ܚܲܕܼܒܫܲܒܵܐ ܩܲܕܼܡܵܝܵܐ ܕܐܹܠܝܼܵܐ
ܬܸܢܝܵܢ ܢܵܡܘܿܣܵܐ ܘ؛ 20‐ܙ؛ 6
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܠܟܠܹܗ ܝܼܣܪܵܝܹܠ؛ ܐܸܢ ܒܵܩܸܪܘܼܟܼ ܒܪܘܿܢܘܼܟܼ ܡ̣ܢ ܩܵܝܕܲܡܬܵܐ؛ ܘܐܵܡܸܪ ܐܸܠܘܼܟܼ؛ ܡܘܼܕܝܼ ܝ݇ܠܵܗ̇ ܣܵܗܕܘܼܬܵܐ ܘܢܵܡܘܿܣܵܐ ܘܕܝܼܘܵܢ ܕܩܲܡ ܦܵܩܸܕܠܵܘܟ̣ܘܿܢ ܡܵܪܝܵܐ ܐܲܠܵܗܵܐ؟܀ ܐ݇ܡܘܿܪ ܠܒܪܘܿܢܘܼܟܼ؛ ܕܪܹ̈ܓܵܘܵܬܹܐ ܝ݇ܘܲܚ ܗ݇ܘܵܐ ܕܦܸܪܥܘܿܢ ܒܡܸܨܪܹܝܢ. ܘܩܲܡ ܦܵܠܸܛܠܲܢ ܡܵܪܝܵܐ ܡ̣ܢ ܡܸܨܪܹܝܢ ܒܐܝܼܕܵܐ ܚܲܝܠܵܢܬܵܐ؛ ܘܥܒ̣ܸܕܠܹܗ ܡܵܪܝܵܐ ܢܝܼܫܲܢܩܹ̈ܐ ܘܥܵܓ̰ܝܼܒܘܼܝܵܬܹ̈ܐ ܓܘܼܪܹ̈ܐ ܘܒܝܼܫܵܬܹ̈ܐ ܒܡܸܨܪܹܝܢ؛ ܒܦܸܪܥܘܿܢ ܘܒܟܠܹܗ ܒܲܝܬܹܗ ܩܵܕ݇ܡ ܥܲܝ̈ܢܲܢ܀ ܘܐܸܠܲܢ ܦܘܼܠܸܛܠܹܗ ܡܵܪܝܵܐ ܡ̣ܢ ܬܵܡܵܐ؛ ܕܡܲܥܒ̣ܸܪܲܢ ܘܝܵܗ݇ܒ̣ܸܠܲܢ ܐܲܪܥܵܐ ܕܝ݇ܡܹܐܠܹܗ ܠܒܵܒܵܘ̈ܵܬܲܢ܀ ܘܩܲܡ ܦܵܩܸܕܠܲܢ ܡܵܪܝܵܐ ܠܸܥܒ̣ܵܕܵܐ ܐܲܢܹܐ ܟܠܲܝܗܝ ܢܵܡܘܿܣܹ̈ܐ؛ ܠܸܙܕܲܥܝܵܐ ܡ̣ܢ ܩܵܕ݇ܡ ܡܵܪܝܵܐ ܐܲܠܵܗܲܢ؛ ܩܵܐ ܕܥܵܒ̣ܸܕ ܛܵܒ̣ܬܵܐ ܐܸܠܲܢ ܟܠܲܝܗܝ ܝܵܘܡܵܢܹ̈ܐ؛ ܘܡܲܚܹܐܠܲܢ ܐܲܝܟܼ ܕܐܸܕܝܘܿܡ݇ ܝܵܘܡܵܐ܀ ܘܙܲܕܝܼܩܘܼܬܵܐ ܒܸܬ ܗܵܘܝܵܐ ܠܲܢ ܐܝܼܡܲܢ ܕܢܛܸܪܲܢ ܘܥܒ̣ܸܕܠܲܢ ܟܠܹܗ ܐܵܗܵܐ ܦܘܼܩܕܵܢܵܐ ܩܵܕ݇ܡ ܡܵܪܝܵܐ ܐܲܠܵܗܵܐ ܐܲܝܟܼ ܕܦܘܼܩܕܲܚܠܹܗ. ܘܐܝܼܡܲܢ ܕܩܲܡ ܡܲܥܒ̣ܸܪܘܼܟܼ ܡܵܪܝܵܐ ܐܲܠܵܗܘܼܟܼ ܠܐܲܪܥܵܐ ܕܥܵܒ̣ܪܸܬ̇ ܠܬܵܡܵܐ ܠܸܪܝܵܬܵܗ̇؛ ܘܒܸܬ ܡܬܵܠܸܩ ܛܵܝܸܦܹ̈ܐ ܓܘܼܪܹ̈ܐ ܡ̣ܢ ܩܵܕ݇ܡܘܼܟܼ؛ ܚܹܬܵܝܹ̈ܐ؛ ܘܓܲܪ̈ܓܘܿܣܵܝܹܐ؛ ܘܐܵܡܘܿܪ̈ܵܝܹܐ؛ ܘܟܢܲܥܢܵܝܹ̈ܐ؛ ܘܦܲܪܙܵܝܹ̈ܐ؛ ܘܚܵܘܵܝܹ̈ܐ؛ ܘܝܵܒ̣ܘܿܣܵܝܹ̈ܐ؛ ܫܲܒ̣ܥܵܐ ܛܵܝܸܦܹ̈ܐ ܒܘܼܫ ܓܘܼܪܹ̈ܐ ܘܒܘܼܫ ܚܲܝܠܵܢܹ̈ܐ ܡܸܢܘܼܟܼ܀ ܘܒܸܬ ܣܵܦܹܐܠܗ݇ܘܿܢ ܡܵܪܝܵܐ ܐܲܠܵܗܘܼܟܼ ܩܵܕ݇ܡܘܼܟܼ؛ ܘܒܸܬ ܡܲܝܝܼܬܘܿܢ ܠܗ݇ܘܿܢ؛ ܘܡܲܚܪܸܡܝܼܬܘܿܢ ܠܗ݇ܘܿܢ؛ ܘܠܵܐ ܡܲܩܸܡܝܼܬܘܿܢ ܥܲܡܲܝܗܝ ܩܵܘܠܵܐ؛ ܘܠܵܐ ܥܵܒ̣ܕܝܼܬܘܿܢ ܪ̈ܲܚܡܹܐ ܥܲܡܲܝܗܝ؛ ܘܠܵܐ ܥܵܒ̣ܕܝܼܬܘܿܢ ܚܸܬܢܘܼܬܵܐ ܥܲܡܲܝܗܝ؛ ܒܢܵܬܵܘ̈ܟ̣ܘܿܢ ܠܵܐ ܝܵܗ݇ܒ̣ܝܼܬܘܿܢ ܩܵܐ ܒܢܘܿܢܲܝ̈ܗܝ؛ ܘܒܢܵܬܲܝ̈ܗܝ ܠܵܐ ܫܵܩܠܝܼܬܘܿܢ ܩܵܐ ܒܢܘܿܢܵܘ̈ܟ̣ܘܿܢ؛ ܕܠܵܐ ܡܲܩܠܸܒܝܼ ܠܒܢܘܿܢܵܘ̈ܟ̣ܘܿܢ ܡܸܢܝܼ؛ ܘܦܵܠܚܝܼ ܠܐܲܠܵܗܹ̈ܐ ܐ݇ܚܹܪ̈݇ܢܹܐ؛ ܘܚܵܝܡܵܐ ܟܲܪܒܹܗ ܕܡܵܪܝܵܐ ܥܲܠܵܘܟ̣ܘܿܢ ܘܬܵܠܸܩܠܵܘܟ̣ܘܿܢ ܓ̰ܲܠܕܹܐ؛ ܐܸܠܵܐ ܗܵܕܟ̣ܵܐ ܥܒ̣ܘܿܕܘܿܢ ܐܸܠܲܝܗܝ ܡܲܕܒܚܲܝܗܝ ܥ݇ܩܘܿܪܘܿܢ؛ ܩܲܝܸܡܝܵܬܲܝ̈ܗܝ ܫܡܘܿܛܘܿܢ؛ ܘܚܸܫܠܵܬܲܝ̈ܗܝ ܦܪܘܿܡܘܿܢ؛ ܘܓܠܝܼܦܲܝ̈ܗܝ ܡܲܩܕܘܿܢ ܒܢܘܼܪܵܐ܀ ܣܵܒܵܒ ܐܲܢ݇ܬ̇ ܛܵܝܸܦܵܐ ܩܲܕܝܼܫܵܐ ܝ݇ܘܸܬ̇ ܠܡܵܪܝܵܐ ܐܲܠܵܗܘܼܟܼ. ܘܐܸܠܘܼܟܼ ܓܘܼܒܹܐܠܹܗ ܡܵܪܝܵܐ ܐܲܠܵܗܘܼܟܼ؛ ܕܗܵܘܸܬ̇ ܐܸܠܹܗ ܛܵܝܸܦܵܐ ܡܘܼܚܸܒܵܐ ܡ̣ܢ ܟܠܲܝܗܝ ܛܵܝܸܦܹ̈ܐ ܕܥܲܠ ܦܵܬܵܐ ܕܐܲܪܥܵܐ܀
