|
ܡܲܪܡܝܼܬܼܵܐ ܕܐ݇ܪ̈ܵܙܹܐ؛ ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ.
ܕܩܲܢܟܹ̇ܐ؛ ܒܣܵܗ̈ܕܹܐ ܒܪ̈ܝܼܟܹܐ. ܡܵܪܝܵܐ ܐܲܡ̣ܠܸܟܼ ܬܕܼܘܼܨ ܐܲܪܥܵܐ؛ ܢܸܚܕܘܿܢ ܫܡܲܝ̈ܵܐ ܘܲܬܿܕܼܘܼܨ ܐܲܪܥܵܐ. ܡܵܪܲܢ ܡܫܝܼܚܵܐ ܐܲܡ̣ܠܸܟܼ ܘܐܸܬܼܝܲܩܲܪ. ܬܕܼܘܼܨ ܐܲܪܥܵܐ ܟܠܵܗ̇. ܟܝܵܢܵܐ ܫܝܼܛܵܐ ܕܒܹܝܬܼ ܐܵܕܼܵܡ. ܗܵܐ ܡܙܲܝܚܝܼܢ ܠܹܗ ܪ̈ܘܼܚܵܢܹܐ. ܢܸܚܕܸ̇ܐ ܟܝܵܢܲܢ ܚܲܠܵܫܵܐ. ܒܒܲܪ ܓܸܢܣܲܢ ܕܲܗܘܸܵܐ ܡܲܠܟܵܐ. ܘܐܸܣܬܲܠܲܩ ܒܫܘܼܒܼܚܵܐ ܠܲܫܡܲܝܵܐ؛ ܬܢܝܼ؛ ܫܒܲܚ. ܨܠܝܼܒܹܗ ܕܲܡܫܝܼܚܵܐ ܩܲܛ̣ܠܵܗ̇ ܠܲܚܛܝܼܬܼܵܐ. ܕܩܸܛܠܲܬܸ ܠܲܟܼܝܵܢܲܢ. ܘܲܬܼܗܲܪܘ ܟܸܢܫܹ̈ܐ ܕܚܲܙܵܝܹ̈ܐ. ܒܙܵܟܼܘܼܬܼܵܐ ܕܲܒܼܪܹܫ ܩܲܝܣܵܐ. ܕܲܙ̣ܟܼܵܐ ܠܲܬܼܪܹܝܢ ܚܲܣܝܼܢܝܼ̈ܢ. ܓܲܒܼܪܵܐ ܕܐܸܬ̇ܬ̇ܠܝܼ ܒܲܙܩܝܼܦܵܐ. ܠܣܵܛܵܢܵܐ ܘܡܵܘܬܵܐ ܡܚܲܒ̇ܠܵܢܵܐ.
ܩܸܪܝܵܢܵܐ؛ ܐܹܫܲܥܝܵܐ؛ ܘ؛ 1‐ܫܘܼܠܵܡܵܐ ܚܲܒܼܪܹܗ؛ ܦܪܲܟܿܣܝܼܣ؛ ܐ؛ 15‐ܫܘܼܠܵܡܵܐ
ܫܘܼܪܵܝܵܐ؛ ܚ. ܒܪܝܼܟܼܘܼ ܡܵܪܝܵܐ ܕܲܓܼܒܼܵܐ ܠܹܗ ܓܒܲܝ̈ܵܐ ܒܲܩܪܝܼܬܼܵܐ ܥܲܫܝܼܢܬܵܐ* ܐܸܢܵܐ ܐܸܡ̇ܪܹܬܼ ܒܲܡܣܲܪܗ̱ܒܼܘܼܬܼܝ ܕܐܸܒܼܕܹ̇ܬܼ ܡ̣ܢ ܩܕܼܵܡ ܥܲܝܢܲܝ̈ܟ* ܘܲܫ̣ܡܲܥܬ̇ ܩܵܠܵܐ ܕܒܼܵܥܘܼܬܼ ܟܲܕܼ ܩܪܹܝ̇ܬܼܵܟܼ* ܪܚܲܡܘ ܠܡܵܪܝܵܐ ܙܲܕ̇ܝܼܩܵܘ̈ܗܝ* ܠܲܡܗܲܝܡܢܹ̈ܐ ܢܵܛܲܪ ܡܵܪܝܵܐ* ܘܦܵܪܲܥ̇ ܠܥܵܘܵܠܹ̈ܐ ܥܒܼܵܕܲܝ̈ܗܘܿܢ* ܐܸܬܼܚܲܝܲܠܘ ܘܢܸܬܼܥܲܫܲܢ ܠܸܒ̇ܟܼܘܿܢ* ܟܠ ܕܲܡܣܲܒ̇ܪܝܼܢ ܒܡܵܪܝܵܐ*
