ܚܲܕܒ̇ܫܲܒܵܐ ܕܡܲܥܵܠܲܝ̈ ܨܵܘܡܵܐ ܪܲܒܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܐܹܪܲܡܪ̱ܡܵܟܼ ܡܵܪܝ ܡܲܠܟܵܐ. (ܡܸܬܼܐܲܡܪܵܐ ܥܲܕܼ ܠܲܩܝܵܡܬܵܐ.)
ܥܘܿܢܝܼܬܼܵܐ ܕܩܲܢܟܹ̇ܐ؛ ܒܩܵܠ. ܬܲܠܡܝܼܕܼܵܘ̈ܗܝ ܕܲܡܫܝܼܚܵܐ.
ܟܠܟܼܘܿܢ ܥܲܒܼܕܵܘ̈ܗܝ ܕܐܲܠܵܗܵܐ. ܬܵܘ ܒܢܲܝ̈ܵܐ ܫܘܼܡܥܘܼܢܝ. ܬܵܘ ܟܠܟܼܘܿܢ ܥܲܡܡܹ̈ܐ ܦܪ̈ܝܼܩܲܝ ܒܲܨܠܝܼܒܼܵܐ. ܢܸܣܲܒܼ ܦܲܓܼܪܹܗ ܘܲܕܼܡܹܗ ܕܲܡܫܝܼܚܵܐ ܕܚܲܫ̣ ܥܲܠ ܐܲܦܲܝ̈ܢ. ܘܲܒܼܢܲܟܼܦܘܼܬܼܵܐ ܘܙܲܗܝܘܼܬܼܵܐ ܘܩܲܕܝܼܫܘܼܬܼܵܐ. ܢܨܲܒܸ̇ܬܼ ܦܲܓ̣ܪ̈ܲܝܢ ܘܢܲܦ̮̈ܫܵܬܲܢ. ܕܠܵܐ ܢܸܗܘܸܐ ܡܘܼܡܵܐ ܒܬܸܫܡܸܫܬܲܢ. ܘܢܸܬܼܚܲܝܲܒܼ ܬܲܡܵܢ ܩܕܼܵܡ ܒܹܝܡ ܕܲܡܫܝܼܚܵܐ. ܬܢܝܼ؛ ܫܲܒܲܚ. ܒܣܵܗܕܹ̈ܐ ܒܪ̈ܝܼܟܹܐ. ܢܛܲܝܸܒ̣ ܬܲܪܥܝܼܬܲܢ ܘܢܸܡܪܘܿܩ ܚܘܼܫܵܒܲܝ̈ܢ ܡ̣ܢ ܐܲܟ̇ܬܼܵܐ ܘܥܵܘܠܵܐ. ܘܢܸܒܼܣܘܿܪ ܘܢܸܫܕܸ̇ܐ ܣܲܢ̈ܝܵܬܲܢ. ܘܢܸܬܼܩܲܪܲܒܼ ܠܲܓܼܡܝܼܪܘܼܬܼܵܐ. ܘܢܸܬܼܒܲܩܸܐ ܒܙܵܘܥܲܝ̈ ܢܲܦ̮ܫܵܐ. ܒܦܲܓ̣ܪܹܗ ܘܲܕܼܡܹܗ ܕܲܡܫܝܼܚܵܐ. ܕܗܸܘ ܐܝܼܬܼܵܘܗܝ ܫܵܒܹܩ̇ ܚܵܘ̈ܒܵܬܼܵܐ.
ܩܸܪܝܵܢܵܐ. ܡܲܦܩܵܢܵܐ؛ ܠܕ؛ 1‐8. 27‐ܫܘܼܠܵܡܵܐ. ܚܲܒ̣ܪܹܗ. ܐܹܫܲܥܝܵܐ؛ ܢܚ؛ 1‐14.
ܫܘܼܪܵܝܵܐ؛ ܚ܀ ܐܲܠܵܗ ܐܲܠܵܗ̈ܝܼܢ ܡܵܪܝܵܐ ܡܲܠܸܠ̣* ܘܲܩ̣ܪܵܗ̇ ܠܐܲܪܥܵܐ ܡ̣ܢ ܡܲܕܼܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ̣ܵܘܗܝ* ܡ̣ܢ ܨܸܗܝܘܿܢ ܟܠܝܼܠܵܐ ܡܫܲܒܚܵܐ ܐܲܠܵܗܵܐ ܚ̣ܵܘܝܼ* ܢܹܐܬܸܐ ܐܲܠܵܗܵܐ ܘܠܵܐ ܢܸܫܬ̇ܘܿܩ* ܘܢܘܼܪܵܐ ܬܹܐܟܼܘܿܠ ܩܕܼܵܡܵܘܗܝ* ܘܲܚܕܼܵܪ̈ܵܘܗܝ ܬܸܬܼܓܵܘܙܲܠ ܛܵܒܼ* ܢܸܩܪܸܐ ܠܲܫܡܲܝܵܐ ܡ̣ܢ ܠܥܸܠ. ܘܐܲܪܥܵܐ ܠܲܡܕܼܵܢ ܥܲܡܹܗ*
ܫܠܝܼܚܵܐ. ܐܵܦܸܣܵܝܹ̈ܐ؛ ܕ؛ 17‐ܗ؛ 5. 15‐22.
