ܚܲܕܼܒ̇ܫܲܒܵܐ ܩܲܕܼܡܵܝܵܐ ܕܒ̣ܵܬܲܪ ܕܸܢܚܵܐ

 

   ܡܲܪܡܝܼܬܼܵܐ ܕܐ݇ܪ̈ܵܙܹܐ. ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.

 

   ܥܘܿܢܝܼܬܼܵܐ ܕܩܲܢܟܹ̇ܐ. ܒܩܵܠ؛ ܡܵܪܵܐ ܕܟ̣ܠܵܐ. ܐܹܪܲܡܪ̱ܡܵܟܼ ܡܵܪܝܵܐ ܕܐܲܪܝܼܡܬܵܢܝ. ܚ̣ܵܘܝܼܬ̇ ܒܥܲܡܡܹ̈ܐ ܥܘܼܫܢܵܟܼ. ܒܕܼܢܚܵܟܼ ܡܵܪܲܢ ܚܲܪܲܪܬ̇ ܠܲܢ. ܡ̣ܢ ܫܘܼܥܒܵܕܼܵܗ̇ ܕܲܚܛܝܼܬܼܵܐ. ܘܢܸܗܪܲܬܸ ܬܹܒܹܝܠ ܕܲܬ̣ܫܲܒ̇ܚܵܟܼ. ܚܠܵܦ ܦܘܼܪܩܵܢܵܐ ܕܲܣܥܲܪܬܸ ܒܵܗ̇. ܘܢܸܩܥܸܐ ܟܠܲܢ ܫܲܘܝܵܐܝܼܬܼ. ܒܩܵܠܵܐ ܪܵܡܵܐ ܕܬܸܫܒ̇ܘܿܚܬܵܐ. ܒܪܝܼܟ̣ܘܼ ܡܫܝܼܚܵܐ ܕܒܲܥܡܵܕܹܗ. ܦܲܪܩܹܗ ܠܓܸܢܣܲܢ ܡ̣ܢ ܠܵܘܛܬ̣ܵܐ. ܬܢܝܼ؛ ܫܲܒܲܚ. ܨܠܝܼܒ̣ܵܟܼ ܕܢܘܼܗܪܵܐ ܕܐܸܬ̣ܚܵܘܝܼ ܠܩܘܿܣܛܲܢܛܝܼܢܘܿܣ ܒܲܫܡܲܝܵܐ. ܐܲܝܟܼ ܪܲܒ̇ ܚܲܝܠܵܐ ܐܵܙܹ̇ܠ ܗ݇ܘ̣ܵܐ ܒܪܹܫ ܡܲܫܪܝܼܬܹܗ ܠܲܩܪܵܒ̣ܵܐ. ܘܙܵܥ ܘܐܸܬ̣ܒܲܠܗ̈‌ܝܼ ܓܘܼܕܲܝ̈ܗܘܿܢ. ܕܚܲܢܦܹ̈ܐ ܣܵܓ̣ܕܲܝ̈ ܠܒܸܪ̈ܝܵܬ̣ܵܐ. ܘܐܲܪܦ̣ܝܼܘ ܛܘܼܥܝܲܝ ܕܚܲܢܦܘܼܬܼܵܐ ܘܲܣ̣ܓܸܕܼܘ ܠܲܨܠܝܼܒ̣ܵܐ ܘܝܲܩ̣ܪܘܼܗ‌ܝ.