ܫܠܝܼܚܵܐ؛ ܦܝܼܠܝܼܦܣܵܝܹ̈ܐ؛ ܐ؛ 27‐ܒ؛11
ܙܘܼܡܵܪܵܐ. ܒܛܘܼܒܲܝܗܘܿܢ. ܣ̣ܠܸܩ ܐܲܠܵܗܵܐ ܒܫܘܼܒܼܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܙܡܲܪܘ ܠܐܲܠܵܗܵܐ ܒܫܘܼܒܼܚܵܐ ܙܡܲܪܘ ܠܡܲܠܟܲܢ ܒ܀ ܡܸܛܠ ܕܡܲܠܟܵܐ ܕܟܼܠܵܗ̇ ܐܲܪܥܵܐ ܐܲܠܵܗܵܐ ܗ݇ܘ̣ ܙܡܲܪܘ ܠܹܗ ܫܘܼܒܼܚܵܐ. ܐܲܡ̣ܠܸܟܼ ܐܲܠܵܗܵܐ ܥܲܠ ܥܲܡܡܹ̈ܐ. ܐܲܠܵܗܵܐ ܝܼܬܸܒܼ ܥܲܠ ܟܘܼܪܣܝܹܗ ܩܲܕ̇ܝܼܫܵܐ. ܓ܀
ܐܹܘܲܢܓܲܠܝܼܘܿܢ؛ ܡܲܪܩܘܿܣ؛ 2‐ܫܘܼܠܵܡܵܐ.
ܕܐܹܘܲܢܓܲܠܝܼܘܿܢ؛ ܒܣܵܗ̈ܕܹ̇ܐ ܒܪ̈ܝܼܟܹܐ. ܚܲܕܼܘܼܬܼܵܐ ܒܟܼܠܵܗ̇ ܐܲܪܥܵܐ. ܣ̣ܠܸܩ ܐܲܠܵܗܵܐ ܒܫܘܼܒܼܚܵܐ ܡܵܪܝܵܐ ܒܩܵܠܵܐ ܕܩܲܪܢܵܐ. ܒܝܵܘܡܵܐ ܕܐܸܣܬܲܠܲܩ ܒܲܪ ܡܲܠܟܵܐ ܫܡܲܝܵܢܵܐ ܒܫܘܼܒܼܚܵܐ ܠܘܵܬܼ ܐܲܒܼܘܼܗܝ. ܚܲܕܼܘܼܬܼܵܐ ܗܘܸܵܬܼ ܒܲܫܡܲܝܵܐ. ܘܟܲܪܝܘܼܬܼܵܐ ܒܹܝܬܼ ܬܲܠܡܝܼ̈ܕܹܐ. ܘܩܵܠ ܥܝܼܪܹ̈ܐ ܕܲܡܝܲܒ̇ܒܼܝܼܢ ܗ݇ܘ̣ܵܘ ܒܫܝܼܦܘܿܪܹ̈ܐ ܪ̈ܘܼܚܵܢܵܝܹܐ. ܕܲܦ̣ܢܵܐ ܠܹܗ ܝܵܪܬܵܐ ܠܒܹܝܬܼ ܐܲܒܼܘܼܗܝ. ܬܢܝܼ؛ ܫܲܒܲܚ. ܠܐܲܬܼܪܵܐ ܪܲܚܝܼܩܵܐ ܚܙܲܩ̣ ܡܲܠܟܵܐ ܕܡܸܢܲܢ. ܕܢܸܣܲܒܼ ܡܲܠܟ̇ܘܼܬܼܵܐ. ܘܲܪܟܸܒܼ ܥܲܠ ܟܸܢܦܹ̈ܐ ܕܪܘܼܚܵܐ. ܘܙܲܝܚܘܼܗܝ ܟܸܢܫܹ̈ܐ ܫܡܲܝܵܢܹ̈ܐ. ܘܲܦ̣ܬܲܚ ܬܲܪ̈ܥܹܐ ܕܲܪܩܝܼܥܵܐ ܕܐܲܚܝܼܕܼܝܼܢ ܗ݇ܘ̣ܵܘ ܡ̣ܢ ܥܵܠܲܡ. ܘܥܲܠ̣ ܘܐܲܡ̣ܠܸܟܼ ܒܐܲܬܼܪܵܐ ܕܠܵܐ ܩܸܢܛܵܐ.
