸܡ. ܕܘܼܨܝ ܘܲܚܕܼܵܝ ܥܹܕܿܬܵܐ ܡܗܲܝܡܲܢܬܵܐ ܒܲܪܬܼ ܡܲܠܟܵܐ ܕܥܵܠܡܹ̈ܐ. ܒܚܲܬܼܢܵܐ ܕܡܲܟܼܪܹܟܼܝ ܘܐܲܥܠܹܟܼܝ ܠܩܲܝܛܘܿܢܹܗ. ܘܲܚܠܵܦ ܦܸܪܢܝܼܬܼܵܐ ܝܲܗ̣݇ܒ̣ ܠܹܟܼܝ ܦܲܓ̣ܪܹܗ ܘܲܕܼܡܹܗ ܝܲܩܝܼܪܵܐ. ܘܲܒܼܝܲܕܼ ܕܸܒ̣ܚܵܐ ܕܲܩܢܘܿܡܹܗ ܚܲܣ̣ܝܹܟܼܝ ܘܩܲܕܫܹܟܼܝ ܘܥܲܒܼܕܹܟܼܝ ܠܹܗ ܟܲܠܬܼܵܐ ܡܨܲܒܲܬܿܬܵܐ. ܘܲܡ̣ܙܲܓܼ ܒܓܼܵܘܹܟܼܝ ܫܸܩܝܵܐ ܪܘܼܚܵܢܵܐ. ܠܟܼܠܗܘܿܢ ܝܲܠܕܲܝ̈ܟܿܝ. ܘܗܵܐ ܡܸܬܼܒܲܣܡܝܼܢ ܒܓܼܵܘ ܒܹܝܬܼ ܩܘܼܕܼܫܵܐ. ܟܲܕܼ ܪܵܘܙ̇ܝܼܢ. ܘܥܲܡܗܘܿܢ ܐܵܦ ܚܢܲܢ ܢܸܩܥܸܐ ܘܢܹܐܡܲܪ ܫܘܼܒ̣ܚܵܐ ܠܵܟܼ؛ ܬܢܝܼ؛ ܘܫܲܒܲܚ ܒܵܗ̇
ܒܹܝܡ؛ ܥܘܼܢܵܝܵܐ. ܒܲܫܒ̣ܝܼܚܘܼ ܝܵܘܡܹܗ. ܐܵܘܕܵܝ ܥܹܕܿܬܵܐ ܒܦܘܼܡ ܝܲܠܕܲܝ̈ܟܿܝ. ܠܲܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܟܿܝ. ܘܫܲܟܼܠܸܠ̣ ܘܲܒܼܢ̣ܵܟܼܝ ܥܲܠ ܫܘܼܥܵܐ. ܕܲܫܪܵܪܹܗ ܕܫܸܡܥܘܿܢ ܟܹܐܦܵܐ. ܘܨܲܒ̇ܬܹܟܼܝ ܒܟܼܵܗܢܹ̈ܐ ܘܡܲܠܦܵܢܹ̈ܐ ܕܲܡܪܲܥܹܝܢ ܠܹܗ. ܘܐܲܬܼܩܸܢ ܘܣ̣ܵܡ ܒܓܼܵܘܹܟܼܝ ܦܵܬܼܘܿܪ ܡܲܠܟܿܘܼܬܼܵܐ. ܦܲܓ̣ܪܹܗ ܘܲܕܼܡܹܗ ܝܲܩܝܼܪܵܐ܀ ܘܗܵܐ ܥܝܼܪܹ̈ܐ ܘܐ݇ܢܵܫܵܐ ܙܵܡ̇ܪܝܼܢ ܒܲܚܠܘܿܠܹܟܼܝ. ܫܘܼܒ̣ܚܵܐ ܠܲܡܟܼܝܼܪܹܟܼܝ ܕܐܸܬ̇ܕܿܒܲܚ ܥܲܠ ܐܲܦܲܝ̈ܟܿܝ. ܘܦܲܓܼܪܹܗ ܩ̣ܨܵܐ ܘܝܲܗ̣݇ܒܼ ܠܹܟܼܝ. ܘܢܸܩܥܸܐ ܠܹܗ ܘܢܹܐܡܲܪ ܗܲܠܸܠܘܼܝܲܗ.
ܒܵܬܹ̈ܐ؛ ܩܲܕܸܿܡ̣ ܒܲܕܸܿܩ̣ ܐܹܫܲܝܥܵܐ. ܩܕܼܵܡ ܕܵܪܹ̈ܐ ܟܲܕܼ ܡܸܬܼܢܲܒܹ̇ܐ. ܕܢܸܗܘܘܿܢ ܬܲܪ̈ܥܲܝܟܿܝ ܒܹܪ̈ܘܿܠܹܐ. ܘܲܩܪܘܿܣܛܸܠܘܿܣ ܒܸܢܝܵܢܲܝ̈ܟܿܝ܀ ܘܗܵܐ ܥܝܼܪܹ̈ܐ...܀