 

ܩܸܪܝܵܢܵܐ.  ܡܲܦܩܵܢܵܐ؛ܓ؛1‐16܀ ܚܲܒ̣ܪܹܗ. ܐܹܫܲܥܝܵܐ؛ ܡܕ؛21‐ܡܗ؛5

 

   ܫܘܼܪܵܝܵܐ. ܘ܀ ܐܲܝܟܼ ܕܲܫܡܲܥ̣ܢ ܗܵܟܲܢܵܐ ܚ̣ܙܲܝܢ܀ ܒܲܩܪܝܼܬܹܗ ܕܡܵܪܝܵܐ ܚܲܝܠ̱ܬܼܵܢܵܐ‌* ܒܲܩܪܝܼܬܹܗ ܕܐܲܠܵܗܲܢ‌*  ܐܲܠܵܗܵܐ ܢܲܬ̣ܩ̄ܢܝܼܗ̇ ܥܕܲܡܵܐ ܠܥܵܠܲܡ‌*  ܣܲܒܲܪ̄ܢ ܐܲܠܵܗܵܐ ܠܛܲܝܒ̇ܘܼܬܼܵܟܼ ܒܓ̣ܵܘܹܗ ܕܗܲܝܟ̇ܠܵܟܼ‌*  ܐܲܝܟܼ ܫܡܵܟܼ ܐܲܠܵܗܵܐ ܗܵܟܲܢܵܐ ܬܸܫ̈ܒܿܚܵܬܼܵܟܼ‌*

 

   ܫܠܝܼܚܵܐ.  ܒ؛ ܛܝܼܡܵܬܹܐܘܿܣ؛ ܓ؛ 1‐16.

 

ܙܘܼܡܵܪܵܐ. ܒܛܘܼܒܲܝܗܘܿܢ܀ ܡܵܪܝܵܐ ܐܲܡ̣ܠܸܟܼ ܘܓܲܐܝܘܼܬܼܵܐ ܠ̣ܒܸܫ. ܠ̣ܒܸܫ ܡܵܪܝܵܐ ܥܘܼܫܢܵܐ ܘܐܸܬ̣ܥܲܫܲܢ. ܒ܀  ܘܐܲܬ̣ܩ̄ܢܵܗ̇ ܠܬܹܒܹܝܠ ܕܠܵܐ ܬܙܘܼܥ. ܡܲܬ̣ܩܲܢܘܼ ܟܘܼܪܣܝܵܟܼ ܡ̣ܢ ܩܕܼܝܼܡ. ܘܡ̣ܢ ܥܵܠܲܡ ܐܲܢ݇ܬ̇ܘܼ. ܓ܀

 

   ܐܹܘܲܢܓܲܠܝܼܘܿܢ.  ܠܘܼܩܵܐ؛ ܕ؛14‐31

 