ܕܐ݇ܪ̈ܵܙܹܐ؛ ܒܣܵܗܕܹ̈ܐ ܒܪ̈ܝܼܟܹܐ. ܟܘܼܪܣܝܵܟܼ ܐܲܠܵܗܵܐ ܠܥܵܠܲܡ ܥܵܠܡܝܼܢ؛ ܐܲܠܵܗܵܐ ܝܼܬܸܒܼ ܥܲܠ ܟܘܼܪܣܝܹܗ ܩܲܕ̇ܝܼܫܵܐ. ܥܲܠ ܟܘܼܪܣܲܝ ܫܘܼܒܼܚܵܐ ܝܼܬܸܒܼ ܒܲܪ ܡܲܠܟܵܐ. ܘܫܲܝܸܢ ܠܥܸܠ ܘܲܠܬܲܚܬ̇. ܬܵܘ ܢܲܣܸܩ ܠܹܗ ܬܸܫܒ̇ܘܿܚܬܵܐ. ܕܪܲܡ̣ܪܸܡ ܠܓܸܢܣܲܢ ܒܣܘܼܠܵܩܹܗ. ܘܪܲܥ̣ܝܼ ܠܲܢ ܥܲܡ ܫܵܠܘܿܚܹܗ. ܕܪܲܓ̇ܝܼܙ ܗ݇ܘ̣ܵܐ ܡܸܛܠ ܥܵܘܠܲܢ. ܘܲܡ̣ܠܲܟܼ ܠܲܢ ܚܲܝܹ̈ܐ ܕܲܠܥܵܠܲܡ. ܬܢܝܼ؛ ܘܫܲܒܲܚ ܒܵܗ̇.
ܕܒܹܝܡ؛ ܥܘܼܢܵܝܵܐ. ܡܸܢܹܗ ܘܠܹܗ. ܡ̣ܢ ܡܪ̈ܵܘܡܹܐ ܥܸܠܵܝܹ̈ܐ. ܡܫܝܼܚܵܐ ܡܵܪܲܢ ܘܦܵܪܘܿܩܵܐ ܕܟܼܠܵܐ. ܓܲܐܝܘܼܬܼܵܐ ܘܫܘܼܒܼܚܵܐ ܘܗܸܕܼܪܵܐ ܠ̣ܒܸܫ. ܟܲܕܼ ܝܲܗ̣݇ܒܼ ܗ݇ܘ̣ܵܐ ܦܘܼܪܩܵܢܵܐ ܠܥܲܡܡܹ̈ܐ. ܘܫܘܼܒܼܩܵܢ ܚܵܘ̈ܒܹ̇ܐ ܘܲܚܛܵܗܹ̈ܐ ܠܚܘܼܣܵܝܵܐ ܕܟܼܠܵܐ܀ ܠܗܵܢܵܐ ܕܡܵܐ ܝܲܩܝܼܪܵܐ ܘܦܲܓܼܪܵܐ ܕܲܢܣܲܒܼܢ ܟܠܲܢ. ܒܬܼܵܘܕܿܝܼܬܼܵܐ ܢܫܲܒܲܚ ܠܹܗ ܘܢܹܐܡܲܪ ܗܲܠܸܠܘܼܝܲܗ ܗܲܠܸܠܘܼܝܲܗ܀ ܒܵܬܹ̈ܐ؛ ܐܲܢܬ̇ܘܿܢ ܕܹܝܢ ܩܵܘܵܘ ܒܐܘܿܪܸܫܠܸܡ ܡܕܼܝܼܢ݇ܬܵܐ. ܥܕܲܡܵܐ ܕܬܸܠܒ̇ܫܘܼܢ ܚܲܝܠܵܐ ܡ̣ܢ ܪܵܘܡܵܐ܀ ܠܗܵܢܵܐ ܕܡܵܐ..܀ ܘܐܲܦܸܩ̣ ܐܸܢܘܿܢ ܥܕܲܡܵܐ ܠܒܹܝܬܼ ܥܲܢܝܵܐ. ܘܐܲܪܝܼܡ ܐܝܼܕܼܵܘ̈ܗܝ ܘܒܲܪܸܟܼ ܐܸܢܘܿܢ܀ ܠܗܵܢܵܐ ܕܡܵܐ ܝܲܩܝܼܪܵܐ..܀ ܘܲܗܘܸܵܐ ܕܟܲܕܼ ܡܒܲܪܸܟܼ ܠܗܘܿܢ. ܐܸܬܼܦܪܸܫ ܡܸܢܗܘܿܢ ܘܲܣ̣ܠܸܩ ܠܲܫܡܲܝܵܐ܀
♱♱♱♱♱♱♱♱♱♱
|