ܙܘܼܡܵܪܵܐ. ܒܲܨܠܝܼܒܼܵܟܼ ܐܲܡ̣ܠܸܟܼ܀ ܬܵܘ ܒܢܲܝ̈ܵܐ ܫܘܼܡܥܘܼܢܝ. ܘܐܲܠܸܦܟ̣ܘܿܢ ܕܸܚܠ̱ܬܹܗ ܕܐܲܠܵܗܵܐ. ܐܲܝܢܵܘ ܓܲܒܼܪܵܐ ܕܨܵܒܹ̇ܐ ܚܲܝܹ̈ܐ. ܘܪܵܚܹ̇ܡ ܝܵܘ̈ܡܵܬܼܵܐ ܛܵܒܹ̈ܐ ܠܡܸܚܙܵܐ. ܕ܀ ܛܲܪ ܠܸܫܵܢܵܟܼ ܡ̣ܢ ܒܝܼܫܬܵܐ. ܘܣܸܦ̈ܘܵܬܼܵܟܼ ܠܵܐ ܢܡܲܠ̈ܠܵܢ ܢܸܟܼܠܵܐ. ܥܒܲܪ ܡ̣ܢ ܒܝܼܫܬܵܐ ܘܲܥܒܸܕܼ ܛܵܒ̣ܬܼܵܐ. ܒܥܝܼ ܫܠܵܡܵܐ ܘܗܲܪܛ̄ ܒܵܬܼܪܹܗ. ܕ܀
ܐܹܘܲܢܓܲܠܝܼܘܿܢ؛ ܡܲܬܲܝ؛ ܓ؛ 16‐ܕ؛ 12
ܕܐ݇ܪ̈ܵܙܹܐ. ܪܹܫ ܩܵܠܵܐ. ܐܸܙܕܲܗ̱ܪܘ ܘܠܵܐ ܬܸܚܛܘܼܢ. ܘܲܒܼܢܵܘ̈ܗܝ ܕܲܡܪܲܝܡܵܐ ܟܠܟܼܘܿܢ. ܕܨܘܼܪܬܵܐ. ܕܲܠܡܵܐ ܓܹܝܪ ܢܢܲܣܹܝܟܼܘܿܢ ܡܢܲܣܝܵܢܵܐ ܘܢܸܗܘܸܐ ܥܲܡܠܲܢ ܣܪܝܼܩܵܐ؛ ܠܵܐ ܬܲܪܡܘܿܢ ܡܲܪ̈ܓܵܢܝܵܬܼܟܼܘܿܢ ܩܕܼܵܡ ܚܙܝܼܪܹ̈ܐ؛ ܚܙܵܘ ܗܵܟܹܝܠ ܐܲܝܟܲܢܵܐ ܬܗܲܠܟܼܘܼܢ ܙܲܗܝܵܐܝܼܬܼ. ܬܲܠܡܝܼܕܼܵܘ̈ܗܝ ܕܲܡܫܝܼܚܵܐ ܘܲܒ̣ܢܲܝ̈ ܐ݇ܪܵܙܹܗ؛ ܐܸܙܕܲܗ̱ܪܘ ܡ̣ܢ ܚܘܼܠܛܵܢܵܐ ܕܥܲܡ ܚܲܢܦܹ̈ܐ ܘܥܲܡ ܟܵܦܘܿܪܹ̈ܐ. ܕܲܠܡܵܐ ܬܸܣܬܲܪܲܩ ܗܲܝܡܵܢܘܼܬܼܟܼܘܿܢ ܘܡܲܥܡܘܿܕܼܝܼܬܼܵܐ ܕܲܢܣܲܒܼܬܿܘܿܢ. ܒܲܥܝܵܕܹ̈ܐ ܕܩܵܢܹܝ̇ܬܿܘܿܢ ܡܸܢܗܘܿܢ؛ ܡܚܲܒ̇ܠܵܢܹ̈ܐ ܕܦܲܓ̣ܪܵܐ ܘܲܕܢܲܦ̮ܫܵܐ. ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ. ܥܘܼܢܵܝܵܐ. ܒܗܵܢܵܘ ܕܸܒ̣ܚܵܐ. ܦܵܬܼܘܿܪ ܩܘܼܕܼܫܵܐ ܪܘܼܚܵܢܵܐ. ܐܲܬܼܩܸܢ ܩܘܼܕܼܡܲܝܢ ܡܫܝܼܚܵܐ ܦܵܪܘܿܩܲܢ. ܣܲܒ̣ܘ ܥܲܡܡܹ̈ܐ ܦܲܓ̣ܪܹܗ ܘܲܕܼܡܹܗ ܕܲܒ̣ܪܵܐ ܕܛܵܒ̣ܘܼ ܠܲܕܼܫܵܩܸ̇ܠ ܠܹܗ. ܒܕܸܚܠܵܐ ܘܚܘܼܒܵܐ ܢܸܬܼܩܲܪܲܒܼ ܠܹܗ܀ ܘܢܸܣܓܿܘܿܕܼ ܠܐܲܒ̣ܵܐ ܘܠܲܒ̣ܪܵܐ ܘܲܠܪܘܼܚܵܐ ܕܩܘܼܕܫܵܐ. ܟܲܕܼ ܐܵܡ̇ܪܝܼܢܲܢ ܗܲܠܸܠܘܼܝܲܗ.
ܒܵܬܹ̈ܐ؛ ܬܵܘ ܢܸܨܛܲܒܲܬܼ ܪܘܼܚܵܢܵܐܝܼܬܼ. ܒܨܵܘܡܵܐ ܕܲܟܼܝܵܐ ܡܕܲܟܹ̇ܐ ܡܘܼܡܹ̈ܐ܀ ܘܢܸܣܓܿܘܿܕܼ ܠܐܲܒܼܵܐ ܘܠܲܒܼܪܵܐ ܘܲܠܪܘܼܚܵܐ ܕܩܘܼܕܼܫܵܐ܀ ܟܲܕܼ ܐܵܡ̇ܪܝܼܢܲܢ ܗܲܠܸܠܘܼܝܲܗ.
♱♱♱♱♱♱♱♱♱