ܚܲܕܼܒ̇ܫܲܒܵܐ ܩܲܕܼܡܵܝܵܐ ܕܐܹܠܝܼܵܐ
ܡܲܪܡܝܼܬܼܵܐ ܕܐ݇ܪ̈ܵܙܹܐ. ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ.
ܕܩܲܢܟܹ̇ܐ. ܒܠܵܟܼܘܼ ܩܵܪܹܝ̇ܢܲܢ. ܒܲܪܸܟܼܘ ܠܡܵܪܝܵܐ ܡܲܠܲܐܟ̣ܵܘ̈ܗܝ؛ ܘܲܢܫܲܒ̇ܚܘܼܢ ܠܲܫܡܵܟܼ ܠܥܵܠܡܝܼܢ. ܟܸܢܫܹ̈ܐ ܕܡܲܠܲܐܟܹ̈ܐ ܡܫܲܒ̇ܚܝܼܢ ܒܐܵܘܝܘܼܬܼܵܐ ܠܲܟܼܝܵܢܵܐ ܣܓ̣ܝܼܕܼܵܐ؛ ܬܢܝܼ؛ ܘܫܲܒܲܚ ܒܵܗ̇.
ܩܸܪܝܵܢܵܐ. ܬܸܢܝܵܢ ܢܵܡܘܿܣܵܐ ܘ؛ 20‐ܙ؛ 6 ܚܲܒ̣ܪܹܗ؛ ܐܹܫܲܥܝܵܐ ܠܐ؛ 1‐ܫܘܼܠܵܡܵܐ
ܫܘܼܪܵܝܵܐ. ܐܸܠܘܼܠܵܐ ܡܘܼܫܹܐ ܓܲܒܼܝܹܗ܀ ܕܩܵܡ̣ ܒܬܼܘܼܪ̱ܥܬܼܵܐ ܩܕܼܵܡܵܘܗܝ܀ ܘܐܲܗ̣ܦܸܟܼ ܪܘܼܓܼܙܹܗ ܕܠܵܐ ܢܚܲܒܸ̇ܠ ܐܸܢܘܿܢ.
ܫܠܝܼܚܵܐ. ܒ ܬܸܣܵܠܘܿܢܝܼܩܵܝܹ̈ܐ ܐ؛ 1‐ܫܘܼܠܵܡܵܐ
ܙܘܼܡܵܪܵܐ. ܒܪܵܥܝܹܗ. ܙܡܲܪܘ ܠܡܵܪܝܵܐ ܕܲܪܟܼܝܼܒܼ ܒܲܫܡܲܝ̈ ܫܡܲܝܵܐ. ܡ̣ܢ ܡܲܕܢ̱ܚܵܐ ܝܲܗ̣݇ܒܼ ܩܵܠܹܗ ܩܵܠܵܐ ܥܲܫܝܼܢܵܐ. ܒ܀ ܕܥܘܼܫܢܹܗ ܒܲܫܡܲܝ̈ ܫܡܲܝܵܐ. ܕܚܝܼܠܲܬ̇ ܐܲܠܵܗܵܐ ܡ̣ܢ ܡܲܩܕ̇ܫܵܟܼ. ܐܲܠܵܗܹܗ ܕܝܼܣܪܵܝܹܠ. ܗܸܘ ܢܸܬܸ̇ܠ ܚܲܝܠܵܐ ܘܥܘܼܫܢܵܐ ܠܥܲܡܹܗ ܒܪܝܼܟܼܘܼ ܐܲܠܵܗܵܐ. ܕ܀
ܐܹܘܲܢܓܲܠܝܼܘܿܢ. ܠܘܼܩܵܐ ܝܚ؛ 35‐ܝܛ؛11
