|
ܚܲܕܼܒܫܲܒܵܐ ܕܒ̣ܵܬܲܪ ܣܘܼܠܵܩܵܐ
ܐܹܫܲܥܝܵܐ ܘ؛ 1‐ܫܘܼܠܵܡܵܐ ܬܸܒ̣ܘ ܘܲܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܒܫܹܢ݇ܬܵܐ ܕܡܝܼܬܠܹܗ ܥܘܼܙܝܼܵܐ ܡܲܠܟܵܐ؛ ܚܙܹܐܠܝܼ ܠܡܵܪܝܵܐ ܝ݇ܬܝܼܒ̣ܵܐ ܥܲܠ ܚܲܕ݇ ܟܘܼܪܣܝܼ ܪܵܡܵܐ؛ ܘܫܸܩܠܵܐ ܕܫܸܦܘܼܠܵܠܘܼܗ̈ܝ ܡܸܠܝܵܐ ܗܲܝܟܠܹܗ܀ ܘܣܪ̈ܵܦܹܐ ܟܸܠܝܹܐ ܥܘܼܠܘܼܠ ܡܸܢܹܗ؛ ܟܠ ܚܲܕ݇ ܡܸܢܲܝܗܝ ܡܵܪܹܐ ܐܸܫܬܵܐ ܓܘܼܠܦܵܢܹ̈ܐ؛ ܒܬܪܹܝ ܡܟܵܣܘܿܝܹܐ ܦܲܪܨܘܿܦܹܗ ܘܒܬܪܹܝ ܡܟܵܣܘܿܝܹܐ ܐܲܩܠܹ̈ܗ؛ ܘܒܬܪܹܝ ܒܸܦܪܵܚܵܐ؛ ܘܒܸܩܪܵܝܵܐ ܐܵܗܵܐ ܠܐܵܗܵܐ؛ ܘܒܹܐܡܵܪܵܐ؛ ܩܲܕܝܼܫ؛ ܩܲܕܝܼܫ؛ ܩܲܕܝܼܫ؛ ܡܵܪܝܵܐ ܚܲܝܠܬܵܢܵܐ؛ ܕܡܠܝܼܬܵܐ ܝ݇ܠܵܗ̇ ܐܲܪܥܵܐ ܬܸܫܒܘܿܚܝܵܬܹ̈ܗ؛ ܪܓܝܼܕܠܗ݇ܘܿܢ ܐܸܣܩܘܿܦܝܵܬܹ̈ܐ ܕܬܲܪ̈ܥܵܢܹܐ ܡ̣ܢ ܩܵܠܵܐ ܕܒܸܩܪܵܝܵܐ؛ ܘܒܲܝܬܵܐ ܦܸܫܠܹܗ ܡܸܠܝܵܐ ܬܸܢܢܵܐ܀ ܘܐ݇ܡܪܝܼ؛ ܘܵܝ ܐܸܠܝܼ ܕܬܠܝܼܩܵܐ ܝ݇ܘܸܢ. ܣܵܒܵܒ ܚܲܕ݇ ܛܲܡܵܐܐ ܕܣܸܦܘܵܬܹ̈ܐ ܝ݇ܘܸܢ؛ ܘܓܵܘ ܛܵܝܸܦܵܐ ܕܣܸܦܘܵܬܹ̈ܗ ܛܲܡ̈ܐܹܐ ܒܸܥܡܵܪܵܐ ܝ݇ܘܸܢ؛ ܘܠܡܲܠܟܵܐ ܡܵܪܝܵܐ ܚܲܝܠܬܵܢܵܐ ܚܙܹܐܠܗ݇ܘܿܢ ܥܲܝܢ̈ܝܼ܀ ܘܦܪܸܚܠܹܗ ܠܟܸܣܠܝܼ ܚܲܕ݇ ܡ̣ܢ ܣܪ̈ܵܦܹܐ؛ ܘܒܐܝܼܷܹܕܹܗ ܚܕܵܐ ܓܸܡܘܼܪܬܵܐ ܕܢܘܼܪܵܐ ܫܩܸܠܹܗ ܒܡܵܫܵܐ ܡ̣ܢ ܡܲܕܒܚܵܐ܀ ܘܡܘܼܩܪܸܒ̣ܠܹܗ ܠܦܘܼܡܝܼ؛ ܘܐ݇ܡܸܪܹܗ ܐܸܠܝܼ؛ ܗܵܐ ܩܘܼܪܒܸܢܵܗ̇ ܐܵܗܵܐ ܠܣܸܦܘܵܬ̈ܘܼܟܼ؛ ܕܥܵܒ̣ܸܪ ܥܵܘܠܘܼܟܼ ܘܦܵܝܫܝܼ ܦܘܼܚܠܹܐ ܚܛܝܼܵܬ̈ܘܼܟܼ܀ ܘܫܡܝܼܥܠܝܼ ܩܵܠܹܗ ܕܡܵܪܝܵܐ ܕܒܹܐܡܵܪܵܐ؛ ܠܡܵܢܝܼ ܫܲܕܪܸܢ؛ ܘܡܵܢܝܼ ܒܸܬ ܐܵܙܸܠ؟ ܘܐ݇ܡܸܪܝܼ ܗܵܐ ܐܵܢܵܐ ܫܲܕܸܪܝܼ܀ ܘܐ݇ܡܸܪܹܗ ܐܸܠܝܼ ܙܹܠ݇ ܐ݇ܡܘܿܪ ܠܐܵܗܵܐ ܛܵܝܸܦܵܐ؛ ܫܡܲܥܝܵܐ ܫܡܸܥܡܘܿܢ ܘܠܵܐ ܦܵܪܡܝܼܬܘܿܢ؛ ܘܚܙܵܝܵܐ ܚܙܹܐܡܘܿܢ ܘܠܹܐ ܝܵܕܥܝܼܬܘܿܢ܀ ܥܘܼܒܹܐܠܹܗ ܠܸܒܹܗ ܕܐܵܗܵܐ ܛܵܝܸܦܵܐ؛ ܘܢܵܬܝܵܬ̈ܘܼܗܝ ܝܘܼܩܪܸܢܗ݇ܘܿܢ؛ ܘܥܲܝܢ̈ܘܼܗܝ ܫܥܝܼܠܗ݇ܘܿܢ؛ ܕܠܵܐ ܚܵܙܹܐ ܒܥܲܝܢ̈ܘܼܗܝ ܘܫܵܡܸܥ ܒܢܵܬܝܵܬ̈ܘܼܗܝ܀ ܘܦܲܪܡܹܐ ܒܠܸܒܹܗ ܘܬܲܘܸܒ ܘܦܵܐܹܫ ܦܘܼܚܠܵܐ. ܘܐ݇ܡܸܪܝܼ؛ ܗܲܠ ܐܝܼܡܲܢ ܝܵܐ ܡܵܪܝܵܐ؟ ܘܐ݇ܡܸܪܹܗ ܗܲܠ ܕܚܵܪܒ̣ܝܼ ܡܵܬܘܵܬܹ̈ܐ ܡ̣ܢ ܕܠܲܝܬ̇ ܝܵܬܒ̣ܵܢܵܐ؛ ܘܒܵܬܹ̈ܐ ܡ̣ܢ ܕܠܲܝܬ̇ ܐ݇ܢܵܫܹ̈ܐ؛ ܘܐܲܪܥܵܐ ܒܸܬ ܚܵܪܒ̣ܵܐ ܘܗܵܘܝܵܐ ܒܲܝܵܪܵܐ؛ ܘܒܸܬ ܡܲܪܚܸܩ ܡܵܪܝܵܐ ܠܒܢܲܝ̈ܢܵܫܵܐ؛ ܘܒܸܬ ܙܵܝܕܵܐ ܫܒ̣ܝܼܩܘܼܬܵܐ ܒܓܵܘܵܗ̇ ܕܐܲܪܥܵܐ܀ ܘܒܸܬ ܦܵܝܫܝܼ ܓܵܘܵܗ̇ ܚܲܕ݇ ܡ̣ܢ ܥܸܣܪܵܐ؛ ܘܒܸܬ ܕܵܝܪܵܐ ܘܗܵܘܝܵܐ ܠܝܲܩܕܵܢܵܐ؛ ܐܲܝܟܼ ܐܝܼܠܵܢܵܐ ܕܒܸܛܡܵܐ ܘܐܲܝܟܼ ܒܲܠܘܼܛܵܐ ܕܢܦܸܠܹܗ ܡ̣ܢ ܥܸܩܪܹܗ؛ ܙܲܪܥܵܐ ܩܲܕܝܼܫܵܐ ܝ݇ܠܹܗ ܫܸܬܠܹܗ܀
ܚܲܒ̣ܪܹܗ