ܚܲܒ̣ܪܹܗ
ܐܹܫܲܥܝܵܐ ܠܐ؛ 1‐ ܫܘܼܠܵܡܵܐ
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܘܵܝ ܠܐܵܢܝܼ ܕܒܸܨܠܵܝܵܐ ܝ݇ܢܵܐ ܠܡܸܨܪܹܝܢ ܠܸܦܝܵܫܵܐ ܗܘܼܝܸܪܹ̈ܐ؛ ܘܦܝܵܫܵܐ ܝ݇ܢܵܐ ܒܗܹܒ̣ܝܼ ܥܲܠ ܣܘܼܣܵܘܵܬܹ̈ܐ؛ ܘܥܲܠ ܟܵܠܸܣܟܹ̈ܐ؛ ܪܵܒܵܐ ܦܝܼܫܵܐ ܝ݇ܢܵܐ ܒܗܹܒ̣ܝܼ܀ ܘܥܲܠ ܪ̈ܵܟܵܒ̣ܹܐ ܪܵܒܵܐ ܙܲܚܡܹ̈ܐ؛ ܘܠܵܐ ܦܸܫܠܗ݇ܘܿܢ ܒܗܹܒ̣ܝܼ ܥܲܠ ܩܲܕܝܼܫܵܐ ܕܝܼܣܪܵܝܹܠ ܘܠܡܵܪܝܵܐ ܠܵܐ ܛܥܹܐܠܗ݇ܘܿܢ܀ ܘܒܚܸܟ̣ܡܬܹܗ [ܘܒܥܵܩܸܠܕܵܪܘܼܬܹܗ] ܡܘܼܬܹܐܠܹܗ ܒܝܼܫܬܵܐ؛ ܘܗܹܡܸܙܡܵܢ̈ܘܼܗܝ ܠܵܐ ܒܘܼܛܸܠܹܗ؛ ܘܩܸܡܠܹܗ ܥܲܠ ܒܲܝܬܵܐ ܕܒܝܼܫܹ̈ܐ؛ ܘܥܲܠ ܗܲܝܲܪܬܵܐ ܕܥܵܒ̣ܕܵܢܹ̈ܐ ܕܥܵܘܠܵܐ܀ ܘܡܸܨܪ̈ܵܝܹܐ ܐ݇ܢܵܫܹ̈ܐ ܝ݇ܢܵܐ؛ ܘܠܹܐ ܝ݇ܢܵܐ ܐܲܠܵܗܹ̈ܐ؛ ܘܣܘܼܣܵܘܵܬܲܝ̈ܗܝ ܕܒܸܣܪܵܐ ܝ݇ܢܵܐ ܘܠܹܐ ܝ݇ܢܵܐ ܕܪܘܼܚܵܐ. ܘܡܵܪܝܵܐ ܒܸܬ ܡܲܟܸܦ ܐܝܼܕܹܗ؛ ܘܒܸܬ ܬܲܪܩܸܠ ܗܲܝܸܪܵܢܵܐ؛ ܘܒܸܬ ܢܵܦܸܠ ܐܘܼܦ ܗ̇ܘ ܕܦܵܐܹܫ ܗܘܼܝܸܪܵܐ؛ ܘܟܠܲܝܗܝ ܡܐܘܼܕܵܠܹܐ ܒܸܬ ܬܵܝܡܝܼ܀ ܣܵܒܵܒ ܕܗܵܕܟ̣ܵܐ ܐ݇ܡܸܪܹܗ ܐܸܠܝܼ ܡܵܪܝܵܐ؛ ܐܲܝܟܼ ܕܓܲܪܓܸܡ ܐܲܪܝܵܐ ܘܓܘܼܪܝܵܐ ܕܐܲܪܝܵܐ ܥܲܠ ܕܗ̇ܘ ܡܸܢܕܝܼ ܕܦܵܪܸܛ؛ ܘܡܲܩܘܸܚܝܼ ܒܝܼܹܗ ܒܘܼܫܵܝܝܼ ܕܪ̈ܵܥܝܹܐ. ܘܡ̣ܢ ܩܵܠܲܝܗܝ ܠܹܐ ܙܵܕܸܥ ܘܡ̣ܢ ܒܘܼܫܵܝܘܼܬܲܝܗܝ ܠܹܐ ܫܵܥܸܫ. ܗܵܕܟ̣ܵܐ ܒܸܬ ܨܵܠܹܐ ܡܵܪܝܵܐ ܚܲܝܠܬܵܢܵܐ ܠܸܦܠܵܫܵܐ ܥܲܠ ܛܘܼܪܵܐ ܕܨܸܗܝܘܿܢ؛ ܘܥܲܠ ܪ̈ܘܼܡܝܵܬܵܗ̇ ܘܐܲܝܟܼ ܨܸܦܪܹ̈ܐ ܕܦܵܪܚܝܼ ܗܵܕܟ̣ܵܐ ܒܸܬ ܨܵܠܹܐ ܡܵܪܝܵܐ ܚܲܝܠܬܵܢܵܐ ܥܲܠ ܐܘܿܪܸܫܠܸܡ؛ ܘܒܸܬ ܨܵܠܹܐ ܘܦܵܨܹܐ؛ ܘܚܵܠܸܨ ܘܗܲܝܸܪ܀ ܬܲܘܸܒܘܿܢ ܒܢܲܝ̈ ܝܼܣܪܵܝܹܠ ܕܥܒ̣ܸܕܠܵܘܟ̣ܘܿܢ ܡܵܪܘܿܕܘܼܬܵܐ܀ ܣܵܒܵܒ ܒܗ̇ܘ ܝܵܘܡܵܐ؛ ܒܸܬ ܡܲܣܠܝܼ ܐ݇ܢܵܫܹ̈ܐ ܨܵܢܲܡܹ̈ܐ ܕܕܲܗܒ̣ܵܐ ܘܕܣܹܐܡܵܐ ܕܬܘܼܪܸܨܠܗ݇ܘܿܢ ܐܝܼܕܵܬ̈ܵܘܟ̣ܘܿܢ ܩܵܐ ܚܛܝܼܬܵܐ܀ ܘܒܸܬ ܢܵܦܸܠ ܐܵܬܘܿܪܵܝܵܐ ܒܣܲܝܦܵܐ. ܠܵܐ ܣܲܝܦܵܐ ܕܐ݇ܢܵܫܹ̈ܐ ܘܠܵܐ ܣܲܝܦܵܐ ܕܓܲܢ݇ܒܵܪܹ̈ܐ ܒܸܬ ܐܵܟ̣ܸܠܹܗ؛ ܐܸܠܵܐ ܒܸܬ ܥܵܪܸܩ ܡ̣ܢ ܩܵܕ݇ܡ ܣܲܝܦܵܐ؛ ܘܓ̰ܘܲܢܩ̈ܘܼܗܝ ܠܢܝܼܫܲܢܩܵܐ ܕܓܹܐܪܹ̈ܐ ܒܸܬ ܗܵܘܝܼ܀ ܘܓܵܘ ܩܵܝܵܐ ܕܡܲܥܡܪܹܗ ܒܸܬ ܫܵܪܹܐ؛ ܘܒܸܬ ܦܵܝܫܝܼ ܫܡܝܼܛܹ̈ܐ ܓܘܼܪ̈ܵܢܘܼܗܝ ܡ̣ܢ ܢܝܼܫܲܢܩܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ ܕܢܘܼܪܹܗ ܒܨܸܗܝܘܿܢ؛ ܘܬܲܢܘܼܪܹܗ ܒܐܘܿܪܸܫܠܸܡ܀
♱♱♱♱♱♱♱♱♱