ܥܘܿܢܝܼܬܼܵܐ ܕܐ݇ܪ̈ܵܙܹܐ. ܫܘܼܚܠܵܦܵܐ ܘܗܸܝ ܗ݇‌ܝ̣ ܪܹܫ ܩܵܠܵܐ. ܡܵܪܝܵܐ ܐܲܡ̣ܠܸܟܼ ܘܓܲܐܝܘܼܬ̣ܵܐ ܠ̣ܒܸܫ܀ ܒܢܲܝ̈ܵܐ ܕܡܸܬ̣ܝܲܠܕܿܝܼܢ ܘܩܵܝ̇ܡܝܼܢ. ܠ̣ܒܸܫܘ ܠܵܐ ܡܸܬ̣ܚܲܒ̇ܠܵܢܘܼܬܼܵܐ. ܡ̣ܢ ܡܲܝ̈ܵܐ ܘܪܘܼܚܵܐ ܚܘܼܕܵܬ̣ܵܐ ܡܗܲܝܡܢܹ̈ܐ. ܘܡ̣ܢ ܗܵܝܕܹܝܢ ܟܲܕܼ ܦܵܪܘܿܩܲܢ ܒܝܘܿܪܕܢܵܢ ܐܸܬ̣ܥ̱ܡܸܕܼ. ܟܝܵܢܵܐ ܕܡܲܒ̇ܘܼܥܹ̈ܐ ܩܲܕܝܼܫܘܼܬܼܵܐ ܐܸܬ̣ܡ̱ܠܝܼ. ܘܠܵܐ ܡܸܟܹ̇ܝܠ ܒܪܝܼܬܼܵܐ ܒܝܲܕܼ ܡܲܝ̈ܵܐ ܕܛܵܘܦܵܢܵܐ ܡܸܬܼܚܲܒ̇ܠܵܐ. ܐܸܬ̣ܚܙܝܼ ܓܹܝܪ ܒܓ̣ܵܘ ܝܘܿܪܕܢܵܢ. ܐܲܝܢܵܐ ܕܫܵܪܹܐ ܡܸܬ̣ܥܲܒ̣ܪܵܢܘܼܬܼܵܐ. ܘܠܵܐ ܡܸܟܹ̇ܝܠ ܚܲܛܵܝܹ̈ܐ ܒܝܲܡܵܐ ܡܸܬ̇ܛܲܒ̇ܥܝܼܢ. ܐܸܠܵܐ ܒܘܲܙܢܵܐ ܥܵܡ̇ܕ̇ܝܼܢ ܘܡܸܬ̣ܦܲܪܩܝܼܢ. ܠܒܸܫܘ ܠܵܐ ܡܸܬ̣ܚܲܒ̇ܠܵܢܘܼܬܼܵܐ ܒܝܲܕܼ ܡܲܝ̈ܵܐ ܘܪܘܼܚܵܐ ܚܘܼܕܵܬܼܵܐ ܡܗܲܝܡܢܹ̈ܐ. ܟܲܕܼ ܩܵܥܹܝܬ̇ܘܿܢ ܡܫܝܼܚܵܐ ܡܲܥܬ̇ܪܵܢܵܐ ܕܢܲܦ̮̈ܫܵܬܲܢ ܫܘܼܒ̣ܚܵܐ ܠܵܟܼ܀ ܬܢܝܼ؛ ܫܲܒܲܚ ܒܵܗ̇.

 

   ܕܒܹܝܡ. ܥܘܼܢܵܝܵܐ. ܬܵܘ ܟܠܲܢ ܫܲܘܝܵܐܝܼܬܼ ܢܵܘܕܹ̇ܐ ܘܢܸܣܓܿܘܿܕܼ ܠܹܗ. ܠܦܵܪܘܿܩܵܐ ܕܓܸܢܣܵܐ ܕܲܒ̣ܢܲܝ̈ܢܵܫܵܐ ܘܲܕܼܥܵܠܡܵܐ ܟܠܹܗ ܡ̣ܢ ܒܝܼܫܵܐ. ܗܸܘ ܓܹܝܪ ܝܲܗ̣݇ܒ̣ܠܲܢ ܒܛܲܝܒ̇ܘܼܬܹܗ. ܡܵܘܗܲܒ̣ܬܼܵܐ ܫܡܲܝܵܢܝܼܬܼܵܐ. ܕܦܲܓ̣ܪܹܗ ܘܲܕܼܡܹܗ. ܠܚܘܼܣܵܝܵܐ ܕܚܵܘܒܹ̈ܐ ܗܲܠܸܠܘܼܝܲܗ܀ ܠܘܵܬܹܗ ܢܸܬ̣ܐ̱ܡܸܢ ܟܠܲܢ. ܘܲܠܡܵܪܘܼܬܹܗ ܢܸܦܠܘܿܚ ܡ̣ܢ ܟܠܹܗ ܠܸܒܲܢ. ܟܲܕܼ ܐܵܡ̇ܪܝܼܢܲܢ ܩܲܕܿܝܼܫܲܬ̇ ܩܲܕ̇ܝܼܫܲܬ̇ ܩܲܕ̇ܝܼܫܲܬ̇ ܪܵܚܹ̇ܡ ܐ݇ܢܵܫܵܐ. ܗܲܠܸܠܘܼܝܲܗ‌܀

ܒܵܬܹ̈ܐ.  ܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ܀ ܠܘܵܬܹܗ ܢܸܬ̣ܐ̱ܡܸܢ ܟܠܲܢ.....‌܀