ܦܪܲܟܣܝܼܣ ܐ؛ 15‐ܫܘܼܠܵܡܵܐ ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܘܗܲܪ ܒܐܵܢܝܼ ܝܵܘܡܵܢܹ̈ܐ ܩܸܡܠܹܗ ܫܸܡܥܘܿܢ ܟܹܐܦܵܐ؛ ܒܒܹܝܬ̣݇ܦܲܠܓܵܐ ܕܬܲܠܡܝܼܕܹ̈ܐ؛ ܘܐܝܼܬ ܗ݇ܘܵܐ ܬܵܡܵܐ ܚܲܕ݇ ܟܸܢܫܵܐ ܕܐ݇ܢܵܫܹ̈ܐ ܐܲܝܟܼ ܐܸܡܵܐܐ ܘܥܸܣܪܝܼ؛ ܘܐ݇ܡܸܪܹܗ܀ ܐ݇ܢܵܫܹ̈ܐ ܐܵܚܘܿܢܘܵܬܲܢ؛ ܘܵܓ̰ܸܒ ܝܼܠܵܗ̇ ܕܦܵܐܹܫ ܬܘܼܡܸܡܵܐ ܟܬܵܒ̣ܵܐ ܗ̇ܘ ܕܡ̣ܢ ܩܲܕ݇ܡܵܝܬܵܐ ܐ݇ܡܸܪܹܗ ܪܘܼܚܵܐ ܕܩܘܼܕܫܵܐ ܒܦܘܼܡܹܗ ܕܕܵܘܝܼܕ؛ ܥܲܠ ܝܼܗܘܼܕܵܐ ܗ̇ܘ ܕܗ݇ܘܹܐܠܹܗ ܡܕܲܒܪܵܢܵܐ ܠܐܵܢܝܼ ܕܕܒ̣ܸܩܠܗ݇ܘܿܢ ܠܝܼܫܘܿܥ܀ ܣܵܒܵܒ ܕܡܸܢܝܵܐ ܗ݇ܘܵܐ ܥܲܡܲܢ ܘܐܝܼܬ ܗ݇ܘܵܐ ܠܹܗ ܣܵܡܵܐ ܒܐܵܗܵܐ ܚܸܠܡܲܬ܀ ܐܵܗܵܐ ܝ݇ܠܹܗ ܕܩܢܹܐܠܹܗ ܩܵܐ ܓܵܢܹܗ ܚܲܩܠܵܐ ܡ̣ܢ ܗܵܩܵܐ ܕܚܛܝܼܬܵܐ؛ ܘܢܦܸܠܹܗ ܥܲܠ ܦܵܬܹܗ ܥܲܠ ܐܲܪܥܵܐ؛ ܘܦܸܫܠܹܗ ܦܪܝܼܛܵܐ ܡ̣ܢ ܒܹܝܬ̣݇ܦܲܠܓܹܗ؛ ܘܬܦܸܚܠܹܗ ܟܠܹܗ ܓܵܘܹܗ܀ ܘܐܵܗܵܐ ܦܸܫܠܵܗ̇ ܝ݇ܕܝܼܥܬܵܐ ܠܟܠܲܝܗܝ ܥܵܡܪ̈ܵܢܹܐ ܕܐܘܿܪܸܫܠܹܡ؛ ܘܗܵܕܟ̣ܵܐ ܦܸܫܠܵܗ̇ ܩܪܝܼܬܵܐ ܗ̇ܝ ܚܲܩܠܵܐ ܒܠܸܫܵܢܹܗ ܕܐܲܬܪܵܐ. ܚܲܩܠܵܐ ܕܕܸܡܵܐ ܕܝܼܠܹܗ ܦܘܼܫܵܩܵܗ̇ ܚܲܩܠܵܐ ܕܕܸܡܵܐ܀ ܣܵܒܵܒ ܟܬܝܼܒ̣ܵܐ ܝ݇ܠܹܗ ܒܣܸܦܪܵܐ ܕܡܲܙܡܘܿܪܵܐ؛ ܒܹܝܬ̣ ܡܲܥܡܪܹܗ ܒܸܬ ܗܵܘܹܐ ܚܵܪܵܒܵܐ؛ ܘܥܵܡܪܵܢܵܐ ܠܹܐ ܗܵܘܹܐ ܓܵܘܹܗ؛ ܘܚܸܠܡܲܬܹܗ ܒܸܬ ܫܵܩܸܠ ܚܲܕ݇ ܐ݇ܚܹܪ݇ܢܵܐ܀ ܗܵܕܟ̣ܵܐ ܘܵܓ̰ܸܒ ܝܼܠܵܗ̇ ܠܚܲܕ݇ ܡ̣ܢ ܕܐܲܢܹܐ ܐ݇ܢܵܫܹ̈ܐ ܕܗ݇ܘܹܐܠܗ݇ܘܿܢ ܥܲܡܲܢ ܒܐܵܗܵܐ ܟܠܵܗ̇ ܥܸܕܵܢܵܐ ܕܥܒ̣ܸܪܹܗ ܘܦܠܸܛܠܹܗ ܥܲܡܲܢ ܡܵܪܲܢ ܝܼܫܘܿܥ܀ ܫܵܪܘܿܝܹܐ ܡ̣ܢ ܡܲܥܡܘܿܕܝܼܬܹܗ ܕܝܘܿܚܲܢܵܢ ܗܲܠ ܝܵܘܡܵܐ ܕܐ݇ܣܸܩܠܹܗ ܡ̣ܢ ܠܟܸܣܠܲܢ؛ ܕܗ̇ܘ ܗܵܘܹܐ ܥܲܡܲܢ ܣܵܗܕܵܐ ܕܩܝܵܡܬܹܗ܀ ܘܡܘܼܟܠܹܐ ܠܗ݇ܘܿܢ ܬܪܹܝ. ܝܵܘܣܸܦ ܕܦܵܐܹܫ ܩܸܪܝܵܐ ܒܲܪܫܲܒܵܐ. ܕܦܸܫܠܹܗ ܩܸܪܝܵܐ ܝܘܼܣܛܘܿܣ؛ ܘܠܡܲܬܝܼܵܐ܀ ܘܟܲܕ ܨܘܼܠܹܐ ܠܗ݇ܘܿܢ ܨܠܘܿܬܵܐ؛ ܐ݇ܡܸܪܗ݇ܘܿܢ؛ ܝܵܐ ܡܵܪܝܵܐ ܝܵܕܥܵܢܵܐ ܓܵܘ ܠܸܒܵܘܵܬܹ̈ܐ ܕܟܠ؛ ܡܲܚܙܝܼ ܚܲܕ݇ ܡ̣ܢ ܕܐܲܢܹܐ ܬܪܹܝ ܐܲܝܢܝܼ ܕܐܲܢ݇ܬ̇ ܓܵܒܸܬ̇܀ ܕܗ̇ܘ ܩܵܒܸܠ ܦܸܫܟܵܐ ܕܚܸܠܡܲܬ ܘܫܠܝܼܚܘܼܬܵܐ ܕܡܸܢܵܗ̇ ܪܚܝܼܩܠܹܗ ܝܼܗܘܼܕܵܐ؛ ܕܐܵܙܸܠ ܠܐܲܬܪܹܗ؛ ܘܕܪܹܐܠܗ݇ܘܿܢ ܦܸܫܟܹ̈ܐ. ܘܐ݇ܣܸܩܠܵܗ̇ ܦܸܫܟܵܐ ܠܡܲܬܝܼܵܐ؛ ܘܦܸܫܠܹܗ ܡܸܢܝܵܐ ܥܲܡ ܚܲܕܸܥܣܲܪ ܫܠܝܼܚܹ̈ܐ܀
♱♱♱♱♱♱♱♱♱♱
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ ܕܲܠܘܵܬܼ ܦܝܼܠܝܼܦܸܣܵܝܹ̈ܐ ܐܲܚܲܝ̈ ܒܵܪܸܟܼܡܵܪܝ܀ ܦܝܼܠܝܼܦܣܵܝܹ̈ܐ؛ ܐ؛ 27‐ܒ؛11
ܐܲܚܟ̰ܝܼ ܚܹܝܡܘܼܢ ܐܲܝܟܼ ܕܚܵܫܚܵܐ ܠܐܹܘܲܢܓܲܠܝܼܘܿܢ ܕܡܫܝܼܚܵܐ، ܕܐܸܢ ܐܵܬܹܝܢ ܘܚܵܙܹܢܵܘܟܼܘܿܢ، ܝܲܢ ܫܵܡܥܹܢ ܒܘܼܬ ܕܝܼܵܘܟܼܘܿܢ ܡ̣ܢ ܪܸܚܩܵܐ، ܗܵܘܹܝܬܘܿܢ ܟܸܠܝܹܐ ܩܸܘܝܵܐ ܒܚܕܵܐ ܪܘܼܚܵܐ، ܒܚܕܵܐ ܓܵܢܵܐ ܒܸܥܒܼܵܕܵܐ ܐܵܓܼܘܿܢܵܐ ܡܥܘܼܕܵܠܹܐ ܒܗܲܝܡܵܢܘܼܬܵܐ ܕܐܹܘܲܢܓܲܠܝܼܘܿܢ، ܘܠܵܐ ܒܸܙܕܵܥܵܐ ܒܘܼܬ ܗܸܟ̃ ܡܸܢܕܝܼ ܡ̣ܢ ܐܵܢܝܼ ܕܩܵܝܡܝܼ ܕܲܠܩܘܼܒܼܠܵܘܟܼܘܿܢ. ܐܵܗܵܐ ܚܲܕَ ܢܝܼܫܲܢܩܵܐ ܝܠܹܗ ܐܸܠܵܝܗܝ ܕܒܸܬ ܛܵܠܩܝܼ، ܐܝܼܢܵܐ ܐܲܚܬܘܿܢ ܒܸܬ ܦܵܪܩܝܼܬܘܿܢ، ܘܐܵܗܵܐ ܡ̣ܢ ܐܲܠܵܗܵܐ ܝܠܵܗ̇. ܣܵܒܵܒ ܦܝܼܫܬܵܐ ܝܠܵܗ̇ ܝܘܼܗَܒܼܹܠܬܵܐ ܐܸܠܵܘܟܼܘܿܢ ܒܘܼܬ ܚܵܬܸܪ ܕܡܫܝܼܚܵܐ ܠܵܐ ܐܲܚܟ̰ܝܼ ܕܗܲܡܸܢܝܼܬܘܿܢ ܒܝܼܹܗ، ܐܝܼܢܵܐ ܐܘܼܦ ܕܓ̰ܲܢܓ̰ܸܪܝܼܬܘܿܢ ܒܘܼܬ ܕܝܼܹܗ. ܟܲܕ ܐܝܼܬ ܠܵܘܟܼܘܿܢ ܗܲܪ ܗ̇ܘ ܐܵܓܼܘܿܢܵܐ ܕܚܙܹܐ ܠܵܘܟܼܘܿܢ ܒܝܼܝܼ، ܘܐܵܕܝܼܵܐ ܒܸܫܡܵܥܵܐ ܝܬܘܿܢ ܕܗܸܫ ܒܝܼܝܼ ܝܠܹܗ. ܒܵܣ ܐܸܢ ܐܝܼܬ ܒܘܼܝܵܐܵܐ ܒܡܫܝܼܚܵܐ، ܘܐܸܢ ܝܵܗܒܼܵܠܬܵܐ ܕܠܸܒܵܐ ܒܚܘܼܒܵܐ، ܘܐܸܢ ܫܲܪܝܼܟܘܼܬܵܐ ܕܪܘܼܚܵܐ، ܘܐܸܢ ܪܲܚܪܲܚܬܵܐ ܘܪ̈ܲܚܡܹܐ، ܬܲܡܸܡܘܼܢ ܚܲܕܘܼܬܝܼ ܕܗܵܘܹܝܬܘܿܢ ܒܚܲܕَ ܪܸܥܝܵܢܵܐ، ܘܒܚܲܕَ ܚܘܼܒܵܐ، ܘܒܚܕܵܐ ܓܵܢܵܐ ܘܒܚܲܕَ ܚܘܼܫܵܒܼܵܐ. ܠܵܐ ܥܵܒܼܕܝܼܬܘܿܢ ܗܸܟ̃ ܡܸܢܕܝܼ ܒܡܲܩܲܪܵܨܘܼܬܵܐ ܝܲܢ ܒܚܸܩܪܵܐ ܒܲܛܝܼܠܵܐ، ܐܸܠܵܐ ܒܡܲܟܝܼܟܼܘܼܬܵܐ ܗܵܘܹܝܬܘܿܢ ܒܸܚܫܵܒܼܵܐ ܐَܚܹܪَ̈ܢܹܐ ܙܵܘܕܵܐ ܡ̣ܢ ܓܵܢܵܘܟܼܘܿܢ. ܠܵܐ ܟܠ ܐَܢܵܫܵܐ ܡܸܢܵܘܟܼܘܿܢ ܓܲܫܸܩ ܠܝܘܼܬܪܵܢܵܐ ܕܓܵܢܹܗ ܐܲܚܟ̰ܝܼ، ܐܸܠܵܐ ܐܘܼܦ ܠܝܘܼܬܪܵܢܵܐ ܕܐَܚܹܪَ̈ܢܹܐ. ܚܵܫܒܼܝܼܬܘܿܢ ܗܲܪ ܗ̇ܘ ܡܸܢܕܝܼ ܕܚܫܝܼܒܼ ܠܹܗ ܐܘܼܦ ܝܑܼܫܘܿܥ ܡܫܝܼܚܵܐ، ܗ̇ܘ ܕܟܲܕ ܝܼܗَܘܵܐ ܒܟܝܵܢܹܗ ܐܲܠܵܗܵܐ، ܠܵܐ ܚܫܝܼܒܼ ܠܹܗ ܕܫܵܘܝܘܼܬܵܐ ܥܲܡ ܐܲܠܵܗܵܐ ܚܵܛܹܦ ܗَܘܵܐ ܠܵܗ̇. ܐܸܠܵܐ ܣܘܼܦܩܵܐ ܠܹܗ ܓܵܢܹܗ ܘܫܩܝܼܠ ܠܹܗ ܕܡܘܼܬܵܐ ܕܪܹܓܵܐ، ܘܗܘܹܐ ܠܹܗ ܒܨܘܼܪܬܵܐ ܕܒܢܲܝ̈ܢܵܫܵܐ. ܘܟܲܕ ܫܩܝܼܠ ܠܹܗ ܐܸܣܟܝܼܡܵܐ ܕܒܲܪܢܵܫܵܐ، ܘܡܘܼܟܸܦܵܐ ܠܹܗ ܓܵܢܹܗ ܘܫܠܝܼܡ ܠܹܗ ܗܲܠ ܡܵܘܬܵܐ، ܡܵܘܬܵܐ ܕܙܩܝܼܦܵܐ. ܒܘܼܬ ܐܵܗܵܐ ܐܘܼܦ ܐܲܠܵܗܵܐ ܒܘܼܫ ܙܵܘܕܵܐ ܡܘܼܪܸܡ ܠܹܗ ܐܸܠܹܗ، ܘܝܘܼܗَܒܼܹܠ ܠܹܗ ܐܸܠܹܗ ܫܸܡܵܐ ܥܸܠܸܠ ܡ̣ܢ ܟܠ ܫܸܡܵܐ، ܕܒܫܸܡܵܐ ܕܝܑܼܫܘܿܥ ܟܠ ܒܸܪܟܵܐ ܟܵܝܦܵܐ، ܒܫܡܲܝܵܐ ܘܒܐܲܪܥܵܐ ܘܕܠܬܸܚܬ ܡ̣ܢ ܐܲܪܥܵܐ، ܘܟܠ ܠܸܫܵܢܵܐ ܡܵܘܕܹܐ ܕܝܑܼܫܘܿܥ ܡܫܝܼܚܵܐ ܡܵܪܝܵܐ ܝܠܹܗ، ܠܫܘܼܒܼܚܵܐ ܕܐܲܠܵܗܵܐ ܒܵܒܵܐ.
♱♱♱♱♱♱♱♱♱♱
ܡܪܩܘܣ ܝܘ: 2 ‐ ܫܘܠܡܐ ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܡܪܩܘܣ
♰ ܐܝܼܢܵܐ ܒܨܲܦܪܵܐ ܒܚܲܕܒܫܲܒܵܐ ܐ݇ܬܹܐܠܗ݇ܘܿܢ ܠܒܹܝܬ ܩܒܼܘܼܪܵܐ. ܟܲܕ ܙܪܸܩܠܵܗ̇ ܫܸܡܫܵܐ. ܘܐܲܡܪܝܼ ܗ݇ܘܵܘ ܒܓܵܢܲܝܗܝ: ܐܝܼܢܵܐ ܡܵܢܝܼ ܒܸܬ ܡܲܚܕܸܪ ܩܵܬܵܢ ܟܹܐܦܵܐ ܡ̣ܢ ܬܲܪܥܵܐ ܕܒܹܝܬ ܩܒܼܘܼܪܵܐ؟ ܘܚܸܪܗ݇ܘܿܢ ܚܙܹܐܠܗ݇ܘܿܢ ܕܗ̇ܝ ܟܹܐܦܵܐ ܡܘܼܚܕܸܪܬܵܐ. ܣܵܒܵܒ ܪܵܒܵܐ ܓܘܼܪܬܵܐ ܗ݇ܘܵܐ. ܘܥܒܼܸܪܗ݇ܘܿܢ ܠܒܹܝܬ ܩܒܼܘܼܪܵܐ. ܘܚܙܹܐܠܗ݇ܘܿܢ ܚܲܕ݇ ܥܠܲܝܡܵܐ ܕܒܸܬܝܵܒܼܵܐ ܡ̣ܢ ܝܲܡܝܼܢܵܐ، ܘܩܛܝܼܘܵܐ ܓ̰ܘܼܒܵܐ ܚܘܵܪܬܵܐ ܘܥܘܼܓ̰ܸܒܠܗ݇ܘܿܢ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܠܵܐ ܙܲܕܥܝܼܬܘܿܢ، ܠܝܼܫܘܿܥ ܢܲܨܪܵܝܵܐ ܐܲܚܬܘܿܢ ܒܥܵܝܵܐ ܝܬܘܿܢ. ܗ̇ܘ ܕܦܸܫܠܹܗ ܙܩܝܼܦܵܐ. ܩܸܡܠܹܗ. ܠܹܐ ܝܠܹܗ ܠܲܐܟܼܵܐ. ܗܵܐ ܕܘܼܟܬܵܐ ܐܲܝܟܵܐ ܕܡܘܼܬܒܼܵܐ ܗ݇ܘܵܐ. ܐܸܠܵܐ ܙܹܠ݇ܡܘܼܢ ܐ݇ܡܘܼܪܘܿܢ ܠܬܲܠܡܝܼܕܘܼ̈ܗܝ ܘܠܟܹܐܦܵܐ. ܕܗܵܐ ܒܸܬ ܩܵܕܸܡܠܵܘܟܼܘܿܢ ܠܓܠܝܼܠܵܐ. ܬܵܡܵܐ ܒܸܬ ܚܵܙܝܼܬܘܿܢ ܠܹܗ ܕܲܐܟܼܝܼ ܕܐ݇ܡܸܪܹܗ ܐܸܠܵܘܟܼܘܿܢ. ܘܟܲܕ ܫܡܸܥܠܗ݇ܘܿܢ ܥܪܸܩܠܗ݇ܘܿܢ ܘܦܠܸܛܠܗ݇ܘܿܢ ܡ̣ܢ ܩܲܒܼܪܵܐ. ܣܵܒܵܒ ܕܒܼܝܼܩܲܝܗܝ ܗ݇ܘܵܐ ܥܘܼܓ̰ܵܒܵܐ ܘܪܲܬܪܲܬܬܵܐ. ܘܠܐ݇ܢܵܫܵܐ ܡܸܢܕܝܼ ܠܵܐ ܐ݇ܡܸܪܗ݇ܘܿܢ. ܣܵܒܵܒ ܙܸܕܥܝܹܐ ܗ݇ܘܵܘ. ܐܝܼܢܵܐ ܒܨܲܦܪܵܐ ܒܚܲܕ݇ܒܫܲܒܵܐ ܩܸܡܠܹܗ: ܘܦܸܫܠܹܗ ܚܸܙܝܵܐ ܩܲܕ݇ܡܵܝܬܵܐ ܠܡܲܪܝܲܡ ܡܲܓܼܕܠܵܝܬܵܐ. ܗ̇ܝ ܕܫܲܒܼܥܵܐ ܫܹܐܕܹ̈ܐ ܦܘܼܠܛܵܐ ܗ݇ܘܵܐ ܡܸܢܵܗ̇. ܘܗ̇ܝ ܐ݇ܙܸܠܵܗ̇ ܡܘܼܫܚܸܕܠܵܗ̇ ܠܐܵܢܝܼ ܕܥܲܡܹܗ ܗ݇ܘܵܘ. ܕܝܼܗ݇ܘܵܘ ܒܬܵܥܙܝܼ ܘܒܟܼܵܝܵܐ. ܘܐܵܢܝܼ ܟܲܕ ܫܡܸܥܠܗ݇ܘܿܢ ܕܐ݇ܡܸܗ݇ܘܿܢ: ܕܚܵܝܵܐ ܝܠܹܗ ܘܦܸܫܠܹܗ ܚܸܙܝܵܐ ܐܸܠܲܝܗܝ. ܠܵܐ ܗܘܼܡܸܢܗ݇ܘܿܢ ܐܸܠܲܝܗܝ: ܒܵܬ݇ܪ ܕܐܲܢܹܐ: ܦܸܫܠܹܗ ܚܸܙܝܵܐ ܠܬܪܹܝ ܡܸܢܲܝܗܝ ܒܕܵܡܵܝܬܵܐ ܐ݇ܚܹܪ݇ܬܵܐ. ܟܲܕ ܒܸܚܕܵܪܵܐ ܘܒܹܐܙܵܠܵܐ ܠܚܕܵܐ ܡܵܬܵܐ. ܘܐܵܢܝܼ ܐ݇ܙܸܠܗ݇ܘܿܢ ܐ݇ܡܸܪܗ݇ܘܿܢ ܠܫܲܪܟܵܐ. ܐܵܦܠܵܐ ܠܐܵܢܝܼ ܗܘܼܡܸܢܗ݇ܘܿܢ. ܐܝܼܢܵܐ ܒܐ݇ܚܲܪܬܵܐ ܦܸܫܠܹܗ ܚܸܙܝܵܐ ܠܲܚܕܲܥܣܲܪ ܟܲܕ ܝܬܝܼܒܼܹܵܐ. ܘܠܸܡܠܹܗ ܠܒܵܨܘܼܪܘܼܬܵܐ ܕܗܲܝܡܵܢܘܼܬܲܝܗܝ. ܘܠܩܲܫܝܘܼܬܵܐ ܕܠܸܒܲܝܗܝ. ܕܠܐܵܢܝܼ ܕܚܙܹܐܠܗ݇ܘܿܢ ܐܸܠܹܗ ܕܩܝܼܡܵܐ ܠܵܐ ܗܘܼܡܸܢܗ݇ܘܿܢ. ܘܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܿܢ ܠܥܵܠܡܵܐ ܟܠܹܗ. ܘܡܲܟܪܸܙܘܿܢ ܤܒ̣ܲܪܬܝܼ ܒܟܠܵܗ̇ ܒܪܝܼܬܵܐ. ܐܲܝܢܝܼ ܕܡܗܲܝܡܸܢ ܘܥܵܡܸܕ ܚܵܝܹܐ. ܘܐܲܝܢܝܼ ܕܠܵܐ ܡܗܲܝܡܸܢ ܗܵܘܹܐ ܚܲܝܵܒܼܵܐ. ܐܝܼܢܵܐ ܐܲܢܹܐ ܢܝܼܫܲܢܩܹ̈ܐ ܠܐܲܝܢܝܼ ܕܡܗܲܝܡܸܢܝܼ ܒܸܬ ܬܲܒܥܝܼ: ܒܫܸܡܝܼ ܫܹܐܕܹ̈ܐ ܒܸܬ ܦܲܠܛܝܼ. ܘܒܠܸܫܵܢܹ̈ܐ ܚܲܕ̈ܬܹܐ ܒܸܬ ܗܲܡܙܸܡܝܼ. ܘܚܘܵܘܵܬܹ̈ܐ ܒܸܬ ܫܲܩܠܝܼ. ܘܐܸܢ ܣܲܡܵܐ ܕܡܵܘܬܵܐ ܫܵܬܝܼ ܠܹܐ ܚܲܙܕܸܓܠܗ݇ܘܿܢ. ܘܐܝܼ̈ܕܵܬܲܝܗܝ ܒܸܬ ܡܲܬܒܼܝܼ ܥܲܠ ܡܸܪ̈ܥܝܹܐ ܘܒܸܬ ܒܲܣܡܝܼ. ܐܝܼܢܵܐ ܝܑܼܫܘܿܥ ܡܵܪܲܢ:ܡ̣ܢ ܒܵܬ݇ܪ ܕܗܘܼܡܙܸܡܠܹܗ ܥܲܡܵܝܗܝ. ܣܸܠَܩܠܹܗ ܠܫܡܲܝܵܐ. ܘܝܬܸܒܼܠܹܗ ܡ̣ܢ ܝܲܡܝܼܢܵܐ ܕܐܲܠܵܗܵܐ. ܐܝܼܢܵܐ ܐܵܢܝܼ ܦܠܸܛܠܗ݇ܘܿܢ ܘܡܘܼܟܪܸܙܠܗ݇ܘܿܢ ܒܟܠ ܕܘܼܟܵܐ، ܘܡܵܪܲܢ ܗܲܝܸܪ ܗ݇ܘܵܐ ܠܗ݇ܘܿܢ. ܘܡܲܩܘܹܐ ܗ݇ܘܵܐ ܗܹܡܸܙܡܵܢܲܝܗܝ ܒܢܝܼܫܲܢܩܹ̈ܐ ܕܥܲܒܼܕܝܼ ܗ݇ܘܵܘ.
♱♱♱♱♱♱♱♱♱♱
|