ܚܲܕܼܒܫܲܒܵܐ ܩܲܕܼܡܵܝܵܐ ܕܕܸܢܚܵܐ
ܡܲܦܩܵܢܵܐ؛ ܓ؛ 1‐16.
ܬܸܒ̣ܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܕܲܬܼܪܹܝܢ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܡܘܼܫܹܐ ܡܲܪܥܘܼܝܹܐ ܗ݇ܘܵܐ ܥܸܪ̈ܒܹܐ ܕܝܲܬܪܘܿܢ ܚܸܡܝܵܢܹܗ؛ ܟܘܼܡܪܵܐ ܕܡܸܕܝܲܢ؛ ܠܘܼܒܸܠܹܗ ܠܦܸܣܩܵܐ ܠܒܲܪܝܼܵܐ؛ ܘܐ݇ܬܹܐܠܹܗ ܠܛܘܼܪܵܐ ܕܐܲܠܵܗܵܐ ܠܚܘܿܪܝܼܒ̣.܀ ܘܦܸܫܠܹܗ ܚܸܙܝܵܐ ܐܸܠܹܗ ܡܲܠܲܐܟ̣ܵܐ ܕܡܵܪܝܵܐ ܓܵܘ ܠܵܗܵܐ ܕܢܘܼܪܵܐ ܡ̣ܢ ܓܵܘ ܣܢܝܼܬܵܐ؛ ܘܚܙܹܐܠܹܗ ܢܘܼܪܵܐ ܒܸܠܗܵܝܵܐ ܓܵܘ ܣܢܝܼܬܵܐ؛ ܘܣܢܝܼܬܵܐ ܠܹܐ ܗ݇ܘܵܐ ܒܸܩܝܵܕܵܐ.܀ ܘܐ݇ܡܸܪܹܗ ܡܘܼܫܹܐ ܒܸܬ ܐܵܙܸܠ݇ܢ ܚܵܙܸܢ ܐܵܗܵܐ ܚܸܙܘܵܐ ܓܘܼܪܵܐ! ܩܵܡܘܿܕܝܼ ܣܢܝܼܬܵܐ ܠܹܐ ܝ݇ܠܵܗ̇ ܒܸܩܝܵܕܵܐ؟܀ ܚܙܹܐܠܹܗ ܡܵܪܝܵܐ ܕܦܬܸܠܹܗ ܠܸܚܙܵܝܵܐ. ܩܪܹܐܠܹܗ ܐܸܠܹܗ ܐܲܠܵܗܵܐ ܡ̣ܢ ܓܵܘ ܣܢܝܼܬܵܐ ܘܐ݇ܡܸܪܹܗ؛ ܡܘܼܫܹܐ؛ ܡܘܼܫܹܐ؛ ܘܐ݇ܡܸܪܹܗ ܗܵܐ ܐܵܢܵܐ.܀ ܐ݇ܡܸܪܹܗ ܐܸܠܹܗ؛ ܠܵܐ ܩܲܪܒܸܢܸܬ̇ ܠܲܐܟ̣ܵܐ؛ ܫܠܘܿܚ ܨܵܘ̈ܠܘܼܟܼ ܡ̣ܢ ܐܲܩܠ̈ܘܼܟܼ؛ ܣܵܒܵܒ ܕܘܼܟܬܵܐ ܕܟܸܠܝܵܐ ܝ݇ܘܸܬ̇ ܥܲܠܵܗ̇ ܩܲܕܝܼܫܬܵܐ ܝ݇ܠܵܗ̇.܀ ܘܐ݇ܡܸܪܹܗ؛ ܐܵܢܵܐ ܝ݇ܘܸܢ ܐܲܠܵܗܵܐ ܕܒܵܒܘܼܟܼ؛ ܐܲܠܵܗܹܗ ܕܐܲܒ̣ܪܵܗܵܡ؛ ܐܲܠܵܗܹܗ ܕܐܝܼܣܚܲܩ؛ ܐܲܠܵܗܹܗ ܕܝܲܥܩܘܿܒ̣؛ ܛܘܼܫܝܵܐܠܹܗ ܡܘܼܫܹܐ ܦܵܬܹܗ؛ ܣܵܒܵܒ ܕܙܕܝܼܥܠܹܗ ܠܸܚܝܵܪܵܐ ܠܟܸܣ ܐܲܠܵܗܵܐ.܀ ܘܐ݇ܡܸܪܹܗ ܡܵܪܝܵܐ؛ ܡܸܚܙܵܝܵܐ ܚܙܹܐܠܝܼ ܝܲܠܨܘܼ̈ܘܹܗ ܕܛܵܝܸܦܝܼ ܓܵܘ ܡܸܨܪܹܝܢ؛ ܘܡܲܩܘܲܚܬܲܝܗܝ ܫܡܝܼܥܠܝܼ ܡ̣ܢ ܩܵܕ݇ܡ ܡܲܠܝܸܨܵܢܲܝܗܝ. ܣܵܒܵܒ ܕܝܵܕܥܸܢ ܠܡܲܪܥܲܝܗܝ. ܘܨܠܹܐܠܝܼ ܩܵܐ ܦܵܨܵܝܬܲܝܗܝ ܡ̣ܢ ܐܝܼܕܵܐ ܕܡܸܨܪ̈ܵܝܹܐ ܘܠܡܵܣܲܩܬܲܝܗܝ ܡ̣ܢ ܕܗ̇ܝ ܐܲܪܥܵܐ؛ ܠܐܲܪܥܵܐ ܪܘܝܼܚܬܵܐ ܘܛܵܒ̣ܬܵܐ؛ ܠܐܲܪܥܵܐ ܕܡܲܓ̰ܪܝܼܵܐ ܚܲܠܒ̣ܵܐ ܘܕܸܒ̣ܫܵܐ؛ ܠܐܲܪܥܵܐ ܕܟܢܲܥܢܵܝܹ̈ܐ؛ ܘܚܹܬܵܝܹ̈ܐ ܘܐܵܡܘܿܪ̈ܵܝܹܐ؛ ܘܦܵܪ̈ܙܵܝܹܐ؛ ܘܚܵܘܵܝܹ̈ܐ ܘܝܵܒ̣ܘܿܣܵܝܹ̈ܐ.܀ ܐܵܕܝܼܵܐ ܗܵܐ ܡܲܩܘܲܚܬܵܐ ܕܒܢܲܝ̈ ܝܼܣܪܵܝܹܠ ܥܒ̣ܸܪܵܗ̇ ܠܟܸܣܠܝܼ؛ ܚܙܹܐܠܝܼ ܝܲܠܨܘܼܝ ܕܡܸܨܪ̈ܵܝܹܐ ܡܲܠܝܘܼܨܹܐ ܝ݇ܢܵܐ ܐܸܠܲܝܗܝ. ܐܵܕܝܼܵܐ ܬܵܐ ܫܲܕܪܸܢܘܼܟܼ ܠܟܸܣ ܦܸܪܥܘܿܢ ܘܦܲܠܸܛ ܠܛܵܝܸܦܝܼ ܒܢܲܝ̈ ܝܼܣܪܵܝܹܠ ܡ̣ܢ ܡܸܨܪܹܝܢ.܀ ܘܐ݇ܡܸܪܹܗ ܡܘܼܫܹܐ ܩܵܐ ܐܲܠܵܗܵܐ ܡܵܢܝܼ ܝ݇ܘܸܢ ܐܵܢܵܐ ܕܐܵܙܸܠ݇ܢ ܠܟܸܣ ܦܸܪܥܘܿܢ ܘܦܲܠܛܸܢ ܠܒܹܝܬ̣ ܝܼܣܪܵܝܹܠ ܡ̣ܢ ܡܸܨܪܹܝܢ؟ ܘܐ݇ܡܸܪܹܗ ܐܸܠܹܗ؛ ܐܵܢܵܐ ܒܸܬ ܗܵܘܸܢ ܥܲܡܘܼܟܼ؛ ܘܐܵܗܵܐ ܢܝܼܫܲܢܩܵܐ ܕܐܵܢܵܐ ܫܵܕܘܿܪܘܼܟܼ ܝܼܘܸܢ؛ ܐܝܼܡܲܢ ܕܦܘܼܠܸܛܠܘܼܟܼ ܠܛܵܝܸܦܵܐ ܡ̣ܢ ܡܸܨܪܹܝܢ؛ ܒܸܬ ܦܵܠܚܝܼܬܘܿܢ ܩܵܕ݇ܡ ܐܲܠܵܗܵܐ ܥܲܠ ܕܐܵܗܵܐ ܛܘܼܪܵܐ.܀ ܘܐ݇ܡܸܪܹܗ ܡܘܼܫܹܐ ܩܵܐ ܐܲܠܵܗܵܐ؛ ܗܵܐ ܐܵܢܵܐ ܒܸܬ ܐܵܙܸܠ݇ܢ ܠܟܸܣ ܒܢܲܝ̈ ܝܼܣܪܵܝܹܠ ܘܐܵܡܪܸܢ ܐܸܠܲܝܗܝ؛ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ ܫܘܼܕܪܸܢܹܗ ܠܟܸܣܠܵܘܟ̣ܘܿܢ؛ ܘܒܸܬ ܐܵܡܪܝܼ ܠܝܼ ܡܘܼܕܝܼ ܝ݇ܠܹܗ ܫܸܡܹܗ؛ ܘܡܘܼܕܝܼ ܐܵܡܪܸܢ ܐܸܠܲܝܗܝ؟. ܘܐ݇ܡܸܪܹܗ ܗܵܕܟ̣ܵܐ ܐܵܡܪܸܬ̇ ܠܒܢܲܝ̈ ܝܼܣܪܵܝܹܠ.