ܚܲܕܼܒܫܲܒܵܐ ܩܲܕ݇ܡܵܝܵܐ ܕܨܵܘܡܵܐ
ܡܲܦܩܵܢܵܐ ܠܕ؛ 1‐8؛ 27‐ܫܘܼܠܵܡܵܐ
ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܕܲܬ̣ܪܹܝܢ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛ ܦܪܘܿܡܠܘܼܟܼ ܬܪܹܝ ܦܵܪ̈ܘܿܫܝܵܬܹܐ ܕܟܹܐܦܹ̈ܐ ܐܲܝܟܼ ܕܐܵܢܝܼ ܩܲܕ݇ܡܵܝܹ̈ܐ؛ ܘܟܬܘܿܒ̣ ܥܲܠ ܦܵܪ̈ܘܿܫܝܵܬܹܐ ܚܲܒܪܹ̈ܐ ܕܐܝܼܬ ܗ݇ܘܵܐ ܥܲܠ ܕܐܵܢܝܼ ܩܲܕ݇ܡܵܝܹ̈ܐ ܕܫܡܸܛܠܘܼܟܼ؛ ܘܗܵܘܝܼ ܗܵܙܸܪ ܒܩܵܝܕܲܡܬܵܐ؛ ܘܐ݇ܣܘܿܩ ܠܛܘܼܪܵܐ ܕܣܝܼܢܲܝ؛ ܘܟܠܝܼ ܬܵܡܵܐ ܒܪܸܫ ܛܘܼܪܵܐ.܀ ܘܗܝܼܟ̰ ܚܲܕ݇ ܐ݇ܢܵܫܵܐ ܠܵܐ ܐܵܣܸܩ ܥܲܡܘܼܟܼ؛ ܘܗܝܼܟ̰ ܐ݇ܢܵܫܵܐ ܠܵܐ ܦܵܐܹܫ ܚܸܙܝܵܐ ܒܟܠܹܗ ܛܘܼܪܵܐ؛ ܐܘܼܦ ܥܸܪ̈ܒܹܐ ܘܬܘܵܪܹ̈ܐ ܠܵܐ ܪܵܥܝܝܼ ܒܲܪܩܘܼܒ̣ܠ ܕܗ̇ܘ ܛܘܼܪܵܐ.܀ ܘܦܪܸܡܠܹܗ ܬܪܹܝ ܦܵܪ̈ܘܿܫܝܵܬܹܐ ܕܟܹܐܦܵܐ ܐܲܝܟܼ ܕܐܵܢܝܼ ܩܵܕ݇ܡܵܝܹ̈ܐ؛ ܘܩܘܼܕܸܡܠܹܗ ܡܘܼܫܹܐ ܒܩܵܝܕܲܡܬܵܐ؛ ܘܐ݇ܣܸܩܠܹܗ ܠܛܘܼܪܵܐ ܕܣܝܼܢܲܝ ܐܲܝܟܼ ܕܦܘܼܩܸܕܠܹܗ ܡܵܪܝܵܐ؛ ܘܫܩܸܠܹܗ ܬܪܹܝ ܦܵܪ̈ܘܿܫܝܵܬܹܐ ܕܟܹܐܦܵܐ ܒܐܝܼܕܹܗ.܀ ܘܨܠܹܐܠܹܗ ܡܵܪܝܵܐ ܒܥܢܵܢܵܐ؛ ܘܟܠܹܐܠܹܗ ܥܲܡܹܗ ܬܵܡܵܐ؛ ܘܩܪܹܐܠܹܗ ܒܫܸܡܵܐ؛ ܡܵܪܝܵܐ!܀ ܘܥܒ̣ܸܪܹܗ ܡܵܪܝܵܐ ܩܵܕ݇ܡܘܼܗܝ؛ ܘܩܪܹܐܠܹܗ ܡܵܪܝܵܐ؛ ܡܵܪܝܵܐ؛ ܐܲܠܵܗܵܐ ܚܲܢܵܢܵܐ ܘܡܪܲܚܡܵܢܵܐ؛ ܘܝܵܪܝܼܟ̣ܬܵܐ ܒܹܐܢܹܗ ܘܓܘܼܪܬܵܐ ܫܵܦܵܩܲܬܹܗ ܘܗܵܩܘܼܬܹܗ؛ ܢܵܛܪܵܢܵܐ ܕܫܵܦܵܩܲܬ ܠܐܲܠܦܵܐ ܕܕܵܘܪܹ̈ܐ؛ ܫܵܒ̣ܩܵܢܵܐ ܕܚܛܝܼܵܬܹ̈ܐ ܘܓܢܵܗܹ̈ܐ؛ ܡܚܵܠܘܿܨܹܐ ܠܹܐ ܡܚܵܠܸܨ؛ ܦܵܩܕܵܢܵܐ ܕܓܢܵܗܹ̈ܐ ܕܐܲܒ̣ܵܗܹ̈ܐ ܥܲܠ ܒܢܘܿܢܹ̈ܐ؛ ܘܥܲܠ ܒܢܘܿܢܹ̈ܐ ܕܒܢܘܿܢܹ̈ܐ ܥܲܠ ܬܠܵܬܵܐ ܘܥܲܠ ܐܲܪܒܥܵܐ ܕܵܘܪܹ̈ܐ.܀ ܘܐ݇ܡܸܪܹܗ ܡܵܪܝܵܐ ܠܡܘܼܫܹܐ؛ ܟܬܘܿܒ̣ܠܘܼܟܼ ܐܲܢܹܐ ܚܲܒܪܹ̈ܐ؛ ܒܣܵܒܵܒ ܕܐܲܢܹܐ ܚܲܒܪܹ̈ܐ ܡܘܼܩܸܡܠܝܼ ܥܲܡܘܼܟܼ ܩܵܘܠܵܐ ܘܥܲܡ ܟܠܹܗ ܝܼܣܪܵܝܹܠ.܀ ܘܗܘܹܐܠܹܗ ܬܵܡܵܐ ܥܲܡ ܡܵܪܝܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ؛ ܠܲܚܡܵܐ ܠܵܐ ܐ݇ܟ̣ܸܠܹܗ ܘܡܝܼܵܐ ܠܵܐ ܫܬܹܐܠܹܗ؛ ܘܟܬܸܒ̣ܠܹܗ ܥܲܠ ܦܵܪ̈ܘܿܫܝܵܬܹܐ ܕܟܹܐܦܵܐ ܗܹܡܸܙܡܵܢܹ̈ܐ ܕܩܵܘܠܵܐ ܥܸܣܪܵܐ ܦܘܼܩܕܵܢܹ̈ܐ.܀ ܘܟܲܕ ܨܠܹܐܠܹܗ ܡܘܼܫܹܐ ܡ̣ܢ ܛܘܼܪܵܐ ܕܣܝܼܢܲܝ ܘܬܪܹܝ ܦܵܪ̈ܘܿܫܝܵܬܹܐ ܕܣܵܗܕܘܼܬܵܐ ܒܐܝܼܕܹܗ؛ ܐܝܼܡܲܢ ܕܨܠܹܐܠܹܗ ܡ̣ܢ ܛܘܼܪܵܐ ܠܵܐ ܝ݇ܕܝܼܥܠܹܗ ܡܘܼܫܹܐ ܕܓܸܠܕܵܐ ܕܦܵܬܹܗ ܠܘܼܓ̰ܠܸܓ̰ܠܹܗ ܟܲܕ ܗܘܼܡܙܸܡܠܹܗ ܥܲܡܹܗ ܐܲܠܵܗܵܐ.܀ ܘܚܙܹܐܠܹܗ ܐܲܗܪܘܿܢ ܘܟܠܹܗ ܝܼܣܪܵܝܹܠ ܦܵܬܹܗ ܕܡܘܼܫܹܐ ܕܠܘܼܓ̰ܠܸܓ̰ܠܹܗ ܓܸܠܕܵܐ ܕܦܵܬܹܗ. ܘܙܕܝܼܥܠܗ݇ܘܿܢ ܠܩܲܪܒܘܼܢܹܐ ܠܟܸܣܠܹܗ.܀ ܘܩܸܪܝܲܝܗܝ ܠܹܗ ܡܘܼܫܹܐ ܘܐ݇ܬܹܐܠܗ݇ܘܢ ܠܟܸܣܠܹܗ ܐܲܗܪܘܿܢ ܘܟܠܲܝܗܝ ܓܘܼܪ̈ܵܢܹܐ ܕܟܢܘܼܫܬܵܐ ܘܗܘܼܡܙܸܡܠܹܗ ܡܘܼܫܹܐ ܥܲܡܲܝܗܝ܀ ܘܗܵܝܓܵܗ̇ ܩܘܼܪܒܸܢܗ݇ܘܿܢ ܠܟܸܣܠܹܗ ܟܠܲܝܗܝ ܒܢܲܝ̈ ܝܼܣܪܵܝܹܠ؛ ܘܦܘܼܩܕܠܹܗ ܐܸܠܲܝܗܝ ܟܠ ܡܸܢܕܝܼ ܕܗܘܼܡܙܸܡܠܹܗ ܡܵܪܝܵܐ ܥܲܡܹܗ ܒܛܘܼܪܵܐ ܕܣܝܼܢܲܝ.܀ ܘܟܲܕ ܬܘܼܡܸܡܠܹܗ ܡܘܼܫܹܐ ܕܗܲܡܙܸܡ ܥܲܡܲܝܗܝ ܕܪܹܐܠܹܗ ܥܲܠ ܦܵܬܹܗ ܚܲܕ݇ ܦܲܪܕܵܐ. ܘܟܲܕ ܥܵܒ̣ܸܪ ܗ݇ܘܵܐ ܡܘܼܫܹܐ ܩܵܕ݇ܡ ܡܵܪܝܵܐ ܕܗܲܡܙܸܡ ܥܲܡܹܗ؛ ܫܵܩܸܠ ܗ݇ܘܵܐ ܠܵܗ̇ ܦܲܪܕܵܐ ܗܲܠ ܕܦܵܠܸܛ ܗ݇ܘܵܐ؛ ܘܐܝܼܡܲܢ ܕܦܵܠܸܛ ܗ݇ܘܵܐ ܐܵܡܸܪ ܗ݇ܘܵܐ ܠܒܹܝܬ̣ ܝܼܣܪܵܝܹܠ ܡܸܢܕܝܼ ܕܦܵܐܹܫ ܗ݇ܘܵܐ ܦܘܼܩܕܵܐ.܀ ܘܚܵܙܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ ܦܵܬܹܗ ܕܡܘܼܫܹܐ ܓܸܠܕܵܗ̇ ܠܲܓ̰ܠܘܼܓ̰ܹܐ؛ ܫܵܩܸܠ ܗ݇ܘܵܐ ܡܘܼܫܹܐ ܦܲܪܕܵܐ ܡ̣ܢ ܦܵܬܹܗ ܐܝܼܡܲܢ ܕܥܵܒ̣ܸܪ ܗ݇ܘܵܐ ܕܗܲܡܙܸܡ ܥܲܡ ܐܲܠܵܗܵܐ܀
ܚܲܒ̣ܪܹܗ
ܐܹܫܲܥܝܵܐ ܢܚ؛ 1‐14
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܩܪܝܼ ܒܒܵܠܘܿܥܬܘܼܟܼ؛ ܘܠܵܐ ܚܵܣܟ̣ܸܬ̇. ܡܵܪܸܡ ܩܵܠܘܼܟܼ ܐܲܝܟܼ ܫܝܼܦܘܿܪܵܐ؛ ܘܡܲܚܙܝܼ ܠܛܵܝܸܦܝܼ ܥܵܘܠܲܝܗܝ؛ ܘܠܒܹܝܬ̣ ܝܲܥܩܘܿܒ̣ ܚܛܝܼܵܬܲܝ̈ܗܝ.܀ ܒܸܒܥܵܝܵܐ ܝ݇ܢܵܐ ܐܸܠܝܼ ܟܠܝܘܿܡ؛ ܘܒܵܥܝܼ ܕܝܵܕܥܝܼ ܐܘܼܪ̈ܚܵܬܝܼ ܐܲܝܟܼ ܛܵܝܸܦܵܐ ܥܵܒ̣ܕܵܢܵܐ ܕܙܲܕܝܼܩܘܼܬܵܐ؛ ܘܠܵܐ ܫܵܒ̣ܩܵܢܵܐ ܕܝܼܘܵܢ ܕܐܲܠܵܗܹܗ؛ ܒܸܛܠܵܒܵܐ ܝ݇ܢܵܐ ܡܸܢܝܼ ܕܝܼܘܵܢ ܘܙܲܕܝܼܩܘܼܬܵܐ؛ ܘܒܵܥܝܼ ܠܩܲܪܒܘܼܢܹܐ ܠܐܲܠܵܗܵܐ.܀ ܩܵܡܘܿܕܝܼ ܨܸܡܠܲܢ ܘܠܵܐ ܚܙܹܐܠܘܼܟܼ؛ ܡܘܼܡܟܸܟ̣ܠܲܢ ܓܵܢܲܢ ܘܠܵܐ ܝ݇ܕܝܼܥܠܘܼܟܼ؟ ܗܵܐ ܒܝܵܘܡܵܐ ܕܨܵܘܡܵܘܟ̣ܘܿܢ ܒܸܥܒ̣ܵܕܵܐ ܝ݇ܬܘܿܢ. ܪܸܙܵܝܵܘܟ̣ܘܿܢ؛ ܘܡܲܩܪܘܼܒ̣ܹܐ ܟܠܲܝܗܝ ܨܲܢܵܡܵܘ̈ܟ̣ܘܿܢ.܀ ܗܵܐ ܠܕܘܼܪܵܫܵܐ ܘܡܲܩܪܲܨܬܵܐ ܒܸܨܝܵܡܵܐ ܝ݇ܬܘܿܢ؛ ܘܠܸܡܚܵܝܵܐ ܒܓܘܼܟ̰ܡܵܐ ܕܥܵܘܠܵܐ؛ ܠܵܐ ܨܵܝܡܝܼܬܘܿܢ ܐܲܝܟܼ ܕܐܸܕܝܘܿܡ݇؛ ܘܡܲܫܡܥܝܼܬܘܿܢ ܩܵܠܵܘܟ̣ܘܿܢ ܥܘܼܠܘܼܠ؟܀ ܐܵܗܵܐ ܝ݇ܠܹܗ ܨܵܘܡܵܐ ܕܓܘܼܒܹܐܠܝܼ؛ ܕܡܲܟܸܦ ܐ݇ܢܵܫܵܐ ܓܵܢܹܗ؛ ܘܡܲܟܸܦ ܩܕܵܠܹܗ ܐܲܝܟܼ ܟܘܿܦܵܠܵܐ. ܣܲܩܵܐ ܘܩܸܛܡܵܐ ܡܲܟܸܦܠܹܗ. ܠܐܵܗܵܐ ܩܵܪܝܼܬܘܿܢ ܨܵܘܡܵܐ؛ ܘܝܵܘܡܵܐ ܕܪܸܙܵܝܹܗ ܕܡܵܪܝܵܐ.܀ ܐܵܗܵܐ ܝ݇ܠܹܗ ܨܵܘܡܵܐ ܕܓܘܼܒܹܐܠܝܼ؛ ܕܫܵܪܸܬ̇ ܟܸܬܪܹ̈ܐ ܕܥܵܘܠܵܐ ܘܩܵܛܥܸܬ̇ ܝܸܣܘܼܪܹ̈ܐ ܕܦܸܟ̰ܠܵܐ؛ ܘܫܵܪܸܬ̇ ܚܒ̣ܝܼܫܹܐ ܠܐܵܙܵܕܘܼܬܵܐ؛ ܘܟܠܲܝܗܝ ܝܸܣܘܼܪܹ̈ܐ ܩܵܛܥܝܼܬܘܿܢ.