ܚܲܕܼܒܫܲܒܵܐ ܩܲܕܼܡܵܝܵܐ ܕܣܘܼܒܵܪܵܐ
ܒܪܝܼܬܵܐ؛ ܝܙ؛ 1‐ ܫܘܼܠܵܡܵܐ.
ܬܸܒ̣ܘ ܘܲܫܠܵܘ ܒܪܝܼܬܵܐ؛ ܣܸܦܪܵܐ ܩܲܕܡܵܝܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܗܘܹܐ ܠܹܗ ܐܲܒ̣ܪܵܡ ܒܲܪ ܐܸܬܫܥܝܼ ܘܐܸܬܫܥܵܐ ܫܸܢܹ̈ܐ؛ ܘܦܸܫܠܹܗ ܓܸܠܝܵܐ ܡܵܪܝܵܐ ܥܲܠ ܐܲܒ̣ܪܵܡ ܘܐ݇ܡܸܪܹܗ ܐܸܠܹܗ؛ ܐܵܢܵܐ ܝ݇ܘܸܢ ܐܹܝܠܫܲܕܲܝ ܐܲܠܵܗܵܐ؛ ܚܕܘܿܪ ܩܵܕ݇ܡܝܼ ܒܨܸܦܝܘܼܬܵܐ ܘܗܘܝܼ ܕܠܵܐ ܠܲܟܵܐ܀ ܘܒܸܬ ܝܵܗܒ̣ܸܢ ܩܵܘܠܝܼ ܒܹܝܠܝܼ ܘܐܸܠܘܼܟܼ؛ ܘܒܸܬ ܡܲܙܝܸܕܸܢܘܼܟܼ ܟ̰ܸܡ ܪܵܒܵܐ܀ ܘܢܦܸܠܹܗ ܐܲܒ̣ܪܵܡ ܥܲܠ ܦܵܬܹܗ؛ ܘܗܘܼܡܙܸܡܠܹܗ ܥܲܡܹܗ ܐܲܠܵܗܵܐ ܘܐ݇ܡܸܪܹܗ ܐܸܠܹܗ܀ ܗܵܐ؛ ܐܵܢܵܐ ܒܸܬ ܡܲܩܸܡܸܢ ܩܵܘܠܝܼ ܥܲܡܘܼܟܼ؛ ܘܒܸܬ ܗܵܘܸܬ̇ ܒܵܒܵܐ ܩܵܐ ܪܵܒܵܐ ܛܵܝܸܦܹ̈ܐ؛ ܘܡܸܕܪܹܐ ܠܹܐ ܦܵܐܹܫ ܩܸܪܝܵܐ ܫܸܡܘܼܟܼ ܐܲܒ̣ܪܵܡ؛ ܐܸܠܵܐ ܒܸܬ ܗܵܘܹܐ ܫܸܡܘܼܟܼ ܐܲܒ̣ܪܵܗܵܡ. ܣܵܒܵܒ ܕܒܵܒܵܐ ܩܵܐ ܪܵܒܵܐ ܛܵܝܸܦܹ̈ܐ ܩܲܡ ܥܵܒ̣ܕܸܢܘܼܟܼ ܕܗܵܘܸܬ̇܀ ܘܒܸܬ ܡܲܦܪܸܢܘܼܟܼ ܘܡܲܙܝܸܕܸܢܘܼܟܼ ܟ̰ܸܡ ܪܵܒܵܐ. ܘܒܸܬ ܡܲܙܝܸܕܸܢ ܡܸܢܘܼܟܼ ܪܵܒܵܐ ܛܵܝܸܦܹ̈ܐ؛ ܘܡܲܠܟܹ̈ܐ ܡ̣ܢ ܚܵܨܘܼܟܼ ܒܸܬ ܦܵܠܛܝܼ܀ ܘܒܸܬ ܡܲܩܸܡܸܢ ܩܵܘܠܝܼ ܒܹܝܠܝܼ ܘܐܸܠܘܼܟܼ؛ ܘܒܹܝܠ ܙܲܪܥܘܼܟܼ ܡ̣ܢ ܒܵܬ݇ܪܘܼܟܼ ܩܵܐ ܟܠܲܝܗܝ ܕܵܘܪܹ̈ܐ؛ ܩܵܘܠܵܐ ܕܗܲܠ ܐܵܒܲܕ؛ ܘܒܸܬ ܗܵܘܸܢ ܩܵܬܘܼܟܼ ܐܲܠܵܗܵܐ ܘܩܵܐ ܙܲܪܥܘܼܟܼ ܡ̣ܢ ܒܵܬ݇ܪܘܼܟܼ܀ ܘܒܸܬ ܝܵܗ݇ܒ̣ܸܢ ܩܵܬܘܼܟܼ ܘܩܵܐ ܙܲܪܥܘܼܟܼ ܡ̣ܢ ܒܵܬ݇ܪܘܼܟܼ ܐܲܪܥܵܐ ܕܥܵܡܪܸܬ̇ ܓܵܘܵܗ̇. ܟܠܵܗ̇ ܐܲܪܥܵܐ ܕܟܢܲܥܢ ܝܵܪܬܘܼܬܵܐ ܩܵܐ ܥܵܠܲܡ؛ ܘܒܸܬ ܗܵܘܸܢ ܩܵܬܲܝܗܝ ܐܲܠܵܗܵܐ܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܐܲܢ݇ܬ̇ ܩܵܘܠܝܼ ܢܛܘܿܪ؛ ܐܲܢ݇ܬ̇ ܘܙܲܪܥܘܼܟܼ ܡ̣ܢ ܒܵܬ݇ܪܘܼܟܼ ܩܵܐ ܟܠܲܝܗܝ ܕܵܘܪܹ̈ܐ܀ ܐܵܗܵܐ ܝ݇ܠܹܗ ܩܵܘܠܝܼ ܕܢܵܛܪܝܼܬܘܿܢ ܒܹܝܠܝܼ ܘܐܸܠܵܘܟ̣ܘܿܢ؛ ܘܒܹܝܠ ܙܲܪܥܘܼܟܼ ܡ̣ܢ ܒܵܬ݇ܪܘܼܟܼ؛ ܕܓܵܙܪܝܼܬܘܿܢ ܟܠ ܐܘܼܪܙܵܐ܀ ܘܓܵܙܪܝܼܬܘܿܢ ܒܸܣܪܵܐ ܕܥܘܼܪܠܘܼܬܵܘܟ̣ܘܿܢ؛ ܘܒܸܬ ܗܵܘܝܵܐ ܢܝܼܫܲܢܩܵܐ ܕܩܵܘܠܵܐ ܒܹܝܠܝܼ ܘܐܸܠܵܘܟ̣ܘܿܢ܀ ܒܲܪ ܬܡܲܢܝܵܐ ܝܵܘܡܵܢܹ̈ܐ ܒܸܬ ܓܵܙܸܪ ܟܠ ܐܘܼܪܙܵܐ ܡܸܢܵܘܟ̣ܘܿܢ ܩܵܐ ܟܠܲܝܗܝ ܕܵܘܪܹ̈ܐ؛ ܗܘܼܨܠܵܐ ܓܵܘ ܒܲܝܬܵܐ؛ ܘܙܒ̣ܝܼܢܵܐ ܒܙܘܼܙܹ̈ܐ؛ ܘܟܠ ܒܪܘܿܢܵܐ ܢܘܼܟ̣ܪܵܝܵܐ ܕܠܹܐ ܝ݇ܠܹܗ ܡ̣ܢ ܙܲܪܥܘܼܟܼ܀ ܗܘܼܨܠܵܐ ܕܒܲܝܬܘܼܟܼ ܘܙܒ̣ܝܼܢܵܐ ܒܙܘܼܙ̈ܘܼܟܼ ܦܵܐܹܫ ܓܙܝܼܪܵܐ. ܘܒܸܬ ܗܵܘܹܐ ܩܵܘܠܝܼ ܒܒܸܣܪܵܘܟ̣ܘܿܢ ܩܵܘܠܵܐ ܐܵܒܵܕܝܼܢܵܝܵܐ܀ ܘܟܠ ܐܘܼܪܙܵܐ ܥܘܼܪܠܵܐ ܕܠܵܐ ܓܵܙܸܪ ܒܸܣܪܵܐ ܕܥܘܼܪܠܘܼܬܹܗ؛ ܗ̇ܝ ܓܵܢܵܐ ܒܸܬ ܬܵܠܩܵܐ ܡ̣ܢ ܓܵܘ ܛܵܝܸܦܵܗ̇؛ ܣܵܒܵܒ ܩܵܘܠܝܼ ܒܘܼܛܸܠܵܗ̇܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ. ܣܲܪܲܝ ܒܲܟ̣ܬܘܼܟܼ ܡ̣ܢ ܐܵܕܝܼܵܐ ܠܒܵܬ݇ܪܵܐ ܠܵܐ ܩܵܪܸܬ̇ ܫܸܡܵܗ̇ ܣܲܪܲܝ؛ ܣܵܒܵܒ ܕܫܸܡܵܗ̇ ܣܲܪܵܐ ܝ݇ܠܹܗ܀ ܘܒܸܬ ܒܲܪܟ̣ܸܢܵܗ̇؛ ܘܐܘܼܦ ܒܸܬ ܝܵܗܒ̣ܸܢ ܩܵܬܘܼܟܼ ܡܸܢܵܗ̇ ܒܪܘܿܢܵܐ؛ ܘܒܸܬ ܒܲܪܟ̣ܸܢܹܗ؛ ܘܡܸܢܹܗ ܒܸܬ ܗܵܘܝܼ ܛܵܝܸܦܹ̈ܐ. ܘܡܲܠܟܹ̈ܐ ܕܛܵܝܸܦܹ̈ܐ ܡܸܢܹܗ ܒܸܬ ܗܵܘܝܼ܀ ܘܢܦܸܠܹܗ ܐܲܒ̣ܪܵܗܵܡ ܥܲܠ ܦܵܬܹܗ ܥܲܠ ܐܲܪܥܵܐ ܘܓܚܸܟܠܹܗ؛ ܘܐ݇ܡܸܪܹܗ ܒܠܸܒܹܗ؛ ܩܵܐ ܒܲܪ ܐܸܡܵܐܐ ܫܸܢܹ̈ܐ ܒܸܬ ܦܵܐܹܫ ܝ݇ܠܝܼܕܵܐ ܒܪܘܿܢܵܐ؟ ܝܲܢ ܣܲܪܵܐ ܒܲܪ݇ܬ ܐܸܬܫܥܝܼ ܫܸܢܹ̈ܐ ܒܸܬ ܝܵܠܕܵܐ؟܀ ܘܐ݇ܡܸܪܹܗ ܐܲܒ̣ܪܵܗܵܡ ܩܵܐ ܐܲܠܵܗܵܐ؛ ܐܲܚܟ̰ܝܼ ܐܝܼܫܡܵܥܹܝܠ ܚܲܝܹܐ ܩܵܕ݇ܡܘܼܟܼ܀ ܘܐ݇ܡܸܪܹܗ ܐܲܠܵܗܵܐ ܩܵܐ ܐܲܒ̣ܪܵܗܵܡ؛ ܒܫܲܪܝܼܪܘܼܬܵܐ ܣܲܪܵܐ ܒܲܟ̣ܬܘܼܟܼ ܒܸܬ ܝܵܠܕܵܐ ܒܪܘܿܢܵܐ ܘܒܸܬ ܩܵܪܸܬ̇ ܫܸܡܹܗ ܐܝܼܣܚܲܩ. ܘܒܸܬ ܡܲܩܸܡܸܢ ܩܵܘܠܝܼ ܥܲܡܹܗ؛ ܩܵܘܠܵܐ ܩܵܐ ܗܲܠ ܐܵܒܲܪ؛ ܘܩܵܐ ܙܲܪܥܹܗ ܡ̣ܢ ܒܵܬ݇ܪܹܗ. ܘܒܘܼܬ ܐܝܼܫܡܵܥܹܝܠ ܩܲܡ ܫܵܡܥܸܢܘܼܟܼ. ܒܸܬ ܒܲܪܟ̣ܸܢܹܗ ܘܡܲܙܝܸܕܸܢܹܗ ܘܒܸܬ ܥܵܒ̣ܕܸܢܹܗ ܪܵܒܵܐ ܓܘܼܪܵܐ؛ ܬܪܸܥܣܲܪ ܓܘܼܪ̈ܵܢܹܐ ܒܸܬ ܗܵܨܸܠ؛ ܘܒܸܬ ܥܵܒ̣ܕܸܢܹܗ ܚܲܕ݇ ܛܵܝܸܦܵܐ ܓܘܼܪܵܐ. ܘܩܵܘܠܝܼ ܒܸܬ ܡܲܩܸܡܸܢ ܥܲܡ ܐܝܼܣܚܲܩ ܕܗܲܨܠܵܐ ܠܘܼܟܼ ܣܲܪܵܐ. ܐܲܝܟܼ ܕܐܵܗܵܐ ܥܸܕܵܢܵܐ ܫܹܢ݇ܬܵܐ ܐ݇ܚܹܪ݇ܬܵܐ܀ ܘܟܲܕ ܦܪܸܩܠܹܗ ܡ̣ܢ ܗܲܡܙܲܡܬܵܐ ܥܲܡܹܗ. ܪܚܸܩܠܹܗ ܐܲܠܵܗܵܐ ܡ̣ܢ ܠܟܸܣ ܐܲܒ̣ܪܵܗܵܡ܀ ܘܠܘܼܒܸܠܹܗ ܐܲܒ̣ܪܵܗܵܡ ܠܐܝܼܫܡܵܥܹܝܠ ܒܪܘܿܢܹܗ؛ ܘܠܟܠܲܝܗܝ ܒܢܘܿܢܹ̈ܐ ܕܒܲܝܬܹܗ ܘܙܒ̣ܝܼܢܵܐ ܒܙܘܼܙܹ̈ܐ ܕܓܵܢܹܗ؛ ܘܟܠ ܐܘܼܪܙܵܐ ܕܓܵܘ ܒܲܝܬܹܗ؛ ܘܓܙܸܪܹܗ ܒܸܣܪܵܐ ܕܥܘܼܪܠܘܼܬܲܝܗܝ ܗܲܪ ܒܗ̇ܘ ܝܵܘܡܵܐ؛ ܐܲܝܟܼ ܕܦܘܼܩܸܕܠܹܗ ܐܸܠܹܗ ܐܲܠܵܗܵܐ܀ ܘܐܲܒ̣ܪܵܗܵܡ ܒܲܪ ܐܸܬܫܥܝܼ ܘܐܸܬܫܥܵܐ ܫܸܢܹ̈ܐ ܗ݇ܘ̣ܵܐ ܐܝܼܡܲܢ ܕܓܙܸܪܹܗ ܒܸܣܪܵܐ ܕܥܘܼܪܠܘܼܬܹܗ܀ ܘܐܸܫܡܵܥܹܝܠ ܒܪܘܿܢܹܗ ܒܲܪ ܬܸܠܬܲܥܣܲܪ ܫܸܢܹ̈ܐ ܗ݇ܘܵܐ ܟܲܕ ܓܙܸܪܹܗ ܠܒܸܣܪܵܐ ܕܥܘܼܪܠܘܼܬܹܗ. ܗܲܪ ܒܗ̇ܘ ܝܵܘܡܵܐ ܓܙܸܪܹܗ ܐܲܒ̣ܪܵܗܵܡ ܠܐܝܼܫܡܵܥܹܝܠ ܒܪܘܿܢܹܗ܀ ܘܠܟܠܲܝܗܝ ܐ݇ܢܵܫܹ̈ܐ ܕܒܲܝܬܹܗ؛ ܝ݇ܠܝܼܕܵܐ ܓܵܘ ܒܲܝܬܹܗ ܘܙܒ̣ܝܼܢܵܐ ܒܙܘܼܙܹ̈ܐ ܕܓܵܢܹܗ؛ ܘܐܘܼܦ ܡ̣ܢ ܒܢܘܿܢܹ̈ܐ ܕܢܘܼܟ̣ܪ̈ܵܝܹܐ ܓܙܸܪܹܗ ܥܲܡܹܗ܀
ܚܲܒ̣ܪܹܗ
ܐܹܫܲܥܝܵܐ ܡܒ؛ 18‐ܡܓ؛14
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ.
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܟܲܪܹ̈ܐ ܫܡܸܥܡܘܿܢ؛ ܘܣܸܡܝܹ̈ܐ ܦܲܪܡܹܐܡܘܿܢ ܘܚܙܹܐܡܘܿܢ܀ ܡܵܢܝܼ ܝ݇ܠܹܗ ܣܸܡܝܵܐ ܐܸܠܵܐ ܪܹܓܝܼ؛ ܘܟܲܪܵܐ ܐܲܝܟܼ ܩܵܨܸܕܝܼ ܕܒܸܬ ܫܲܕܪܸܢ؟ ܡܵܢܝܼ ܝ݇ܠܹܗ ܣܸܡܝܵܐ ܐܲܝܟܼ ܗܵܟܝܼܡ؛ ܘܣܸܡܝܵܐ ܐܲܝܟܼ ܪܹܓܹܗ ܕܡܵܪܝܵܐ܀ ܚܸܪܝܼ ܪܵܒܵܐ ܘܠܹܐ ܝ݇ܬܘܿܢ ܒܸܢܛܵܪܵܐ؛ ܘܦܬܸܚܠܝܼ ܢܵܬܝܵܬܹ̈ܐ ܘܠܹܐ ܝ݇ܬܘܿܢ ܒܸܫܡܲܥܝܵܐ܀ ܡܵܪܝܵܐ ܒܣܸܡܠܵܐ ܠܹܗ ܒܘܼܬ ܚܵܬܸܪ ܕܙܲܕܝܼܩܘܼܬܹܗ ܕܓܲܪܘܸܣܠܹܗ ܢܵܡܘܿܣܵܐ ܘܥܵܒ̣ܸܕ ܠܹܗ ܚܩܝܼܪܵܐ܀ ܐܵܗܵܐ ܚܲܕ݇ ܛܵܝܸܦܵܐ ܝ݇ܠܹܗ ܣܠܝܼܒܵܐ ܘܕܘܼܫܕܸܫܵܐ؛ ܩܘܼܠܝܵܬܹ̈ܐ ܝ݇ܢܵܐ ܟܠܲܝܗܝ ܓ̰ܘܲܢܩܹ̈ܐ؛ ܘܓܵܘ ܒܵܬܹ̈ܐ ܐܲܣܝܼܪܹ̈ܐ ܛܘܼܫܹܐܠܗ݇ܘܿܢ؛ ܘܗ݇ܘܹܐܠܗ݇ܘܿܢ ܠܸܣܠܵܒܵܐ ܘܠܲܝܬ̇ ܦܲܨܝܵܢܵܐ؛ ܘܠܕܲܫܕܲܫܬܵܐ ܘܠܲܝܬ̇ ܡܲܕܸܪܵܢܵܐ. ܡܵܢܝܼ ܐܝܼܬ ܓܵܘܵܘܟ̣ܘܿܢ ܕܡܲܫܡܸܥ ܐܵܗܵܐ؟܀ ܘܡܲܨܝܸܬ ܘܫܵܡܸܥ ܠܚܲܕ݇ܐ ܐ݇ܚܹܪ݇ܬܵܐ؟ ܡܵܢܝܼ ܝܘܼܗܒ̣ܸܠܹܗ ܠܝܲܥܩܘܿܒ̣ ܕܗܵܘܹܐ ܩܵܐ ܕܲܫܕܲܫܬܵܐ ܘܠܝܼܣܪܵܝܸܠ ܩܵܐ ܣܠܵܒܵܐ؟܀ ܠܹܐ ܝ݇ܠܹܗ ܡܵܪܝܵܐ؟ ܗ̇ܘ ܕܚܛܹܐܠܲܢ ܩܵܕ݇ܡܹܗ؛ ܘܠܵܐ ܒܣܸܡܠܵܐ ܠܲܢ ܠܸܚܕܵܪܵܐ ܒܐܘܼܪ̈ܚܵܬܹܗ؛ ܘܠܵܐ ܫܡܝܼܥܠܲܢ ܫܲܪܥܲܬܹܗ؟ ܬܘܼܦܸܚܠܹܗ ܥܲܠܲܝܗܝ ܚܸܡܬܵܐ ܕܟܲܪܒܹܗ ܘܚܲܝܠܵܐ ܕܦܠܵܫܵܐ ܩܲܡ ܡܵܩܸܕܠܗ݇ܘܿܢ ܡ̣ܢ ܚܲܕܸܪ̈ܘܵܢܲܝܗܝ ܘܠܵܐ ܝ݇ܕܝܼܥ ܠܗ݇ܘܿܢ؛ ܘܬܦܹܐܠܹܗ ܒܝܼܲܝܗܝ ܢܘܼܪܵܐ ܘܠܵܐ ܪܥܝܼܫܠܗ݇ܘܿܢ܀ ܐܵܕܝܼܵܐ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܕܩܲܡ ܒܵܪܹܐܠܘܼܟܼ ܝܲܥܩܘܿܒ̣ ܘܓܵܒ̣ܸܠܘܼܟܼ ܝܼܣܪܵܝܹܠ. ܠܵܐ ܙܵܕܥܸܬ̇ ܕܒܸܬ ܦܲܪܩܸܢܘܼܟܼ؛ ܘܒܸܬ ܩܵܪܸܢܘܼܟܼ ܒܫܸܡܘܼܟܼ ܣܵܒܵܒ ܕܝܼܝܼ ܝ݇ܘܸܬ̇܀ ܐܸܢ ܥܵܒ̣ܪܸܬ̇ ܓܵܘ ܝܵܡܵܐ ܥܲܡܘܼܟܼ ܝܼܘܸܢ ܘܢܲܗܪ̈ܵܘܵܬܹܐ ܠܹܐ ܓܵܪܦܝܼܠܘܼܟܼ؛ ܐܸܢ ܚܵܕܪܸܬ̇ ܥܲܠ ܢܘܼܪܵܐ ܠܹܐ ܦܵܝܫܸܬ̇ ܟܘܼܝܵܐ؛ ܘܠܵܗܵܐ ܕܢܘܼܪܵܐ ܠܹܐ ܡܲܩܕܵܐ ܠܘܼܟܼ. ܣܵܒܵܒ ܐܵܢܵܐ ܝ݇ܘܸܢ ܡܵܪܝܵܐ ܐܲܠܵܗܘܼܟܼ؛ ܩܲܕܝܼܫܵܐ ܕܝܼܣܪܵܝܹܠ ܦܵܪܘܿܩܘܼܟܼ. ܝܘܼܗ݇ܒ̣ܸܠܝܼ ܠܡܸܨܪܹܝܢ ܡ̣ܢ ܓܹܒܘܼܟܼ؛ ܘܠܟܘܼܫ ܘܫܒ̣ܵܐ ܒܘܼܬ ܚܵܬܸܪ ܕܝܼܘܼܟܼ܀ ܡ̣ܢ ܣܵܒܵܒ ܕܝܼܘܸܬ̇ ܡܝܘܼܩܪܵܐ ܒܥܲܝ̈ܢܝܼ ܦܸܫܠܘܼܟܼ ܚܩܝܼܪܵܐ. ܘܐܵܢܵܐ ܡܘܼܚܸܒܠܝܼ ܐܸܠܘܼܟܼ؛ ܝܘܼܗ݇ܒ̣ܸܠܝܼ ܐ݇ܢܵܫܹ̈ܐ ܡܒܵܕܵܠܘܼܟܼ؛ ܘܡܸܠܲܬܹ̈ܐ ܡ̣ܢ ܓܹܒܵܐ ܕܓܵܢܘܼܟܼ܀ ܠܵܐ ܙܵܕܥܸܬ̇ ܣܵܒܵܒ ܥܲܡܘܼܟܼ ܝܼܘܸܢ. ܡ̣ܢ ܡܲܕܢܚܵܐ ܒܸܬ ܡܲܝܬ݇ܝܸܢ ܒܢܘܿܢ̈ܘܼܟܼ؛ ܘܡ̣ܢ ܡܲܥܪܒ̣ܵܐ ܒܸܬ ܓ̰ܲܡܥܸܢܘܼܟܼ܀ ܒܸܬ ܐܵܡܪܸܢ ܩܵܐ ܓܲܪܒܝܵܐ ܗܲܒ̣݇ܠܝ؛ ܘܩܵܐ ܬܲܝܡܢܵܐ ܠܵܐ ܡܲܟܠܸܝܲܬ̇ܝ؛ ܘܒܸܬ ܡܲܝܬ݇ܝܸܢ ܒܢܘܿܢ̈ܝܼ ܡ̣ܢ ܪܸܚܩܵܐ ܘܒܢܵܬ̈ܝܼ ܡ̣ܢ ܡܲܪ̈ܙܵܢܵܢܹܐ ܕܐܲܪܥܵܐ܀ ܟܠ ܕܩܵܪܹܐ ܒܫܸܡܝܼ؛ ܩܵܐ ܐܝܼܩܵܪܝܼ ܒܪܹܐܠܝܼ ܘܓܒ̣ܸܠܝܼ ܩܵܬܹܗ܀ ܦܵܠܸܛ ܛܵܝܸܦܵܐ ܕܥܲܝܢܹ̈ܐ ܣܸܡܝܹ̈ܐ ܐܝܼܬܠܗ݇ܘܿܢ. ܘܢܵܬܝܵܬܹ̈ܐ ܐܝܼܬܠܗ݇ܘܿܢ ܘܟܲܪܹ̈ܐ ܝ݇ܢܵܐ!܀ ܟܠܲܝܗܝ ܛܵܝܸܦܹ̈ܐ ܒܸܬ ܓ̰ܲܡܥܝܼ ܡܐܘܼܕܵܠܹܐ؛ ܘܒܸܬ ܓ̰ܲܡܥܝܼ ܡܸܠܲܬܹ̈ܐ. ܡܵܢܝܼ ܐܝܼܬ ܒܝܼܵܘܟ̣ܘܿܢ ܕܡܲܚܙܹܐ ܐܵܗܵܐ؛ ܘܩܲܕ݇ܡܵܝܹ̈ܐ ܡܲܫܡܸܥ؟ ܡܲܝܬ݇ܝܼ ܣܵܗܕܲܝ̈ܗܝ ܘܦܵܝܫܝܼ ܡܘܼܟܫܸܛܹ̈ܐ؛ ܘܫܵܡܥܝܼ ܘܐܵܡܪܝܼ܀ ܒܫܲܪܝܼܪܘܼܬܵܐ ܣܵܗܕܝܼ̈ ܝ݇ܬܘܿܢ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܘܪܹ̈ܓܵܘܵܬܝܼ ܕܓܘܼܒܹܐܠܝܼ؛ ܘܝܵܕܥܝܼܬܘܿܢ ܘܗܲܡܸܢܝܼܬܘܿܢ ܒܝܼܝܼ؛ ܘܦܵܪܡܝܼܬܘܿܢ ܕܐܵܢܵܐ ܝ݇ܘܸܢ؛ ܘܡ̣ܢ ܩܲܕ݇ܡ ܕܝܼܝܼ ܠܵܐ ܦܸܫܠܹܐ ܒܸܪܝܵܐ ܐܲܠܵܗܵܐ؛ ܘܡ̣ܢ ܒܵܬ݇ܪ ܡܸܢܝܼ ܠܹܐ ܗܵܘܹܐ܀ ܐܵܢܵܐ ܝ݇ܘܸܢ ܡܵܪܝܵܐ؛ ܘܠܲܝܬ̇ ܐ݇ܚܹܪ݇ܢܵܐ ܫܒ̣ܘܼܩ ܡܸܢܝܼ܀ ܐܵܢܵܐ ܡܘܼܕܸܥܠܝܼ ܘܦܘܼܪܸܩܠܝܼ ܘܡܘܼܫܡܸܥܠܝܼ؛ ܘܠܲܝܬ̇ ܒܝܼܵܘܟ̣ܘܿܢ ܢܘܼܟ̣ܪܵܝܵܐ؛ ܘܐܲܚܬܘܿܢ ܣܵܗܕ̈ܝܼ ܝ݇ܬܘܿܢ؛ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܘܐܵܢܵܐ ܐܲܠܵܗܵܐ. ܘܐܘܼܦ ܡ̣ܢ ܝܵܘܡܵܐ ܩܲܕ݇ܡܵܝܵܐ؛ ܐܵܢܵܐ ܝ݇ܘܸܢ ܘܠܲܝܬ̇ ܕܡܦܵܨܹܐ ܡ̣ܢ ܐܝܼܕ̈ܝܼ؛ ܘܡܸܢܕܝܼ ܕܥܵܒ̣ܕܸܢ؛ ܡܵܢܝܼ ܒܸܬ ܡܲܕܸܪ ܠܒܵܬ݇ܪܵܐ؟܀
♱♱♱♱♱♱♱♱♱♱♱♱♱♱
ܚܲܕ݇ܒܼܫܹܒܵܐ ܐ ܕܣܘܼܒܵܪܵܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܐܵܦܸܣܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ܀
ܚܙܹܐܡܘܿܢ ܗܲܕܟܼܵܐ ܕܵܐܟܼܝܼ ܚܵܕܪܝܼܬܘܿܢ ܒܗܸܫܝܵܪܘܼܬܵܐ؛ ܠܵܐ ܐܲܝܟܼ ܣܲܟܼܠܹ̈ܐ. ܐܸܠܵܐ ܐܲܝܟܼ ܗܵܘܢܵܢܹ̈ܐ ܕܙܵܒܼܢܝܼ ܕܲܥܘܝܼܲܝܗܝ؛ ܣܵܒܵܒ ܕܝܵܘܡܢܹ̈ܐ ܒܝܼܫܹ̈ܐ ܝ݇ܢܵܐ* ܒܘܼܬ ܕܐܵܗܵܐ؛ ܠܵܐ ܗܵܘܝܼܬܘܿܢ ܒܵܨܘܿܪܹ̈ܐ ܕܗܵܘܢܵܐ؛ ܐܸܠܵܐ ܦܲܪܡܹܐܡܘܿܢ ܡܘܼܕܝܼ ܝ݇ܠܹܗ ܪܸܙܵܝܵܐ ܕܐܲܠܵܗܵܐ* ܘܠܵܐ ܗܵܘܝܼܬܘܿܢ ܪ̈ܵܘܵܝܹܐ ܒܚܲܡܪܵܐ ܕܒܝܼܹܗ ܐܝܼܬ ܐܵܣܘܿܛܘܼܬܵܐ؛ ܐܸܠܵܐ ܦܘܼܫܘܼܢ ܡܸܠܝܸܐ ܒܪܘܼܚܵܐ* ܘܗܲܡܙܸܡܘܿܢ ܥܲܡ ܓܵܢܵܘܟܼܘܿܢ ܒܡܲܙܡܘܼܪܹ̈ܐ ܘܬܸܫܒܘܿܚܝܵܬܹ̈ܐ؛ ܘܒܙܡܲܪ̈ܝܵܬܹܐ ܕܪܘܼܚܵܐ ܗܵܘܝܼܬܘܿܢ ܒܸܙܡܵܪܵܐ ܓܵܘ ܠܸܒܵܘܵܬܵܘ̈ܟܼܘܿܢ ܠܡܵܪܝܵܐ* ܘܗܵܘܝܼܬܘܿܢ ܡܵܘܕܘܿܝܹܐ ܒܟܠ ܥܕܵܢܵܐ ܒܘܼܬ ܚܵܬܸܪ ܕܟܠ ܐ݇ܢܵܫܵܐ ܒܫܸܡܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܠܐܲܠܵܗܵܐ ܒܵܒܵܐ* ܘܗܵܘܝܼܬܘܿܢ ܙܲܒܛ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܒܚܘܼܒܹܗ ܕܡܫܝܼܚܵܐ* ܒܲܟܼܬܵܬܹ̈ܐ؛ ܗܵܘܝܼܬܘܿܢ ܙܲܒܛ ܠܓܲܒܼܪ̈ܵܢܵܘܟܼܘܿܢ ܐܲܝܟܼ ܕܠܡܵܪܲܢ* ܣܵܒܵܒ ܓܲܒܼܪܵܐ ܪܹܫܵܐ ܝ݇ܠܹܗ ܕܒܲܟܼܬܵܐ؛ ܕܵܐܟܼܝܼ ܕܐܘܼܦ ܡܫܝܼܚܵܐ ܪܹܫܵܐ ܝ݇ܠܹܗ ܕܥܹܕܬܵܐ؛ ܘܗ̇ܘ ܝܼܠܹܗ ܡܲܚܝܼܵܢܵܐ ܕܦܲܓܼܪܵܐ* ܕܵܐܟܼܝܼ ܕܥܹܕܬܵܐ ܒܸܗܘܵܝܵܐ ܝ݇ܠܵܗ̇ ܙܲܒܛ ܠܡܫܝܼܚܵܐ؛ ܗܲܕܟܼܵܐ ܐܘܼܦ ܒܲܟܼܬܵܬܹ̈ܐ ܠܓܲܒܼܪ̈ܵܢܲܝܗܝ ܒܟܠ ܡܸܢܕܝܼ* ܓܲܒܼܪܹ̈ܐ؛ ܡܲܚܸܒܘܿܢ ܒܲܟܼܬܵܬܵܘ̈ܟܼܘܿܢ؛ ܐܲܝܟܼ ܕܐܘܼܦ ܡܫܝܼܚܵܐ ܡܘܼܚܸܒܠܹܗ ܠܥܹܕܬܹܗ ܘܣܘܼܦܝܵܐ ܠܹܗ ܓܵܢܹܗ ܠܡܵܘܬܵܐ ܡ̣ܢ ܓܹܒܵܗ̇* ܩܵܐ ܕܡܩܵܕܸܫ ܠܵܗ̇ ܘܡܕܵܟܹܐ ܠܵܗ̇ ܒܣܚܵܝܬܵܐ ܕܡܝܼ̈ܵܐ ܘܒܗܹܡܸܙܡܲܢ ܩܲܕܝܼܫܬܵܐ* ܘܡܲܩܸܡܠܵܗ̇ ܥܹܕܬܵܐ ܚܩܝܼܪܬܵܐ ܩܵܐ ܓܵܢܹܗ؛ ܕܠܲܝܬ ܓܵܘܵܗ̇ ܠܵܐ ܠܲܟܵܐ ܘܠܵܐ ܚܲܕ݇ ܡܸܢܕܝܼ ܕܵܡܝܵܢܵܐ ܠܐܲܢܹܐ ܐܸܠܵܐ ܕܗܵܘܝܵܐ ܩܲܕܝܼܫܬܵܐ ܘܕܠܵܐ ܠܲܟܵܐ* ܗܲܕܟܼܵܐ ܚܫܝܼܚܬܵܐ ܝ݇ܠܵܗ̇ ܠܓܲܒܼܪܹ̈ܐ ܕܡܲܚܸܒܝܼ ܒܲܟܼܬܵܬܲܝ̈ܗܝ ܐܲܝܟܼ ܦܲܓܼܪܲܝܗܝ. ܣܵܒܵܒ ܡ̇ܢ ܕܡܲܚܸܒ ܠܒܲܟܼܬܹܗ ܓܵܢܹܗ ܝ݇ܠܹܗ ܡܲܚܘܼܒܹܐ* ܗܸܟ̃ ܚܲܕ݇ ܐ݇ܢܵܫܵܐ ܠܹܗ ܣܵܢܹܐ ܦܲܓܼܪܹܗ؛ ܐܸܠܵܐ ܡܬܲܪܣܹܐ ܠܹܗ ܘܐܵܟܸܠ ܚܲܡ ܕܝܼـܹܗ؛ ܕܵܐܟܼܝܼ ܕܐܘܼܦ ܡܫܝܼܚܵܐ ܕܥܹܕܬܵܐ* ܣܵܒܵܒ ܕܐܲܚܢܲܢ ܗܲܕܵܡܹ̈ܐ ܝ݇ܘܲܚ ܕܦܲܓܼܪܹܗ؛ ܘܡ̣ܢ ܒܸܣܪܹܗ ܘܡ̣ܢ ܓܲܪ̈ܡܘܼܗܝ* ܩܵܐ ܕܐܵܗܵܐ ܣܵܒܵܒ؛ ܒܹܬ ܫܵܒܸܩ ܓܲܒܼܪܵܐ ܠܒܵܒܹܗ ܘܝܸܡܹܗ؛ ܘܬܲܒܸܥ ܠܒܲܟܼܬܹܗ؛ ܘܗܵܘܝܼ ܬܸܪܘܲܝܗܝ ܚܲܕ݇ ܒܸܣܪܵܐ* ܐܵܗܵܐ ܚܲܕ݇ ܐܵܪܵܙܵܐ ܓܘܼܪܵܐ ܝ݇ܠܹܗ؛ ܐܝܼܢܵܐ ܐܵܢܵܐ ܒܹܐܡܵܪܵܐ ܝ݇ܘܸܢ ܒܘܼܬ ܡܫܝܼܚܵܐ ܘܒܘܼܬ ܥܹܕܬܹܗ* ܐܝܼܢܵܐ ܐܘܼܦ ܐܲܚܬܘܿܢ ܟܠ ܚܲܕ݇ ܡܸܢܵܘܟܼܘܿܢ ܗܲܕܟܼܵܐ ܡܲܚܸܒ ܠܒܲܟܼܬܹܗ ܐܲܝܟܼ ܕܩܵܐ ܓܵܢܹܗ. ܐܝܼܢܵܐ ܒܲܟܼܬܵܐ ܗܵܘܝܵܐ ܒܸܙܕܲܥܝܵܐ ܡ̣ܢ ܓܲܒܼܪܵܗ̇* ܒܢܘܼܢܹ̈ܐ؛ ܡܲܨܝܸܬܬܘܿܢ ܠܒܵܒܵܘܵܬܵܘ̈ܟܼܘܿܢ ܒܡܵܪܲܢ؛ ܣܵܒܵܒ ܐܵܗܵܐ ܝ݇ܠܵܗ̇ ܗܵܩܘܼܬܵܐ* ܘܐܵܗܵܐ ܝ݇ܠܹܗ ܦܘܼܩܕܵܢܵܐ ܩܲܕ݇ܡܵܝܵܐ ܕܦܝܼܫܵܐ ܝܠܹܗ ܦܩܝܼܕܵܐ؛ ܥܲܠ ܐܲܪܥܵܐ* ܐܲܒܼܵܗܹ̈ܐ؛ ܠܵܐ ܡܲܟܪܸܒܝܼܬܘܿܢ ܠܒܢܘܼܢܵܘ̈ܟܼܘܿܢ ܐܸܠܵܐ ܓܲܪܘܸܣܘܿܢ ܠܗ݇ܘܿܢ ܒܡܲܪܕܘܼܬܵܐ ܘܝܘܼܠܦܵܢܵܐ ܕܡܵܪܲܢ* ܪܹ̈ܓܵܘܵܬܹܐ؛ ܡܲܨܝܸܬܬܘܿܢ ܠܡܵܪ̈ܵܘܵܬܵܘܟܼܘܿܢ ܓܵܘ ܕܐܵܗܵܐ ܕܘܼܢܝܹܐ؛ ܘܒܙܕܘܼܥܬܵܐ ܘܪܲܬܪܲܬܵܐ ܘܒܨܹܦܝܘܼܬܵܐ ܕܠܸܒܵܐ ܐܲܝܟܼ ܕܩܵܐ ܡܫܝܼܚܵܐ* ܠܵܐ ܒܡܲܒܝܲܢܬܵܐ ܐܲܝܟܼ ܫܦܲܪܬܵܐ ܠܒܸܢܲܝ̈ܢܵܫܵܐ؛ ܐܸܠܵܐ ܐܲܝܟܼ ܪܹ̈ܓܵܘܵܬܹܐ ܕܡܫܝܼܚܵܐ ܕܥܵܒܼܕܝܼ ܕܸܙܵܝܵܐ ܕܐܲܠܵܗܵܐ* ܘܥܒܼܘܿܕܘܿܢ ܠܗ݇ܘܿܢ ܚܸܠܡܲܬ̇ ܡ̣ܢ ܟܠܵܗ̇ ܓܵܢܵܘܟܼܘܿܢ ܒܚܘܼܒܵܐ؛ ܐܲܝܟܼ ܕܩܵܐ ܡܵܪܲܢ؛ ܘܠܵܐ ܐܲܝܟܼ ܕܩܵܐ ܒܢܲܝ̈ܢܵܫܵܐ* ܟܲܕ ܒܝܼܕܲܥܝܵܐ ܝ݇ܬܘܿܢ ܕܗ̇ܘ ܡܸܢܕܝܼ ܨܦܵܝ ܕܥܵܒܼܸܕ ܚܲܕ݇ ܐ݇ܢܵܫܵܐ؛ ܗ̇ܘ ܒܸܬ ܦܵܐܸܫ ܦܸܪܥܝܵܐ ܡ̣ܢ ܡܵܪܲܢ؛ ܐܸܢ ܪܹܓܵܐ ܘܐܸܢ ܒܲܪ ܚܹܐܪܹܐ* ܐܘܼܦ ܐܲܚܬܘܿܢ ܡܵܪ̈ܵܘܵܬܹܐ؛ ܗܲܕܟܼܵܐ ܗܵܘܝܼܬܘܿܢ ܒܸܥܒܼܵܕܵܐ ܠܪܹ̈ܓܵܘܵܬܵܘܟܼܘܿܢ؛ ܘܫܵܒܼܩܝܼܬܘܿܢ ܠܗ݇ܘܿܢ ܓܢܵܗܵܬܹ̈ܐ؛ ܣܵܒܵܒ ܕܝܵܕܥܝܼܬܘܿܢ ܕܐܘܼܦ ܡܵܪܵܐ ܕܝܼܵܘܟܼܘܿܢ ܝܼܠܹܗ ܓܵܘ ܫܡܲܝܵܐ؛ ܘܚܙܵܝܬܵܐ ܕܦܵܐܬܵܐ ܠܲܝܬ ܠܟܸܣܠܹܗ*