ܕܐܹܘܲܢܓܲܠܝܼܘܿܢ. ܒܩܵܠܵܐ ܪܲܒܵܐ. ܐܘܼܪ̈ܚܵܬܼܵܟܼ ܡܵܪܝܵܐ ܚܵܘܵܢܝ؛ ܪܸܓܿܬܼܵܐ ܕܠܸܒܹ̇ܗ ܝܲܗ̣݇ܒܼܬ̇ ܠܹܗ؛ ܒܵܟܼ ܣܲܒܲܪܘ ܘܠܵܐ ܒܗܸܬ̣ܘ. ܕܨܘܼܪܬܵܐ. ܛܝܼܡܲܝ ܒܲܪ ܛܝܼܡܲܝ ܣܲܡܝܵܐ. ܥܲܠ ܝܲܕܼ ܐܘܼܪܚܵܐ ܟܲܕܼ ܝܵܬܹ̇ܒܼ ܗ݇ܘ̣ܵܐ ܗܵܘ̇ ܣܲܡܝܵܐ. ܘܚܵܕܲܪ ܠܲܚܡܵܐ ܠܝܵܘܡܵܐ ܒܙܸܕܼܩܬܼܵܐ. ܫܡܲܥ̣ ܗ݇ܘ̣ܵܐ ܘܐܲܪܓܸ̇ܫ̣. ܕܲܩ̣ܪܸܒܼܬ̇ ܕܬܸܥܒܲܪ ܨܹܐܕܼܵܘܗܝ ܡܵܪܹܟ̇ܠ. ܘܩܵܡ̣ ܗ݇ܘ̣ܵܐ ܕܲܢܦܝܼܣ ܠܵܟܼ. ܕܐܲܢ݇ܬ̇ܘܼ ܝܵܗܹ̇ܒ̣ ܟܠ ܥܘܼܕܼܪ̈ܵܢܝܼܢ. ܘܲܩܪܸܒ̣ܬ̇ ܒܲܡܪܲܚܡܵܢܘܼܬܼܵܟܼ ܠܥܲܝܢܵܘ̈ܗܝ ܕܡܲܠ̈ܝܵܢ ܗ݇ܘܲܝ̈ ܚܸܫܟܵܐ. ܘܡ̣ܢ ܫܹܠܝ ܐܸܬܼܦܬܲܚ ܥܲܝܢܵܘ̈ܗܝ. ܘܐܲܙܥܸܩ̣ ܘܐܸܡܲܪ ܟܲܕܼ ܡܵܘܕܸܿܐ. ܫܘܼܒ̣ܚܵܐ ܠܵܟܼ ܕܲܦܪܲܩ̣ܬܵܢܝ ܡ̣ܢ ܚܸܫܘܿܟܼܵܐ ܘܲܚܙܹ̇ܝܬܼ ܢܘܼܗܪܵܐ. ܫܘܼܒ̣ܚܵܐ ܠܵܟܼ ܕܫܵܘܙܸܒ̣ܬܵܢܝ ܡ̣ܢ ܬܘܼܩ̈ܠܵܬܼܵܐ ܘܡ̣ܢ ܝܲܕܼ ܫܲܒ̣ܛܵܐ. ܫܘܼܒ̣ܚܵܐ ܠܵܟܼ ܡܠܸܐ ܬܸܕܼܡ̱ܪ̈ܵܬܼܵܐ. ܐܲܢ݇ܬ̇ ܪܵܚܹ̇ܡ ܐ݇ܢܵܫܵܐ؛ ܬܢܝܼ؛ ܫܲܒܲܚ. ܒܫܘܼܪܵܝ ܡܲܒ̇ܘܼܥ ܚܲܝܹ̈ܐ. ܡܫܝܼܚܵܐ ܕܪܲܡܪܸܡ ܠܼܲܟ̣ܝܵܢܲܢ. ܘܲܥ̣ܩܲܪ ܡܸܢܲܢ ܠܲܚܛܝܼܬܼܵܐ ܘܡܵܘܬܵܐ ܡܚܲܒ̇ܠܵܢܵܐ. ܘܲܩ̣ܪܵܐ ܠܚܲܛܵܝܹ̈ܐ ܕܢܸܣܒ̣ܘܼܢ ܡܸܢܹܗ ܥܘܼܕܼܪܵܢܵܐ ܘܦܘܼܪܩܵܢܵܐ. ܫ̣ܡܲܥ ܕܹܝܢ ܡܵܟܼܣܵܐ ܘܐܸܣܬܲܪܗܲܒܼ. ܒܕܲܐܪܓܸ̇ܫ̣ ܗ݇ܘ̣ܵܐ ܒܚܘܼܒܵܟܼ ܡܬܼܘܿܡܵܝܵܐ. ܘܨܵܒܹܐ ܗ݇ܘ̣ܵܐ ܕܢܸܚܙܹܝܟܼ ܡܵܪܲܢ ܘܒܼܵܟܼ ܡܸܬܼܓܵܘܲܣ. ܘܠܵܐ ܡܸܫܟܲܚ ܗ݇ܘ̣ܵܐ ܕܲܒ̣ܩܵܘܡܬܹܗ ܙܥܘܿܪ ܗ݇ܘ̣ܵܐ ܙܲܟܲܝ. ܠܬܹܬܵܐ ܣ̣ܠܸܩ ܗ݇ܘ̣ܵܐ ܕܬܲܡܵܢ ܢܸܚܙܹܝܟܼ ܡܲܒ̇ܘܼܥ ܚܲܝܹ̈ܐ. ܘܐܲܢ݇ܬ̇ ܝܵܕܼܘܿܥܵܐ ܕܟܲܣ̈ܝܵܬܲܢ ܘܟܼܠܗܘܿܢ ܚܲܫܲܝ̈ܢ. ܠܵܐ ܐܲܡ̣ܐܸܢ ܚܘܼܒܵܟܼ ܕܬܲܦܢܹܝܘܗܝ ܠܘܵܬܼܵܟܼ. ܘܲܫ̣ܒܲܩܬ̇ ܚܵܘ̈ܒܵܘܗܝ ܒܲܚܢܵܢܵܟܼ ܘܣܘܿܓܼܐܵܐ ܕܥܵܘ̣ܠܹܗ. ܘܫܲܪܝܼ ܦܵܪܲܥ̇ ܚܵܘܒܵܬܹ̈ܗ ܒܝܲܕܼ ܙܸܕܼܩ̈ܵܬܼܵܐ. ܘܲܡܫܲܒܲܚ ܗ݇ܘ̣ܵܐ ܩܕܼܵܡ ܟܠܢܵܫ ܘܡܵܘܕܸܿܐ ܠܡܵܪܘܼܬܼܵܟܼ.
ܕܐ݇ܪ̈ܵܙܹܐ. ܪܹܫܩܵܠܵܐ. ܫܲܒܲܚܘ ܠܡܵܪܝܵܐ ܒܩܘܼܕܼܫܹܗ؛ ܐܲܪܝܼܡܘ ܐܝܼܕܲܝܟܿܘܿܢ ܠܩܘܼܕܼܫܵܐ ܘܒܲܪܸܟܼܘ ܠܡܵܪܝܵܐ. ܒܢܲܝ̈ܟ ܐܲܝܟܼ ܢܸܨܒ̇ܬܼܵܐ ܕܙܲܝܬܵܐ ܟܪܝܼܟܼܝܼܢ ܠܦܵܬܼܘܿܪܵܟܼ. ܕܨܘܼܪܬܵܐ. ܟܠ ܡܸܕܸ̇ܡ ܡܛܲܝܲܒܼ ܬܵܘ ܠܡܸܫܬ̇ܘܼܬܼܵܐ. ܐܸܬܼܒܲܣܲܡܘ ܥܲܡܡܹ̈ܐ ܥܲܡ ܥܲܡܹܗ. ܗܵܐ ܦܵܬܼܘܿܪܵܐ ܡܲܬܼܩܲܢ ܒܲܩܕܼܘܿܫ ܩܘܼܕܼܫܹ̈ܐ. ܘܟܼܵܗܢܹ̈ܐ ܫܒ̣ܝܼܚܹ̈ܐ ܟܪܝܼܟܼܝܼܢ ܠܹܗ ܒܛܘܼܦ̮ܣܵܐ ܕܲܣܪ̈ܵܦܹܐ. ܘܩܵܪܹܐ ܟܵܗܢܵܐ ܠܪܘܼܚܵܐ ܘܢܵܚ̇ܬܵܐ ܘܫܵܪܝܵܐ. ܒܠܲܚܡܵܐ ܘܡܸܬܼܡܲܙܓ̣ܵܐ ܒܟܼܵܣܵܐ ܘܗܵܘܹ̇ܐ ܣܲܡ ܚܲܝܹ̈ܐ. ܘܩܵܪܒ̇ܝܼܢ ܘܢܵܣܒ̇ܝܼܢ ܡܵܝܘܿܬܹ̈ܐ. ܚܘܼܣܵܝܵܐ ܕܩܵܛܹܠ ܠܲܚܛܝܼܬܼܵܐ. ܘܩܵܥܹܝ̇ܢ ܠܹܗ ܩܲܕ̇ܝܼܫ ܩܲܕ̇ܝܼܫ ܩܲܕ̇ܝܫܼ ܡܲܚܝܵܢܲܢ܀ ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ. ܥܘܼܢܵܝܵܐ. ܡ̣ܢ ܦܵܬܼܘܿܪܵܐ ܪܘܼܚܵܢܵܐ ܢܸܩܪܘܿܒܼ ܘܢܸܣܲܒ̣. ܦܲܓ̣ܪܹܗ ܘܲܕܼܡܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܵܘܒܹ̈ܐ. ܐ݇ܪܵܙܵܐ ܗ݇ܘ̣ ܪܲܒܵܐ ܕܲܡܠܸܐ ܒܘܼܣܵܡܹ̈ܐ. ܘܪܲܗܒ̣ܘܿܢܵܐ ܗ݇ܘ̣ ܕܚܲܝܹ̈ܐ ܕܠܵܐ ܫܘܼܠܵܡ. ܘܐܲܝܢܵܐ ܕܫܵܩܹ̇ܠ ܠܹܗ ܒܚܘܼܒܵܐ ܡܸܬܼܚܲܣܸܐ ܒܹܗ. ܘܗܵܘܹ̇ܐ ܝܵܪܬܵܐ ܒܡܲܠܟ̇ܘܼܬܼܵܐ ܐܲܝܟܼ ܡܸܠܲܬܼ ܡܵܪܲܢ. ܗܲܠܸܠܘܼܝܲܗ.
ܒܵܬܹ̈ܐ؛ ܐܘܿ ܚܲܛܵܝܹ̈ܐ ܐܸܫܬܵܘܬܲܦܘ ܒܗܵܢܵܐ ܐ݇ܪܵܙܵܐ. ܕܡܸܢܹܗ ܬܸܩܢܘܿܢ ܚܲܝܲܝ̈ܟܿܘܿܢ ܘܚܘܼܣܵܝ ܚܵܘܒܲܝ̈ܟܿܘܿܢ. ܐ݇ܪܵܙܵܐ ܗ݇ܘ̣ ܪܲܒܵܐ ܕܚܲܝܹ̈ܐ ܛܡܝܼܪܝܼܢ ܒܹܗ. ܘܟܼܠ ܛܵܒ̣ܵܬܼ̈ܵܐ ܝܵܗܹ̇ܒܼ ܠܲܕܼܫܵܘܹܝܢ ܠܹܗ. ܒܕܲܟܼܝܘܼܬܼ ܠܸܒܵܐ ܢܸܩܪܘܿܒܼ ܠܹܗ ܕܢܸܬܼܚܲܣܸܐ ܒܹܗ. ܘܒܹܗ ܢܸܬܼܡܲܪܩܘܼܢ ܚܘܼܫܵܒܲܝ̈ܢ ܘܡܘܼܡܲܝ̈ܢ ܢܸܬܼܐܲܣܘܿܢ. ܗܲܠܸܠܘܼܝܲܗ.
♱♱♱♱♱♱♱♱♱