܀ ܩܵܨܸܬ̇ ܠܲܚܡܘܼܟܼ ܠܟܦܝܼܢܵܐ؛ ܘܠܩܲܪܝܼܒܵܝܵܐ ܡܲܥܒ̣ܸܪܸܬ̇ ܠܒܲܝܬܘܼܟܼ؛ ܟܲܕ ܚܵܙܸܬ̇ ܫܘܼܠܚܵܝܵܐ؛ ܡܲܟܸܣܸܬ̇ܠܹܗ ܘܠܵܐ ܡܲܚܦܸܠܸܬ̇ ܡ̣ܢ ܒܲܪ ܒܸܣܪܘܼܟܼ.܀ ܗܵܝܓܵܗ̇ ܒܸܬ ܦܵܐܹܫ ܦܬܝܼܚܵܐ ܒܲܗܪܘܼܟܼ ܐܲܝܟܼ ܩܵܝܕܲܡܬܵܐ ܘܙܲܕܝܼܩܘܼܬܘܼܟܼ ܓ̰ܲܠܕܹܐ ܒܸܬ ܙܵܪܩܵܐ؛ ܘܒܸܬ ܐܵܙܵܠ݇ܐ ܩܵܕ݇ܡܘܼܟܼ ܙܲܕܝܼܩܘܼܬܘܼܟܼ؛ ܘܐܝܼܩܵܪܹܗ ܕܡܵܪܝܵܐ ܒܸܬ ܓ̰ܲܡܸܥܠܘܼܟܼ.܀ ܗܵܝܓܵܗ̇ ܒܸܬ ܩܵܪܸܬ̇؛ ܘܒܸܬ ܓ̰ܲܘܸܒܠܘܼܟܼ ܡܵܪܝܵܐ؛ ܘܒܸܬ ܡܲܩܘܸܚܸܬ̇؛ ܘܒܸܬ ܐܵܡܸܪ ܗܵܐ ܐܵܢܵܐ. ܐܸܢ ܦܲܠܛܸܬ̇ ܦܸܟ̰ܠܵܐ ܡ̣ܢ ܓܵܘܘܿܟܼ. ܘܫܵܪܸܬ̇ ܚܒ̣ܝܼܫܹ̈ܐ؛ ܘܡ̣ܢ ܗܹܡܸܙܡܵܢ ܕܵܓܵܠܬܵܐ ܪܵܚܩܸܬ̇؛ ܘܝܵܗܒ̣ܸܬ̇ ܠܲܚܡܘܼܟܼ ܩܵܐ ܟܦܝܼܢܵܐ؛ ܘܡܲܣܒ̣ܸܥܬ̇ ܓܵܢܵܐ ܕܟܦܝܼܢܵܐ؛ ܒܸܬ ܙܵܪܸܩ ܒܲܗܪܘܼܟܼ ܒܚܸܫܟܵܐ؛ ܘܚܸܫܟܘܼܟܼ ܒܸܬ ܗܵܘܹܐ ܐܲܝܟܼ ܦܲܠܓܵܐ ܕܝܵܘܡܵܐ ܘܒܸܬ ܬܲܓܒܸܪܘܼܟܼ ܡܵܪܝܵܐ ܒܕܵܝܸܡܘܼܬܵܐ؛ ܘܒܸܬ ܡܲܣܒ̣ܸܥ ܓܵܢܘܼܟܼ ܒܕܘܼܗܵܢܵܐ ܘܒܸܬ ܡܲܩܘܹܐ ܓܲܪ̈ܡܘܼܟܼ؛ ܘܒܸܬ ܗܵܘܸܬ̇ ܐܲܝܟܼ ܟܲܪܡܵܐ ܡܘܼܫܬܝܼܵܐ ܘܐܲܝܟܼ ܡܲܒܘܼܥܵܐ ܕܡܝܼܵܐ؛ ܕܠܹܐ ܩܵܛܥܝܼ ܡܝܼܘ̈ܗܝ؛ ܘܒܸܬ ܒܵܢܝܼ ܡܸܢܘܼܟܼ ܚܵܪ̈ܵܒܝܼܹܐ ܕܡ̣ܢ ܥܵܠܲܡ؛ ܘܒܸܢܝܲܬܹ̈ܐ ܕܕܵܘܪܹ̈ܐ ܒܸܬ ܡܲܩܸܡܸܬ̇؛ ܘܒܸܬ ܩܵܪܝܼܠܘܼܟܼ ܬܵܪܨܵܢܵܐ ܕܬܪܘܿܥܬܵܐ ܘܡܲܕܸܪܵܢܵܐ ܕܓ̰ܵܕܵܘܵܬܹ̈ܐ ܠܬܝܵܒ̣ܬܵܐ.܀ ܗܵܝܓܵܗ̇ ܒܸܬ ܦܵܝܫܸܬ̇ ܒܗܹܒ̣ܝܼ ܥܲܠ ܡܵܪܝܵܐ ܕܩܲܡ ܡܲܬܸܒ̣ܠܘܼܟܼ ܥܲܠ ܙܲܚܡܘܼܬܵܐ ܕܐܲܪܥܵܐ؛ ܘܡܲܐܟ̣ܸܠܘܼܟܼ ܝܵܪܬܘܼܬܹܗ ܕܒܵܒܘܼܟܼ ܝܲܥܩܘܿܒ̣ ܣܵܒܵܒ ܦܘܼܡܹܗ ܕܡܵܪܝܵܐ ܗܘܼܡܙܸܡܠܹܗ܀
♱♱♱♱♱♱♱♱♱
ܚܲܕܼܒܫܲܒܵܐ ܩܲܕ݇ܡܵܝܵܐ ܕܨܵܘܡܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܐܵܗܵܐ ܒܹܐܡܵܪܵܐ ܝ݇ܘܸܢ ܘܒܝܼܵܗ݇ܒܼܵܐ ܝ݇ܘܸܢ ܣܵܗܕܘܼܬܵܐ ܒܡܵܪܝܵܐ؛ ܕܡ̣ܢ ܐܵܕܝܼܵܐ ܠܵܐ ܗܵܘܝܼܬܘܿܢ ܒܸܚܕܵܪܵܐ ܐܲܝܟܼ ܣܵܡܵܐ ܦܝܼܫܵܐ ܕܛܵܝܸܦܹ̈ܐ ܕܒܸܚܕܵܪܵܐ ܝ݇ܢܵܐ ܒܒܵܛܝܼܠܘܼܬܵܐ ܕܚܝܼܵܠܲܝ̈ܗܝ؛ ܘܢܘܼܟܼܪ̈ܵܝܹܐ ܝ݇ܢܵܐ ܡ̣ܢ ܚܲܝܹ̈ܐ ܕܐܲܠܵܗܵܐ. ܣܵܒܵܒ ܕܠܲܝܬ ܒܝܼܲܝܗܝ ܝ݇ܕܵܥܝܬܵܐ؛ ܘܡ̣ܢ ܣܵܒܵܒ ܕܣܸܡܝܘܼܬܵܐ ܕܠܸܒܲܝܗܝ* ܐܵܢܝܼ ܕܩܛܸܥܠܗ݇ܘܿܢ ܗܹܒܼܝܼܲܝܗܝ ܘܣܘܼܦܹܐܠܗ݇ܘܿܢ ܓܵܢܲܝܗܝ ܠܦܲܚܙܘܼܬܵܐ ܘܦܘܼܠܚܵܢܵܐ ܕܟܠܵܗ̇ ܟ̰ܲܦܵܠܘܼܬܵܐ ܒܒܲܕܢܲܦ̮ܣܘܼܬܲܝܗܝ* ܐܝܼܢܵܐ ܐܲܚܬܘܿܢ ܠܵܐ ܗܲܕܟܼܵܐ ܝ݇ܠܝܼܦ ܠܵܘܟܼܘܿܢ ܐܸܠܹܗ ܠܡܫܝܼܚܵܐ* ܐܸܢ ܒܣܲܪܲܣܬܘܼܬܵܐ ܫܡܝܼܥ ܠܵܘܟܼܘܿܢ ܘܒܝܼܹܗ ܝ݇ܠܝܼܦܠܵܘܟܼܘܿܢ ܐܲܝܟܼ ܕܝܼܠܵܗ̇ ܗܵܩܘܼܬܵܐ ܒܝܼܫܘܿܥ* ܐܸܠܵܐ ܕܡܲܢܝܸܚܝܼܬܘܿܢ ܚܕܵܪ̈ܵܘܟܼܘܿܢ ܩܵܕ݇ܡܵܝܹܐ؛ ܠܒܲܪܢܵܫܵܐ ܗ̇ܘ ܥܲܬܝܼܩܵܐ ܕܦܝܼܫܵܐ ܝ݇ܠܹܗ ܡܘܼܚܪܸܒܼܵܐ ܒܫܲܗܘܲܬܝܵܬܹ̈ܐ ܕܚܹܠܛܘܼܢܝܘܼܬܵܐ* ܘܦܵܝܫܝܼܬܘܿܢ ܚܘܼܕܸܬܬܹܐ ܒܪܘܼܚܵܐ ܕܚܝܼܵܠܵܘ̈ܟܼܘܿܢ ܘܠܵܒܼܫܝܼܬܘܿܢ ܠܒܲܪܢܵܫܵܐ ܚܲܕ݇ܬܵܐ؛ ܗ̇ܘ ܕܒܐܲܠܵܗܵܐ ܦܸܫܠܹܗ ܒܸܪܝܵܐ ܒܙܲܕܝܼܩܘܼܬܵܐ ܘܒܕܸܟܼܝܘܼܬܵܐ ܕܗܵܩܘܼܬܵܐ* ܒܘܼܬ ܕܐܵܗܵܐ؛ ܡܲܢܝܸܚܘܿܢ ܡܸܢܵܘܟܼܘܿܢ ܕܘܼܓܠܵܐ ܘܗܲܡܙܸܡܘܿܢ ܣܲܪܲܣܬܘܼܬܵܐ ܐ݇ܢܵܫܵܐ ܥܲܡ ܫܒܼܵܒܼܹܗ. ܣܵܒܵܒ ܗܲܕܵܡܹ̈ܐ ܝ݇ܘܲܚ ܚܲܕ݇ ܕܗ̇ܘ ܐ݇ܚܹܪ݇ܢܵܐ* ܟܪܘܿܒܘܿܢ ܘܠܵܐ ܚܵܛܝܼܬܘܿܢ. ܘܫܸܡܫܵܐ ܥܲܠ ܟܲܪܒܵܘܟܼܘܿܢ ܠܵܐ ܓܵܢܹܐ. ܘܠܵܐ ܝܵܗ݇ܒܼܝܼܬܘܿܢ ܦܸܪܣܲܬ ܠܐܵܟܼܸܠܩܲܪܨܵܐ* ܘܗ̇ܘ ܕܓܵܢܸܒܼ ܗ݇ܘ̣ܵܐ؛ ܡܐܵܕܝܼܵܐ ܠܒܵܬ݇ܪܵܐ ܐ݇ܚܸܪ݇ܢܵܐ ܠܵܐ ܓܵܢܸܒܼ؛ ܐܝܼܢܵܐ ܓ̰ܵܗܝܹܐ ܒܐܝܼܕܵܬܘܼܗ̈ܝ ܘܦܵܠܸܚ ܛܵܒܼܵܬܹ̈ܐ؛ ܘܗܵܘܹܐ ܠܹܗ ܕܝܵܗ݇ܒܼܸܠ ܩܵܐ ܕܗ̇ܘ ܕܣܢܝܼܩܵܐ ܝ݇ܠܹܗ، ܟܠ ܗܹܡܸܙܡܲܢ ܣܪܝܼܬܵܐ ܡ̣ܢ ܦܘܼܡܵܘܟܼܘܿܢ ܠܵܐ ܦܵܠܛܵܐ؛ ܐܸܠܵܐ ܗ̇ܝ ܕܝܼܠܵܗ̇ ܨܦܵܝ ܘܚܵܫܚܵܐ ܠܒܸܢܝܵܢܵܐ؛ ܕܝܵܗܒܼܵܐ ܛܲܥܡܵܐ ܠܐܵܢܝܼ ܕܫܵܡܥܝܼ. ܠܵܐ ܗܵܘܝܼܬܘܿܢ ܡܲܦܫܘܼܡܹܐ ܠܪܘܼܚܵܐ ܩܲܕܝܼܫܵܐ ܕܐܲܠܵܗܵܐ ܕܒܝܼـܹܗ ܦܸܫܠܵܘܟܼܘܿܢ ܡܸܚܝܹܐ ܡܘܿܗܪ ܠܝܵܘܡܵܐ ܕܦܘܼܪܩܵܢܵܐ* ܟܠܵܗ̇ ܡܲܪܝܼܪܘܼܬܵܐ؛ ܚܸܡܬܵܐ؛ ܟܲܪܒܵܐ؛ ܩܵܠܡܲܩܵܠ؛ ܓܘܼܕܵܦܵܐ ܦܵܝܫܝܼ ܫܩܝܼܠܹܐ ܡܸܢܵܘܟܼܘܿܢ ܥܲܡ ܟܠܵܗ̇ ܒܝܼܫܘܼܬܵܐ. ܘܗܵܘܝܼܬܘܿܢ ܒܲܣܝܼܡܹ̈ܐ ܚܲܕ݇ ܠܟܸܣ ܕܗ̇ܘ ܐ݇ܚܸܪ݇ܢܵܐ. ܘܡܪ̈ܲܚܡܵܢܹܐ. ܘܗܵܘܝܼܬܘܿܢ ܒܸܫܒܼܵܩܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܕܵܐܟܼܝܼ ܕܐܲܠܵܗܵܐ ܒܡܫܝܼܚܵܐ ܫܒܼܸܩܠܹܗ ܐܸܠܲܢ* ܗܲܕܟܼܵܐ ܗܵܘܝܼܬܘܿܢ ܒܸܬܡܵܝܵܐ ܒܐܲܠܵܗܵܐ ܐܲܝܟܼ ܒܢܘܼܢܹ̈ܐ ܡܘܼܚܸܒܹ̈ܐ؛ ܘܚܕܘܿܪܘܿܢ ܒܚܘܼܒܵܐ ܐܲܝܟܼ ܕܐܘܼܦ ܡܫܝܼܚܵܐ ܩܲܡ ܡܲܚܸܒܠܲܢ؛ ܘܣܘܼܦܹܐܠܹܗ ܓܵܢܹܗ ܡ̣ܢ ܓܹܒܲܢ ܩܘܼܪܒܵܢܵܐ ܘܕܸܒܼܚܵܐ ܠܐܲܠܵܗܵܐ ܠܪܹܝܚܵܐ ܒܲܣܝܼܡܵܐ* ܐܝܼܢܵܐ ܙܵܢܝܘܼܬܵܐ ܘܟܠܵܗ̇ ܟ̰ܲܦܵܠܘܼܬܵܐ ܘܛܲܡܥܵܟܵܪܘܼܬܵܐ ܐܘܼܦ ܒܫܸܡܵܐ ܠܵܐ ܦܵܝܫܝܼ ܩܹܪܝܹܐ ܓܵܘܵܘܟܼܘܿܢ ܐܲܝܟܼ ܕܚܫܝܼܚܬܵܐ ܝ݇ܠܵܗ̇ ܠܩܲܕܝܼܫܹ̈ܐ܋ ܠܵܐ ܨܵܥܲܪ̈ܝܵܬܹܐ ܘܠܵܐ ܗܹܡܸܙܡܵܢܹ̈ܐ ܕܐܲܗܡܵܩܘܼܬܵܐ ܝܲܢ ܡܲܣܚܵܪܘܼܬܵܐ ܝܲܢ ܠܵܩܸܪܕܝܼ. ܐܲܢܹܐ ܕܠܹܐ ܝ݇ܢܵܐ ܠܵܙܸܡ ܐܸܠܵܐ ܡ̣ܢ ܓܹܒܵܐ ܕܐܲܢܹܐ ܫܵܟܲܪܬܵܐ* ܗܲܕܟܼܵܐ ܚܙܹܐܡܘܿܢ ܕܵܐܟܼܝܼ ܚܵܕܪܝܼܬܘܿܢ ܒܗܸܫܝܵܪܘܼܬܵܐ؛ ܠܵܐ ܐܲܝܟܼ ܣܲܟܼܠܹ̈ܐ؛ ܐܸܠܵܐ ܐܲܝܟܼ ܗܵܘܢܵܢܹ̈ܐ ܕܙܵܒܼܢܝܼ ܕܲܥܘܝܼܲܝܗܝ؛ ܣܵܒܵܒ ܕܝܵܘܡܵܢܹ̈ܐ ܒܝܼܫܹ̈ܐ ܝ݇ܢܵܐ* ܒܘܼܬ ܕܐܵܗܵܐ؛ ܠܵܐ ܗܵܘܝܼܬܘܿܢ ܒܵܨܘܿܪܹ̈ܐ ܕܚܝܼܵܠ؛ ܐܸܠܵܐ ܦܲܪܡܹܐܡܘܿܢ ܡܘܼܕܝܼ ܝ݇ܠܹܗ ܪܸܙܵܝܹܗ ܕܐܲܠܵܗܵܐ* ܘܠܵܐ ܗܘܝܼܬܘܿܢ ܒܸܪܘܵܝܵܐ ܒܚܲܡܪܵܐ ܕܒܝܼܹܗ ܐܝܼܬ ܐܵܣܘܿܛܘܼܬܵܐ. ܐܸܠܵܐ ܦܘܼܫܘܼܢ ܡܸܠܝܹܐ ܒܪܘܼܚܵܐ* ܘܗܲܡܙܸܡܘܿܢ ܥܲܡ ܓܵܢܵܘܟܼܘܿܢ ܒܡܲܙܡܘܿܪܹ̈ܐ ܘܬܸܫܒܘܿܚܝܵܬܹ̈ܐ ܘܒܙܡܲܪ̈ܝܵܬܹܐ ܕܪܘܼܚܵܐ ܗܵܘܝܼܬܘܿܢ ܒܸܙܡܵܪܵܐ ܓܵܘ ܠܸܒܵܘܟܼܘܿܢ ܠܡܵܪܝܵܐ. ܘܗܵܘܝܼܬܘܿܢ ܡܵܘܕܘܿܝܹܐ ܒܟܠ ܥܕܵܢܵܐ ܡ̣ܢ ܓܹܒܵܐ ܕܟܠ ܐ݇ܢܵܫܵܐ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܠܐܲܠܵܗܵܐ ܒܵܒܵܐ* ܘܗܵܘܝܼܬܘܿܢ ܙܲܒܛ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܒܚܘܼܒܹܗ ܕܡܫܝܼܚܵܐ*
♱♱♱♱♱♱♱♱♱
ܡܬܝ ܓ: 16 ‐ ܕ: 12
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܬܝ
♰ ܐܝܼܢܵܐ ܟܲܕ ܥܡܝܼܕܠܹܗ ܝܑܼܫܘܿܥ: ܒܗ̇ܝ ܥܕܵܢܵܐ ܣܝܼܠَܩܠܹܗ ܡ̣ܢ ܡܝܼ̈ܵܐ: ܘܦܝܼܫܠܵܗ̇ ܦܬܝܼܚܬܵܐ ܐܸܠܹܗ ܫܡܲܝܵܐ: ܘܚܙܹܐܠܹܗ ܪܘܼܚܵܐ ܕܐܲܠܵܗܵܐ ܕܒܸܨܠܵܝܵܐ ܐܲܝܟܼ ܝܵܘܢܵܐ: ܘܐ݇ܬܹܐܠܵܗ̇ ܥܲܠܘܼܗܝ. ܘܗܵܐ ܩܵܠܵܐ ܡ̣ܢ ܫܡܲܝܵܐ ܕܒܹܐܡܵܪܵܐ: ܐܵܗܵܐ ܝܑܼܠܹܗ ܒܪܘܿܢܝܼ ܚܲܒܝܼܒܼܵܐ، ܕܒܝܼܹܗ ܒܣܸܡܠܵܐ ܠܝܼ. ܗܿܝܓܵܗ̇ ܦܝܼܫܠܹܗ ܠܘܼܒܠܵܐ ܝܑܼܫܘܿܥ ܡ̣ܢ ܪܘܼܚܵܐ ܕܩܘܼܕܫܵܐ ܠܒܲܪܝܼܵܐ: ܕܦܵܐܸܫ ܓ̰ܘܼܪܒܵܐ ܡ̣ܢ ܐܵܟܼܸܠܩܲܪܨܵܐ: ܘܨܝܼܡܠܹܗ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ. ܐܝܼܢܵܐ ܐ݇ܚܲܪܬܵܐ ܟܦܝܼܢܹܗ: ܘܩܘܼܪܒܸܢܹܗ ܗ̇ܘ ܕܓ̰ܵܪܸܒ، ܘܐ݇ܡܝܼܪܹܗ ܐܸܠܹܗ: ܐܸܢ ܐܲܢ݇ܬ ܒܪܘܿܢܹܗ ܕܐܲܠܵܗܵܐ ܝܘܸܬ: ܐ݇ܡܘܿܪ ܕܐܲܢܹܐ ܟܹܐܦܹ̈ܐ ܗܵܘܝܼ ܠܲܚܡܵܐ: ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܝܼܪܹܗ: ܟܬܝܼܒܼܵܐ ܝܠܹܗ ܕܠܹܐ ܝܗ݇ܘܵܐ ܐܲܚܟ̰ܝܼ ܒܠܲܚܡܵܐ ܚܵܝܹܐ ܒܲܪܢܵܫܵܐ: ܐܸܠܵܐ ܒܟܠ ܗܹܡܸܙܡܵܢ ܕܦܲܠܛܵܐ ܡ̣ܢ ܦܘܼܡܹܗ ܕܐܲܠܵܗܵܐ. ܗܿܝܓܵܗ̇ ܩܲܡ ܠܵܒܸܠܹܗ ܐܵܟܼܸܠܩܲܪܨܵܐ ܠܡܕܝܼܢ݇ܬܵܐ ܕܩܘܼܕܫܵܐ:ܘܩܲܡ ܡܵܟܠܹܐ ܠܹܗ ܥܲܠ ܟܸܢܦܵܐ ܕܗܲܝܟܠܵܐ ܘܐ݇ܡܝܼܪܹܗ ܐܸܠܹܗ: ܐܸܢ ܒܪܘܿܢܹܗ ܕܐܲܠܵܗܵܐ ܝܘܸܬ ܪܲܦܝܼ ܓܵܢܘܼܟܼ ܠܬܲܚܬ: ܣܵܒܵܒ ܟܬܝܼܒܼܵܐ ܝܠܹܗ ܕܠܡܲܠܲܐܟܼܘܼ̈ܗܝ ܒܸܬ ܦܵܩܸܕ ܥܲܠܘܼܟܼ: ܘܥܲܠ ܐܝܼܕܵܬܲܝ̈ܗܝ ܒܸܕ ܫܲܩܠܝܼܠܘܼܟܼ ܕܠܵܐ ܬܲܪܩܸܠܵܗ̇ ܒܟܹܐܦܵܐ ܐܲܩܠܘܼܟܼ: ܐܵܡܸܪ ܐܸܠܹܗ ܝܑܼܫܘܿܥ: ܡܸܢ݇ܕܪܹܫ݇ ܟܬܝܼܒܼܵܐ ܝܠܹܗ: ܕܠܵܐ ܓ̰ܲܪܒܸܬ ܠܡܵܪܝܵܐ ܐܲܠܵܗܘܼܟܼ: ܡܸܢ݇ܕܪܹܫ݇ ܩܲܡ ܠܵܒܸܠܹܗ ܐܵܟܼܸܠܩܲܨܵܐ ܠܛܘܼܪܵܐ ܪܵܒܵܐ ܪܵܡܵܐ: ܘܩܲܡ ܡܲܚܙܹܐܠܹܗ ܟܠܲܝܗܝ ܡܲܠܟܘܵܬܹ̈ܐ ܕܥܵܠܡܵܐ ܘܫܘܼܒܼܚܲܝܗܝ: ܘܐ݇ܡܝܼܪܹܗ ܐܸܠܹܗ: ܟܠܲܝܗܝ ܐܲܢܹܐ ܐܸܠܘܼܟܼ ܒܸܕ ܝܲܗ݇ܒܼܸܢ: ܐܸܢ ܢܲܦܠܸܬ ܣܲܓܼܕܸܬ ܐܸܠܝܼ: ܗܿܝܓܵܗ̇ ܐ݇ܡܝܼܪܹܗ ܐܸܠܹܗ ܝܑܼܫܘܿܥ: ܙܹܠ݇ ܠܘܼܟܼ ܣܵܛܵܢܵܐ: ܣܵܒܵܒ ܟܬܝܼܒܼܵܐ ܝܠܹܗ ܕܠܡܵܪܝܵܐ ܐܲܠܵܗܘܼܟܼ ܣܲܓܼܕܸܬ: ܘܐܲܚܟ̰ܝܼ ܐܸܠܹܗ ܦܵܠܚܸܬ: ܗܵܝܓܵܗ̇ ܫܒܼܝܼܩܠܹܗ ܐܸܠܹܗ ܐܵܟܼܸܠܩܲܪܨܵܐ: ܘܗܵܐ ܡܲܠܲܐܟܼܹ̈ܐ ܩܘܼܪܒܸܢܗ݇ܘܿܢ ܘܥܲܒܼܕܝܼ ܗ݇ܘܵܘ ܠܹܗ ܚܸܠܡܵܬ.
♱♱♱♱♱♱♱♱♱