܀ ܘܐ݇ܡܸܪܹܗ ܐܲܠܵܗܵܐ ܠܡܘܼܫܹܐ؛ ܐܵܗܝܼܵܗ ܐܵܫܵܪܵܗܝܼܵܗ. ܘܐ݇ܡܸܪܹܗ ܗܵܕܟ̣ܵܐ ܐܵܡܪܸܬ̇ ܠܒܢܲܝ̈ ܝܼܣܪܵܝܹܠ؛ ܐܵܗܝܼܵܗ ܩܲܡ ܫܲܕܸܪܝܼ ܠܟܸܣܠܵܘܟ̣ܘܿܢ.܀ ܘܐ݇ܡܸܪܹܗ ܡܸܕܪܹܐ ܐܲܠܵܗܵܐ ܠܡܘܼܫܹܐ؛ ܗܵܕܟ̣ܵܐ ܒܸܬ ܐܵܡܪܸܬ̇ ܠܒܢܲܝ̈ ܝܼܣܪܵܝܹܠ؛ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ؛ ܐܲܠܵܗܹܗ ܕܐܲܒ̣ܪܵܗܵܡ؛ ܐܲܠܵܗܹܗ ܕܐܝܼܣܚܲܩ؛ ܐܲܠܵܗܹܗ ܕܝܲܥܩܘܿܒ̣؛ ܫܘܼܕܪܸܢܹܗ ܥܲܠܵܘܟ̣ܘܿܢ؛ ܐܵܗܵܐ ܝ݇ܠܹܗ ܫܸܡܝܼ ܠܥܵܠܲܡ؛ ܘܐܵܗܵܐ ܝ݇ܠܹܗ ܕܟ̣ܵܪܝܼ ܠܕܵܘܪܵܐ ܕܕܵܘܪܹ̈ܐ܀
ܚܲܒ̣ܪܹܗ
ܐܹܫܲܥܝܵܐ ܡܕ؛ 21‐ܡܗ؛ 5.
ܫܠܵܘ ܢܒ̣ܝܼܘܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܕܟ̣ܘܿܪ ܐܲܢܹܐ ܝܲܥܩܘܿܒ̣؛ ܘܝܼܣܪܵܝܹܠ ܕܪܹܓܝܼ ܝ݇ܘܸܬ̇؛ ܩܲܡ ܓܲܒ̣ܠܸܢܘܼܟܼ ܪܹܓܵܐ ܩܵܐ ܓܵܢܝܼ؛ ܡܐܵܕܝܼܵܐ ܝܼܣܪܵܝܹܠ ܠܵܐ ܡܲܢܫܸܬ̇ ܠܝܼ؛ ܛܪܸܕܠܝܼ ܥܵܘܠܘܼܟܼ ܐܲܝܟܼ ܥܲܝܒ̣ܵܐ ܘܚܛܝܼܵܬ̈ܘܼܟܼ ܐܲܝܟܼ ܥܢܵܢܵܐ؛ ܕܘܼܪ ܠܟܸܣܠܝܼ ܕܩܲܡ ܦܲܪܩܸܢܘܼܟܼ.܀ ܫܲܒܚܘܼܢ ܫܡܲܝܵܐ ܣܵܒܵܒ ܕܐܲܢܹܐ ܥܒ̣ܸܕܠܹܗ ܡܵܪܝܵܐ. ܡܲܩܘܸܚܘܼܢ ܒܸܢܝܲܬܹ̈ܐ ܕܐܲܪܥܵܐ؛ ܦܨܘܿܚܘܿܢ ܛܘܼܪ̈ܵܢܹܐ ܒܬܸܫܒܘܿܚܬܵܐ؛ ܘܡܲܝܫܵܐ ܘܟܠܲܝܗܝ ܐܝܼܠܵܢܹ̈ܐ ܕܓܵܘܹܗ؛ ܕܦܘܼܪܸܩܠܹܗ ܡܵܪܝܵܐ ܠܝܲܥܩܘܿܒ̣ ܘܒܝܼܣܪܵܝܹܠ ܦܸܫܠܹܗ ܫܘܼܒܚܵܐ. ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܕܩܲܡ ܦܵܪܸܩܠܘܼܟܼ ܘܓܵܒ̣ܸܠܘܼܟܼ ܒܡܲܪܒܥܵܐ ܘܗܲܝܸܪܘܼܟܼ؛ ܐܵܢܵܐ ܝ݇ܘܸܢ ܡܵܪܝܵܐ ܕܥܒ̣ܸܕܠܝܼ ܟܠ. ܡܬܸܚܠܝܼ ܫܡܲܝܵܐ ܒܠܚܘܿܕܝܼ؛ ܘܪܩܸܥܠܝܼ ܐܲܪܥܵܐ ܗܲܪ ܐܵܢܵܐ ܒܓܵܢܝܼ.܀ ܡܒܲܛܠܵܢܵܐ؛ ܕܢܝܼܫܲܢܩܹ̈ܐ ܕܚܲܪ̈ܵܫܹܐ؛ ܘܚܸܪ̈ܫܲܝܗܝ ܟܹܐ ܫܵܪܸܢ. ܡܲܕܸܪܵܢܵܐ ܕܦܲܪ̈ܡܝܼܵܢܹܐ ܠܵܒܵܬ݇ܪܵܐ؛ ܝ݇ܕܥܵܝܬܲܝܗܝ ܟܹܐ ܥܵܒ̣ܕܸܢ ܣܲܟ̣ܠܵܐ؛ ܡܲܩܸܡܵܢܵܐ ܕܗܹܡܸܙܡܵܢ ܕܪܹܓܹܗ؛ ܘܚܝܼܵܠ ܕܩܵܨܸܕ̈ܘܼܗܝ ܟܹܐ ܡܬܲܡܸܡ؛ ܕܐ݇ܡܸܪܹܗ ܠܐܘܿܪܸܫܠܸܡ ܕܦܵܝܫܵܐ ܡܘܼܥܡܸܪܬܵܐ؛ ܘܡܵܬܘܵܬܹ̈ܐ ܕܲܝܗܘܼܕܵܐ ܕܦܵܝܫܝܼ ܒܸܢܝܹ̈ܐ؛ ܘܚܵܪ̈ܵܒܝܼܵܗ̇ ܦܵܝܫܝܼ ܡܘܼܩܸܡܹܐ؛ ܕܐ݇ܡܸܪܹܗ ܠܥܘܼܡܩܵܐ ܕܚܵܪܸܒ̣؛ ܘܢܲܗܪ̈ܵܘܵܬܘܼܟܼ ܡܲܒܪܸܙܸܢ.܀ ܕܐ݇ܡܸܪܹܗ ܠܟܘܼܪܸܫ ܪܲܥܝܝܼ ܝ݇ܠܹܗ؛ ܘܒܸܬ ܬܲܡܸܡ ܟܠܹܗ ܪܸܙܵܐܝܝܼ؛ ܠܹܐܡܵܪܵܐ ܠܐܘܿܪܫܠܹܡ ܕܦܵܝܫܵܐ ܒܢܝܼܬܵܐ؛ ܘܗܲܝܟܠܵܐ ܦܵܐܹܫ ܡܘܼܟܡܸܠܵܐ.܀ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܠܡܫܝܼܚܹܗ ܕܒ̣ܸܩܠܝܼ ܒܝܲܡܝܼܢܹܗ ܕܟܘܼܪܸܫ؛ ܦܵܝܫܝܼ ܙܘܼܒܛܸܢܹܐ ܩܵܕ݇ܡܘܼܗܝ ܛܵܝܸܦܹ̈ܐ؛ ܘܚܵܨܵܐ ܕܡܲܠܟܹ̈ܐ ܒܸܬ ܫܵܪܸܢ. ܠܸܦܬܵܚܵܐ ܩܵܕ݇ܡܘܼܗܝ ܬܲܪ̈ܥܵܢܹܐ؛ ܘܬܲܪ̈ܥܵܢܹܐ ܠܹܐ ܦܵܝܫܝܼ ܕܒ̣ܝܼܪܹ̈ܐ.܀ ܐܵܢܵܐ ܒܸܬ ܐܵܙܸܠ݇ܢ ܩܵܕ݇ܡܘܼܗܝ؛ ܥܲܣܩܘܼܝܵܬܹ̈ܐ ܒܸܬ ܥܵܒ̣ܕܸܢ ܗܵܣܵܢܵܝܝܼ؛ ܬܲܪ̈ܥܵܢܹܐ ܕܒܪܸܢܓ̰ ܒܸܬ ܫܵܡܛܸܢ ܘܕܒ̣ܝܼܪܹ̈ܐ ܕܦܲܪܙܠܵܐ ܒܸܬ ܩܵܛܥܸܢ.܀ ܘܒܸܬ ܝܵܗܒ̣ܸܢܘܼܟܼ ܚܲܙܝܼܢܹ̈ܐ ܕܓܵܘ ܚܸܫܟܵܐ؛ ܘܛܡܘܼܪ̈ܝܵܬܹܐ ܛܘܼܫܝܹܐ؛ ܩܵܐ ܕܝܵܕܥܸܬ̇ ܕܐܵܢܵܐ ܝ݇ܘܸܢ ܡܵܪܝܵܐ ܕܩܲܡ ܩܵܪܸܢܘܼܟܼ ܒܫܸܡܘܼܟܼ ܐܲܠܵܗܹܗ ܕܝܼܣܪܵܝܹܠ؛ ܒܘܼܬ ܚܵܬܸܪ ܪܹܓܝܼ ܝܲܥܩܘܿܒ̣؛ ܘܝܼܣܪܵܝܹܠ ܓܘܼܒܝܝܼ؛ ܩܲܡ ܩܵܪܸܢܘܼܟܼ ܒܫܸܡܘܼܟܼ؛ ܘܡܘܼܬܸܒ̣ܠܝܼ ܐܸܠܘܼܟܼ ܫܸܡܵܐ؛ ܘܠܵܐ ܝ݇ܕܝܼܥܠܘܼܟܼ ܐܸܠܝܼ܀
♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܛܝܼܡܵܬܹܐܘܿܣ ܐܲܚܲܝ̈ ܒܲܪܸܟܼܡܵܪܝ܀
ܐܝܼܢܵܐ ܐܵܗܵܐ ܗܵܘܸܬ ܒܝܼܕܲܥܝܵܐ؛ ܕܒܝܵܘܡܵܢܹ̈ܐ ܐ݇ܚܵܪ̈ܵܝܹܐ ܒܸܬ ܗܵܘܝܼ ܙܲܒܼܢܹ̈ܐ ܩܸܫܝܹ̈ܐ* ܘܒܸܬ ܗܵܘܝܼ ܒܢܲܝ̈ܢܵܫܵܐ ܡܲܚܸܒܵܢܹ̈ܐ ܕܓܵܢܲܝܗܝ ܡܲܚܸܒܵܢܹ̈ܐ ܕܙܘܼܙܹ̈ܐ؛ ܫܲܒܼܗܪ̈ܵܢܹܐ؛ ܪ̈ܵܡܹܐ؛ ܗܲܡܙܸܡܵܢܹ̈ܐ ܕܓܘܼܕܵܦܵܐ؛ ܠܐ݇ܢܵܫܲܝ̈ܗܝ ܠܹܐ ܡܲܨܝܸܬܬܝܼ؛ ܠܵܐ ܛܲܥܢܵܢܹ̈ܐ ܕܡܸܢܬܵܐ؛ ܟܵܦܘܿܪܹ̈ܐ* ܡܲܚܝܵܢܹ̈ܐ ܕܲܪܗܲܩ؛ ܙܘܼܒܿܛܸܢܹܐ ܠܫܲܗܘܲܬܵܐ؛ ܟܝܼܘ̈ܝܼܹܐ؛ ܣܵܢܝܵܢܹ̈ܐ ܕܛܵܒܼܵܬܹ̈ܐ* ܡܣܲܦܝܵܢܹ̈ܐ؛ ܡܲܠܝܸܙܵܢܹ̈ܐ؛ ܚܬܝܼܪܹ̈ܐ؛ ܡܲܚܸܒܵܢܹ̈ܐ ܕܠܲܙܲܬܹ̈ܐ ܒܘܼܫ ܡ̣ܢ ܚܘܼܒܹܗ ܕܐܲܠܵܗܵܐ. ܕܐܝܼܬ ܠܗ݇ܘܿܢ ܐܸܣܟܹܝܡܵܐ ܕܙܕܘܼܥܬܵܐ ܕܐܲܠܵܗܵܐ ܘܡ̣ܢ ܚܲܝܠܵܗ̇ ܪܸܚܩܵܐ ܝ݇ܢܵܐ؛ ܐܵܢܝܼ ܕܗܲܕܟܼܵܐ ܝ݇ܢܵܐ ܡܲܪܚܸܩ ܠܗ݇ܘܿܢ ܡܸܢܘܼܟܼ* ܡ̣ܢ ܕܐܲܢܹܐ ܝ݇ܢܵܐ ܐܵܢܝܼ ܕܟܹܐ ܥܵܒܼܪܝܼ ܓܵܘ ܒܵܬܹ̈ܐ؛ ܘܣܵܠܒܿܝܼ ܒܲܟܼܬܵܬܹ̈ܐ ܕܛܡܝܼܪܹܐ ܝ݇ܢܵܐ ܓܵܘ ܚܛܝܼܬܵܐ؛ ܘܦܵܝܫܝܼ ܠܘܼܒܿܠܹܐ ܠܫܲܗܘܲܬܝܵܬܹ̈ܐ ܕܬܵܗܵܪܹ̈ܐ ܦܪ̈ܝܼܫܹܐ* ܕܒܟܠ ܥܕܵܢܵܐ ܒܸܠܝܵܦܵܐ ܝ݇ܢܵܐ ܘܗܸܟ̃ ܠܹܐ ܡܵܨܝܼ ܠܹܐܬܵܝܵܐ ܠܝ݇ܕܵܥܝܬܵܐ ܕܣܲܪܲܣܬܘܼܬܵܐ* ܐܝܼܢܵܐ ܕܵܐܟܼܝܼ ܕܝܵܢܹܣ ܘܝܲܡܒܿܪܹܣ ܩܸܡܠܗ݇ܘܿܢ ܕܲܪܩܘܼܒܼܠ ܕܡܘܼܫܹܐ؛ ܗܲܕܟܼܵܐ ܐܵܦ ܐܵܢܝܼ ܒܸܩܝܵܡܵܐ ܝ݇ܢܵܐ ܕܲܪܩܘܼܒܼܠ ܕܣܲܪܲܣܬܘܼܬܵܐ. ܚܲܕ݇ܟܡܵܐ ܐ݇ܢܵܫܹ̈ܐ ܝ݇ܢܵܐ ܚܪ̈ܝܼܒܼܹܐ ܘܡܘܼܣܠܝܹ̈ܐ ܡ̣ܢ ܗܲܝܡܵܢܘܼܬܵܐ* ܐܸܠܵܐ ܠܹܐ ܡܲܢܬܝܼ. ܣܵܒܵܒ ܐܲܗܡܲܩܘܼܬܲܝܗܝ ܦܝܵܫܵܐ ܝَܠܵܗ̇ ܝ݇ܕܝܼܥܬܵܐ ܠܟܠ ܐ݇ܢܵܫܵܐ؛ ܕܵܐܟܼܝܼ ܕܐܵܦ ܗ̇ܝ ܕܐܵܢܝܼ ܦܸܫܠܵܗ̇ ܝ݇ܕܝܼܥܬܵܐ. ܐܝܼܢܵܐ ܐܲܢ݇ܬ ܕܐ݇ܬܹܐܠܘܼܟܼ ܒܵܬَܪ ܝܘܼܠܦܵܢܝܼ؛ ܘܒܵܬَܪ ܕܘܼܒܵܪ̈ܝܼ؛ ܒܵܬ݇ܪ ܪܸܙܵܝܝܼ؛ ܒܵܬَܪ ܗܲܝܡܵܢܘܼܬܝܼ؛ ܒܵܬَܪ ܡܲܪܝܲܟܼܬܵܐ ܕܒܹܐܢܝܼ؛ ܒܵܬَܪ ܚܘܼܒܝܼ؛ ܒܵܬَܪ ܚܡܲܠܬܝܼ* ܒܵܬَܪ ܟܵܡܲܪܬܝܼ؛ ܘܒܵܬَܪ ܚܲܫ̈ܝܼ. ܘܟܹܐ ܝܵܕܥܸܬ ܡܘܼܕܝ݇ ܙܲܗܡܲܬܹ̈ܐ ܩܘܼܒܸܿܠܝܼ ܓܵܘ ܐܲܢܛܝܵܟܼܝܵܐ ܘܐܝܼܩܵܢܘܿܢ. ܘܓܵܘ ܠܘܼܣܛܪܵܐ ܡܘܼܕܝ݇ ܟܵܡܲܪ̈ܝܵܬܹܐ ܩܘܼܒܸܿܠܝܼ؛ ܘܡ̣ܢ ܟܠܲܝܗܝ ܩܲܡ ܦܵܨܹܐ ܠܝܼ ܡܵܪܝܼ* ܘܟܠܲܝܗܝ ܐܵܢܝܼ ܕܒܵܥܝܝܼ ܚܲܝܝܼ ܒܙܕܘܼܥܬܵܐ ܕܐܲܠܵܗܵܐ ܒܝܼܫܘܿܥ ܡܫܝܼܚܵܐ ܟܹܐ ܦܵܝܫܝܼ ܛܪܝܼܕܹܐ* ܐܝܼܢܵܐ ܒܢܲܝ̈ܢܵܫܵܐ ܒܝܼܫܹ̈ܐ ܘܡܲܚܠܸܛܵܢܹ̈ܐ ܟܹܐ ܡܲܙܝܸܕܝܼ ܥܲܠ ܒܝܼܫܘܼܬܲܝܗܝ ܟܲܕ ܒܸܚܠܵܛܵܐ ܝ݇ܢܵܐ ܘܡܲܚܠܘܼܛܹܐ* ܐܝܼܢܵܐ ܐܲܢ݇ܬ ܟܠܝܼ ܒܐܵܢܝܼ ܡܸܢܕܝܼܵܢܹ̈ܐ ܕܝ݇ܠܝܼܦܵܐ ܝ݇ܘܸܬ ܘܦܝܼܫܵܐ ܡܘܼܩܘܝܼܵܐ. ܣܵܒܵܒ ܟܹܐ ܝܵܕܥܸܬ ܡ̣ܢ ܡܵܢܝܼ ܝ݇ܠܸܦܠܘܼܟܼ* ܕܡ̣ܢ ܝܵܠܕ݇ܘܼܬܘܼܟܼ ܟܬܵܒܹ̈ܐ ܩܲܕܝܼܫܹ̈ܐ ܝ݇ܠܝܼܦܵܐ ܝ݇ܘܸܬ. ܕܡܵܨܝܼ ܥܵܒܼܕܝܼ ܠܘܼܟܼ ܗܵܘܢܵܢܵܐ ܠܚܲܝܹ̈ܐ ܒܗܲܝܡܵܢܘܼܬܵܐ ܕܝܼܫܘܿܥ ܡܫܝܼܚܵܐ*
♱♱♱♱♱♱♱♱
ܚܕܒܫܒܐ ܩܕܡܝܐ ܕܒܬܼܪ ܕܢܚܐ
ܠܘܩܐ ܕ: 14 ‐ 31
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܘܕܥܝܼܪܹܗ ܝܑܼܫܘܿܥ ܒܚܲܝܠܵܐ ܕܪܘܼܚܵܐ ܠܸܓܠܝܼܠܵܐ: ܘܦܪܝܼܤܠܹܗ ܚܲܒܪܵܐ ܒܘܼܬ ܕܝܼܘܼܗܝ ܒܟܠܹܗ ܐܲܬܪܵܐ ܕܚܵܕܸܪܘܵܢܲܝܗܝ: ܘܗ̇ܘ ܡܵܠܸܦ ܗ݇ܘܵܐ ܓܵܘ ܟܢܘܼܫܝܵܬܲܝ̈ܗܝ: ܘܦܵܐܸܫ ܗ݇ܘܵܐ ܡܫܘܼܒܚܵܐ ܡ̣ܢ ܟܠܢܵܫܵܐ. ܘܐ݇ܬܹܐܠܹܗ ܠܢܵܨܪܲܬ ܐܲܝܟܵܐ ܕܓܘܼܪܘܸܣܠܹܗ. ܘܥܒܼܝܼܪܹܗ ܕܲܐܟܼܝܼ ܕܐܝܼܬ ܗ݇ܘܵܐ ܠܹܗ ܥܵܕܲܬ ܠܟܢܘܼܫܬܵܐ ܒܝܵܘܡܵܐ ܕܫܲܒܬܵܐ: ܘܩܝܼܡܠܹܗ ܠܸܩܪܵܝܵܐ: ܘܦܝܼܫܠܹܗ ܝܘܼܗ݇ܒܼܵܐ ܐܸܠܹܗ ܟܬܵܒܼܵܐ ܕܐܹܫܲܥܝܵܐ ܢܒܼܝܼܵܐ: ܘܦܬܝܼܚܠܹܗ ܝܑܼܫܘܿܥ ܟܬܵܒܼܵܐ: ܘܡܘܼܫ݇ܟ̰ܸܚܠܹܗ ܕܘܼܟܵܐ ܐܲܝܟܵܐ ܕܟܬܝܼܒܼܵܐ ܝܠܹܗ: ܪܘܼܚܹܗ ܕܡܵܪܝܵܐ ܥܲܠܝܼ: ܘܒܘܼܬ ܕܐܵܗܵܐ ܩܲܡ ܡܵܫܸܚܠܝܼ ܠܡܲܫܚܘܼܕܹܐ ܠܡܸܣܟܹܢܹ̈ܐ: ܘܩܲܡ ܫܵܕܸܪܝܼ ܠܒܵܣܘܼܡܹܐ ܠܬܒܼܝܼܪܹ̈ܐ ܕܠܸܒܵܐ: ܘܠܡܲܟܪܘܼܙܹܐ ܠܝܲܚܣܝܼܪܹ̈ܐ ܫܘܼܒܼܩܵܢܵܐ: ܘܠܟܘܼܪܹ̈ܐ ܚܙܵܝܬܵܐ: ܘܠܸܡܫܲܪܘܼܪܹܐ ܠܬܒܼܝܼܪܹ̈ܐ ܒܫܘܼܒܼܩܵܢܵܐ: ܘܠܡܲܟܪܘܼܙܹܐ ܫܹܢ݇ܬܵܐ ܡܩܘܼܒܸܠܬܵܐ ܠܡܵܪܝܵܐ: ܘܟܪܝܼܟܼܠܹܗ ܟܬܵܒܼܵܐ ܘܝܘܼܗ݇ܒܼܸܠܹܗ ܠܡܫܲܡܫܵܢܵܐ: ܘܐ݇ܙܝܼܠܹܗ ܝَܬܝܼܒܼܠܹܗ: ܐܝܼܢܵܐ ܟܠܲܝܗܝ ܕܓܵܘ ܟܢܘܼܫܬܵܐ ܥܲܝܢܲܝ̈ܗܝ ܚܲܝܪܝܼ ܗ݇ܘܵܘ ܒܝܼܹܗ: ܘܫܘܼܪܹܐ ܠܹܗ ܠܹܐܡܵܪܵܐ ܐܸܠܲܝܗܝ: ܕܐܸܕܝܘܿܡ ܦܝܼܫܠܹܗ ܬܘܼܡܸܡܵܐ ܐܵܗܵܐ ܟܬܵܒܼܵܐ ܒܢܵܬܝܵܬܵܘ̈ܟܼܘܿܢ. ܘܟܠܲܝܗܝ ܣܵܗܕܝܼ ܗ݇ܘܵܘ ܠܹܗ: ܘܥܲܓ̰ܒܝܼ ܗ݇ܘܵܘ ܒܗܹܡܸܙܡܵܢܹ̈ܐ ܕܛܲܝܒܘܼܬܵܐ ܕܦܲܠܛܝܼ ܗ݇ܘܵܘ ܡ̣ܢ ܦܘܼܡܹܗ: ܘܐܲܡܪܝܼ ܗ݇ܘܵܘ: ܠܹܐ ܝܠܹܗ ܐܵܗܵܐ ܒܪܘܿܢܵܐ ܕܝܵܘܣܸܦ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܒܲܠܟܵܐ ܒܸܬ ܐܲܡܪܝܼܬܘܿܢ ܐܸܠܝܼ ܐܵܗܵܐ ܡܲܬܠܵܐ: ܐܲܣܝܵܐ ܒܵܣܸܡ ܓܵܢܘܼܟܼ: ܘܟܠ ܕܫܡܝܼܥܠܲܢ ܕܥܒܼܝܼܕܠܘܼܟܼ ܓܵܘ ܟܦܲܪܢܵܚܘܿܡ ܥܒܼܘܼܕ ܐܘܿܦ ܠܲܐܟܼܵܐ ܓܵܘ ܡܕܝܼܢ݇ܬܘܼܟܼ: ܐܝܼܢܵܐ ܗ̇ܘ ܐ݇ܡܝܼܪܹܗ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ، ܕܠܲܝܬ ܢܒܼܝܼܵܐ ܕܦܵܐܸܫ ܡܩܘܼܒܠܵܐ ܒܡܕܝܼܢ݇ܬܹܗ. ܣܵܒܵܒ ܫܪܵܪܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܪܵܒܵܐ ܐܲܪ̈ܡܸܠܝܵܬܹܐ ܐܝܼܬ ܗ݇ܘܵܘ ܒܹܝܬ ܝܑܼܤܪܵܝܸܠ ܒܝܵܘܡܵܢܹ̈ܐ ܕܐܹܠܝܼܵܐ ܢܒ̣ܝܼܵܐ، ܟܲܕ ܦܝܼܫܠܵܗ̇ ܕܒ̣ܝܼܩܬܵܐ ܫܡܲܝܵܐ ܬܠܵܬ ܫܸܢܹ̈ܐ ܘܐܸܫܸܬ ܝܲܪ̈ܚܹܐ: ܘܗ݇ܘܹܐܠܹܗ ܟܸܦܢܵܐ ܪܲܒܵܐ ܒܟܠܵܗ̇ ܐܲܪܥܵܐ: ܘܠܘܵܬ ܚܕܵܐ ܡܸܢܲܝܗܝ ܠܵܐ ܦܝܼܫܠܹܗ ܫܘܼܕܪܵܐ ܐܹܠܝܼܵܐ: ܐܸܠܵܐ ܠܨܲܪܦܲܬ ܕܨܲܝܕܵܢ: ܠܘܵܬ ܒܲܟܼܬܵܐ ܐܲܪܡܲܠܬܵܐ. ܘܪܵܒܵܐ ܓܲܪ̈ܒܼܵܢܹܐ ܐܝܼܬ ܗ݇ܘܵܘ ܒܹܝܬ ܝܑܼܣܪܵܝܸܠ ܒܝܵܘܡܵܢܹ̈ܐ ܕܐܹܠܝܼܫܲܥ ܢܒܼܝܼܵܐ: ܘܚܲܕ݇ ܡܸܢܲܝܗܝ ܠܵܐ ܦܝܼܫܠܹܗ ܕܘܼܟܼܝܵܐ ܐܸܠܵܐ ܐܸܢ ܢܲܥܡܵܢ ܐܵܪܵܡܵܝܵܐ. ܘܟܲܕ ܫܡܝܼܥܠܗ݇ܘܿܢ، ܐܵܢܝܼ ܕܓܵܘ ܟܢܘܼܫܬܵܐ ܟܠܲܝܗܝ ܐܲܢܹܐ: ܦܝܼܫܠܗ݇ܘܿܢ ܡܸܠܝܹܐ ܚܸܡܬܵܐ ܟܠܲܝܗܝ، ܘܩܝܼܡܠܗ݇ܘܿܢ ܦܘܼܠܸܛܗ݇ܘܿܢ ܠܒܼܲܕܲܪ ܡ̣ܢ ܡܕܝܼܢ݇ܬܵܐ: ܘܡܘܼܬܹܐ ܠܗ݇ܘܿܢ ܐܸܠܹܗ ܗܲܠ ܠܓܒܼܝܼܢܵܐ ܕܛܘܼܪܵܐ ܗ̇ܘ ܕܡܕܝܼܢ݇ܬܲܝܗܝ ܒܢܝܼܬܵܐ ܝܗ݇ܘܵܐ ܥܲܠܹܗ، ܕܪܲܦܝܼܠܹܗ ܡ̣ܢ ܫܩܝܼܦܵܐ: ܐܝܼܢܵܐ ܗ̇ܘ ܥܒܼܝܼܪܹܗ ܒܲܝܢܵܬܲܝܗܝ ܘܐ݇ܙܝܼܠܹܗ.
♱♱♱♱♱♱♱♱