ܚܕܒܫܒܐ ܐ ܕܐܠܝܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܬܸܣܵܠܘܿܢܝܼܩܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܦܵܘܠܘܿܣ ܘܣܸܠܘܵܢܘܿܣ ܘܛܝܼܡܵܬܹܐܘܿܣ ܠܥܸܕܬܵܐ ܕܬܸܣܵܠܘܿܢܝܼܩܵܝܹ̈ܐ ܕܒܐܲܠܵܗܵܐ ܒܵܒܲܢ ܘܡܵܪܲܢ ܝܼܫܘܿܥ ܡܫܝܼܚܵܐ* ܫܵܦܵܩܲܬ ܥܲܡܵܘܟܼܘܿܢ ܘܫܠܵܡܵܐ ܡ̣ܢ ܐܲܠܵܗܵܐ ܒܵܒܲܢ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ* ܕܵܝܢܵܢܹ̈ܐ ܝ݇ܘܲܚ ܠܡܵܘܕܘܿܝܸܐ ܠܐܲܠܵܗܵܐ ܒܟܠ ܥܕܵܢܵܐ ܒܘܼܬ ܕܝܼܵܘܟܼܘܿܢ ܐܵܚܘܿܢܘܵܬܝܼ̈ ܐܲܝܟܼ ܕܘܵܓ̰ܸܒ ܝܼܠܵܗ̇ ܕܒܘܼܫ ܙܵܘܕܵܐ ܓܲܪܘܸܣܵܐ ܗܲܝܡܵܢܘܼܬܵܘܟܼܘܿܢ ܘܙܵܝܸܕ ܚܘܼܒܵܐ ܕܟܠܵܘܟܼܘܿܢ ܚܲܕ݇ ܠܟܸܣ ܕܗ̇ܘ ܐ݇ܚܹܪ݇ܢܵܐ* ܐܲܝܟܼ ܕܐܘܼܦ ܐܲܚܢܲܢ ܒܝܼܵܘܟܼܘܿܢ ܥܵܒܼܕܲܚ ܫܘܼܒܼܗܵܪܵܐ ܒܥܹܕܬܵܐ ܕܐܲܠܵܗܵܐ ܒܘܼܬ ܗܲܝܡܵܢܘܼܬܵܘܟܼܘܿܢ ܘܒܘܼܬ ܚܡܲܠܬܵܘܟܼܘܿܢ ܕܒܟܠܵܗ̇ ܟܵܡܲܪܬܵܘܟܼܘܿܢ ܘܝܲܠܨ̈ܘܼܘܵܘܟܼܘܿܢ ܕܩܵܒܘܿܠܹܐ ܝ݇ܬܘܿܢ* ܩܵܐ ܡܲܚܙܵܝܬܵܐ ܕܕܝܼܘܵܢ ܗܲܩ ܕܐܲܠܵܗܵܐ ܕܚܵܫܚܝܼܬܘܿܢ ܠܡܲܠܟܘܼܬܹܗ ܗ̇ܝ ܕܡ̣ܢ ܓܹܒܵܗ̇ ܩܵܒܘܿܠܹܐ ܝ݇ܬܘܿܢ ܚܲܫܵܐ* ܘܐܸܢ ܗܲܩ ܝܼܠܵܗ̇ ܩܵܕ݇ܡ ܐܲܠܵܗܵܐ ܕܦܲܪܸܥ ܝܲܠܨܘܼܝ ܠܡܲܠܝܸܨܵܢܵܘ̈ܟܼܘܿܢ* ܘܐܲܚܬܘܿܢ ܕܦܝܼܫܹܐ ܝ݇ܬܘܿܢ ܡܘܼܠܝܸܨܹܐ ܒܸܬ ܡܲܚܹܐ ܥܲܡܲܢ ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܡ̣ܢ ܫܡܲܝܵܐ؛ ܥܲܡ ܚܲܝܠܵܐ ܕܡܲܠܲܐܟܼܘܼܗ̈ܝ* ܐܝܼܡܲܢ ܕܥܵܒܼܸܕ ܫܩܲܠܬܵܐ ܕܬܘܼܥܠܵܐ ܒܠܵܗܵܐ ܕܢܘܼܪܵܐ ܡ̣ܢ ܕܐܵܢܝܼ ܕܠܵܐ ܝ݇ܕܝܼܥܠܗ݇ܘܿܢ ܠܐܲܠܵܗܵܐ؛ ܘܡ̣ܢ ܕܐܵܢܝܼ ܕܠܵܐ ܡܘܼܨܝܸܬܠܗ݇ܘܿܢ ܠܡܲܫܚܲܕܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ* ܕܐܵܢܝܼ ܒܕܝܼܘܵܢ ܦܵܝܫܝܼ ܦܸܪܥܝܸܐ ܬܠܵܩܵܐ ܐܵܒܵܕܝܼܢܵܝܵܐ ܡ̣ܢ ܦܲܪܨܘܿܦܸܗ ܕܡܵܪܲܢ ܘܡ̣ܢ ܚܸܩܪܵܐ ܕܚܲܝܠܹܗ* ܕܐܝܼܡܲܢ ܕܐܵܬܹܐ ܕܦܵܐܸܫ ܚܩܝܼܪܵܐ ܒܩܲܕܝܼܫܘܼܗ̈ܝ ܘܡܲܚܙܸܐ ܥܵܓ̰ܝܼܒܘܼܝܵܬܘܼܗ̈ܝ ܒܐܝܼܕܵܐ ܕܡܗܘܼܡܢ̈ܘܼܗܝ؛ ܕܦܵܝܫܵܐ ܗܘܼܡܸܢܬܵܐ ܣܵܗܕܘܼܬܲܢ ܒܘܼܬ ܕܝܼܵܘܟܼܘܿܢ ܒܗ̇ܘ ܝܵܘܡܵܐ* ܒܘܼܬ ܕܐܵܗܵܐ ܒܟܠ ܥܕܵܢܵܐ ܨܵܠܘܿܝܸܐ ܝ݇ܘܲܚ ܨܠܘܿܬܵܐ ܒܘܼܬ ܕܝܼܵܘܟܼܘܿܢ ܕܡܲܚܫܸܚܠܵܘܟܼܘܿܢ ܐܲܠܵܗܵܐ ܠܩܪܵܝܬܵܘܟܼܘܿܢ ܘܡܵܠܹܐ ܠܵܘܟܼܘܿܢ ܟܠܹܗ ܪܸܙܵܝܵܐ ܕܛܵܒܼܵܬܹ̈ܐ ܘܦܘܼܠܚܵܢܹ̈ܐ ܕܗܲܝܡܵܢܘܼܬܵܐ ܒܚܲܝܠܵܐ* ܕܦܵܐܸܫ ܚܩܝܼܪܵܐ ܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܘܥܲܠܵܘܟܼܘܿܢ ܫܵܦܵܩܲܬ ܕܐܲܠܵܗܲܢ ܘܡܵܪܲܢ ܝܼܫܘܿܥ ܡܫܝܼܚܵܐ*
♱♱♱♱♱♱♱♱♱
ܚܕܒܫܒܐ ܩܕܡܝܐ ܕܐܠܝܐ
ܠܘܩܐ ܝܚ: 35 ‐ ܝܛ: 11
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܼܩܐ
♰ ܟܲܕ ܩܘܼܪܒܸܢܹܗ ܝܑܼܫܘܿܥ ܠܐܝܼܪܝܼܚܘܿ. ܚܲܕ݇ ܣܲܡܝܵܐ ܝܬܝܼܒܼܵܐ ܗ݇ܘܵܐ ܥܲܠ ܡܲܪܙܵܐ ܕܐܘܼܪܚܵܐ ܘܒܸܓܘܵܝܵܐ. ܘܫܡܸܥܠܹܗ ܩܵܠܵܐ ܕܟܸܢܫܵܐ ܕܒܸܥܒܼܵܪܵܐ. ܘܒܵܩܸܪ ܗ݇ܘܵܐ ܕܡܵܢܝܼ ܝܠܹܗ ܐܵܗܵܐ؟ ܐܲܡܪܝܼ ܐܸܠܹܗ: ܝܑܼܫܘܿܥ ܢܲܨܪܵܝܵܐ ܒܸܥܒܼܵܪܵܐ ܝܠܹܗ. ܘܡܘܼܩܘܸܚܠܹܗ ܘܐ݇ܡܸܪܹܗ: ܝܑܼܫܘܿܥ ܒܪܘܿܢܹܗ ܕܕܵܘܝܼܕ ܪܲܚܸܡ ܥܲܠܝܼ. ܘܐܵܢܝܼ ܕܒܹܐܙܵܠܵܐ ܗ݇ܘܵܘ ܩܵܕ݇ܡܵܐ ܩܵܕ݇ܡܹܗ ܕܝܼܫܘܿܥ ܢܲܓ̰ܘܝܼ ܗ݇ܘܵܘ ܒܝܼܹܗ ܕܫܵܬܸܩ. ܐܝܼܢܵܐ ܗ̇ܘ ܒܘܼܫ ܡܲܩܘܸܚ ܗ݇ܘܵܐ: ܒܪܘܿܢܹܗ ܕܕܵܘܝܼܕ ܪܲܚܸܡ ܥܲܠܝܼ. ܘܟܠܹܐܠܹܗ ܝܑܼܫܘܿܥ ܘܦܩܝܼܕܠܹܗ ܕܡܲܝܬܝܼܠܹܗ ܠܘܵܬܹܗ. ܘܟܲܕ ܩܘܼܪܒܸܢܹܗ، ܩܲܡ ܒܵܩܸܪܹܗ ܘܐ݇ܡܸܪܹܗ ܐܸܠܹܗ: ܡܘܿܕܝܼ ܒܣܵܡܘܼܟܼ ܝܼܠܵܗ̇ ܕܥܲܒܼܕܸܢ ܩܵܐ ܕܝܼܠ݇ܘܿܟܼ؟ ܐܝܼܢܵܐ ܗ̇ܘ ܐ݇ܡܸܪܹܗ: ܡܵܪܝܼ ܕܚܵܙܸܢ. ܘܝܼܫܘܿܥ ܐ݇ܡܸܪܹܗ ܐܸܠܹܗ: ܚܙܝܼ. ܗܲܝܡܵܢܘܼܬܘܼܟܼ ܩܲܡ ܡܲܚܝܼܵܐ ܠܘܼܟܼ. ܘܗܲܪ ܒܗ̇ܝ ܣܵܥܵܬ ܚܙܹܐܠܹܗ: ܘܐܵܬܹܐ ܗ݇ܘܵܐ ܒܵܬ݇ܪܹܗ ܘܡܫܵܒܸܚ ܗ݇ܘܵܐ ܠܐܲܠܵܗܵܐ. ܘܟܠܹܗ ܥܲܡܵܐ ܕܚܙܹܐܠܹܗ. ܝܲܗ݇ܒܼܸܠ ܗ݇ܘܵܐ ܫܘܼܒܼܚܵܐ ܠܐܲܠܵܗܵܐ. ܘܟܲܕ ܥܒܼܸܪܹܗ ܝܑܼܫܘܿܥ ܡ̣ܢ ܓܵܘ ܐܝܼܪܝܼܚܘܿ. ܚܲܕ݇ ܓܲܒܼܪܵܐ ܕܫܸܡܹܗ ܝܼܗَܘܵܐ ܙܲܟܲܝ: ܥܲܬܝܼܪܵܐ ܗ݇ܘܵܐ ܘܪܲܒ ܡܲܟܼܣܹ̈ܐ. ܘܒܵܥܹܐ ܗ݇ܘܵܐ ܕܚܵܙܹܐ ܠܝܼܫܘܿܥ ܕܡܵܢܝܼ ܝܠܹܗ. ܘܠܹܐ ܡܵܨܹܐ ܗ݇ܘܵܐ ܡ̣ܢ ܟܸܢܫܵܐ. ܣܵܒܵܒ ܕܒܩܘܼܡܬܹܗ ܟܸܪܝܵܐ ܗ݇ܘܵܐ ܙܲܟܲܝ. ܘܪܚܸܛܠܹܗ ܘܩܕܝܼܡܠܹܗ ܠܝܼܫܘܿܥ. ܘܣܸܠ݇ܩܠܹܗ ܠܬܹܐܢܵܐ ܦܲܟܝܼܗܬܵܐ ܕܚܵܙܹܐܠܹܗ، ܣܵܒܵܒ ܕܡ̣ܢ ܬܵܡܵܐ ܗܕܝܼܪܵܐ ܗ݇ܘܵܐ ܕܥܵܒܼܸܪ. ܘܟܲܕ ܐ݇ܬܹܐܠܹܗ ܝܑܼܫܘܿܥ ܠܗ̇ܝ ܕܘܼܟܬܵܐ، ܚܙܹܐܠܹܗ ܐܸܠܹܗ ܘܐ݇ܡܸܪܹܗ: ܡܲܠܝܸܙ ܨܠܝܼ ܙܲܟܲܝ، ܣܵܒܵܒ ܐܸܕܝܘܿܡ ܝܵܘܡܵܐ ܘܵܠܹܐ ܕܒܲܝܬܘܼܟܼ ܗܵܘܸܢ. ܘܡܘܼܠܝܸܙܠܹܗ ܨܠܹܐܠܹܗ، ܘܩܲܡ ܩܵܒܸܠܹܗ ܟܲܕ ܒܸܚܕܵܝܵܐ. ܐܝܼܢܵܐ ܟܲܕ ܚܙܹܐܠܗ݇ܘܿܢ ܟܠܲܝܗܝ. ܛܲܪܛܸܡܝܼ ܗ݇ܘܵܘ ܘܐܲܡܪܝܼ: ܕܠܘܵܬ ܐ݇ܢܵܫܵܐ ܚܲܛܵܝܵܐ ܥܒܼܸܪܹܗ ܫܪܹܐ ܠܹܗ. ܐܝܼܢܵܐ ܩܸܡܠܹܗ ܙܲܟܲܝ ܘܐ݇ܡܸܪܹܗ ܠܝܼܫܘܿܥ: ܡܵܪܝܼ ܗܵܐ ܦܲܠܓܹܗ ܕܡܸܢܕܝܼܝܼ ܒܝܼܵܗ݇ܒܼܵܐ ܝܘܸܢ ܠܡܸܣܟܹܢܹ̈ܐ. ܘܠܟܠ ܐ݇ܢܵܫܵܐ ܡܸܢܕܝܼ ܕܙܠܸܡܠܝܼ، ܚܲܕ݇ ܒܐܲܪܒܥܵܐ ܒܸܬ ܦܲܪܥܸܢ. ܐܵܡܸܪ ܐܸܠܹܗ ܝܑܼܫܘܿܥ: ܐܸܕܝܘܿܡ ܝܵܘܡܵܐ ܗ݇ܘܹܐܠܗ݇ܘܿܢ ܚܲܝܹ̈ܐ ܠܐܵܗܵܐ ܒܲܝܬܵܐ. ܣܵܒܵܒ ܕܐܘܿܦ ܐܵܗܵܐ ܒܪܘܿܢܹܗ ܕܐܲܒܼܪܵܗܲܡ ܝܼܠܹܗ. ܣܵܒܵܒ ܐ݇ܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܕܛܵܥܹܐ ܘܡܲܚܹܐ ܗ̇ܘ ܡܸܢܕܝܼ ܕܛܠܝܼܩܵܐ ܗَܘܵܐ.
♱♱♱♱♱♱♱♱♱