♱♱♱♱♱♱♱♱♱♱♱♱♱♱
ܠܘܩܐ ܐ: 1 ‐ 26
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ
♰ ܒܗ̇ܝ ܕܪܵܒܵܐ ܒܣܝܼܡܠܵܐ ܠܗܘܿܢ ܕܟܲܬܒܼܝܼ ܬܲܫܥܝܼܵܬܹ̈ܐ ܕܦܘܼܠܚܵܢܹ̈ܐ ܐܲܝܢܝܼ ܕܐܲܚܢܲܢ ܒܵܠܵܕ ܝܘܲܚ ܒܝܼܵܝܗܝ: ܐܲܝܟܼ ܡܸܢܕܝܼ ܕܣܘܼܦܹܐܠܗ݇ܘܿܢ ܐܸܠܲܢ ܐܵܢܝܼ ܕܡ̣ܢ ܩܵܕ݇ܡܵܝܬܵܐ ܗ݇ܘܹܐ ܠܗ݇ܘܿܢ ܚܲܙܵܝܹ̈ܐ ܘܡܫܲܡܫܵܢܹ̈ܐ ܕܝܼܵܗ̇ ܕܡܸܠܬܵܐ: ܐܘܿܦ ܐܸܠܝܼ ܦܝܼܫܠܹܗ ܚܸܙܝܵܐ، ܣܵܒܵܒ ܗ݇ܘܹܐ ܠܝܼ ܩܘܼܪܒܵܐ ܒܐ݇ܟܼܵܠܬܵܐ ܕܚܲܡ ܠܟܠܲܝܗܝ. ܕܟܠ ܡܸܢܕܝܼ ܒܛܲܟܼܣܹܗ ܟܲܬܒܼܸܢ ܐܸܠܘܼܟ، ܝܵܐ ܢܲܨܝܼܚܵܐ ܬܹܐܘܿܦܝܼܠܵܐ: ܕܝܲܕܥܸܬ ܫܪܵܪܵܐ ܕܗܹܡܸܙ̈ܡܵܢܹܐ ܕܦܝܼܫܠܘܼܟܼ ܬܘܼܠܡܸܕܵܐ ܐܸܠܲܝܗܝ. ܗ݇ܘܹܐܠܵܗ̇ ܒܝܵܘ̈ܡܵܢܹܐ ܕܗܹܪܘܿܕܸܣ ܡܲܠܟܵܐ ܕܝܼܗ݇ܘܼܕܵܐ: ܚܲܕ݇ ܟܵܗܢܵܐ ܕܫܸܡܹܗ ܝܼܗ݇ܘܵܐ ܙܟܼܲܪܝܵܐ ܡ̣ܢ ܬܸܫܡܸܫܬܵܐ ܕܒܹܝܬ ܐܲܒܼܝܼܵܐ: ܘܒܲܟܼܬܹܗ ܡ̣ܢ ܒܢܵܬܹ̈ܐ ܕܐܲܗܪܘܿܢ: ܫܸܡܵܗ̇ ܝܼܗ݇ܘܵܐ ܐܹܠܝܼܫܒܼܲܥ. ܬܸܪܘܲܝܗܝ ܙܲܕܝܼܩܹ̈ܐ ܝܗ݇ܘܵܘ ܩܵܕ݇ܡ ܐܲܠܵܗܵܐ، ܘܒܸܚܕܵܪܵܐ ܒܟܠܲܝܗܝ ܦܘܼܩܕܵܢܘܼ̈ܗܝ، ܘܒܟܹܐܢܘܼܬܹܗ ܕܡܵܪܝܵܐ ܕܠܵܐ ܠܵܘܡܵܐ: ܐܝܼܢܵܐ ܒܪܘܿܢܵܐ ܠܲܝܬ ܗ݇ܘܵܘ ܠܗ݇ܘܿܢ. ܣܵܒܵܒ ܕܐܹܠܝܼܫܒܼܲܥ ܥܩܲܪܬܵܐ ܗ݇ܘܵܐ. ܘܬܸܪܘܲܝܗܝ ܪܵܒܵܐ ܥܒܼܝܼܪܹܐ ܝܗ݇ܘܵܘ ܒܫܸܢܹ̈ܐ: ܐܝܼܢܵܐ ܗ݇ܘܹܐ ܠܵܗ̇ ܕܟܲܕ ܒܸܥܒܼܵܕܵܐ ܝܗ݇ܘܵܐ ܟܵܗܢܘܼܬܵܐ ܒܛܲܟܼܣܵܐ ܕܬܸܫܡܸܫܬܹܗ ܩܵܕ݇ܡ ܐܲܠܵܗܵܐ: ܒܥܵܕܲܬ ܕܟܵܗܢܘܼܬܵܐ ܡܛܹܐܠܵܗ̇ ܐܸܠܹܗ ܕܡܲܬܝܼܒܼ ܒܸܣܡܹ̈ܐ: ܘܥܒܼܸܝܼܪܹܗ ܠܗܲܝܟܠܹܗ ܕܡܵܪܝܵܐ. ܘܟܠܹܗ ܟܸܢܫܵܐ ܕܥܲܡܵܐ ܡܨܵܠܘܼܝܹܐ ܝܗ݇ܘܵܐ ܠܒܼܲܕܲܪ ܒܥܸܕܵܢܵܐ ܕܒܸܣܡܹ̈ܐ. ܘܦܝܼܫܠܹܗ ܚܸܙܝܵܐ ܠܸܙܟܼܲܪܝܵܐ ܡܲܠܲܐܟܼܵܐ ܕܡܵܪܝܵܐ: ܕܒܸܟܠܵܝܵܐ ܡ̣ܢ ܝܲܡܝܼܢܵܐ ܕܡܲܕܒܚܵܐ ܕܒܸܣ̈ܡܹܐ: ܘܫܓܼܝܼܫܠܹܗ ܙܟܼܲܪܝܵܐ ܟܲܕ ܚܙܹܐܠܹܗ ܐܸܠܹܗ: ܘܙܕܘܿܥܬܵܐ ܢܦܝܼܠܵܗ̇ ܥܲܠܘܼܗܝ. ܘܐ݇ܡܝܼܪܹܗ ܐܸܠܹܗ ܡܲܠܲܐܟܼܵܐ: ܠܵܐ ܙܲܕܥܸܬ ܙܟܼܲܪܝܵܐ: ܣܵܒܵܒ ܕܦܝܼܫܠܵܗ̇ ܫܡܝܼܥܬܵܐ ܨܠܘܿܬܘܼܟܼ: ܘܒܲܟܼܬܘܼܟܼ ܐܹܠܝܼܫܒܼܲܥ ܒܸܕ ܝܲܠܕܵܐ ܒܪܘܿܢܵܐ ܐܸܠܘܼܟܼ: ܘܒܸܕ ܩܵܪܸܬ ܫܸܡܹܗ ܝܘܿܚܲܢܲܢ: ܘܒܸܕ ܗܵܘܝܵܐ ܐܸܠܘܼܟܼ ܚܲܕܘܼܬܵܐ ܘܪܘܵܙܵܐ: ܘܪܵܒܵܐ ܒܸܬ ܚܵܕܝܼ ܒܡܵܘܠܵܕܹܗ: ܣܵܒܵܒ ܒܸܕ ܗܵܘܹܐ ܓܘܼܪܵܐ ܩܵܕ݇ܡ ܡܵܪܝܵܐ: ܘܚܲܡܪܵܐ ܘܫܲܟܼܪܵܐ ܠܹܐ ܫܵܬܹܐ: ܘܒܸܕ ܦܵܐܸܫ ܡܸܠܝܵܐ ܪܘܼܚܵܐ ܕܩܘܼܕܫܵܐ، ܗܵܠܵܐ ܗ̇ܘ ܓܵܘ ܟܲܪ݇ܣܵܐ ܕܝܸܡܹܗ: ܘܪܵܒܵܐ ܡ̣ܢ ܒܢܲܝ̈ ܝܼܤܪܵܝܸܠ ܒܸܕ ܡܲܕܥܸܪ ܠܘܵܬ ܡܵܪܝܵܐ ܐܲܠܵܗܵܝܗܝ: ܘܗ̇ܘ ܒܸܕ ܐܵܙܸܠ ܩܵܕ݇ܡܵܐ ܩܵܕ݇ܡܘܼܗܝ ܒܪܘܼܚܵܐ ܘܒܚܲܝܠܵܐ ܕܐܹܠܝܼܵܐ ܢܒܼܝܼܵܐ: ܕܡܲܕܥܸܪ ܠܸܒܵܐ ܕܐܲܒܼܵܗܹ̈ܐ ܥܲܠ ܒܢ̈ܘܿܢܹܐ: ܘܠܐܲܝܢܝܼ ܕܠܵܐ ܡܲܨܝܸܬܝܼ ܠܝܕܲܥܬܵܐ ܕܟܹܐܢܹ̈ܐ: ܘܒܸܕ ܗܵܕܸܪ ܠܡܵܪܝܵܐ ܥܲܡܵܐ ܓܡܝܼܪܵܐ. ܘܐ݇ܡܝܼܪܹܗ ܙܟܼܲܪܝܵܐ ܠܡܲܠܲܐܟܼܵܐ: ܕܲܐܟܼܝܼ ܒܸܕ ܝܲܕܥܸܢ ܐܵܗܵܐ؟ ܣܵܒܵܒ ܐܵܢܵܐ ܣܵܒܼܵܐ ܝܘܸܢ: ܘܒܲܟܼܬܝܼ ܪܵܒܵܐ ܥܒܼܝܼܪܬܵܐ ܝܠܵܗ̇ ܒܫܸܢܹ̈ܐ: ܘܓ̰ܘܼܘܸܒܠܹܗ ܡܲܠܲܐܟܼܵܐ ܘܐ݇ܡܝܼܪܹܗ ܐܸܠܹܗ: ܐܵܢܵܐ ܝܑܼܘܸܢ ܓܲܒܼܪܝܼܹܠ ܕܟܹܐ ܟܵܠܸܢ ܩܵܕ݇ܡ ܐܲܠܵܗܵܐ: ܘܦܝܼܫܠܝܼ ܫܘܼܕܪܵܐ ܕܗܲܡܙܸܡܸܢ ܥܲܡܘܼܟܼ ܘܡܲܫܚܸܕܸܢܘܼܟܼ ܐܲܢܹܐ. ܡ̣ܢ ܐܵܕܝܼܵܐ ܒܸܕ ܗܵܘܸܬ ܫܬܝܼܩܵܐ ܘܠܹܐ ܡܵܨܸܬ ܠܡܗܲܡܙܘܼܡܹܐ: ܗܲܠ ܝܵܘܡܵܐ ܕܐܲܢܹܐ ܗܵܘܝܼ. ܥܲܠ ܕܠܵܐ ܗܘܼܡܸܢܘܼܟܼ ܠܗܹܡܸܙ̈ܡܵܢܝܼ ܐܲܢܹܐ ܕܒܸܕ ܦܲܝܫܝܼ ܬܘܼܡܸܡܹܐ ܒܙܲܒܼܢܲܝܗܝ. ܐܝܼܢܵܐ ܥܲܡܵܐ ܟܸܠܝܵܐ ܝܗ݇ܘܵܐ ܘܒܸܤܦܵܪܵܐ ܠܙܟܼܲܪܝܵܐ: ܘܥܲܓ̰ܒܝܼ ܗ݇ܘܵܘ ܥܲܠ ܥܲܪܩܲܠܬܹܗ ܕܓܵܘ ܗܲܝܟܠܵܐ. ܐܝܼܢܵܐ ܟܲܕ ܦܠܝܼܛܠܹܗ ܙܟܼܲܪܝܵܐ: ܠܵܐ ܡܵܨܹܐ ܗ݇ܘܵܐ ܕܗܲܡܙܸܡ ܗ݇ܘܵܐ ܥܲܡܲܝܗܝ: ܘܦܘܼܪܡܹܐ ܠܗ݇ܘܿܢ ܕܚܸܙܘܵܐ ܚܙܹܐܠܹܗ ܓܵܘ ܗܲܝܟܠܵܐ: ܘܗ̇ܘ ܪܡܵܙܵܐ ܪܵܡܸܙ ܗ݇ܘܵܐ ܐܸܠܲܝܗܝ: ܘܦܝܼܫܠܹܗ ܠܲܥܠܵܐ. ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܬܸܫܡܸܫܬܹܗ، ܐ݇ܙܝܼܠܹܗ ܠܒܲܝܬܹܗ: ܘܗ݇ܘܹܐ ܠܵܗ̇ ܡ̣ܢ ܒܵܬ݇ܪ ܐܵܢܝܼ ܝܵܘܡܵܢܹ̈ܐ ܒܛܝܼܢܵܗ̇ ܐܹܠܝܼܫܒܼܲܥ ܒܲܟܼܬܹܗ: ܘܛܲܫܝܵܐ ܗ݇ܘܵܐ ܠܵܗ̇ ܓܵܢܘܼܗ̇ ܚܲܡܫܵܐ ܝܲܪ̈ܚܹܐ: ܘܐܲܡܪܵܐ ܗ݇ܘܵܐ: ܕܐܲܢܹܐ ܥܒܼܝܼܕܠܹܗ ܡܵܪܝܵܐ ܐܸܠܝܼ ܒܝܵܘܡܵܢܹ̈ܐ ܕܚܝܼܪܹܗ ܒܝܼܝܼ: ܠܸܫܩܵܠܵܐ ܠܵܘܡܝܼ ܕܒܹܝܬ ܒܢܲܝ̈ܢܵܫܵܐ.
♱♱♱♱♱♱♱♱♱♱♱♱♱♱